Kota maître ti e afa ye na e na yâ ti gigi ti e kue

TAPANDE TI BABÂ NA MAMA TI MBI

Na hunzingo ti angu 1950, babâ na mama ti mbi aquitté Italie ala gue na Kindersley so ayeke na Saskatchewan, na Canada. Kete na pekoni, ala manda tâ tënë na aga ye so ayeke kota mingi na yâ ti fini ti e. Mbi dabe ti mbi so na ngoi so mbi de kete, e na sewa e yeke fa tënë na yâ ti ambeni lango al’heure mingi, tongaso na ambeni ngoi mbi yeke tene tënë ti ngia mbi tene mbi “sara kua ti pionnier auxiliaire” na ngu 8.

Babâ na mama ti mbi ayeke lani awayere, me ala zia nzoni tapande na e na ndö ti sarango asacrifice ndali ti Jéhovah. Na tapande, na ngu 1963, ala kä gbâ ti aye ti ala ti wara nginza ti gue na assemblée internationale na Pasadena so ayeke na Californie, na États-Unis. Na ngu 1972, e voyagé kilomètre 1000 tongaso e gue na Trail so ayeke na Colombie-Britannique, na Canada, ti fa tënë na azo so atene Italien. Babâ ti mbi ayeke nettoyé mbeni kota da nga lo yeke bâ lani lege ni. Lo ke akua so apeut ti ga na lo gbâ ti nginza tongaso si lo peut ti zia li ti lo na ndö ti kua ti Jéhovah.

Mbi kiri singila mingi ndali ti tapande so babâ na mama ti mbi azia na mbi nga na aita ti mbi ota. Tapande ti ala ayeke tongo nda ti fango na mbi kua ti Jéhovah. Ala fa na mbi mbeni ye so mbi girisa ni ape na yâ ti gigi ti mbi kue: Tongana mbi gi Royaume kozo, Jéhovah ayeke bâ lege ti mbi.—Mat. 6:33.

MBI KOMANSE KUA TI NGOI KUE

Na ngu 1980, mbi na Debbie, mbeni pendere ita-wali so aye kua ti Jéhovah mingi, e sara mariage. E ye lani ti sara kua ti ngoi kue, tongaso Debbie aga pionnier nze ota na peko ti mariage ti e. Ngu oko na peko ti mariage ti e, e gue ti mû maboko na mbeni kete congrégation so bezoin ayeke dä, na mbi kue mbi ga pionnier.

A si na mbeni ngoi, e découragé na e mû desizion ti quitté. Kozoni, e sara tënë ni na surveillant ti circonscription. Lo tene na e na nzoni bê nga polele, lo tene: “Ala la asara si gigi akpengba na ala. Li ti ala ayeke gï na ndö ti akpale so ala wara. Me tongana ala gi ti bâ anzoni ye, ala yeke wara ni.” A yeke tâ gï wango so e bezoin ni lani (Ps. 141:5). Hio e sara ye alingbi na wango ni na kete na pekoni e ga ti bâ so, ti vrai ni, anzoni ye mingi ayeke dä. Aita mingi na yâ ti congrégation aye lani ti sara kua ti Jéhovah mingi, même amaseka nga na ambeni so koli wala wali ti ala ayeke Témoin ape. So ayeke mbeni kpengba ye ti manda la. E manda ti bâ anzoni ye nga ti ku ti tene Jéhovah aleke akpale so e yeke na ni lani (Mi. 7:7). E kiri e duti na ngia nga aye aga nzoni.

Aita so afa lani ye na ngoi ti kozo ekole ti apionnier so e sara asara na Jéhovah lani na akodro-wande. Ala fa na e afoto nga ala sara tënë ti akpale nga na atufa so ala wara kâ, ye so asara si e sara nzara ti sara kua ti missionnaire. Tongaso, e mû desizion ti gi ti ga amissionnaire.

Ti si na ye so e gi ti sara, na ngu 1984 e gue na Québec, so ayo kilomètre 4000 na Colombie-Britannique, so azo atene Français dä. Kâ, e doit lani ti sara ye alingbi na ngobo ti fini ndo ni nga ti manda mbeni fini yanga ti kodro. Mbeni kpale so e wara ayeke so fani mingi e yeke na nginza mingi ape. Teti mbeni ngoi, e doit lani ti te gï pomme de terre so mbeni zo ti fango yaka ayeda ti tene e gue e zi ni. Debbie amanda ti tö ni na afason nde nde. Atâa akpale so e wara, e sara kue ti gbu ngangu nga ti bata ngia ti e. Na ndö ni, e bâ so Jéhovah ayeke bâ lege ti e lani.—Ps. 64:10.

Mbeni lâ, e wara mbeni appel so e ku terê ti e na ni ape. A tisa e ti sara kua na Béthel ti Canada. E sara lani demande ti Ekole ti Galaad, tongaso atâa so e yeke na ngia so a tisa e, vundu asara e nga. Me e yeda na tisango ndo ni. Tongana e si kâ awe, e hunda Ita Kenneth Little, so ayeke lani membre ti Komite ti filiale, e tene: “Ka demande ti e ti Ekole ti Galaad tongana nyen?” Lo tene: “E yeke bâ lege ni ande tongana a tisa ala.”

Yenga oko na pekoni, a tisa mbi na Debbie ti gue na Ekole ti Galaad. Tongaso e yeke lani na mbeni desizion ti mû. Ita Little atene na e: “Atâa nyen la ala soro ti sara, na ambeni lango ala peut ti pensé atene ala hinga lani, ala soro fade mbeni ye ni so. Mbeni ye ni ayeke nzoni ahon mbeni ape; Jéhovah apeut ti sara tufa na ndö ni use kue.” E soro lani ti sara Ekole ti Galaad na tongana angu ayeke hon, e bâ so atënë ti Ita Little ayeke tâ tënë. Fani mingi, e tene atënë ti lo ni so na aita so adoit ti soro kua ti Jéhovah so a ye ti mû na ala.

GIGI TI E TI MISSIONNAIRE

Terê ti e anzere lani ti duti na popo ti a-élève 24 ti klase 83 ti Ekole ti Galaad so a sara ni lani na Brooklyn, na New York, na avril 1987. Mingi ni, Ita Ulysses Glass nga na Ita Jack Redford la afa lani ye na ngoi ti ekole ni. Nze oku ti ekole ni ahon hio mingi na e wara diplôme ti e na lango 6 ti septembre 1987. A tokua e na Haïti, e na John na Marie Goode.

Na ngu 1962 a tomba andangba missionnaire so ayeke lani kâ. Ngbene ye na ngoi ni so, a tokua amissionnaire na Haïti ape. Yenga ota na peko ti so e wara diplôme ti e, e si na Haïti, a tokua e na yâ ti mbeni kete congrégation so awafango tënë 35 ayeke dä. A yeke na yâ ti ahoto na mbeni ndo so ayo. E yeke lani maseka, e hinga ye mingi ape nga gï e la e yeke na yâ ti da ti missionnaire. Azo ni ayeke awayere na mingi ti ala ahinga ti diko mbeti ape. Na ngoi so e yeke kâ, e bâ bira so a sara na yâ ti kodro ni, azo aye ti mû kodro na ngangu, azo azö aye ti kanga lege nga na akota pupu so abuba ndo.

E manda aye mingi na lege ti aita ti e ti Haïti so ahinga ti kanga bê ngangu na ala ngbâ ti duti na ngia. Gigi akpengba na mingi ti ala, me ala ye Jéhovah nga na fango tënë. Mbeni ita-wali so ayeke mbakoro ahinga mbeti ape, me lo hinga aversê nduru na 150 na li. Akpale so e wara kâ asara si e ye même mingi ti fa na azo so gï Royaume ti Nzapa la ayeke leke akpale ti azo. A nzere na e mingi ti bâ so ambeni kozo zo so e manda Bible na ala aga apionnier permanent, apionnier spécial nga a-ancien.

Na ngoi so e yeke na Haïti, mbi wara terê na Trevor, mbeni missionnaire ti aMormon so ade maseka na e sara lisoro na ndö ti Bible fani mingi. Angu mingi na pekoni, mbi wara lettre ti lo so mbi ku terê ti mbi na ni ape. Lo tene: “Mbi yeke wara batême na kota bungbi so ayeke ga. Mbi ye ti kiri na Haïti ti ga pionnier spécial na oko ndo so mbi yeke lani missionnaire ti aMormon dä.” Na a yeke ye so lo na wali ti lo asara teti angu mingi.

NA EUROPE, NA PEKONI NA AFRIKA

A tokua e na mbage ti Europe so a yeke ngangu encore ape ti fa tënë kâ. Na ngu 1992, e si na Ljubljana, na Slovénie, nduru na ndo so babâ na mama ti mbi akono dä kozo ti tene ala gue na Italie. Bira angbâ ti kporo lani na ando na yâ ti ngbene Yougoslavie. Filiale so ayeke na Vienne, na Autriche nga na abureau so ayeke na Zagreb so ayeke na Croatie nga na Belgrade so ayeke na Serbie la ayeke bâ ndo na ndö ti kua ti fango tënë na Europe de l’est. A leke lani ti tene kodro ni oko oko awara Béthel ti lo wani.

Tongaso e doit lani ti sara ye alingbi na ngobo ti ndo ni nga ti manda mbeni yanga ti kodro. Azo ti ndo ni ayeke tene ka “Jezik je težek,” so aye ti tene “Yanga ti kodro ni akpengba.” Na a kpengba biani! E ne aita so ayeke lani nduru ti yeda na achangement kue so bungbi ti Jéhovah asara na e bâ tongana nyen la Jéhovah asara tufa na ndö ti ala. Ge encore, e bâ so Jéhovah ayeke leke akpale nga lo yeke sara ni na tâ ngoi ni. E manda aye mingi na Slovénie na aye so e manda kozo a-aidé e ti gbu ngangu na yâ ti akpale so e wara.

Me gbâ ti achangement angbâ na devant. Na ngu 2000 a tokua e na Côte d’Ivoire, na Afrique de l’ouest. Na pekoni na novembre 2002, e kpe e gue na Sierra Leone ndali ti bira so ayeke na yâ ti kodro ni. Mbeni bira ti ngu 11 alondo ti hunzi kâ. A yeke lani ngangu ti quitté Côte d’Ivoire gï hio tongaso. Me aye so e manda a-aidé e ti ngbâ ti duti na ngia.

E zia li ti e na ndö ti gbâ ti azo so aye ti hinga tâ tënë nga na aita ti e so aye e na so agbu ngangu angu mingi na yâ ti bira. Ala yeke awayere me ala ye ti kangbi ye so ala yeke na ni. Mbeni ita-wali aye ti mû ambeni bongo na Debbie. Na ngoi so lo bâ so Debbie aye ti ke, lo kue lo ke, lo tene: “Na ngoi ti bira ni, aita ti ambeni kodro amû maboko na e. Fadeso a yeke tour ti e ti aidé ala.” E leke na bê ti e ti sara ye tongana ala.

A si na mbeni ngoi, e kiri na Côte d’Ivoire, me azo akiri akomanse ti sara aye ti ngangu na amba ti ala. Tongaso, na novembre 2004, e monté hélicoptère e hon, valise ti e oko oko ane gï kilo 10. Na bï ni, e lango na sese na camp ti aturugu ti France, na lango ti peko e mû avion e gue na Suisse. Na ngoi so e si na Béthel na minuit, aita ti Komite ti filiale nga na aita so ayeke fa ye na Ekole ti formation ministérielle nga na awali ti ala ayamba e, ala gbu e na maboko ti ala, ala mû na e kobe nga na gbâ ti chocolat ti Suisse. A ndu lani bê ti e mingi.

A tokua e na Ghana teti mbeni kete ngoi na pekoni na e kiri na Côte d’Ivoire na peko ti so bira ni akaï. So aita asara ye na e na nzoni bê a-aidé e ti gbu ngangu na ngoi so e yeke kpe nga na ngoi so a tokua e na akodro nde nde. Atâa so mbi na Debbie e hinga so na yâ ti bungbi ti Jéhovah aita aye terê mingi, e ye ti bâ ni lâ oko ape tongana senge ye. Ti vrai ni, même angoi ti ngangu so e vivre ni amû lege na e ti manda akpengba ye.

A TOKUA E NA MOYEN-ORIENT

Na ngu 2006, e wara lettre so alondo na kota ndokua ti e atene na e so a mû na e mbeni fini kua na Moyen-Orient. Kâ, e kiri e vivre afini ye, e wara afini kpale, e manda afini yanga ti kodro nga na afini ngobo. Aye ti manda ayeke lani mingi na ndo so tënë ti poroso nga na ti vorongo nzapa agbu bê ti azo ngangu. A nzere na e so aita ti yâ ti acongrégation atene ayanga ti kodro nde nde nga e bâ so e yeke beoko ndali ti so e sara ye alingbi na fango lege ti bungbi ti Jéhovah. E ne aita ndali ti so sân mbeto, mingi ti ala agbu ngangu na gbele kangango lege ti afami ti ala, amba ti ala ti ekole, ti place ti kua nga na ti avoizin ti ala.

E gue na kota bungbi so ayeke nde so a sara na ngu 2012 na Tel Aviv, na Israël. Kota bungbi so la ayeke kozo ngoi so awakua ti Jéhovah ti kâ abungbi gbani tongaso depuis Pentecôte ti ngu 33. A yeke lani mbeni pendere ngoi so e peut ti girisa ni ape.

Na yâ ti angu so, a tokua e ti sara vizite na yâ ti mbeni kodro so a kanga lege na kua ti e dä. E gue na ambeni mbeti ti e, e fa tënë nga e sara akota bungbi so azo abungbi mingi ape. Aturugu so ayeke na angombe nga na abarrière ayeke na ndo kue, me so e na kete wungo ti awafango tënë e sara ye na hange na ngoi so e yeke gue na ando nde nde, e bâ so sioni ye ayeke si na e ape.

E KIRI NA AFRIKA

Na ngu 2013, a mû na e mbeni kua so ayeke nde mingi: a tokua e ti sara kua na Béthel ti Kinshasa, na Congo, mbeni kota kodro so ayeke pendere mingi me so yere nga na bira ayeke mingi. Na tongo nda ni, e tene: “E hinga Afrika, e yeke nduru awe.” Me a ngbâ lani na e aye mingi ti manda mbilimbili na ndö ti sarango voyage na ndö ti asioni lege. E wara anzoni ye ti zia li ti e dä, na tapande aita ayeke gbu ngangu nga ala yeke na ngia atâa kpale ti nginza, ala ye fango tënë nga ala sara effort ti gue na abungbi nga na akota bungbi. E wani e bâ tongana nyen la kua ti Royaume ague na li ni grâce na mungo maboko ti Jéhovah nga na tufa ti lo. Angu mingi so e sara na Congo afa na e akpengba ye ti manda nga e wara akamarade mingi so ayeke tongana afami ti e.

Na hunzingo ti ngu 2017, a tokua e na Afrique du Sud. A yeke mbeni Béthel so akono ahon aBéthel kue so e sara kua dä nga même kua ti e kâ ayeke fini ni na e. Ge nga kue gbâ ti aye ti manda ayeke dä, me aye so e manda kozo a-aidé e. E ye mingi aita so angbâ ti gbu ngangu na yâ ti angu mingi. Nga bê ti e apika mingi ti bâ sewa ti Béthel so ayeke sara kua place oko atâa so poro ti terê ti ala nga na angobo ti ala ayeke nde nde. A yeke polele so Jéhovah asara tufa na ndö ti azo ti lo na mungo na ala siriri ndali ti so ala yü fini zo nga ala sara ye alingbi na amama-ndia ti Bible.

Na yâ ti angu so ahon, a mû na Debbie apendere kua, e sara changement alingbi na angobo ti ando nde nde nga e manda afini yanga ti kodro. A yeke lakue kete ye ape, me e bâ lakue tâ ndoye ti Jéhovah na lege ti bungbi ti lo nga ti sewa ti aita (Ps. 144:2). Gbâ ti ye so e manda na yâ ti kua ti ngoi kue asara si e ga anzoni wakua ti Jéhovah.

Mbi kiri singila mingi na babâ na mama ti mbi ndali ti aye so ala fa na mbi, na mungo maboko ti Debbie, wali ti mbi so mbi ye lo mingi nga na apendere tapande so sewa ti aita ti dunia kue azia. Na ngoi so e yeke gbu li na ndö ti aye so angbâ ti ku e na devant, e leke na bê ti e ti ngbâ ti manda aye so Kota maître ti e ayeke fa na e.