March

Bible ne maa yesa yenwu mmenia biemɔ bɔ né bɛte ateneneefoɛ nakoso nzieɛn, bɛɛyɛle abɔnefoɛ nwo dwirɛ. Benu bie yeɛ ole Ɔhene Solomon. Né bahyirehyire ye Yehowa nwo nikye, ɔne atee bɔ odikyɛ ɔfaso so ye ɔ, na Yehowa koso yirale ye paa. Nakoso nzieɛn, ɔɔsone bosoen. Bɔ ɔyɛle ne maa Yehowa fɛle yeso yaa, na ɛhene ati Yisraelfoɛ nemɔ nwuni amaneɛ afoɛ pee. Bible ne kã kyɛ Solomon “toale ye mbanyi mɔ.” Sɔ mbanyi nemɔ ne, benu kõ yeɛ ole Ɔhene Dawide bɔ né odi nahorɛ ne. (1 Ahe. 11:​5-9, 43; 2 Ahe. 23:13) Nakoso, aso nekaa bɔ besiele Solomon ne kyire kyɛ kyɛbɔ ɔte biala ne, bekotingye ye anaa? Ɛhene de, Bible ne nga. Ewuetingyelɛ te akyɛdeɛ bɔ ofi Nyameɛ bɔ okuro yɛ dwirɛ ne berɛ ɔ. Ɛhene ati, bɛbɔ okuro kyɛ bɛso ye daa ne, yeɛ ɔfa yenwo atee bɔ ɔte sɔ ne do bɛ ɔ. (Yob 14:​13, 14; Yoh. 6:44) Aso Solomon konya sɔ akyɛdeɛ ne bie anaa? Ɛhene de yɛnze; Yehowa ngome yeɛ ɔse ɔ. Bɔ yɛse alaa yeɛ ole kyɛ, Yehowa kɔyɛ bɔ ɔtengyɛ ɔ. w24. 05 4 ¶9

Sɛ yɛhyɛ Yehowa bɔ kyɛ yɛkɔso ye a, ɔmaa yenya yenwo atee yɛba ye tena sua nanu. Nningyein bɔ ɔboka yɛ maa yɛne ye afia yɛ kama ne, ɛberɛ yeɛ yɛsa kã ye ɔ. Afei, aliemaamɔ bɔ bɛ koso bawa berɛ bie ne, yɛne bɛ kora fa adamvoa. Yehowa tena sua ne de, ɔnne nekaa pɔtee bie. Ɛhe maa yenwu ye kyɛ, sɛ yɛso Yehowa nahorɛ nu a, ɔmva yenwo ne nekaa biala bɔ yɛwɔ ne, yɛkɔhora yɛkɔwa ye tena sua nanu bie. (Nye. 21:3) Mmenia bɔ bɛsone Yehowa nahorɛ nu bɔ bawu ne, aso yɛkɔhora yɛkɔha kyɛ bɛté wɔ ye tena sua nanu anaa? Yóo! Nzuati yeɛ yɛkã sɔ ɔ? Ofikyɛ Yehowa té kae bɛ. Yesu hane kyɛ: “Ɔfa awufoɛ dwɔsolɛ nwo de, Mose koso maa yɛnwu ye wɔ ngyɛkyerɛ ne nwo dwirɛ ne anu, mmerɛ bɔ ɔfrɛ Awurade kyɛ: ‘Abraham Nyameɛ, Yisake Nyameɛ ne Yakob Nyameɛ’ ne. Yiti, ɔtte awufoɛ Nyameɛ, na mmom ɔte ateasefoɛ Nyameɛ; ofikyɛ bɛ mukoraa bɛte ase bɛma ye.”—Luka 20:​37, 38. w24. 06 3 ¶6-7

Sadoke hɔle Hebron ne, né waboa yenwo kyɛ sɛ ngondii bie si a, ɔkɔfa yenwo kole nu bie. (1 Abe. 12:38) Ɔwɔ nu kyɛ né Sadoke tte sogyaniɛ, nakoso ne ole akokoduro. Yeti, né yenye gye yenwo kyɛ ɔne Dawide kɔhɔ koɛ, na waboka maa bale Yisraelfoɛ bafi bɛ pɔfoɛmɔ sa nu. Ebie bɔ ɔte sɔfo tekyɛ Sadoke de, nisua yeɛ osuane kyɛ okonya akokoduro ɔ? Mmrienzua bɔ ɔfale yenwo bɔle bɛ ne, né bele akokoduro paa, yeti yɛkɔhora yɛkɔha kyɛ osua fili bɛ berɛ. Benu ko yeɛ ole Dawide. Ɔnate kyɛ né ole akokoduro nati, ye yeɛ né odi Yisraelfoɛ nemɔ nyunu fa bɛ kɔ koɛ, na ɛhene maa Yisraelfoɛ namu bɛɛtale ye si. (1 Abe. 11:​1, 2) Mmerɛ biala, né ɔfa yenwo to Yehowa so kyɛ ɔboka ye ma oli ye pɔfoɛmɔ so ngunim. (Edw. 138:3) Afei koso, ebiemɔ te kyɛ Yehoada ne ɔwa Benaya bɔ né ɔte sogyaniɛ, ɔne safohene 22 bɔ bɛɛtale Dawide si ne koso, Sadoke suane akokoduro fili bɛ berɛ.—1 Abe. 11:​22-25; 12:​26-28. w24. 07 3 ¶5-6

Bɛbɔ né beli Kristo sĩ ne, Sɔɔlo bɔ ofi Taaso tuli yenye siele bɛ so paa. Ɛhene ati, né Kristofoɛ nemɔ pee le adwene kyɛ ɔngɔhora ngɔsesã lle. Nakoso Yesu bɔ né batingye ne de, né onnwu ye sɔ. Na mmom, ɔne ye Baba nwuni subaen pá biemɔ bɔ ɔwɔ Sɔɔlo nwo ne. Yesu hane kyɛ: “Maye ye kyɛ ɔso me.” (Aso. 9:15) Ɔyɛle anwanwadeɛ po kyɛbɔ ɔkɔyɛ a, Sɔɔlo kɔhora kɔsakyera ɔ. (Aso. 7:58–8:3; 9:​1-9, 17-20) Siɛ ye Sɔɔlo sesane ɔɔyɛle Kristoniɛ, na bɛfrɛle ye somafoɛ Pɔɔlo. Né ɔtaa kã kyɛ, yenye sɔ kyɛbɔ Yehowa ne Yesu nwuni ye anwumvoin, ná bɛlole ye ne paa. (1 Tim. 1:​12-15) Mmerɛ bie Pɔɔlo tele kyɛ ebie bu bra bɔne wɔ Korinto asafo nanu, nakoso né bɛhanne yenwo hwee. Ɔwale sɔ ne, nzu yeɛ ɔyɛle ɔ? Olili edwirɛ nanwo dwumaa wɔ atee bie aso bɔ ɔmaa yenwu kyɛ sɛ Yehowa twe ebie so a, ɔyɛ ye wɔ ɔdɔ nu, na yenwo hia koso kyɛ yenwu mmenia anwumvoin. w24. 08 13 ¶15-16

Bɔ osili wɔ Eden turo nu berɛ ne si ne, ngakangaka, Yehowa maa mmenia bɔ bɔne wɔ bɛnwo ne nwuni kyɛbɔ bɛkɔhora bekopingye ye ɔ. Adam ne Hawa awa bɔ ɔtɔ so nyɔ bɔ yeɛ ole Abel ne, ye yeɛ olimoa nyane Yehowa nu gyidie ɔ. Né ɔdɔ Yehowa, na né ɔpena kyɛ ɔyɛ bɔ ɔsɔ yenye na opingye ye. Yeti ɔbɔle afɔleɛ mane ye. Né ɔte mmoaenneafoɛ, yeti ohuni ye mmoaen ne bie, na ɛhene yeɛ ɔfa bɔle afɔleɛ ne. Yehowa nwuni bɔ ɔyɛle ne sɛ? Bible ne kã kyɛ: ‘Ye nye sɔle Abel ne ye afɔleɛ ne.’ (Gye. 4:4) Nna Abel ngome yeɛ Yehowa nye sɔle ye afɔleɛ ɔ. Ebiemɔ koso bɔ né bɛdɔ Yehowa, ná bɛfale bɛnwo bɛtole ye so tekyɛ Nowa ne, yenye sɔle b’afɔleɛ ne. (Gye. 8:​20, 21) Yehowa nate bɔ ɔyɛle naso hyirele kyɛ, mmenia bɔ bɔne wɔ bɛnwo ne, ɔkɔhora kole bɛ kɔto nu, na bapingye ye. w24. 08 3 ¶5-6

Sɛ bebua yɛ ndɛengyea a, ɔkɔhora kɔyɛ yɛ yea, anaa okobu yɛ aba nu. (Nwo. 7:7) Mmenia bɔ né bedi nahorɛ bɛma Yehowa tekyɛ Yob ne Habakuku po, ɛhe bie tole bɛ. (Yob 6:​2, 3; Hab. 1:​1-3) Ɔwɔ nu, sɛ ɔba sɔ a, yɛkɔhora yekoli yealɛ, nakoso odikyɛ yɛnea yé na yanyɛ nikyeebiala bɔ ɔttemaye, na wanzɛkye edwirɛ ne koraa. Sɛ mmenia di bɔne na bɛfa bɛnwo bedi a, ebiaa ɔkɔmaa yekonya adwene kyɛ mvasoɛ nne so kyɛ yɛkɔyɛ bɔ ɔte pá ɔ. Ɛhe tole edweintolɛniɛ bie. Onyane adwene kyɛ abɔnefoɛ bɔ besisi teneneefoɛ ne, bɛnwo tɔ bɛ. Ɔhane kyɛ: “Nea, kyɛ abɔnefoɛ bɛte hɔ ɛne: bɛ nwo atɔ bɛ daa.” (Edw. 73:12) Afei koso, mmerɛ bɔ onwuni ndɛengyea bɔ né ɔkɔso ne, ɔyɛle ye yea, na onyane adwene kyɛ mvasoɛ nne so kyɛ ɔsõ Yehowa ɔ. Yeti ɔhane kyɛ: “Nakoso nyɛle m’adwene kyɛ mepena kyɛ mete sɔ nikyee ne abo ne, nwuni kyɛ ɔte adwuma bɔ ɔyɛ se paa ɔ.”—Edw. 73:​14, 16 w24. 11 3 ¶5-7

Yɛhyɛ Yehowa animnyam ofikyɛ yebu ye paa. Bɔ yeti yeɛ yebu Yehowa yeɛ ole kyɛ, ole tumi paa, na ɔkora fa ye tumi ne yɛ bɔ okuro biala. (Edw. 96:​4-7) Nningyein bɔ wabɔ ne koso maa yenwu ye kyɛ ɔse nworɛ paa. Ye yeɛ wama yɛ ngoa ɔ, na ɔnate ye so yeɛ yɛte ase ɔ. (Nye. 4:11) Afei koso odi nahorɛ. (Nye. 15:4) Nikyefee nne berɛ bɔ ɔngora ye yɛ ɔ, na odi ye bɔhyɛ so mmerɛ biala. (Yos. 23:14) Ɛhene ati, diyifoɛ Yeremia hane yenwo dwirɛ kyɛ: “Amaenmaenso nworɛfoɛ amukoraa nu, yeɛ b’ahennie amukoraa nu, ebiala nne berɛ bɔ ɔte kyɛ wɔ ɔ”! (Yer. 10:​6, 7) Amba, yele nningyein pee bɔ yeti odikyɛ yebu yɛ Baba bɔ ɔwɔ anwuro ne ɔ. Nná ɛhene ngome, na mmom yesa yekuro ye dwirɛ. w25. 01 3 ¶5-6

Yehowa akwangyerɛ bɔ ahyehyɛdeɛ ne boka yɛ maa yɛfa yɛbɔ yɛ bra ne, Nyameɛ pɔfoɛ nemɔ kekã yenwo dwirɛ tɛɛ. Ebie yeɛ ole kyɛ, Bible ne maa yenwu ye kyɛ bɛbɔ bɛsõ Yehowa ne, ɔpena kyɛ bedi bɛnwo ni, bɛbɔ bra pá, na bɛsõ ye kyɛbɔ okuro ɔ. Ɛhene ati, ebiala bɔ ɔkɔhɔso kɔbɔ bra bɔ ɔttemaye, bɔ ɔmbena kyɛ onu yenwo ne, Yehowa pena kyɛ betu ye befi asafo nanu. (1 Kor. 5:​11, 12; 6:​9, 10) Ɔnate kyɛ yɛfa sɔ dwirɛ ne yɛyɛ adwuma nati, yɛpɔfoɛ nemɔ kã kyɛ, yɛ tianu yɛ se, yɛte twann, na yenguro sona dwirɛ. Odikyɛ yenwu nekaa bɔ edwirɛ bɔ ɔtte nahorɛ hemɔ fi ɔ. Edwirɛ biala bɔ ɔtte nahorɛ bɔ mmenia kekã ne, Satan Abɔnzam yeɛ ɔta ye si ɔ, ofikyɛ ɔte “ngondombo baba.” (Yoh. 8:44; Gye. 3:​1-5) Yeti sɛ ɔmaa mmenia kekã edwirɛ bɔ ɔtte nahorɛ fa Yehowa ahyehyɛdeɛ nanwo a, ɔnzɛkyɛ yɛmaa ɔyɛ yɛ nwanwa. w24. 04 10-11 ¶13-14

Sɛ amaneɛnwunɛ piri bɔ bɛnate so bɛkɔsɛkye “Babilɔn Pirikua” ne hyɛ yebo a, ebia ebiemɔ kɔkae kyɛ, Yehowa Adanzefoɛ ahã ye dadaada kyɛ sɔ dwirɛ ne kosi. Mmenia bɔ bekonwu kyɛ sɔ dwirɛ nemɔ sisi ne, aso benu biemɔ kɔyɛ nzakrayɛɛ kɔɔso Yehowa anaa? (Nye. 17:5) Sɛ ebiemɔ yɛ sɔ a, yede ɔkɔyɛ tekyɛ bɔ osili wɔ Egypt wɔ Mose aberɛ so ne. Kae kyɛ, mmerɛ bɔ né Yisraelfoɛ nemɔ fi Egypt ne, “mmenia mvrafra pee” ne bɛ hɔle. Sɔ mmenia hemɔ, ebia benu biemɔ hyɛle yebo nyane Yehowa nu gyidie mmerɛ bɔ benwuni kyɛ Ɔhaw Buru bɔ Mose hane yenwo dwirɛ ne, ye mukoraati awa nu ne. (Ɛks. 12:38) Sɛ bɛsɛkye Babilɔn Pirikua ne, na edwirɛ bɔ ɔte sɔ ne bie si a, aso odikyɛ yɛmaa ɔyɛ yɛ yea kyɛ Yehowa ama ebiemɔ atee maa baaboka yɛ so mmerɛ bɔ waha kaa maa Amagedon ba ne? Daabi, ofikyɛ yɛpena kyɛ yesuesua yɛ Baba bɔ ɔwɔ anwuro ne. Ɔte “Nyameɛ bɔ ɔse anwumvoin ná ɔdo mmenia ɔ, bɔ ye ahone nhu ndɛ, bɔ ye ɔdɔ bɔ onni ngasi ne nahorɛlilɛ sone ɔ.”—Ɛks. 34:6. w24. 05 11 ¶12-13

‘Edwirɛ paa mɔ nwo nhwɛsoɛ ne,’ sɛ yanzɔ nu yé a, nzu yeɛ ɔkɔhora kosi ɔ? Ɛmɔma yɛnea edwirɛ bie bɔ osili wɔ asomafoɛ nemɔ aberɛ so ɔ. Né ebiemɔ yɛ nwuhunwuhu wɔ asafo nanu kyɛ Yehowa kyea ne awa dada. Ɔkɔyɛ kyɛ krataa bie bɔ bɛnwa somafoɛ Pɔɔlo ahworɔ ne, yeɛ ɔmaa begyinane so bɛhane sɔ ɔ. Kristofoɛ bɔ né bɛwɔ Tɛsalonika ne, benu biemɔ lɛle sɔ dwirɛ ne lili bɔ banyɛ nu nhwehwemuɛ biala ɔ. Ɛhene ati, bɛkoso né bɛfa edwirɛ ne betené. Né odikyɛ ahaa bɛkae edwirɛ bɔ né Pɔɔlo afa ahyirehyire bɛ mmerɛ bɔ né ɔwɔ bɛnwo berɛ ne. Sɛ bɛyɛle sɔ a, ahaa bengole sɔ ngondombo dwirɛ ne bengoli. (2 Tɛs. 2:​1-5) Pɔɔlo tuli oliema nemɔ foɛ kyɛ, nna edwirɛ biala bɔ bɛkɔte ne yeɛ odikyɛ bede bedi ɔ. Bɔ ɔkɔyɛ ne banea bɛnwo yé mmerɛ foforɛ ne, Pɔɔlo fale ye krataa bɔ ɔtɔ so nyɔ bɔ ɔhworɔ mane bɛ ne wale ayieleɛ kyɛ: “Me bɔbɔ, Pɔɔlo, me sa noa ahyerɛlɛ yeɛ mefa mebisa ɛmɔ bisabisa ɔ, na ɛhe hyɛ me krataa biala bɔ mekyerɛ ne nzorɛ: kyɛbɔ mekyerɛ hɔ ɛne.”—2 Tɛs. 3:17. w24. 07 12 ¶13-14

Ɔnate ɔhaw bɔ né ɔba nati, né odikyɛ Kristofoɛ bɔ bɛwɔ Yudea ne mia bɛnye kora né bahora basõ Yehowa. Sɔ Kristofoɛ ne, benu biemɔ wɔ berɛ a, né mmenia atane bɛnye paa, nakoso benu pee de, sɔ haw ne bie ando bɛ. Yeti somafoɛ Pɔɔlo tuli bɛ foɛ kyɛ benwu ye kyɛ mmenia kɔtane bɛnye. Nakoso sɛ ɔba sɔ a, bemia bɛnye beli nahorɛ beedwu ewue nu kyɛbɔ Yesu yɛle ne. (Heb. 12:4) Ɔnate kyɛ Yudafoɛ nanu pee bɛɛyɛle Kristofoɛ nati, ɔmaa bɛ pɔfoɛ nemɔ fɛle bɛso yaa paa. Afoɛ kãa bie bɔ né wapɛ nu ne, Yudafoɛ kɔbo aburanna ‘tale ndaen kyɛ bengodidi anaa bɛngɔno hwee, sana banya Pɔɔlo bahu ye kora.’ (Aso. 22:22; 23:​12-14) Ɔwɔ nu kyɛ né bɛtane Kristofoɛ nemɔ nye paa de, nakoso né odikyɛ beyia nu bɛsõ Yehowa, bɛkɔso bɛkã nzɛmba ne, ná bɛmaa bɛ gyidie koso yɛ se. w24. 09 12 ¶15

Né Yohane te Yesu Kristo suaniɛ bɔ okuro ye dwirɛ paa ɔ. (Mat. 10:2) Ɔne Yesu bɔle nu yɛle asɛnga adwuma ne, na ɔfale yenye nwuni anwanwadeɛ ahoroɛ bɔ ɔyɛle ne. Afei koso, ɔhaw bɔ bɛfale nu mukoraati sĩ ne, ɔhɔle so lili Yesu si. Osa nwuni kyɛbɔ Kristosom trɛle ndɛndɛ wɔ asomafoɛ nemɔ aberɛ so, ɔne kyɛbɔ bɛbɔle nzɛmba ‘nanwo dawure behyirele abɔdeɛ mukoraa wɔ wiase’ ne. (Kol. 1:23) Mmerɛ bɔ Yohane yɛle biaa panyi ne, onyane yenwo atee hworɔle Bible ne bie. Ɛhe anu kõ yeɛ ole Nyekyire nwomaa ne. (Nye. 1:1) Osa hworɔle Nzɛmba ne bie. Afei Yehowa maa ɔhworɔle ngrataa nza bɔ yeɛ ole 1 Yohane, 2 Yohane, ɔne 3 Yohane ne. Ye krataa bɔ ɔtɔ so nza ne de, ɔhworɔ ɔɔmane Kristoniɛ bie bɔ né odi nahorɛ bɔ bɛfrɛ ye Gayɔso ne. Ne Yohane kuro ye dwirɛ tekyɛ ye bɔbɔ ɔwa. (3 Yoh. 1) Edwirɛ bɔ sɔ biaa panyi he hworɔle ne, wahyɛ Kristofoɛ mukoraati ngunaen waadwu ɛnnɛ. w24. 11 12 ¶15-16

Brienzua bɔ okuro ɔye ne, yenwo hia ye na onni yenwo angorɛ. Onwu ɔye kyɛ, ɔte akyɛdeɛ bɔ ɔyɛ nyemene bɔ Yehowa afa ama ye ɔ. (Any. 18:22; 31:10) Yesɔ nati, sɛ ɔne ɔye ne da a, ɔda ye ali kyɛ ɔdwene yenwo, na obu ye. Yeti, ɔngɔhyɛ ye kyɛ ɔyɛ nnaa nu nningyein biemɔ bɔ onguro, bɔ ɔkɔmaa ɔkɔteetee, anaa ɔkɔmaa ye tiboa kobua ye fɔ ɔ. Sɔ ala yeɛ brienzua ne koso, ɔngɔyɛ nikyeebie bɔ ɔkɔmaa ye tiboa kobua ye fɔ wɔ Yehowa nyunu mmerɛ bɔ ɔne ɔye bɛda ne. (Aso. 24:16) Huɛmɔ, ɛmɔnya gyidie kyɛ mmɔden bɔ ɛmɔbɔ kyɛ ɛmɔkɔfa anidie bɛkɔma ɛmɔ ayemɔ ne, Yehowa nwu ye mukoraati, na yenye sɔ. Yeti yere wɔnwo kyɛ ɛkɔfa anidie kɔma ɛye, na nnɛyɛ nikyeebiala bɔ ɔkɔmaa ɔkɔteetee ɔ. Afei ma onwu ye kyɛ ɛdwene yenwo, ebu ye, na ekuro ye. Ɛyɛ sɔ a, ɛmaa onwu ye kyɛ, yenwo hia wɔ. Yeti sɛ ɛpena kyɛ ɛne Yehowa afia kɔso yɛ kama a, yede bɔ mmɔden kyɛ ɛkɔfa anidie kɔma ɛye.—Edw. 25:14. w25. 01 13 ¶17-18

Nikyee kõ bɔ ɔmaa bɛbɔ bɛsõ Yehowa ne da nzorɛ fi bɛbɔ bɛnwa bɛte Kristofoɛ nanwo yeɛ ole anwokeka bɔ bɛfa bɛyɛ asɛnga adwuma ne. Bɔ Yesu yɛle ne, sɛ yesusu yenwo a, ɔkɔboka yɛ maa yɛ koso yɛkɔfa anwokeka yɛkɔyɛ asɛnga adwuma ne. Mmerɛ bɔ né ɔyɛ asɛnga adwuma ne, ye anwokeka angɔ ase lle, na mmom ɔyerele yenwo fale ye mmerɛ ne ye anwoserɛ mukoraa hane nzɛmba ne. Né Yesu tekyɛ hwɛsoniɛ bɔ ɔneane borɔdoma bakaa so afoɛ nza, nakoso wanzu mmaa ne. Ɔfale afoɛ nza mumua hane nzɛmba ne hyirele Yudafoɛ nemɔ, nakoso bɛnu pee andɛ ye so. Wamma ye abanu ammu, na mmom kyɛbɔ hwɛsoniɛ ne yɛle ne, ɔhɔle so fale anwokeka hane nzɛmba ne. (Luka 13:​6-9) Sɛ yesuesua bɔ ɔyɛle ɔne kyɛbɔ ohyirehyirele mmenia ne a, ɔkɔboka yɛ maa yɛ koso yɛkɔfa anwokeka yɛkɔyɛ asɛnga adwuma ne. w25. 03 14-15 ¶1-4

Sɛ enwu ebie bɔ wɔnye gye yenwo a, odikyɛ ndɛ nala ɛfa kɔbɔ so kyɛ ekuro ye anaa? Bible ne kã kyɛ, ebie bɔ ɔte badwemma de, bɔ ɔyɛ biala, ɔfa adwene to yenwo. Yeti ɔte pá kyɛ ɛkɔto wɔ boase konwu ebie subaen yé kora, né ahahyire ye kyɛ ekuro ye. Sona bɔ ɛpena kyɛ ɛne ye yɛ agyaa nhyehyɛɛ ne, ɛkɔyɛ sɛɛ né ahora anwu ye subaen yé? Ɛkɔhora kɔfa wɔnye kɔto ase kɔnea mmɔden bɔ sona ne bɔ ye wɔ asafo nanu, ɔne subaen bɔ ɔda y’ali mmerɛ bɔ aliemaamɔ ayia nu kyɛ bɛgye bɛnye ne. Bisa wɔnwo kyɛ: ‘Nwamɔ yeɛ bɛte ye damvo ɔ, na nzu yeɛ ɔtaa kã yenwo dwirɛ ɔ?’ (Luka 6:45) Bɔ ogyi yenye so ne, ɛhene bie ala yeɛ ogyi wɔnye so anaa? Ɛkɔhora kobisa yenwo dwirɛ kofi ye asafo nu mbanyi, anaa aliemaamɔ bɔ bɛse sona ne yé ne berɛ. (Any. 20:18) Bɔ ɛkɔhora kobisa yenwo dwirɛ ne bie yeɛ ole mmɔden bɔ sona ne bɔ ye wɔ asafo nanu, ɔne ye subaen. (Rut 2:11) Mmerɛ bɔ ɛyɛ sɔ ne, odikyɛ ɛnea yé na anyɛ nikyee biala bɔ ɔkɔha sona ne ɔ. Ɛhene kohyire kyɛ ebu ye. w24. 05 22 ¶7-8

Sɛ ebie yɛ bɔne a mbanyi nemɔ mbere bɛnwo bɛnga kyɛ ɛhe de ɛyɛ ye sɛɛ ɔngɔsakyera. Ebiemɔ wɔ berɛ a, ebiaa kɔmatii ne yia bɛ mmerɛ bɔ olimoa nala a, bɛkɔsakyera. Nakoso ebiemɔ de, ebia sana bɛma bɛ mmerɛ kãa. Yeti mbanyi nemɔ kɔhora koyia sona ne pɛen nyɔ anaa bɔ ɔbo sɔ ɔ. Ebiaa bɛne ye yia mmerɛ bɔ olimoa na ɔkɔ a, ɔkɔɔtena ase dinn kɔdwene bɔ bɛne ye susuli yenwo nanwo. Ebiaa ɔkɔbɔ mbaeɛ po kyɛ Yehowa fa ye bɔne hyɛ ye. (Edw. 38:18) Ɔkɔhora kɔwa kyɛ, beyiale ye mmerɛ bɔ olimoa ne, wanyɛ nikyeebiala bɔ okyire kyɛ wanu yenwo, nakoso bekoyia ye bieku ne, ebiaa bekonwu ye kyɛ yenye awa yenwo so. Sɛ mbanyi nemɔ kɔhora kɔboka bɔ wayɛ bɔne ne maa ɔkɔsakyera ye adwene a, odikyɛ bɛmaa onwu kyɛ bekuro ye dwirɛ, na bɛdwene yenwo. Odikyɛ bɛsrɛ Yehowa kyɛ ɔboka bɛ na bɛ fɛɛ anyɛ mbaen, na benya gyidie kyɛ beliema ne nye kɔhora kɔwa yenwo so na wasesã.—2 Tim. 2:​25, 26. w24. 08 22-23 ¶12-13

Yehowa mbena kyɛ ebiala kɔsɛkye! Ɔpena kyɛ ɔne abɔnefoɛ siesie b’afia, na ɔkã bɛ bata yenwo. (2 Kor. 5:20) Ɛhene ati yeɛ ofi tete ɔbaadwu ɛnnɛ mukoraati ne, ɔkɔso srɛ abɔnefoɛ kyɛ bɛsakyera b’adwene, na besa bɛbra ye berɛ ne. Ɔte yenwo atee paa kyɛ mbanyi nemɔ ne Yehowa bɔ nu yɛ adwuma, mmerɛ bɔ bɛyere bɛnwo bɛboka mmenia bɔ bayɛ bɔne ne maa bɛsakyera b’adwene ne. (Rom. 2:4; 1 Kor. 3:9) Sɛ abɔnefoɛ sakyera b’adwene a, anigye bɔ ɔba anwuro dɔ ne de, bɛnga! Yehowa, yɛ Baba bɔ ɔwɔ anwuro ne, sɛ ye mmoaen bɔ bamini nanu kõ sa ba asafo nanu a, ye bɔbɔ koso yenye gye paa. Sɛ yɛdwenedwene anwumvoin bɔ Yehowa le ye, ɔne kyɛbɔ wasi walo yɛ nanwo a, ɔmaa ɔdɔ bɔ yele yɛma ye ne, ɔyɛ piri paa.—Luka 1:78. w24. 08 31 ¶16-17

Sɛ Yesu mane mmenia nemɔ atee maa bɛfale ye besiele hene a, ahaa okohyire kyɛ ɔta Yudafoɛ nemɔ si, ofikyɛ sɔ mmerɛ ne, Romanfoɛ yeɛ né bedi Yudafoɛ nemɔ aso ɔ. Yeti, ‘ɔhwene ye nwo, na ɔhɔle bokaa ne aso.’ Ɔmva yenwo ne bɔ mmenia yɛle ne, Yesu amva yenwo anwurowura amanyɔnzɛm nu lle. Bɔ ɔyɛle ne, yɛkɔhora yekosua nikyee yekofi nu. Ɔwɔ nu, mmenia ngɔhyɛda ngɔhã kyɛ yɛyɛ nzɛngyerɛnneɛ ma benya aleɛ beli, yɛsa b’anwonyerɛ, anaa bɛma yeli bɛso hene. Nakoso, ebiaa bɛkɔhã alaa kyɛ ebie bɔ besusu kyɛ ɔkɔmaa nningyein kɔyɛ yé ne, yɛto aba yɛma ye, anaa yɛyɛ nikyeebie bɔ okyire kyɛ yɛta ye si ɔ. Nakoso yɛse bɔ Yesu yɛle ne pefee. Wamva yenwo wanwurowura amanyɔnzɛm nu lle. Ɔhane po kyɛ: “M’ahennie ne, offi wiase wa.” (Yoh. 17:14; 18:36) Yɛbɔ yɛte Kristofoɛ ne, yɛbɔ mmɔden kyɛ yekosuesua bɔ Yesu yɛle ne. Yeti yɛ koso yɛta Nyameɛ Ahennie ne si, yedi yenwo adanzeɛ, na yɛbɔ mbaeɛ kyɛ ɔbra.—Mat. 6:10. w24. 12 4 ¶5-6

Sɛ ésua nikyee a, pena atee ahoroɛ bɔ ɛkɔfa so kɔfa bɔ esua ne kɔyɛ adwuma ɔ. Ebie yeɛ ole kyɛ, suesua kyɛbɔ Yehowa bua ndɛen turoloo ne, na nnɛyɛ mmenia nu nyeyemuɛ. Sɛ énwu amaneɛ po a, mia wɔnye kyɛ ɛkɔyɛ bɔ Yehowa kuro ɔ, na bɔ mmɔden boka mmenia. Ɛhene kohyire kyɛ ésuesua bɔ Yesu yɛle ne. Afei koso, yere wɔnwo kã nzɛmba ne kyire mmenia fa suesua Yesu, na wamaa bɛ koso banya akyɛdeɛ bɔ ɔsombo bɔ Yehowa afa ama yɛ naso mvasoɛ. Sɛ yɛkɔso yesua Yesu wue nanwo nikye, na yɛdwenedwene yenwo a, ɔkɔmaa yekonya ɔdɔ pirikua yɛkɔma Yehowa ne Ɔwa ne. Ɛhene kɔmaa bɛ koso bekohuro yɛ dwirɛ paa. (Yak. 4:8) Yeti nningyein bɔ Yehowa afa ama yɛ, bɔ ɔboka yɛ maa yesua Yesu wue nanwo dwirɛ yɛkɔ siɛ ne, ɛmɔma yɛhɔso yɛfa yɛyɛ adwuma. w25. 01 25 ¶16-17

Tworɔnzɛm bɔ ɛnnɛ dwirɛ ne gyi so ne, bɛkora bekyire yebo kyɛ: “Amaa wayɛ kyɛbɔ nyɛlle bɔne biala ne.” Sɔ dwirɛ he maa yenwu ye kyɛ, bɛbɔ benu bɛnwo nwo ne, Yehowa gyi bɛ bɔne ne to nekaa bie bɔ ɔnnea ye ko ɔ. Bible ne fale mvandoho foforɛ hyirehyirele sɔ dwirɛ he anu wɔ Mika 7:​18, 19 ne. Wɔ sɔ tworɔnzɛm nanu ne, Yehowa hane kyɛ okofindi yɛ bɔne amukoraa kogua ɛpo nabo dɔ. Tete ne, sɛ né ebie gyi nikyee bie to ɛpo nu maa ɔkɔtɔ yebo dɔ a, né ɔkɔyɛ se paa kyɛ yesa kɔha ye bieku ɔ. Sɔ dwirɛ hemɔ bɔ yasusu yenwo ne amaa yanwu ye kyɛ, sɛ Yehowa fa yɛ bɔne kyɛ yɛ a, ɔye fi yɛ so koraa maa yɛnwo tɔ yɛ. Sɛ Dawide hane a, né ɔnnaka kyɛ: “Bɛ bɔ Nyameɛ afa b’amumuyɛɛ wahyɛ bɛ, ná wakata bɛ bɔne so ne, banya saleɛ. Sona bɔ Awurade ngɔfa ye bɔne nwo ngondaa ngogua ye so ne, wanya saleɛ.” (Rom. 4:7) Amba, Yehowa fa bɔne kyɛ koraa. w25. 02 9 ¶7-8

Yele paradise bie wɔ aseɛ so ɛnnɛ. Mmeni pee yeɛ bɛwɔ nu ɔ, na bɛ mukoraati bɛyɛ nyumaa pá. Sɔ mmenia hemɔ so anu dwo bɛ, na bɛnye gye. Bɛbɔ bɛnwo mmɔden kyɛ bengofi sɔ paradise nanu lé, na bɛnye gye yenwo kyɛ bekonya mmeni pee maa bɛkɔɔboka bɛ so ɔ. Yede, nzu yeɛ ole sɔ paradise ne? Ɛhene yeɛ ole honhom nu paradise ne. Ewiase he anu ayɛ suro paa, ofikyɛ Satan amaa mmenia tianu ayɛ se, na bellé ɔdɔ bɛmma bɛnwo. Nakoso bɔ ɔyɛ nwanwa yeɛ ole kyɛ, Yehowa amaa yanya nekaa bie bɔ asomdwee wɔ ɔ. (1 Yoh. 5:19; Nye. 12:12) Yɛ Nyameɛ bɔ okuro yɛ dwirɛ ne, wanwu bɔ ɔkɔso wɔ ewiase he anu ne. Ɛhene ati, wama yɛ honhom nu paradise bɔ ɔnate so bɔ yɛnwo waen kyɛbɔ ɔkɔyɛ a, yɛkɔhora yɛkɔsõ ye ɔ. Bible ne kã yenwo dwirɛ kyɛ, ɔte “afealeɛ,” ɔne “turo bɔ mmerɛ biala nzue doadoa nu ɔ.” (Yes. 4:6; 58:11) Bɛbɔ bɛwɔ sɔ paradise he anu ne, Yehowa ayira bɛ paa. Yeti, ɔmva yenwo kyɛ nningyein nu ayɛ se ne, bɛso anu dwo bɛ.—Yes. 54:14; 2 Tim. 3:1. w24. 04 20 ¶1-2

Sɛ ɛpena kyɛ egya a, yedé yedi kyɛ ahã yenwo dwirɛ ahyire Yehowa. Yehowa hyɛlle yenu biala bɔ kyɛ ɔkɔma yɛ ebie bɔ yekogya ye ɔ. Nakoso ɔdwene wɔnwo, na ɔse bɔ ehia ɔ. Ɛhene ati, mmerɛ bɔ eguso ɛpena ebie bɔ ekogya ye ne, ɔkɔboka wɔ. Yeti kɔso fa w’ahiasɛm to ye nyunu. (Edw. 62:8) Srɛ Yehowa kyɛ ɔma wɔ nworɛ ne aboterɛ. (Yak. 1:5) Sɛ enyanne ebie bɔ ekogya ye kesaalae po a, Yehowa ahyɛ bɔ kyɛ ɔkɔhɔso kɔnea wɔ, na ɔkɔmaa wɔnye kɔgye. (Edw. 55:22) Odikyɛ ɛhyɛ ɛhe nzorɛ: Sɛ ɛpena ebie bɔ ekogya ye a, nnɛmaa ɛhene bayɛ nikyee bɔ yenwo hia wɔ paa wɔ wɔ́ asetena nu ɔ. (Flp. 1:10) Sɛ wɔnye kɔgye a, oggyi agyaa bɔ ɛkɔhɔ anaa sigya bɔ ekoli naso, na mmom ogyi kyɛbɔ ɛne Yehowa afia si te naso. (Mat. 5:3) Sɛ ɛte sigyaniɛ a, ɔkora maa ɛfa wɔ mmerɛ pee so Yehowa. (1 Kor. 7:​32, 33) Yeti, fa sɔ mmerɛ ne yɛ adwuma yé. w24. 05 21 ¶4; 22 ¶6

Mmerɛ tendenn sɛ yeɛ odikyɛ ɛmɔ nhyehyɛɛ ne di ɔ? Sɛ ɛpere wɔnwo si gyinayɛɛ a, ɔtaa fa ɔhaw pee ba. (Any. 21:5) Yeti mmerɛ bɔ ɛmɔyɛ nhyehyɛɛ ne, odikyɛ ɛmɔto bɛ boase kyɛbɔ ɔkɔyɛ a, ebiala konwu ye mango subaen yé ɔ. Nakoso ɔnzɛkyɛ ɛmɔmaa ɛmɔ nhyehyɛɛ ne kyɛ bo so. Bible ne kã kyɛ: “Sɛ w’anyelasoɛ wɔ nikyee bie anwo ɔkyɛ a, ɔmaa ɛboto.” (Any. 13:12) Sɛɛ yeɛ aliemaamɔ kɔhora kɔboka bɛbɔ bɛyɛ nhyehyɛɛ ne ɔ? Yɛkɔhora yɛkɔto asaa yɛkɔfrɛ bɛ maa yɛne bɛ kɔbɔ nu kodidi, yɛkɔyɛ abusua soen, anaa yekɔbɔ nu yekoli angorɛ. (Rom. 12:13) Aso bekohia ebie bɔ ɔkɔboka bɛ so mmerɛ bɔ betu atee, anaa bɛkwaatena nekaa bie bɛbɔ ngɔmmɔ ne? Sɛ sɔ a, yede ɛkɔhora kɔboka bɛ. (Gal. 6:10) Sɛ bɛbɔ bɛyɛ nhyehyɛɛ ne kã kyire wɔ kyɛ ɛboka bɛ wɔ sɔ atee naso a, wɔ koso ɛkɔhora kɔyɛ sɔ. Sɛ ɔba sɔ a, nea kyɛ ɛngɔyakyi bɛ ngome ma bengowura nekaa bie. Nakoso sɛ bɛpena kyɛ bɛbɔ ngɔmmɔ bie a, ɛkɔhora kɔhwe wɔnwo kaa. w24. 05 30 ¶13-14

Bɔ ɔmaa sona ne yɛle bɔne ne, mbanyi nemɔ susu yenwo. Bɛkɔhora bekobisa bɛnwo kyɛ: Aso né onzua nikye anaa ɔngɔ asɛnga ti yeɛ ɔmaa ɔyɛle mmerɛ ne anaa? Né ɔtaa bɔ mbaeɛ hɔ ɔ? Wamaa akɔnnɔ bɔne afa ye ayɛ akoaa anaa? Ye damvomɔ yeɛ ole nwa? Nningyein benimɔ yeɛ ɔfa gye yenye ɔ, na subaen beni yeɛ ɛhene amaa wanya ye ɔ? Odé to nu kyɛ bɔ wayɛ ne, wamaa Yehowa bɔ ɔte ye Baba ne di yealɛ anaa? Ɔwɔ nu, nná edwirɛ biala yeɛ odikyɛ bebisa sona ne ɔ, nakoso sɛ bɛto bɛ boase bɛne ye bɔ ngɔmmɔ a, ɔkɔmaa bekonwu bɔ ɔwɔ ye ahone nu, na bahora baboka ye. (Any. 20:5) Afei koso, bɛkɔhora bɛkɔfa mvandoho kɔboka ye maa okonwu kyɛ bɔ wayɛ ne bɔne te piri paa. Sɛ mbanyi nemɔ yɛ sɔ a, ebiaa sɔ ɛlɛhõ nala, sona ne kɔyɛ nikyeebie bɔ okyire kyɛ ɔyɛ ye yea kyɛ ɔyɛle sɔ ɔ, na ebiaa ɔkɔsakyera ye adwene po. w24. 08 22 ¶9-11

Yesu yerele yenwo hane “ahennie ne nwo nzɛmba ne,” ofikyɛ né ɔse kyɛ Nyameɛ pena kyɛ ɔyɛ sɔ adwuma ne. Né asɛnga adwuma nanwo hia Yesu tra nikyee biala wɔ ye asetena nu. Ɔka kãa maa ɔfa ye asɛnga adwuma ne ba ayieleɛ wɔ aseɛ so ne, ohyinini “nguro ne nguraa mɔ nu,” na ohyirehyirele mmenia. (Luka 13:22) Nna ɛhene angome, na mmom osa tetele ye asuafoɛ nemɔ kyɛbɔ ɔkɔyɛ a, bɛ koso bɛkɔhã nzɛmba ne bie ɔ. (Luka 10:1) Ɛnnɛ koso, adwuma titire paa bɔ Yehowa ne Yesu mukoraati pena kyɛ yɛyɛ yeɛ ole asɛnga adwuma ne. (Mat. 24:14; 28:​19, 20) Yehowa pena kyɛ mmeni pee te nzɛmba ne, na bɛfa bɛbɔ bɛ bra. Sɛ yenya sɔ adwene ne bie a, ɔkɔmaa yɛkɔfa anwokeka yɛkɔyɛ asɛnga adwuma ne. (1 Tim. 2:​3, 4) Ɔnate kyɛ nzɛmba ne kora dé mmenia ngoa nati, Yehowa tete yɛ maa yenwu kyɛbɔ yekotu mbɔn wɔ asɛnga nu ɔ. Sɛ mmenia andie nzɛmba ne banyɛ nzakrayɛɛ ɛnnɛ po a, ebiaa bekonya yenwo atee bɛkɔyɛ sɔ kora né amaneɛnwunɛ piri ne awa ayieleɛ. w25. 03 15-16 ¶5-7

Odikyɛ Kristoniɛ biala gyina ye tiboa bɔ wafa Bible ne watete naso si gyinayɛɛ mmerɛ bɔ ɔne ebie bɔ baye ye bafi asafo nanu ne di ne. Ɛhene ati ebiaa ebiemɔ kosi gyinayɛɛ kyɛ sɛ sona ne ba adesua a, bɛde ɔngɔha bɛ kyɛ bɛkɔhyea ye ná bayɛ ye akwaaba ɔ. Koso ɛhene ngyire kyɛ yɛne ye yɛɛte yegyina yɛbɔ ngɔmmɔ. Ebiaa ebiemɔ kobisa kyɛ: ‘Bible ne nwa sɛ ebie kyea sɔ sona ne a, okyire kyɛ ɔyɔ ye yɔleɛ tɛɛ ne bie, ɛhene koso ɛɛ? (2 Yoh. 9-11)Sɛ yɛnea bɔ né sɔ tworɔnzɛm ne kã yenwo dwirɛ ne a, yenwu ye kyɛ awaefoɛ ne bɛbɔ bɛhyɛ subaen mmɔne nwo ngunaen wɔ asafo nanu ne, yeɛ ɔfa bɛnwo ɔ. (Nye. 2:20) Yeti sɛ sona ne te ɔwaefoɛ, anaa ebie bɔ ɔhyɛ subaen mmɔne nwo ngunaen a, ɛhene de mbanyi nemɔ ngɔhɔ ye berɛ. Nahorɛ nu, sɔ sona ne kɔhora kɔsesã. Nakoso kodwu kyɛ ɔkɔyɛ sɔ ne, yɛngɔhyea ye, na yɛngɔto yɛsa yɛngɔfrɛ ye kyɛ ɔbra adesua. w24. 08 30-31 ¶14-15

Mmerɛ bɔ Yesu mane mmeni lɔen bie aleɛ yiele ne, ɔmaa ye asomafoɛ nemɔ fole ɛlɛen bɛhɔle Kapanɔm. Ye bɔbɔ de, oowurale bokaa naso dɔ, kyɛbɔ ɔkɔyɛ a bengonya ye bɛngɔfa ye bengosi hene ɔ. (Yoh. 6:​16-20) Asomafoɛ nemɔ te ɛlɛen nanu bɔ bɛkɔ ne, mvrama pirikua bie tuli na asorɔkye serɛserɛ bie bɔle. Bɛkwaato bɛnye a, Yesu yeɛ ɔnate nzue naso bɔ ɔba ye. Ɔhahyirele Petro po kyɛ, ɔnate nzue naso ɔbra. (Mat. 14:​22-31) Yesu fole ɛlɛen nala pɛ, yeɛ mvrama ne yakyili ɔ. Asuafoɛ nemɔ nwo dwirili bɛ, na bɛhane kyɛ: “Amba, wɔ ole Nyameɛ Awa ne.” (Mat. 14:33) Ebie bɔ né wama mmeni lɔen bɔ bɛte sɔ aleɛ ne de, ne ɔnzɛkyɛ ahãa ɔyɛ bɛ nwanwa kyɛ wahora wanate ɛpo so ɔ. Marko hane kyɛ: “Bɛ nwo dwirili bɛ paa, ofikyɛ né bennya bɛttele paanoo ne nwo nzɛngyerɛnneɛ nabo.” (Mak. 6:​50-52) Nahorɛ nu ne, tumi bɔ né Yehowa afa ama Yesu kyɛ ɔfa yɛ nzɛngyerɛnneɛ ne, ne asomafoɛ nemɔ nnya bɛttele yebo. w24. 12 5 ¶7

Atee foforɛ koso yeɛ ole kyɛ, yɛkɔhora yɛkɔfa Yesu wue bɔ yɛkɔkae afoɛ he naso yekohyire kyɛ yɛnye sɔ ye ngoa bɔ Yehowa maa ɔfa bɔle afɔleɛ mane yɛ ne. Nhyehyɛɛ bɔ yɛ́yɛ, na wamaa yɛbɔbɔ yahora yahɔ bie ne la ahameɛ a, yɛkɔhora yɛkɔto yɛsa yɛkɔfrɛ mmenia maa bɛ koso bɛkɔwa bie. Bɛbɔ ɛto wɔsa frɛ bɛ ne, ɛyɛ a ma benwu bɔ ɔkɔhɔso wɔ dwumadie nabo ɔ. Ɛkɔhora koso kɔye vidio bɔ yeɛ ole Nzuati Yeɛ Yesu Wule Ɔ? ɔne Kae Yesu Wue Ne bɔ ɔwɔ jw.org so ne kohyire bɛ. Odikyɛ asafo nu mbanyi nemɔ to bɛsa frɛ bɛbɔ bayakyi adesua ne asɛngahɔlɛ ne. Sɛ Yehowa mmoaen bɔ bamini nanu bie sa ba mmoaen kure nanu a, wɔde nea anigye bɔ ɔkɔwa anwuro ne aseɛ so ɔ! (Luka 15:​4-7) Wɔ dwumadie nabo ne, nna aliemaamɔ ngome yeɛ odikyɛ yesoma bɛsa nu ɔ, na mmom bɛbɔ bɛte foforɛ ɔne bɛbɔ bɛwale bie ahyɛ ne koso, odikyɛ yɛkyea bɛ, na wamaa bɛnye ahã!—Rom. 12:13. w25. 01 29 ¶15

Yesu wue ne te adanzeɛ bɔ okyire kyɛ Yehowa yɛ bɔ ɔtengyɛ ɔ. Nakoso, osa maa yenwu ye kyɛ Yehowa kuro yɛ dwirɛ paa. (Yoh. 3:16; 1 Yoh. 4:​9, 10) Ebieku koso, ɔmaa yenwu kyɛ, nna daa ngoa ngome yeɛ Yehowa pena kyɛ yenya ye ɔ, na mmom ɔpena kyɛ yɛboka ye abusua naso. Wɔde susu ɛhe anwo nea oo, mmerɛ bɔ Adam yɛle bɔne ne, Yehowa foane ye fili ye abusua nanu. Ɛhene ati mmerɛ bɔ bɛwole yɛ ne, né yɛbokka Nyameɛ abusua naso. Nakoso, ɔnate Yesu wue nati, Yehowa afa yɛ bɔne ahyɛ yɛ, yeti sɛ yenya Yehowa nu gyidie na yɛyɛ sotie yɛma ye a, ɔkɔmaa yɛkɔɔboka ye abusua naso kyẽabie. Ɛnnɛ po, yɛne Yehowa ne yeliemamɔ Kristofoɛ afia kɔhora kɔyɛ kama. Ɛhe mukoraati maa yenwu ye kyɛ, Yehowa kuro yɛ dwirɛ amba!—Rom. 5:​10, 11. w25. 01 21 ¶6

YESU ngoa bɔ ɔfa bɔle afɔleɛ ne, ɔte akyɛdeɛ pirikua paa! (2 Kor. 9:15) Ɔnate ye wue nati, ɛne Yehowa kɔhora kɔfa adamvoa. Afei koso, ɔmaa enya anyelasoɛ kyɛ ɛkɔhora konya daa ngoa. Yehowa kuro yɛ dwirɛ paa, na ɛhene ati yeɛ ɔmaa Yesu oowuli ɔ. Odikyɛ ɛhe kã yɛ maa yɛda ye ase paa! (Rom. 5:8) Bɔ ɔkɔyɛ né yɛ wora amvi bɔ Yehowa ne Yesu ayɛ ama yɛ ne, Yesu hane kyɛ yɛkae ye wue ne afoɛ biala. Sɛ yɛkɔ sɔ aluolue nabo a, okyire kyɛ yɛnye sɔ bɔ bayɛ bama yɛ ne paa. (Luka 22:​19, 20). Yɛkɔkae Yesu wue ne Wuhue, April 2, 2026, na yɛse ye paa kyɛ yɛ mukoraati yɛboa yɛnwo kyɛ yɛkɔhɔ bie. Sɛ odwu mmerɛ bɔ yɛfa yɛkae Yesu wue ne, ná yɛdwenedwene bɔ Yehowa ne Ɔwa ne ayɛ ama yɛ nanwo a, yekonya so mvasoɛ paa. w25. 01 20 ¶1-2

Ɔdɔ bɔ Yehowa ne Yesu Kristo ala ye ali ahyire wɔ ne, kɔso sua yenwo nikye na dwenedwene yenwo. Mmerɛ bɔ ɔka kãa maa yɛkae Yesu wue ne afoɛ he, anaa ɛhene si ne, ɛkɔhora kɔkenga edwirɛ bɔ ɔwɔ Nzɛmba nanu ne bie. Ɛyɛ a nnɛpere wɔnwo kenga edwirɛ pee, na mmom kenga ye ngakã. Afei to wɔ boase yɛ nhwehwɛmuɛ pena nikyee foforɛ bɔ yeti yeɛ odikyɛ yenya ɔdɔ yɛma Yehowa ne Yesu ɔ. Ebiaa ɛwale asafo nanu ahyɛ paa. Yeti ɛkɔhora konya adwene kyɛ, kyɛbɔ Yehowa yɛ bɔ ɔtengyɛ, ɔdɔ bɔ ole ye, ɔne Yesu wue ne de, ɛse yenwo dwirɛ pee. Ɛhe ati yenwo nhia kyɛ ekosua yenwo dwirɛ foforɛ biala kõ. Nakoso bɔ ɔwɔ nu yeɛ ole kyɛ, yɛngɔhora yengosua sɔ nningyein hemɔ nwo nikyee yengoyie lle. Yɛ nwomaa ahoroɛ ne kã sɔ nningyein hemɔ nwo dwirɛ pee, yeti ɛyɛ a to wɔ boase sua. w25. 01 24-25 ¶13-15