Bible nu dwirɛ he maa yenwu bɔ ɔkɔhora kɔto bɛbɔ bɛso Yehowa nanu biala ɔ. Sɛ ebie yɛ bɔne pirikua bie a, ebia ɔkɔha kyɛ, “Ɛhe de ofuni me nu,” anaa “Né menye nne menwo so koraa.” Nakoso sɛ sona ne susu bɔ wasi nanwo a, okonwu ye kyɛ olimoa tuli agyirɛ biemɔ bɔ né ɔttemaye, kora yeɛ ɔkwaayɛ sɔ bɔne ne ɔ. Ebie yeɛ ole kyɛ, ebia ɔfale yenwo bɔle mmenia bɔ bɛ bra asɛkye, ɔfale nningyein bɔ ɔttemaye gyele yenye, ɔhɔle nekaa bie bɔ ɔnzɛkyɛ Kristoniɛ kɔ, anaa wɛbsait biemɔ bɔ ɔnzɛkyɛ Kristoniɛ kɔ so ɔ. Afei koso, ebia né wayakyi mbaeɛ bɔlɛ, ɔngenga Bible ne ko, anaa wayakyi adesua ne asɛnga hɔlɛ po. Tekyɛ abrandeɛ bɔ yenwo dwirɛ wɔ Anyandera nwomaa nanu ne, sɛ sɔ sona ne kɔyɛ bɔne a, ɔngɔhora ngɔha kyɛ ofuni ye nu. Nzu yeɛ yesua yefi nu ɔ? Nna bɔne ngome yeɛ odikyɛ yɛtwe yɛnwo yefi yenwo ɔ, na mmom nningyein bɔ ɔkɔmaa yɛkɔɔyɛ bɔne ne koso boka ye. Sɔ pɛpɛɛpɛ yeɛ Solomon hane ɔ, mmerɛ bɔ ɔhane abrandeɛ ne, ɔne brasua tuutuuniɛ nanwo dwirɛ yiele ne.—Mat. 5:​29, 30. w24. 07 16 ¶10-11

Nzu yeɛ ole sɔ agyapadeɛ ne? Ɛhene yeɛ ole Ahennie nanwo nzɛmba bɔ yɛkã yekyire mmenia, kyɛbɔ ɔkɔyɛ a bekonya ngoa ne. (2 Kor. 4:1) Ngukue ne koso, yeɛ ole nzu? Yeɛ ole bɛbɔ bɛsõ Nyameɛ, bɔ bɛkã nzɛmba ne bekyire mmenia ne. Wɔ Pɔɔlo aberɛ so ne, ne adwadifoɛ fa nningyein biemɔ bɔ yenwo hia tekyɛ aleɛ, esikaa, ɔne nzaa gua ngukue nu bɛfa betu atee. Yɛkoso, Yehowa afa asɛnga adwuma bɔ yenwo hia paa ne wawura yɛsa, yeti ɔkɔma yɛ anwoserɛ bɔ yɛkɔfa yɛkɔyɛ ɔ. Sɛ odwu mmerɛ bie na yɛbaahɔ asɛnga a ne yekunu tete yɛ. Ɔnate kyɛ ɛyɛ a, yɛnze kyɛbɔ mmenia kɔyɛ bɛ nikye ɔ. Yɛkɔyɛ sɛɛ né yahora yali ɔhaw bɔ ɔte sɔ naso? Mmerɛ bɔ bɛhã behyirele asomafoɛ nemɔ kyɛ nnɛmaa bɛkã nzɛmba ne, baamma esuronyi anga bɛ. Mmom bɛsrɛle Yehowa kyɛ ɔma bɛ ‘ahoneserɛ,’ anaa akokoduro ‘bɔ bɛkɔfa bekodwudwo ɔ.’ Yehowa mane bɛ mbaeɛ nanwo mmuayɛɛ ɛberɛ ala. (Aso. 4:​18, 29, 31) Yɛkoso, sɛ yɛbaahɔ asɛnga na yekunu tete yɛ a, odikyɛ yɛsrɛ Yehowa kyɛ ɔma yɛhɔso yenya ɔdɔ yɛma mmenia, kyɛbɔ ɔkɔyɛ a, yekoli esuronyi bɔ wahã yɛ naso ɔ. w24. 04 16 ¶8-9

Ɔdɔ bɔ yele yɛma Yehowa ne, yeɛ ɔkã yɛ maa yɛte ye dumaa nanwo ɔ. (Mat. 6:9) Yɛpena kyɛ mmenia nwu ye kyɛ, ngondombo bɔ Satan apɛ ato Yehowa so afa asɛkye ye dumaa ne, ɔtte nahorɛ. (Gye. 3:​1-5; Yob 2:4; Yoh. 8:44) Yeti, yɛpena kyɛ yɛkã nahorɛ bɔ ɔfa Yehowa nwo ne yekyire ebiala bɔ okotie, yɛfa yekyire kyɛ yɛta ye si. Yɛpena kyɛ mmenia nwu ye kyɛ, ɔdɔ yeɛ ɔte Yehowa subaen titire ɔ, na ye yeɛ ɔkɔhora koli yɛ so maa yɛnwo kɔtɔ yɛ ɔ. Afei koso, ɔngɔhyɛ ɔnate ye Ahennie naso kɔye yɛ haw mukoraati kofi berɛ, na ɔkɔmaa yekonya anigye ne asomdwee. (Edw. 37:​10, 11, 29; 1 Yoh. 4:8) Sɛ yɛmaa mmenia nwu sɔ dwirɛ hemɔ bɔ ɔfa Yehowa nwo ne a, okyire kyɛ yɛte ye dumaa nanwo. Ɛhene koso maa yɛnye gye ofikyɛ dumaa bɔ ɔla yɛ so ne, yenwo adwuma alaa yeɛ yɛyɛ ne. w24. 05 18 ¶12