Ngbanga ti nyen la bira nga na sarango ye ti ngangu na zo angbâ lakue?

SIOKPARI

Nzapa acréé kozo babâ na mama ti e, Adam na Ève, na image ti lo (Genèse 1: 27). So ti tene so ala peut ti duti na asarango ye so Nzapa ayeke na ni, na tapande siriri nga na ndoye (1 aCorinthien 14:33; 1 Jean 4:8). Me, Adam na Ève ake lani yanga ti Nzapa na ala sara siokpari. Ye ti peko ni ayeke so, siokpari ayeke na terê ti e nga e yeke kui (aRomain 5:12). So e yeke na siokpari na terê ti e, a yeke pusu e ti wara asioni pensé nga ti sara aye ti sioni.—Genèse 6:5; Marc 7:​21, 22.

GOUVERNEMENT TI AZO

Nzapa acréé e ti tene e wani la e komande terê ti e ape. Bible atene: “Zo so ayeke tambela, a yeke même na lo wani ti fa lege na gere ti lo pëpe.” (Jérémie 10:23). Ndani la gouvernement ti azo apeut ape ti hunzi bira nga na sarango ye ti ngangu na zo biani biani.

SATAN NGA NA ASIONI YINGO TI LO

Bible afa so “dunia so kue ayeke na gbe ti Zo ti sioni.” (1 Jean 5:19). “Zo ti sioni” ni so ayeke Satan Zabolo, nga lo yeke sioni zo ti fango zo (Jean 8:44). Lo na asioni yingo ti lo ayeke pusu azo ti sara bira nga ti sara ye ti ngangu na zo.—Apocalypse 12:​9, 12.