SUMANA 8-14 YA JUNHO YA 2026
NYIMBO 8 Yahova Ndi Pakuthawira Pathu
“Mulungu Analonga Undimomwene” Ndzidzi Onsene Asakwanirisa Mapikiro Ace
“Yahova, Mulungu analonga undimomwene, imwe mwandiombola.”—MAS. 31:5.
PINAFUNA IFE KUPFUNDZA
Tinapfundza pinthu pyakuti pinawangisa cinyindiro cathu cakuti Yahova anakwanirisa pyonsene pidapikira iye, mbamalisa uthambi wa Sathani.
1. Mwakubverana na Masalmo 31:2-5, thangwi yanji tinakwanisa kunyindira Yahova?
TIRI kukhala mu dziko yakutongwa na Sathani, yakuti anthu kazinji kene asasandukirana, pontho asalonga uthambi. Mphyakunentsa kudziwa munthu adathema kunyindirwa. Maempreza mazinji asacita pinthu pyakusowa ulungami. Anyakugulisa pinthu asalonga uthambi kuna ale anagulisira iwo toera agule pinthu pyawo. Pontho anthu azinji adzindikira kuti nee asafunika kunyindira ngakhale axamwali awo a ponda ndipondembo. Mbwenye ndi pyakutsandzayisa kudziwa kuti tinakwanisa kunyindira Yahova ndzidzi onsene. Iye ndi “Mulungu analonga undimomwene.” (Lerini Masalmo 31:2-5.) Undimomwene ndi n’khaliro wakufunika kakamwe kuna Yahova. Ife tinakwanisa kunyindira pyonsene pinalonga iye na pinacita iye.
2. Tinapfundzanji mu nsolo uno?
2 Mu nsolo uno, pakutoma tinapfundza kuti thangwi yanji tisafunika kunyindira Yahova na ntima onsene. Buluka penepo, tinapfundza kuti Mulungu wandimomwene ali kucitanji cincino toera kukwanirisa mapikiro ace, pontho kuti anafudza tani dziko ino ya Sathani. Kupfundza pyenepi kunatiphedza toera kulonga na anango thangwi ya Yahova mwacipapo.
THANGWI YANJI TINAKWANISA KUNYINDIRA MULUNGU WANDIMOMWENE?
3. Thangwi yanji tisafunika kunyindira Yahova na ntima onsene?
3 Ife tinakwanisa kunyindira Yahova thangwi iye ndi Nciti. Iye acita kudzulu, dziko yapantsi na pinthu pyonsene piri na umaso. (Gen. 1:1; Mas. 36:9; Apok. 4:11) Yahova acitambo pinthu pyakuti pisatiphedza kupitiriza kukhala na umaso. Iye ndzidzi onsene asayang’anira pinthu pyonsene. Natenepa, ife tinakwanisa kukhala na cinyindiro consene cakuti Yahova anatsalakana umaso wathu cincino na ntsogolo, thangwi iye ndi Nciti, waudziwisi na wamphambvu zonsene.
4. Tisadziwa tani kuti Yahova asatifuna?
4 Tinakwanisa kunyindira Yahova thangwi asatifuna. Yahova aticita toera tikhale m’maso, pontho titsandzaye na umaso ninga pinacita iye. Yahova aticita mwakulandana na iye, pontho na luso yakupangiza makhaliro ace ninga ufuni na kukoma ntima. (Gen. 1:26) Yahova atipasambo ufulu wakusankhula, pontho atipasa dziko yadidi kakamwe toera kukhala. (Mas. 115:16) Kusiyapo pyenepi, iye akhadapasa basa yadidi kakamwe anyakubala athu akutoma, toera kucitisa dziko yapantsi kukhala paraizu. (Gen. 1:28; 2:15) Yahova aapasambo pyakudya pizinji, miti yakusiyana-siyana, pinyama na pinthu pinango pizinji. Iye acita pyenepi toera iwo akwanise kukhala akutsandzaya. Pyenepi pisapangiza kuti “ufuni wakukhonda mala wa Yahova usakhala kwenda na kwenda.”—Mas. 103:17.
5. (a) Yahova acitanji pidadawa Adhamu na Eva? (b) Kodi Yahova akwanirisa mapikiro api anango? (Onani bokosi ya nsolo wakuti “Mulungu Ndzidzi Onsene Asalonga Undimomwene.”)
5 Tinakwanisa kunyindira Yahova thangwi ndzidzi onsene asacita pinalonga iye. Yahova ‘nee acita dziko yapantsi papezi, mbwenye aicita toera anthu akhalemo.’ (Iza. 45:18, 19) Pidakhonda kubvera Adhamu na Eva, iwo atongwa kufa. Pyenepi pikhali ninga Sathani acimwanisa pikhafuna Yahova kuna anthu pa dziko yapantsi. Mbwenye pyenepi nee mbapidakwanisika; Yahova asakwanirisa pyonsene pinalonga iye. (Iza. 46:10, 11) Iye apitiriza na cifuno cace ca kudzadza dziko yapantsi na anthu akulungama. Yahova atawirisa kuti Adhamu na Eva akhale na ana. Iye aperekambo Mwanace m’bodzi ekha ninga ciomboli toera kupulumusa ana a Adhamu toera akwanise kukhala na cidikhiro ca umaso wa kwenda na kwenda.—Juw. 3:16.
MULUNGU WANDIMOMWENE NEE ACINJA CIFUNIRO CACE
6. Pidamala kudawa Adhamu na Eva, Yahova alonganji?
6 Adacitisa Adhamu na Eva kukhonda kubvera Mulungu ndi “nyoka ire yakale, inacemerwa Dyabo na Sathani.”a (Apok. 12:9; Gen. 3:4, 5; Juw. 8:44) Na thangwi ineyi, Yahova alonga kuti nyoka ineyi mbidafudzwa. (Gen. 3:15) Pyenepi mbapidzati kucitika, anthu azinji mbadacita pinthu ninga Sathani. Mbwenye anango mbadakhala akukhulupirika kuna Yahova.
7. Mbani adasankhula kubvera Sathani, pontho ninji pinafuna kudzaacitikira?
7 Aanju na anthu azinji asiya kubvera Mulungu mbabvera Sathani. Thangwi yakukhonda bvera Mulungu, iwo adzakhala ana a Dyabo. Mbwenye Yahova akhazikisa ndzidzi toera kufudza Sathani na onsene anamphedzera.—Dhan. 2:44; Aroma 16:20.
8. Yezu acitanji mu caka ca 1914? (Onanimbo mafoto.)
8 Thangwi yanji tinakwanisa kukhala na cinyindiro cakuti Yahova anakwanirisa cifuniro cace cakufudza Sathani na onsene anamphedzera? Mu caka ca 1914, Yezu atomesa nkhondo. Iye amenyana na Sathani na madimonyo ace, mbaaponya pa dziko yapantsi. (Apok. 12:7-9) Nkhondo ineyi yacitika kudzulu, mbwenye anthu pa dziko yapantsi adzathabuka thangwi ya nkhondo ineyi. Bhibhlya isalonga: “Mbwenye dzedze pa dziko yapantsi na bara, thangwi Dyabo atcita kuna imwe, iye ali na ukali ukulu, thangwi asadziwa kuti ndzidzi wace wasala pangʼono basi.” (Apok. 12:12) Kutomera mu caka ca 1914, cifuno cikulu ca Sathani ndi kucitisa anthu azinji kakamwe kumbvera. Na thangwi ineyi, nyatwa ziri kuthimizirika kakamwe pa dziko yapantsi. Thimize pano, Yezu anafudza Sathani na mautongi onsene a dziko ino na anthu onsene anacita pinafuna Sathani. (Apok. 6:2) Yezu anacitisa kuti anthu onsene adziwe kuti Sathani ndi wakuipa, pontho akhalonga uthambi thangwi ya Yahova. (Mas. 45:4-6) Anthu onsene anadzadziwa kuti Yahova ndi Mulungu wandimomwene!—Ezek. 38:23.
World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images
Kutomera caka ca 1914, makhaliro a dziko ino ali kutekera kakamwe (Onani ndima 8)
YAHOVA ALI KUGUMANYA ALE ANANFUNA
9. Yahova ali kucitanji lero?
9 Mu ndzidzi wakuti Sathani na ale anamphedzera adzati kufudzwa, Yahova ali ‘kugumanya pinthu pyonsene mwa Kristu, pinthu pyakudzulu na pinthu pya pa dziko yapantsi.’ (Aef. 1:10) Mafala akuti “pinthu pyakudzulu” asaimirira Akristu akudzodzwa adasankhulwa na Yahova toera kutonga pabodzi na Yezu kudzulu. Mafala akuti “pinthu pya pa dziko yapantsi” asaimirira anthu anafuna kudzakhala m’Paraizu pa dziko yapantsi kwenda na kwenda. Alambiri onsene a Yahova ali kucita pyonsene pinakwanisa iwo toera kupangiza kuti Sathani ndi nyauthambi, pontho iwo asaphedza anango kudziwa undimomwene.
10. Ninji pinacita Yahova toera kuphedza anthu kudziwa undimomwene? (Apokalipse 14:6, 7)
10 Toera kugumanya anthu anafuna undimomwene pa dziko yonsene, Yahova ali kuphatisira basa yakumwaza mphangwa. (Lerini Apokalipse 14:6, 7.) Maseze Yahova asaphatisira anthu toera kumwaza mphangwa, aanju asacitambo nawo pabodzi basa ineyi. Mu ndzidzi unamwaza mphangwa atumiki a Mulungu, iwo asapangiza undimomwene thangwi ya iye, pontho asaphedza anthu kubvesesa kuti Sathani asaphatisira uphemberi wauthambi toera kulonga uthambi. Sathani asacita pyenepi mu pyaka pizinji. (Apok. 18:2, 4) Thimize pano, mauphemberi onsene authambi anafudzwa, pontho onsene anafuna Mulungu wandimomwene, anadzampasa mbiri.—Apok. 17:16.
11. Tinakwanisa tani kudzindikira alambiri andimomwene a Mulungu?
11 Yahova ali kugumanya anthu a mitundu yakusiyana-siyana akubuluka m’madziko akusiyana-siyana. (Apok. 7:9, 10) Iwo angabva thangwi ya Yahova pa ulendo wakutoma, asakwanisa kukhala na cinyindiro cakuti agumana undimomwene, pontho asakhala akutsandzaya thangwi yakugumanyikana na mbumba ya Mulungu. (Marko 13:10) Lero, tisakwanisa kuona mwadidi kuti mbani anatumikira Yahova munjira yadidi. Mprofeta Malakiya alonga: “Imwe munadzaona pontho kusiyana pakati pa munthu wakulungama na munthu wakucita pyakuipa, pakati pa ule anatumikira Mulungu na ule anakhonda kuntumikira.” (Mal. 3:18) Tinakwanisa kudzindikira alambiri andimomwene a Mulungu kubulukira ku makhaliro awo na basa inacita iwo yakumwaza mphangwa.
12. Ninji pinacitika tingamwaza mphangwa zadidi?
12 Tingamwaza “mphangwa zadidi za Umambo,” tisabvera Yezu, pontho tisakwanirisa maprofesiya. (Mat. 24:14; 28:18-20) Kusiyapo pyenepi, tisaphedza anthu azinji pa dziko yonsene toera akhale atowereri andimomwene a Yezu, na kukhala na cidikhiro cakulambira Mulungu wandimomwene kwenda na kwenda. Kumwaza mphangwa zadidi ndi mwai ukulu kakamwe, thangwi tisaphedzera kukwanirisa cifuno ca Yahova!
NKHABEPO ANAFUNA KUPINGIZA YAHOVA KUCITA CINTHU
13. Sathani makamaka asatcinga ani, pontho thangwi yanji?
13 Sathani ali wakuipirwa kakamwe, “thangwi asadziwa kuti ndzidzi wace wasala pangʼono basi,” pontho kuti dziko yace inafudzwa. (Apok. 12:12, 13) Sathani asatcinga makamaka Akristu akudzodzwa, “ale anabvera matongero a Mulungu, akuti ali na basa yakupereka umboni wa Yezu.” (Apok. 12:17; 14:12) Iye asatcingambo onsene anaaphedzera.
14. Ninji pinafuna kucitika Sathani angapomokera mbumba ya Yahova? (Onanimbo foto)
14 Bhabhilonya Wankulu angamala kufudzwa, ale anaphedzera Sathani anadzapomokera mbumba ya Yahova. Natenepa nkhondo ya Armajedhoni inatoma. (Apok. 16:13, 14, 16) Yezu na anyankhondo a kudzulu anadzapulumusa alambiri a Yahova, mbafudza anthu anango onsene akukhonda kubvera. (Apok. 19:19-21) Ndi mu ndzidzi unoyu unafuna kufudzwa anthu onsene akuipa. (Apok. 21:8) Mu ndzidzi unoyu, anthu onsene anadzadziwa kuti Yahova asacita pinthu pyadidi, pontho ndzidzi onsene asalonga undimomwene.
Yezu na anyankhondo akudzulu akwira makavalo mu ndzidzi wa nkhondo ya Armajedhoni, pontho ali dzololo toera kufudza anyamalwa a Mulungu (Onani ndima 14)
15. Thangwi yanji tiri na cinyindiro cakuti nkhabepo anakwanisa kupingiza Yahova kucita pinafuna iye? (Izaiya 65:16, 17) (Onanimbo foto.)
15 Lero anthu ali akugawana, pontho asalonga uthambi kuna unango na ndzace. Mbwenye mbumba ya Yahova iri kupitiriza kukhala yakuphatana. Basa yakugumanya anthu anafuna undimomwene iri kucitika. Nkhabepo munthu anakwanisa kupingiza Yahova kupasa nkhombo alambiri ace na basa inacita iwo. (Lerini Izaiya 65:16, 17.) Tinakwanisa kukhala na cinyindiro cakuti mapikiro a Yahova anakwanirisika. Thangwi yanji? Thangwi pa Aroma 8:38, 39, mpostolo Paulu alonga tenepa: “Nee kufa, nee umaso, nee aanju, nee mautongi, nee pinthu pya cincino, nee pinthu pyantsogolo, nee mphambvu, nee pinthu pyakudzulu, nee pinthu pya pantsi, nee pinthu pinango pidacitwa na Mulungu, pinakwanisa kuticimwanisa kutambira ufuni wa Mulungu, wakuti uli muna Mbuyathu Kristu Yezu.”
Mu dziko ipswa, nee tinakumbukabve nyatwa zinatamba ife lero (Onani ndima 15)
16. Thangwi yanji musanyindira Yahova na ntima onsene?
16 Tiri na mathangwi akunyindira Yahova na ntima onsene, thangwi iye ndi Mulungu analonga undimomwene. Iye ndi Nciti wathu, pontho asatifuna kakamwe. Iye ali kugumanya anthu azinji kakamwe pa dziko yonsene yapantsi toera amulambire mwadidi. (Iza. 60:22; Zak. 8:23) Ife tisadziwa kuti Yahova ndzidzi onsene asakwanirisa pinalonga iye, pontho mwakukhonda dembuka, iye anafudza dziko ino ya Sathani na uthambi wace. Ife tisacita phembero ninga idacita Dhavidhi kuti: “Mbasimbwe Yahova Mulungu, . . . Ndiye basi anacita pinthu pyakudzumisa. Dzina yace yakubvekera mbisimbwe kwenda na kwenda, pontho mbiri yace mbibvekere pa dziko yonsene yapantsi.”—Mas. 72:18, 19.
NYIMBO 2 Dzina Yanu Ndi Yahova
a Bhibhlya nee isalonga dzina yandimomwene ya anju unoyu wakukhonda bvera. Iyo basi ene isancemera na cidzo cakuti “Dyabo” cakuti cisabveka Nyakupambizira na “Sathani” cakuti cisabveka Mpingizi.