Tongana nyen la bira nga na sarango ye ti ngangu na zo ayeke hunzi ande?

NZAPA AYEKE FUTI ANDE AGOUVERNEMENT TI AZO

Nzapa ayeke futi ande agouvernement ti azo na lege ti mbeni bira so Bible airi ni Harmaguédona (Apocalypse 16:16). Na ngoi ni so, “agbia ti sese kue so azo ayeke dä” ayeke bungbi oko ndali ti “bira ti kota lâ ti Nzapa, Lo so ngangu ti lo ahon angangu kue.” (Apocalypse 16:14). Harmaguédon ayeke bira ti Nzapa so ayeke hunzi ande abira kue so ayeke na ndö ti sese.

Royaume ti Nzapa wala gouvernement ti lo ayeke mû ande place ti agouvernement ti azo, na a yeke komande ande na yayu nga a yeke futi ni lâ oko ape (Daniel 2:44). Nzapa asoro Molenge ti lo, Jésus Christ, ti duti Gbia ti Royaume ni (Ésaïe 9:​6, 7; Matthieu 28:18). Gouvernement ni so ayeke Royaumeb so Jésus afa lani na adisciple ti lo ti sambela ndali ni (Matthieu 6:​9, 10). Azo kue ayeke duti ande beoko na gbe ti gouvernement so Jésus la ayeke Gbia ni.

Nde na komandema ti azo, Jésus ayeke sara ande kua na ngangu so lo yeke na ni ndali ti aye so agbu bê ti lo ape. Ndali ti so Jésus ayeke sara ande ye na lege ni nga lo yeke sara kangbi na popo ti azo ape, ye so asara si zo oko apeut ti gi bê ti lo ape ndali ti tënë ti mara, ti kodro wala ndo so zo ni alondo dä (Ésaïe 11:​3, 4). Nga, azo abezoin ande ape ti sara grève ndali ti tënë ti injustice. Ngbanga ti nyen? A yeke ndali ti so tënë ti nzoni duti ti azo ayeke gbu ande bê ti Jésus mingi. “Lo yeke zi awayere so atoto ti tene a mû maboko na ala, nga na zo ti mawa na zo kue so zo ti mungo maboko na lo ayeke dä pëpe. . . . Lo yeke zi ala na yâ ti pasi nga na yâ ti ye ti ngangu so a yeke sara na ala”.—Psaume 72:​12-14.

Royaume ti Nzapa ayeke zi ande aye ti bira kue so ayeke fâ azo na ndö ti sese (Michée 4:3). A yeke futi ande azo ti sioni kue so aye bira wala so aye ti duti na siriri na amba ti ala ape (Psaume 37:​9, 10). Azo kue, akoli, awali nga na amolenge, a yeke duti ande nzoni na ndo kue so ala yeke gue dä na ndö ti sese.—Ézéchiel 34:28.

Na ngoi so gouvernement ti Nzapa ayeke komande ande na ndö ti sese, azo kue ayeke duti ande nzoni. Gouvernement ti Nzapa ayeke zi ande aye kue so ayeke na gunda ti akpale ti azo, na tapande, bira, yere, nzara nga na kpale ti warango ndo ti lango. Zo kue ayeke wara ande anzoni kobe ti tengo ni nga na mbeni nzoni ndo ti lango.— Psaume 72:16; Ésaïe 65:​21-23.

Na gbe ti Royaume ti Nzapa, aye ti sioni kue so bira aga na ni ayeke duti ande dä ape. Ye so andu akä so azo awara nga na akpale ti kobela ti li so azo abâ pasi na ni na ngoi ti abira. Même azo so akui, a yeke zingo ande ala na kuâ ti kiri ti wara fini na ndö ti sese (Ésaïe 25:8; 26:19; 35:​5, 6). Asewa ayeke kiri ande ti duti beoko nga ala yeke dabe ti ala encore ape na aye ti sioni so asi ândö ndali ti so “angbene ye ni ahon ti ala awe.”—Apocalypse 21:4.

NZAPA AYEKE ZI ANDE SIOKPARI

Na ngoi so Royaume ti Nzapa ayeke komande ande na ndö ti sese, azo kue ayeke voro ande gï oko tâ Nzapa, Jéhovahc, so ayeke “Nzapa ti ndoye nga na ti siriri”. (2 aCorinthien 13:11). Azo ayeke manda ande ti duti na siriri na amba ti ala (Ésaïe 2:​3, 4; 11:9). Azo kue so ayeke mä yanga ti Nzapa ayeke ga ande mbilimbili-kue.—aRomain 8:​20, 21.

NZAPA AYEKE FUTI ANDE SATAN NGA NA ASIONI YINGO TI LO

Royaume ti Nzapa ayeke futi ande azo so ayeke pusu azo ti sara bira, so ti tene, Satan na asioni yingo ti lo (Apocalypse 20:​1-3, 10). So ala yeke handa ande azo encore ape, “siriri ayeke duti dä mingi”.—Psaume 72:7.

Mo peut ti duti sûr so zendo so Nzapa amû ti hunzi bira nga na sarango ye ti ngangu na zo ayeke ga ande tâ tënë. Lo yeke na ngangu nga na nzara ti hunzi bira.

• Nzapa ayeke na ndara nga na ngangu ti hunzi bira nga na sarango ye ti ngangu na zo (Job 9:4). Mbeni ye so lo pensé ti sara si akara lo ayeke dä pëpe.—Job 42:2.

• Nzapa aye ti tene azo abâ pasi ape (Ésaïe 63:9). Lo ke nga “zo kue so aye sarango ye ti ngangu na zo.”—Psaume 11:5.

• Nzapa ayeke sara ye lakue alingbi na tënë ti yanga ti lo; lo peut ti tene mvene ape.—Ésaïe 55:​10, 11; Tite 1:2.