April

Yesu nipadua ne ye mogya bɔ ɔfa bɔle afɔleɛ ne, sɛ yɛkɔhora yekonya so mvasoɛ a, sana yenya ye wue nanu gyidie.. (Ɛfe. 1:7) Awurade Nɔsoa Aleɛ dwumadie bɔ bɛyɛ ye afoɛnoa biala ne, sɛ bɛbɔ Yesu hane kyɛ bɛte “mmoaen foforɛ” ne kɔ bie a, benni paanoo ne, na bɛnno nzaa ne bie; ɔnzɛkyɛ bɛyɛ sɔ po. (Yoh. 10:16) Nakoso, Yesu Kristo nipadua ne ye mogya bɔ ɔfa bɔle afɔleɛ ne, benya so mvasoɛ. Sɛ benya gyidie kyɛ sɔ afɔleɛ bɔ ɔbɔle ne kɔhora kole bɛ ngoa a, yeɛ ɔkɔmaa bekonya sɔ mvasoɛ ne ɔ. (Yoh. 6:53) Bɛbɔ odikyɛ bedi paanoo ne, na bɛno nzaa ne bie ne de, bɛboka apam foforɛ naso, na bɛne Yesu koli hene wɔ ye Ahennie nanu. Yeti sɛ yɛboka bɛbɔ bapopa bɛ naso oo, sɛ yɛboka mmoaen foforɛ naso oo, odikyɛ yenya Yesu wue nanu gyidie na wamaa yanya daa ngoa. w24. 12 13 ¶14, 16

Awurade Nɔsoa Aleɛ nabo ne, Yesu fale paanoo kabrɛdi mane ye asomafoɛ nemɔ, na ɔhane kyɛ ogyi berɛ ma ye nwonaen. Afei ɔfale nzaa ne mane bɛ, na ɔhane kyɛ ogyi berɛ ma ‘apam foforɛ nanwo mogya’ ne. (Mak. 14:​22-25; Luka 22:20; 1 Kor. 11:24) Apam foforɛ ne, ɔte “[sunzum nu] Yisrael awuro ama” bɔ bɛne Yesu koli bia wɔ anwuro ne yeɛ bɛwɔ nu ɔ. (Heb. 8:​6, 10; 9:15) Awurade Nɔsoa Aleɛ nabo ne, ne Yesu dwudwo kyire ‘kue kaamba’ ne. Ye asomafoɛ bɔ bedi nahorɛ bɔ ne bɛboka ye so wɔ sɔ sua nanu ne, bɛ yeɛ belimoa wɔ sɔ kue nanu ɔ. Bɛ yeɛ bɛne Yesu kooli bia wɔ anwuro ne. w24. 12 11 ¶9-10

Yesu damvo bie yele ye mane maa bɛhyele ye. Mmerɛ bɔ bedi ye dwirɛ ne, bɛpepɛle ye nzoaa, bɛpɛle edwirɛ bɛtole ye so, bɛyɛle ye ayayadeɛ, na bebuale ye kumfɔ. Sogyafoɛ nemɔ fale ye hɔle, na bɛɛbɔle ye asɛnnua nu. Yesu fale ɛyealɛ nu, koso ɔhora gyinane nu. Nakoso ebie wɔ berɛ bɔ edwirɛ ne hɔle yenwo paa ɔ. Ye yeɛ ole Yehowa yɛ Nyameɛ ne. Né ole tumi bɔ ɔkɔfa kɔbɔ Yesu nwo waen, nakoso wanyɛ sɔ. Nzuati ɔ? Ɔnate ɔdɔ bɔ ole ma yɛ nati ɔ. Yesu ngoa bɔ ɔfa bɔle afɔleɛ ne, ɔte adanzeɛ turoloo bɔ okyire kyɛ Yehowa kuro yɛ dwirɛ paa. Nwu ye kyɛ Yehowa kuro wɔ dwirɛ paa, ofikyɛ ɔnate wɔ ti, nea ɛyealɛ bɔ ɔfale nu kyɛbɔ ɔkɔyɛ a, okole wɔ kofi bɔne ne ewue nu ɔ! (1 Yoh. 4:​9, 10) Ɛhe maa yenwu ye kyɛ, Yehowa pena kyɛ ɔboka yenu biala maa yɛkõ yetia bɔne, na yedi so ngunim. w24. 08 6 ¶13-14

Sɛ yesusu ɛyealɛ bɔ Yehowa fale nu kora yeɛ ɔmaa Yesu wu nanwo a, ɔkɔmaa yekonwu ye kyɛ okuro yɛ dwirɛ paa. Satan nwa bɛbɔ bɛsõ Nyameɛ ne, sɛ bɛ́fa ɛyealɛ nu a, benu biala nne berɛ bɔ ɔkɔhɔso koli nahorɛ ɔ. Yesɔ nati, Yehowa mane atee maa Yesu nwuni amaneɛ kora yeɛ owu ɔ, kyɛbɔ ɔkɔyɛ a, ebiala konwu kyɛ Satan te ngondomboniɛ ɔ. (Yob 2:​1-5) Mmerɛ bɔ né mmenia goro Yesu nwo, sogyafoɛ nemɔ bo ye, ná bɛbɔ ye asɛnnua nu mukoraati ne, né Yehowa nye tua. Afei mmerɛ bɔ né Ɔwa bɔ okuro ye dwirɛ ne wu ewue yeayea ne, onwuni ye mukoraati. (Mat. 27:​28-31, 39) Yehowa le tumi bɔ ahaa ɔkɔhora kɔfa kosi ɛhemɔ noa ɔ. (Mat. 27:​42, 43) Nakoso sɛ ɔyɛle sɔ a, ahaa Yesu ngɔhora ngɔfa ye ngoa ngɔbɔ afɔleɛ ngole yɛ. Yeti ahaa yelle anyelasoɛ biala. Ɛhene ati yeɛ Yehowa mane atee maa Ɔwa ne nwuni amaneɛ koraka yeɛ owu ne. w25. 01 22 ¶7

NISAN kyẽa bɔ ɔtɔ so 16, afoɛ 33 Y.A (Yɛ Aberɛ So) ne, né Yesu asuafoɛ nemɔ wora abɔ paa, na né esuronyi koso ahã bɛ. Benu nyɔ fili Yerusalem fale bɛnye hyirele Emawoso. Biaa bie ɔɔtole bɛ wɔ atee so, na ɔne bɛ bɔle nu hɔle. Edwirɛ bɔ ɔyɛ yea bɔ né wato Yesu ne, asuafoɛ nemɔ bɔle ye amaneɛ. Afei biaa ne hane edwirɛ bie bɔ né bɛwora ngofi ye lle ɔ. Kyɛbɔ né odikyɛ Mɛsaya ne nwu amaneɛ na owu ne, “ɔhyɛle ye bo fili Mose ne ngɔmhyɛlɛfoɛ ne amukoraa so” hane yenwo dwirɛ hyirele bɛ. Beedwuli Emawoso ne, mmrienzua nyɔ nemɔ nwuni kyɛ sãa Yesu bɔ batingye ye ne, yeɛ waye yenwo ali wahyire bɛ ne. (Luka 24:​13-35) Eleburanna bɔ Yesu lili ye wɔ aseɛ so kora yeɛ ɔkɔ anwuro ne, ɔyele yenwo ali hyirele ye asuafoɛ nemɔ mmerɛ pee. Sɔ mmerɛ ne, né bɛ wora abɔ paa, na ne esuronyi ahã bɛ, yeti Yesu hyɛle bɛ ngunaen. Ɛhene maa bɛnye gyele, na benyane akokoduro bɔ bɛkɔfa bɛkɔhã Ahennie nanwo dwirɛ ne ɔ. w24. 10 12 ¶1-3

Sɛ bɛwo akwalaa bie a, kyɛbɔ ɔte biala okonyi kɔɔyɛ panyi. Nakoso, sɛ ebie kɔhora kɔɔyɛ Kristoniɛ bɔ wanyi wɔ sunzum nu a, ɛhene de ɔtte sɔ. Sɛ yɛnea Korintofoɛ nemɔ sɔaa, benu biemɔ tiele nzɛmba ne, bɛbɔle asu, na benyane honhom krongron akyɛdeɛ ne bie. Afei koso, nningyein bɔ somafoɛ Pɔɔlo hyirehyirele bɛ ne, benyane mvasoɛ pee befili so. (Aso. 18:​8-11) Nakoso bɛbɔle asu afoɛ pee sĩ ne, né benu biemɔ té te mmenia bɔ bennyini wɔ sunzum nu ɔ. (1 Kor. 3:2) Sɛ yɛkɔhora yɛkɔyɛ Kristoniɛ bɔ wanyi wɔ sunzum nu a, sana yetu yenwo agyirɛ. Bɛbɔ bɛ “adwene te nganga,” bɔ bɛmbena kyɛ benyi wɔ sunzum nu ne, ɔkɔhora kɔyɛ se kɔma bɛ kyɛ bekonya ngɔsoɛ wɔ asafo nanu ɔ. (Any. 1:22) Yɛmbena kyɛ yɛyɛ kyɛ mmenia bɔ banyi, nakoso daa bɛpena kyɛ bɛ maame anaa bɛ baba kyire bɛ bɔ odikyɛ bɛyɛ ɔ. Mmom odikyɛ yɛbɔbɔ yɛyere yɛnwo kyɛ, yɛkɔhɔ so yekonya gyidie bɔ enu yɛ se wɔ Yehowa nu. Sɛ ɛpena kyɛ ɛbayɛ Kristoniɛ bɔ wanyi wɔ sunzum nu a, srɛ Yehowa ma ɔboka wɔ, ofikyɛ ye yeɛ ɔmaa ‘yekuro kyɛ yɛyɔ, ná yɛyɔ nnwumaa kyɛbɔ ɔsɔ ye nye ɔ.’—Flp. 2:13. w24. 04 4 ¶9-10

Yehowa maa yenwu adwene bɔ ole ye wɔ ndɛen bɔ obua mmenia nanwo ɔ. (Hes. 33:11) Koraka Yehowa kosi gyinayɛɛ kyɛ ɔsɛkye ebie a, ongotingye ye ne, sana onya nikyee pɔtee bie gyina so. Ɔnate kyɛ Yehowa te anwumvoinnwunɛ Nyameɛ nati, sɛ onwu nikyee bie bɔ odikyɛ ogyina so nwu sona ne anwumvo a, ɔyɛ sɔ. Mmenia bɔ bengotingye bɛ ne, bɛnwo dwirɛ beni yeɛ yɛse ɔ? Benu kaa bie yeɛ Bible ne kã bɛnwo dwirɛ ɔ. Ebie yeɛ ole kyɛ, Yesu hane kyɛ bengotingye Yudase Yiskariote. (Mak. 14:21; Yoh. 17:12) Né Yudase se ye paa kyɛ, ɔyɛ bɔne tia Yehowa ne Ɔwa ne, nakoso obuli yenye guale so yɛle. (Mak. 3:29) Afei koso, Yesu hane kyɛ, nyamesom mbanyi bɔ né bɛtane yenye ne, sɛ bewu a, bengotingye bɛ. (Mat. 23:33; Yoh. 19:11) Somafoɛ Pɔɔlo koso hane kyɛ, mmenia biemɔ bɔ né bafi asafo nanu, bɔ né bɛkeka yenwo dwirɛ tɛɛ bɛfa bɛsɛkye mmenia adwene ne, sɛ banzakyera na bewu a, bengotingye bɛ.—Heb. 6:​4-8; 10:29. w24. 05 4 ¶10-11

Sɛ yɛkɔso yedi nahorɛ yɛma Yehowa a, Satan ngɔhora ngɔfa ɔhaw ngɔwa yɛ so afebɔɔ. (1 Yoh. 3:8) Wɔ ewiase foforɛ nanu ne, Yehowa kɔhɔso kɔbɔ ye damvomɔ nwo waen, kyɛbɔ ɔkɔyɛ a nikyefee ngɔsɛkye bɛne ye afia, na okole bɛ kofi ewue sanu. (Nye. 21:4) Ɔte yenwo atee pirikua paa kyɛ yɛkɔwa Yehowa tena sua nanu, ofikyɛ ɔmaa yɛne ye fa adamvoa bɔ ɔkɔtena berɛ daa ɔ. (Hes. 37:27) Sɛ yɛkɔhɔso yɛkɔtena Yehowa tena sua nanu a, nzu yeɛ odikyɛ yɛyɛ ɔ? Sɛ ebie to yesa frɛ wɔ ba ye awuro a, wɔnye kɔgye yenwo kyɛ, ɛkɔyɛ bɔ sona ne kuro ɔ. Sɔ ala yeɛ yɛ koso yɛpena kyɛ Yehowa kyire yɛ bɔ odikyɛ yɛyɛ, na wamaa yahɔso yatena ye tena sua nanu ɔ. Ɔnate ɔdɔ bɔ yele yɛma Yehowa nati, yɛpena kyɛ yɛyɛ bɔ yɛkɔhora biala kyɛ, yɛkɔyɛ bɔ “ɔsɔ ye nye” ɔ. (Kol. 1:10) Afei koso, odikyɛ yesuro ye, na yɛmaa onwu ye kyɛ yebu ye. Ɛhene kɔboka yɛ maa yɛkɔhwe yɛnwo yekofi nikyee biala bɔ onguro nanwo. Yɛnye gye yenwo paa kyɛ yɛne yɛ Nyameɛ ne ‘kɔnate anwobrɛaseɛ nu ɔ.’—Mik. 6:8. w24. 06 4 ¶8-9

Yehowa hahyirele Abraham kyɛ ohu ɔwa Yisake ɔfa ye bɔ afɔleɛ. Né ɛhe ngɔyɛ mmerɛ ngɔma ye, yeti ye wora bɔle paa, nakoso otiele Yehowa. Mmerɛ bɔ ɔyɛle kyɛ oku ye ne, Yehowa hane kyɛ ɔyakyi. Sɔ dwirɛ ne maa yenwu bɔ né Yehowa kɔyɛ ye kyẽabie ɔ. Yeɛ ole kyɛ, né ɔkɔfa Ɔwa bɔ ɔla ye ahone so paa ne kɔbɔ afɔleɛ. Ɛhe maa yenwu ye kyɛ, Yehowa kuro sona dwirɛ paa! (Gye. 22:​1-18) Afoɛ pee si ne, Yehowa fale mmraa mane Yisraelfoɛ nemɔ. Mmraa ne hane kyɛ bɛfa ngaka bɛbɔ afɔleɛ kyɛbɔ ɔkɔyɛ a, ɔkɔfa bɛ bɔne kɔhyɛ bɛ ɔ. (Lew. 4:​27-29; 17:11) Né sɔ afɔleɛ ne kyire kyɛ Yehowa baabɔ afɔleɛ bie bɔ né ɔkɔmaa sona kole yenwo kofi bɔne nwo ɔ. Nyameɛ maa ye adiyifoɛ hworɔle bosoniɛ bɔ né bahyɛ yenwo bɔ nanwo dwirɛ, na ye yeɛ ole Nyameɛ Awa komaapɛ ne. Né okonwu amaneɛ, na bahũ ye kyɛbɔ ɔkɔyɛ a, okole mmenia mukoraati kofi bɔne, ne ewue nu, bɔ wɔ koso ɛboka so ɔ.—Yes. 53:​1-12. w24. 08 4 ¶7-8

Sɛ ɛ́kenga Bible ne a, odikyɛ ɛnea atee ahoroɛ bɔ ɛkɔhora kɔfa so kɔfa bɔ ɛkenga ne kɔyɛ adwuma ɔ. Mmerɛ bɔ akenga Bible nu dwirɛ bie ayie ne, bisa wɔnwo kyɛ, ‘Ngɔyɛ sɛɛ né mahora mafa bɔ makenga ne mabɔ me bra ɛnnɛ, ɔne kyẽabie?’ Ma yɛnea ɛhe anwo nhwɛsoɛ kãa. Fa ye kyɛ akenga 1 Tɛsalonikafoɛ 5:​17, 18. Mmerɛ bɔ akenga ayie ne, ɛkɔhora kogyina kãa, na asusu kyɛbɔ ɛbɔ mbaeɛ, ɔne mmerɛ dodoɔ bɔ ɛfa yɛ sɔ nanwo. Afei koso, ɛkɔhora kosusu nningyein bɔ Yehowa ayɛ ama wɔ nanwo. Ɛhene si ne, ɛkɔhora kɔla Yehowa ase wɔ nningyein nza biemɔ bɔ wayɛ wama wɔ nanwo. Sɔ mmerɛ kãa bɔ ɛkɔfa kɔdwenedwene bɔ akenga nanwo ne, ɔkɔboka wɔ maa ɛkɔhora kɔfa Nyameɛ Dwirɛ ne kɔbɔ wɔ bra. Sɛ ɛkora yɛ ɛhe, mmerɛ biala bɔ ɛkɔkenga Bible ne bue bie a, wɔde nea kyɛbɔ okosi kɔboka wɔ ɔ! Ɔkɔmaa ɛkɔɔyɛ ebie bɔ ɔfa Nyameɛ Dwirɛ ne bɔ ye bra ɔ. w24. 09 4-5 ¶9-10

Ɔnate kyɛbɔ Yehowa bɔle yɛ nati, sɛ ebie kyɛ yɛ nikyee a, yɛnye gye. Nakoso sɛ yɛ mmom yɛkyɛ mmenia nikyee a, yɛnye gye bo so. Afei koso, sɛ yɛkora yɛboka yeliemamɔ Kristofoɛ a y’ahone tɔ yɛ kunu, na sɛ bɛda yɛ ase a, ɔmaa yɛnye gye. Sɛ yɛyɛ mmenia pá na bɛda yɛ ase oo, banna yɛ ase oo, yɛnye kɔhora kɔgye ofikyɛ yɛse kyɛ yayɛ bɔ ɔte pá ɔ. Nnɛmaa wɔ wora fi kyɛ, akyɛdeɛ biala bɔ ɛkɔfa kɔma ebie ne, “AWURADE kɔhora kɔma wɔ bɔ ɔbo sɔ ɔ.” (2 Abe. 25:9) Yeti bɔ Yehowa kɔfa kosi wɔ gya nu ne, ɔkɔtra bɔ ɛfa mane sona ne koraa. Yɛse kyɛ Yehowa koso de sɛ otua wɔ kerɛ a, ɔtra akatua biala. Yeti ɛmɔma yɛyere yɛnwo kyɛ yɛkɔhɔ so yekosuesua yɛ Baba bɔ ɔwɔ anwuro, bɔ ɔye yekunu kyɛ nikyee ne. w24. 09 31 ¶20-21

Yehowa se anwumvoin. (Edw. 103:13; Yes. 49:15) Sɛ yɛfa ɔhaw nu koso a, ɔyɛ ye yea. (Sak. 2:8) Ɔma yɛ atee maa yepingye ye, na yɛkora yɛfa ye adamvoa. (Edw. 25:14; Aso. 17:27) Afei koso, ɔbrɛ yenwo ase, ofikyɛ ‘ɔbere ye nye ase nea ewienu ne aseɛ so, na ɔma ehianiɛ so fi mvuturo nu.’ (Edw. 113:​6, 7) Yeti, nwa paa yeɛ onguro kyɛ ɔkɔhyɛ yɛ Nyameɛ bɔ ɔte piri ne animnyam ɔ? Yɛpena kyɛ mmenia nwu Yehowa, yeti yɛhyɛ ye animnyam. Mmeni pee nze nahorɛ bɔ ɔfa Yehowa nwo ɔ. Nzuati ɔ? Ofikyɛ Satan akekã edwirɛ pee bɔ ɔtte nahorɛ wafa Yehowa nwo maa bale bali. (2 Kor. 4:4) Wamaa mmenia anya adwene kyɛ Yehowa mva bɔne ngyɛ, ɔndwene sona nwo, na amaneɛ bɔ yenwu ye ne, pee nala fi ye. Nakoso, yɛde yɛse nahorɛ dwirɛ bɔ ɔfa Nyameɛ nwo ɔ, na yɛpena kyɛ yɛkã yekyire mmenia yɛfa yɛhyɛ ye animnyam.—Yes. 43:10. w25. 01 3 ¶6-7

Yesu te Nyameɛ Awa bɔ bɔne biala nne yenwo ɔ, na mmerɛ bɔ ɔwale aseɛ he aso ne, ɔyɛle nzɛngyerɛnneɛ pee. Nakoso Satan nate ebiemɔ so kekãne yenwo dwirɛ tɛɛ. Nyamesom mbanyi nemɔ sɔa, bɛhãne kyɛ, tumi bɔ Yesu fa tu sunzummɔne ne, ofi “sunzummɔne mɔ panyi” ne berɛ. (Mak. 3:22) Mmerɛ bɔ né bedi Yesu dwirɛ ne koso, bɛhãne kyɛ wahã musue dwirɛ, na bɛhã behyirele mmeni lɔen ne kyɛ bɛpene so ma behũ ye. (Mat. 27:20) Ɛhene si ne, mmerɛ bɔ né Yesu asuafoɛ nemɔ kã nzɛmba ne, bɛ pɔfoɛ nemɔ sɛkyele “amaenmaensofoɛ nemɔ adwene, na bɛmaa benyane aliɛmaa nemɔ nwo adwene tɛɛ,” kyɛbɔ ɔkɔyɛ a bɛkɔtane bɛnye ɔ. (Aso. 14:​2, 19) Ɛwɛnelɛ Waen bɔ ɔwale December 1, 1998 ne hyirehyirele edwirɛ bɔ ɔwɔ Asomafoɛ 14:2 nanu kyɛ: “Yudafoɛ bɔ né bɛpɔ Kristofoɛ nemɔ ne, né bendie nzɛmba ne. Afei koso, né bɛkekã bɛnwo dwirɛ tɛɛ kyɛbɔ ɔkɔyɛ a, maenmaensofoɛ nemɔ, konya bɛnwo adwene bɔ ɔttemaye ɔ.” Ɛnnɛ koso, Satan té ‘lakalaka wiase amukoraa.’ w24. 04 11 ¶15-16

Sɛ bekotingye ebie maa ɔkɔtena ase daa a, oggyi mmerɛ bɔ ɔfa wuli naso. Yehowa de, obua ndɛen turoloo, na odi nahorɛ wɔ ye dwirɛ amukoraa nu. (Edw. 33:​4, 5) Yeti yedé yedi paa kyɛ, “aseɛ ye aso amukoraa Ndɛenbualɛniɛ ne,” ɔkɔyɛ bɔ ɔtengyɛ ɔ. Afei koso, odikyɛ yenwu ye kyɛ, sɛ ebie kɔtena ase daa kyẽabie a, oggyi maen horɛ bɔ ɔte nu naso. Yeti mmeni pee bɔ bɛwɔ maen ahoroɛ biemɔ so, bɔ ɔyɛ se kyɛ bɛkɔte Ahennie nanwo dwirɛ ne, Yehowa ngobua bɛ ndɛen kyɛ bɛte “mmɔngye.” (Mat. 25:46) Aseɛ he aso amukoraa ndɛenbualɛniɛ bɔ ɔyɛ bɔ ɔtengyɛ ne, ɔdwene sɔ mmenia nemɔ nwo paa tra yɛ po. Yɛnze atee bɔ Yehowa kɔfa so kɔyɛ nningyein wɔ amaneɛnwunɛ piri nanu ɔ. Edwirɛ bɔ okosisi sɔ mmerɛ ne, ebia ɔkɔmaa sɔ mmenia nemɔ bie konya Yehowa nu gyidie, mmerɛ bɔ ɔkɔye ye dumaa ne ali kohyire ebiala bɔ ɔwɔ aseɛ he aso ne.—Hes. 38:16. w24. 05 12 ¶14-15

Bɛbɔ bɛso Yehowa ne de, bɛnye gye yenwo kyɛ bɛkɔbokaboka bɛnwo ɔ. (2 Kor. 8:4) Nakoso odwu mmerɛ bie a, odikyɛ benya akokoduro kora né bahora bayɛ sɔ. Sɛ koɛ si nekaa bie a, asafo nu mbanyi bɔ bɛwɔ berɛ ne, bɛhyɛ beliemamɔ ngunaen, na bɛboka bɛ maa bɛsa ka nningyein bɔ behia ɔ. Ebie yeɛ ole Bible, asafo nwomaa, aleɛ, nzue, ndaadeɛ, ɔne nekaa bɔ bɛkɔla ɔ. Ɛyɛ a né ɔyɛ suro kyɛ bɛkɔyɛ sɔ adwuma ne. Nakoso ɔnate kyɛ bekuro beliemamɔ dwirɛ nati, bemia bɛnye bɛyɛ. Mmerɛ bɔ ɔte sɔ nu ne, yenwo hia paa kyɛ yɛkɔyɛ ko. Yeti, akwangyerɛ bɔ Bɛtɛl kɔfa kɔma yɛ ne, fa yɛ adwuma. (Heb. 13:17) Asafo ne akwangyerɛ bɔ ɔfa kyɛbɔ yɛkɔboa yɛnwo yɛkɔma atorɛngyɛm, ɔne nhyehyɛɛ bɔ mbanyi nemɔ ayɛ bɔ ɔfa ɛhe anwo ne, odikyɛ mbanyi nemɔ taa susu yenwo. (1 Kor. 14:​33, 40) Da akokoduro ali, nakoso ma wɔnye la berɛ. (Any. 22:3) Nnɛyɛ nikyefee bɔ ɔkɔmaa ekopira anaa wɔ ngoa kofi wɔ sa ɔ, na mmom bɔ ɛyɛ biala ne, nea wɔnwo yé. Fa wɔnwo to Yehowa so. Kae kyɛ, Yehowa mbena kyɛ asane bie kɔto ɛne aliemaamɔ, yeti ɔkɔta wɔ si mmerɛ bɔ ɛboka bɛ ne. w24. 07 4 ¶8; 5 ¶11

Né Ɔhene Dawide se kyɛbɔ Yehowa si te ɔ, yeti ɔfale yenwo tole ye so. Mmerɛ bɔ né ye pɔfoɛmɔ bɔ Ɔhene Sɔɔlo boka so, bɛpena ye beku ye ne, ɔbɔle Yehowa mbaeɛ kyɛ ɔboka ye. Nyameɛ tiele Dawide mbaeɛ ne, na ɔpepɛ lele ye. Ɛhene ati ɔhane kyɛ: “AWURADE te ase!” (Edw. 18:46) Sɔ dwirɛ bɔ Dawide hane ne, né ongyire kyɛ Yehowa wɔ berɛ mbaen. Nwomaa bie hane kyɛ, bɔ né Dawide pena kyire yeɛ ole kyɛ Yehowa te “Nyameɛ teasefoɛ bɔ ɔpepɛ de ye mmenia mmerɛ biala ɔ.” Bɔ ɔhɔle so wɔ Dawide asetena nu ne maa onwuni kyɛ ye Nyameɛ ne te ase. Ɛhene bokale ye maa osili ye hue kyɛ ɔkɔso Yehowa, na waye ye ayɛ. (Edw. 18:​28, 29, 49) Sɛ yede yedi paa kyɛ Yehowa te Nyameɛ teasefoɛ a, ɔkɔboka yɛ maa yɛkɔyere yɛnwo yɛkɔso ye. Afei koso, ɔkɔmaa yekonya anwoserɛ yɛkɔfa yekogyina ɔhaw biala bɔ ɔkɔto yɛ ne noa, na yɛkɔhɔso yɛkɔyɛ adwuma serɛ wɔ ye soen nu. Okosa kɔboka yɛ maa yɛkɔhɔso yekopingye Yehowa. w24. 06 20-21 ¶3-4

Bɔ somafoɛ Pɔɔlo hahyirele Tɛsalonikafoɛ nemɔ ne, nzu yeɛ yɛkɔhora yekosua yekofi nu ɔ? Bɔ yasua ye wɔ Bible nanu, anaa bɔ yɛse yɛfa asafo nanwo ne, sɛ yɛte yenwo dwirɛ bie bɔ ɔte sorongo a, odikyɛ yɛmaa yɛnye da berɛ paa. Daa Soviet Union awaen ne aberɛ so ne, yɛ pɔfoɛ nemɔ fale krataa bie bɛɛmane aliemaamɔ. Né waayɛ kyɛ asafo ne adwumayɛbeati ne yeɛ wahworɔ ɔ. Nu dwirɛ ne hyɛle aliemaa biemɔ ngunaen kyɛ bɛte bɛnwo befi asafo nanwo, ná bɛ bɔbɔ bɛte bɛ deɛ. Sɛ wɔnye bɔ sɔ krataa naso a, ɛkɔha kyɛ asafo ne yeɛ wahworɔ ɔ. Nakoso, ɛhe angora anlakalaka aliemaamɔ bɔ bedi nahorɛ ne. Benwuni kyɛ né krataa nanu dwirɛ te sorongo wɔ bɔ basua nanwo. Ɛnnɛ koso, odwu mmerɛ bie a, yɛ pɔfoɛmɔ fa intanɛt ne sohyia midia so keka yɛnwo dwirɛ. Bɛyɛ sɔ kyɛbɔ ɔkɔyɛ a, y’adwene nu kɔyɛ yɛ naa na wamaa yɛne aliemaamɔ afia atete. Sɛ yɛkenga anaa yɛte edwirɛ bɔ ɔte sɔ a, odikyɛ yɛfa yɛtoto nahorɛ ne bɔ yasua ye dada nanwo. Sɛ yɛyɛ sɔ a, ‘yɛ tianu ngɔyɛ yɛ kesenee ndɛndɛ,’ na ɛhene kɔbɔ yɛnwo waen.—2 Tɛs. 2:2; 1 Yoh. 4:1. w24. 07 12 ¶14-15

Gyinayɛɛ bɔ yenwo hia paa yeɛ ole kyɛ, ebie koyira yenwo so kɔma Yehowa na waaboka ye abusua naso ɔ. Yehowa pena kyɛ ebiala yɛ sɔ. Nzuati ɔ? Ɔpena kyɛ ɔne bɛ fa adamvoa, na benya daa ngoa. (Deut. 30:​19, 20; Gal. 6:​7, 8) Bɔ ɔte yeɛ ole kyɛ Yehowa nhyɛ ebiala kyɛ ɔsõ ye. Na mmom, wama ebiala atee kyɛ ye bɔbɔ osi sɔ gyinayɛɛ ne. Yede, sɛ Kristoniɛ bie bɔ wabɔ asu ne yɛ bɔne pirikua bie tia Yehowa koso ɛɛ? Sɛ wansakyera a, odikyɛ bɛye ye befi asafo nanu. (1 Kor. 5:13) Nakoso ɛhene po ne, ɛyɛ a né Yehowa nea atee kyɛ sona ne kosa kɔwa ye berɛ bieku. Ɛhene titire paa ti yeɛ ɔmaa Yesu oowuli ɔ, kyɛbɔ ɔkɔyɛ a abɔnefoɛ bɔ basakyera b’adwene ne, ɔkɔfa bɛ bɔne kɔhyɛ bɛ ɔ. Yeti bɛbɔ bayɛ bɔne pirikua ne, yɛ Nyameɛ bɔ okuro yɛ dwirɛ ne pena kyɛ bɛsakyera b’adwene.—Sak. 1:3; Rom. 2:4; Yak. 4:8. w24. 08 14 ¶1-2

Mmerɛ bɔ somafoɛ Yohane hworɔle ye krataa bɔ ɔtɔ so nza ne, ne ebiemɔ afa ngondombo ngyerɛkyerɛ baawura asafo nanu, na né ɛhene afa mbakyembakyemuɛ awa aliemaamɔ nu. Nakoso ebiemɔ de, né ‘bɛnate nahorɛ nanu.’ Sɔ mmenia nemɔ tiele Yehowa, na ‘belili ye ahyɛdeɛ ne aso.’ (2 Yoh. 4, 6) Sɔ Kristofoɛ bɔ bedi nahorɛ ne, bɛmaa Yohane ne Yehowa mukoraati nye gyele. (Any. 27:11) Nzu yeɛ yesua yefi nu ɔ? Sɛ yedi nahorɛ a, nna yɛ ngome yeɛ yɛnye gye ɔ. (1 Yoh. 5:3) Ebie yeɛ ole kyɛ sɛ yɛyɛ bɔ Yehowa kuro a, ɔmaa yɛnye gye. Yehowa koso sɛ onwu kyɛ, nzɔhwɛ bɔ yɛfa nu wɔ ewiase he anu mukoraati sĩ ne, yɛyere yɛnwo kyɛ yɛkɔyɛ bɔ okuro a, ɔmaa yenye gye paa. Abɔfo bɔ bɛwɔ anwuro dɔ ne koso, bɛnye gye. (Luka 15:10) Afei koso, sɛ yenwu ye kyɛ yeliemamɔ di nahorɛ bɛma Yehowa a, ɔmaa yɛnye gye. (2 Tɛs. 1:4) Sɛ ewiase he ba ye ayieleɛ na yɛto yɛnye yɛnea yesi, na yenwu kyɛ yelili nahorɛ a, ɔkɔmaa yɛngye kɔgye paa. w24. 11 12 ¶17-18

Odikyɛ ɛnea sona ne subaen kodwu mmerɛ beni kora, né ahahyire ye kyɛ ekuro ye? Sɛ ɛkã kyire sona ne ndɛ kyɛ ekuro ye a, ebia né wanya adwene kyɛ ɛpere wɔnwo soma. (Any. 29:20) Nakoso, sɛ sona ne nwu ye kyɛ ekuro ye na ɛngora ye kã a, okonya adwene kyɛ ɛte lapafoɛ. (Nwo. 11:4) Hyɛ ye nzorɛ kyɛ, sɛ ɛkã kyire ebie kyɛ ekuro ye a, ongyire kyɛ kyɛbɔ ɔte biala sona ne kɔpene so kɔma wɔ. Kae kyɛ, koraka ɛkɔhã kohyire ebie kyɛ ekuro ye ne, odikyɛ enwu ye kyɛ aso agyaa, na sona ne koso te ebie bɔ egya ye a, ɔkɔboka wɔ ɔ. Yede sɛ ebie kã kyire wɔ kyɛ okuro wɔ koso ɛ? Sɛ enwu ye kyɛ enguro sona ne a, ma onwu ye. Ɔba sɔ a, nnɛyɛ nningyein biemɔ bɔ ɔkɔmaa sona ne tianu kɔyɛ ye fɛ kyɛ ebia ekuro ye, mmerɛ bɔ wɔ bɔbɔ ɛse kyɛ enguro ye ɔ.—Ɛfe. 4:25. w24. 05 22-23 ¶9-10

Bɛbɔ bapopa bɛ ne, benu bɔ bedi nahorɛ ne ngome yeɛ Yesu ‘kɔfa bɛ kɔhɔ’ anwuro Ahennie nanu ɔ. Bɛbɔ bapopa bɛ ne, benu sona bɔ wangɔ so wanwɛne ne, bɛngɔfa ye bɛngɔboka bɛbɔ ‘baneanea nu baye bɛ’ bɔ bɛkɔhɔ anwuro naso. (Mat. 24:31) Ye mukoraati nu ne, bɛbɔ bɛsõ Nyameɛ ne, odikyɛ benu biala tie Yesu kɔkɔbɔ ne, na bɛkɔso bɛwɛne kyɛbɔ ɔkɔyɛ a bekoli nahorɛ, ɔmva yenwo ne anyelasoɛ bɔ bele ye ne. Yɛse Yehowa yé paa, yeti yedé yedi kyɛ ɔyɛ bɔ ɔtɛngyɛ mmerɛ biala. Ɛhene ati, sɛ Yehowa fa ye honhom ne popa ebie ɛnnɛ a, ɔnha yɛ. Yɛkae Yesu dwirɛ bɔ ɔfa adwumayɛfoɛ bɔ bɛbɔle bɛ paa maa bɛhɔle adwuma nɔsoa nnɔnnum ne. (Mat. 20:​1-16) Bɛbɔ bɛhɔle adwuma nɔsoa ne, bɛ ne bɛbɔ bɛhɔle adwuma ngyerɛmɔ tutuutu ne mukoraati nyane akatuaa ko. Yesɔ nati, ɔmva yenwo ne mmerɛ bɔ bɛkɔpopa ebie ne, sɛ ɔkɔso di nahorɛ a, ɔne bɛbɔ baha ne mukoraati konya yenwo atee kɔhɔ anwuro. w24. 09 24 ¶15-17

Sɛ bɛ́kã ebie bɔ ɔhora gyinane ndɛengyea noa paa a, yeɛ ole Yesu. Mmenia fale edwirɛ bɔ ɔyɛ yea pee lili ye, na né yebɔbɔ ye abusuafoɛ po boka so. Ebie yeɛ ole kyɛ, ye abusuafoɛ bɔ né belle ye nu gyidie ne hane kyɛ wabɔ laen, na asɔfo nemɔ koso bɔle ye somoɛ kyɛ ole sunzummɔne. Roman sogyafoɛ nemɔ koso gorole yenwo, bɛbole ye, na ayieleɛ koraa ne, behuni ye. (Mak. 3:​21, 22; 14:55; 15:​16-20, 35-37) Sɔ dwirɛ bɔ bɛfa belili Yesu mukoraati sĩ ne, wanyɛ nikyeebiala bɔ ɔttemaye ɔ. Nzu yeɛ yɛkɔhora yekosua yekofi bɔ ɔyɛle nanu ɔ? (1 Pet. 2:​21-23) Yesu nate nneasoɛ kama bɔ ɔyɛle naso maa yenwu bɔ odikyɛ yɛyɛ, mmerɛ bɔ babua yɛ ndɛengyea ne. Né ɔse mmerɛ bɔ odikyɛ odwudwo, ɔne mmerɛ bɔ odikyɛ omua yenoa ɔ. (Mat. 26:​62-64) Sɛ né mmenia kekã edwirɛ bɔ ɔtte nahorɛ bɛto ye so po a, né ɔnga hwee. (Mat. 11:19) Bɛbɔ né bɛtane yenye ne koso, sɛ né ɔne bɛ dwudwo a, né ɔmmɔ b’alapaa anaa onwunanwuna bɛ. w24. 11 4-5 ¶9-10

Fa ye kyɛ afa nikyeebie bɔ ɔyɛ nyemene, na ɔsombo paa ahyɛ ebie bɔ ekuro ye dwirɛ ɔ. Sɛ sona ne nye angye akyɛdeɛ nanwo, na ogyi to nekaa bie a, ɔkɔyɛ wɔ yea paa! Nakoso sɛ ɔfa wɔ akyɛdeɛ ne di dwumaa fa kyire kyɛ yenye asɔ bɔ ayɛ ama ye ne a, ɔkɔmaa wɔnye kɔgye. Nzu yeɛ yɛkɔhora yekosua yekofi mvandoho he anu ɔ? Yehowa maa Ɔwa ne oowu mane yɛ. Sɔ akyɛdeɛ bɔ ɔsombo bɔ Yehowa afa ama yɛ ne, ɔmaa yenwu ye kyɛ okuro yɛ dwirɛ paa. Yeti sɛ yɛyɛ nikyeebie yɛfa yekyire kyɛ yɛnye sɔ a, nea kyɛbɔ ɔkɔmaa yenye kɔgye ɔ! (Yoh. 3:16; Rom. 5:​7, 8) Mmerɛ kɔso ne, sɛ yannea yé a, yengohyire anisɔ yɛngɔma Yesu wue ne kõ. Sɛ ɔba sɔ a, ɔkɔyɛ kyɛbɔ akyɛdeɛ bɔ Nyameɛ afa ama yɛ ne, yagyi yato nekaabie anaa yafa yafea ne. Bɔ ɔkɔyɛ né yanyɛ sɔ ne, odikyɛ daa biala yekyire anisɔ yɛma bɔ Nyameɛ ne Kristo ayɛ ama yɛ ne. w25. 01 26 ¶1-2

Sɛ aliemaa bie kɔhora kɔɔyɛ asafo nu panyi a, ɔnzɛ kyɛ ɔyɛ sona bɔ ɔte gyidiniɛ foforɛ ɔ. Nna afoɛ pee bɔ afa abɔ asu ne yeɛ ole edwirɛ ne, na mmom odikyɛ ɛyɛ ebie bɔ asua Bible ne ate yebo yé, bɔ ɛkora gyina nu dwirɛ naso sisi gyinayɛɛ bɔ ɔte pá ɔ. (Mat. 20:23; Flp. 2:​5-8) Sɛ edi Yehowa mmraa so, na ɛfa akwangyerɛ bɔ ye ahyehyɛdeɛ ne fama yɛ ne yɛ adwuma a, okyire kyɛ ɛte ebie bɔ odi nahorɛ ɔ. Tworɔnzɛm ne kã kyɛ ɔsɛ kyɛ neafoɛ yɛ ebie bɔ ɔse ngyerɛkyerɛ ɔ. Aso ɛhe kyire kyɛ odikyɛ ɛyɛ ebie bɔ yenoa ate paa wɔ dwudwolɛ manɛ nu anaa? Daabi. Asafo nu mbanyi pee nala wɔ berɛ a, bɛtte mmenia bɔ bɛnoa ate paa wɔ dwudwolɛ manɛ nu ɔ. Nakoso, sɛ ɛte asafo nu panyi a, odikyɛ ɛkora kyirekyire yé wɔ asɛnga nu, na sɛ ɛkɔnea aliemaamɔ boso a, odikyɛ ɛkora fa Bible ne hyɛ bɛ ngunaen. w24. 11 23-24 ¶14-15

Sɛ ɛkenga edwirɛ bie wɔ Bible nanu ná ɛnde yebo a, yɛ nu nhwehwɛmuɛ. Afei bɔ asua ne, dwenedwene yenwo sɔ kyẽa ne, na nea bɔ ɔmaa enwu ye fa Yehowa, Ɔwa ne, ɔne ɔdɔ bɔ bele bɛma wɔ nanwo ɔ. (Edw. 119:97) Sɛ ɛ́kenga Bible ne, anaa ɛ́yɛ nhwehwɛmuɛ na enwu ye kyɛ, ennya edwirɛ foforɛ biala mmokka bɔ ɛse ye dada naso a, nnɛmaa w’aba nu bu. Atee bie aso ne, bɔ ɛyɛ ne tekyɛ bɛbɔ bɛpena esikaa kɔkorɛ ɔ. Sɔ mmenia nemɔ kora fa dɔnhwere anaa ngyẽa pee bɛpena esikaa kɔkorɛ, nakoso ɛkɔnea ne, kamba bie yeɛ benya ye ɔ. Sɛ ɔba sɔ a, bɛmma b’abanu mmu, ofikyɛ kaamba bie po bɔ bekonya ye ne, ɔsombo ma bɛ. Nakoso Bible nu dwirɛ de, yenwo hia tra esikaa kɔkorɛ koraa! (Any. 8:10) Yeti kɔso kenga Bible ne, na yɛ nhwehwɛmuɛ.—Edw. 1:2. w25. 01 25 ¶14-15

Bɛbɔ bayɛ nikyee maa wayɛ yɛ yea ne, Yehowa nea atee kyɛ yɛkɔfa yɛkɔhyɛ bɛ. (Edw. 86:5; Luka 17:4; Ɛfe. 4:32) Sɛ ebie yɛ nikyeebie maa ɔha yɛ a, ɔkora yɛ yɛ yea paa. Na sɛ sona ne te yɛ damvo anaa y’abusuaniɛ a, yede bɛnga. (Edw. 55:​12-14) Odwu mmerɛ bie a, ɛyealɛ bɔ yɛfa nu ne, ɛyɛ a ɔte kyɛbɔ ebie awɔ yɛ dadeɛ ne. (Any. 12:18) Sɛ ɔba sɔ na yɛfa sona ne nwo dwirɛ yewura yenu a, ɔte kyɛbɔ yepia dadeɛ naso ne. Yeti sɛ ebie yɛ nikyee maa ɔyɛ yɛ yea, na yɛfa yenwo dwirɛ yewura yɛ nu a, yɛnwo ngɔtɔ yɛ lle. Sɛ ebie yɛ nikyee maa ɔha yɛ a, ahyɛaseɛ ne de, ebia yɛkɔfɛ yaa. Bible ne nwa sɛ yɛfɛ yaa a, ɔtte bɔne. Nakoso osa bɔ yɛ kɔkɔ kyɛ nnɛmaa yɛfa ɛyaafɛlɛ yewura yɛ nu. (Edw. 4:4; Ɛfe. 4:26) Nzuati ɔ? Ofikyɛ sɛ yɛfa ɛyaafɛlɛ yewura yɛ nu a, ɔkɔmaa yɛkɔyɛ nningyein biemɔ bɔ nziɛen yekonu yɛnwo ɔ. (Yak. 1:20) Kae kyɛ ɛkɔhora kɔfɛ yaa, nakoso kyɛ ɛkɔfa ɛyaafɛlɛ ne kowura wɔ nu ne de, ogyi wɔ so. w25. 02 15 ¶4-6

Wɔ Yesu mvandoho bie bɔ ɔyɛle nanu ne, ɔhane kyɛ ndeaseɛ biala nne nu kyɛ ebie kɔboa esikaa pee noa, mmerɛ bɔ ‘olle anwonyadeɛ wɔ Nyameɛ nu ɔ.’ (Luka 12:​16-21) Bɔ ɔte yeɛ ole kyɛ, ebiala nze ɛhema dwirɛ. (Any. 23:​4, 5; Yak. 4:​13-15) Ɔnate kyɛ yɛte Yesu asuafoɛ nati, ɔhaw kɔhora kɔto yɛnu biala. Yesu hane kyɛ sɛ yɛkɔhora yɛkɔyɛ ye suaniɛ a, odikyɛ yɛyakyi bɔ ‘yele ye amukoraa berɛ.’ (Luka 14:33) Kristofoɛ bɔ né bɛwɔ Yudea ne sɔa, sɔ dwirɛ ne bie tole bɛ, nakoso né ɔnha bɛ kyɛ bɛ nningyein kofi bɛ sa ɔ. (Heb. 10:34) Ɛnnɛ koso, ɔnate kyɛ yeliemamɔ pee mva bɛnwo benwura amanyɔnzɛm nu nati, b’agyapadeɛ ne b’adwuma po afi bɛ sa. (Nye. 13:​16, 17) Yede nzu yeɛ waboka bɛ ɔ? Yehowa bɔhyɛ bɔ yenwa: “Mengoli wɔ ngasi, yeɛ mengɔye me sa wɔ wɔ bo le” ne, bele nu gyidie. (Heb. 13:5) Yɛbɔ yɛnwo mmɔden kyɛ yɛkɔpena nikyeebie yɛkɔto yɛsi, na sɛ yɛbɔ aworowaa a yafa yanea yɛnwo. Nakoso sɛ edwirɛ bie bɔ yɛnnea atee to yɛ maa bɔ yele ye ne fi yɛ sa a, yele gyidie kyɛ Yehowa kɔnea yɛ. w25. 03 29 ¶13-14

Yehowa ayɛ nningyein biemɔ bɔ ɔkɔboka yɛ maa yekonyi wɔ sunzum nu ɔ. Ebie ole kyɛ, yele asafo nu mbanyi bɔ bɛnea yɛ so, ná bekyirekyire yɛ ɔ. Bɛnye gye yenwo paa kyɛ, bɛkɔboka yɛ maa yɛkɔɔyɛ “mmenia bɔ yanyi yayie, bɔ yanya Kristo ye sue tebea ne tɛkyɛ ɔ.” (Ɛfe. 4:​11-13) Afei koso, Yehowa fa ye honhom krongron ne boka yɛ maa yenya “Kristo adwene.” (1 Kor. 2:​14-16) Yehowa amaa bahworɔ Nzɛmba nna ne, kyɛbɔ ɔkɔboka yɛ maa yekonwu subaen ahoroɛ bɔ Yesu lale ye ali mmerɛ bɔ ne ɔkã nzɛmba ne wɔ aseɛ he aso ne. Sɛ esuesua bɔ Yesu yɛle ne a, ɔkɔboka wɔ maa ɛkɔyɛ Kristoniɛ bɔ wanyi wɔ sunzum nu ɔ. Sɛ yɛkɔhora yɛkɔyɛ Kristofoɛ bɔ banyi wɔ sunzum nu a, “Kristo nwo ngwadaa ngwadaa ngyerɛkyerɛ,” anaa Bible nu dwirɛ bɔ yesuane kora yeɛ yɛbɔ asu ne, odikyɛ yesua pee yɛboka so. w24. 04 4-5 ¶11-12

Kyẽa biala yele gyinayɛɛ ahoroɛ bɔ odikyɛ yesi ɔ. Ebie yeɛ ole aleɛ bɔ yekoli ye ngyerɛmɔ, ɔne mmerɛ bɔ odikyɛ yɛda ɔ. Ɛhene de, ɛyɛ a, ɔnyɛ se kyɛ yekosi yenwo gyinayɛɛ. Nakoso gyinayɛɛ ne biemɔ wɔ berɛ a, ɔlla ase kyɛ yekosi ɔ. Ofikyɛ ɛhene de, ɔkora kã y’anwoserɛ, y’anigye, y’abusuafoɛ, ɔne yɛ soen. Sɛ yési gyinayɛɛ a, yɛpena kyɛ yɛne y’abusuafoɛ nya so mvasoɛ, na bɔ yenwo hia paa ne, yɛpena kyɛ Yehowa nye gye yenwo. (Rom. 12:​1, 2) Sɛ ɛpena kyɛ esi gyinayɛɛ pá a, nikyee bɔ olimoa bɔ odikyɛ ɛyɛ yeɛ ole kyɛ ekonwu nahorɛ bɔ ɔwɔ edwirɛ nanu ɔ. Nzuati yeɛ ɛhe anwo hia ɔ? Fa ye kyɛ ebie afokyɛ paa yeɛ wahɔ dɔktaniɛ bie berɛ kyɛ ɔnea ye. Ɛnea a, dɔktaniɛ ne kɔma sona ne ayire, mmerɛ bɔ onnwuni anwonyerɛ bɔ ɔha ye, anaa obisalle ye dwirɛ biala ne? Daabi, ɔngɔyɛ sɔ. Wɔ koso, sɛ edimoa nwu nahorɛ bɔ ɔwɔ edwirɛ bie nu a, ɔkɔboka wɔ maa ekosi gyinayɛɛ pá. w25. 01 14 ¶1-3

Nzu yeɛ yɛse yɛfa Yehowa anwumvoinnwunɛ nwo ɔ? Nzu yeɛ wayɛ wafa wahyire kyɛ, “ɔmbena kyɛ sona biala mini,” anaa ɔsɛkye ɔ? (2 Pet. 3:9) Ɛmɔma yɛnea kyɛbɔ Yehowa nwuni ebiemɔ anwumvo, mmerɛ bɔ bɛyɛle bɔne pirikua ne. Ɔhene Dawide yɛle nningyein biemɔ bɔ né ɔte bɔne pirikua paa ɔ. Ebie yeɛ ole kyɛ ɔsɛkyele agyaa, na ohuni sona. Nakoso Dawide nuni yenwo, yeti Yehowa nwuni ye anwumvoin, na ɔfa hyɛle ye. (2 Sam. 12:​1-12) Ɔhene Manase koso yɛle nningyein pee bɔ ɔttemaye wɔ ye asetena nu. Ɔwɔ nu kyɛ ɔyɛle bɔne hɔle siɛ paa de, nakoso mmerɛ bɔ onuni yenwo ne, Yehowa nwuni ye anwumvoin, na ɔfa hyɛle ye. (2 Abe. 33:​9-16) Sɔ dwirɛ hemɔ maa yenwu ye kyɛ, sɛ Yehowa nwu ye kyɛ odikyɛ onwu ebie anwumvoin a, ɔyɛ ye sɔ. Mmenia biemɔ bɔ bɛyɛle bɔne pirikua, nakoso benuni bɛnwo ne, Yehowa kotingye bɛ. w24. 05 4 ¶12