Khalani na Maonero a Yahova Thangwi ya Nyatwa

1-2. Tisafunika kucitanji toera tikwanise kupirira nyatwa zathu? (Onanimbo foto.)

KODI imwe muli kutsalakanwa mwakuipa? Muli kutcingwa na acibale anu thangwi ya cikhulupiro canu? Kodi imwe muli na utenda peno mwakalamba? Muli wakutsukwala thangwi yakuferwa na munthu wakuti mukhanfuna kakamwe? Ninga atumiki anango a Yahova, panango umaso wanu ‘wadzala na nyatwa na kutsukwala.’—Mas. 90:10.

² Toera tikwanise kupirira nyatwa, tisafunika kuziona munjira yadidi. Thangwi yanji? Thangwi tingakhonda kuona nyatwa zathu munjira yadidi, ife nee tinakwanisa kuzipirira. Mwacitsandzo, nyakutekenya karu nee anakwanisa kuona mwadidi madjendje, vidhru yakutsogolo ingapswipa. Mbwenye vidhru ingacena, anaona madjendje, pontho anakwanisa kudziwa pinafunika iye kucita angaaona. Munjira ibodzi ene, toera kupirira nyatwa zathu, tisafunika kuziona munjira inaziona Yahova. Natenepa, mu nsolo uno, tinapfundza (1) pinthu pinafunika ife kukumbuka tingatamba nyatwa, (2) pinafuna kuticitikira tingakhonda kukhala na maonero adidi thangwi ya nyatwa zathu na (3) pinafunika ife kucita pinthu pyakuipa pingaticitikira.

KUKHALA NA MAONERO ADIDI THANGWI YA NYATWA

3. Mu dziko ino yakuipa, ife tonsene tisafunika kudikhiranji?

³ Mu dziko ino, ife tonsene tisatamba nyatwa. Mu ndzidzi unapitiriza ife kukhala akusowa ungwiro, pontho dziko mbitongwa na Sathani, ife tonsene tinatamba nyatwa. Kusiyapo pyenepi, mu ndzidzi unafendedzera ife kumala kwa dziko ino, ife tinapitiriza kutamba nyatwa zizinji, ninga piteketeke, kudzala kwa madzi, cidengwa ca kupya kwa pinthu peno nyatwa zinango zinacitiswa na anthu akuti asacita pinthu pyakuipa. (Mat. 24:8; 2 Tim. 3:13) Yahova mbadamalisa nyatwa zenezi, mbadakhala ninga ali kuphedzera Sathani kutonga dziko ino. Mu dziko ino, ife tonsene tinatamba “nyatwa.”—Ekle. 9:12, cidzindikiro capantsi.

4. Thangwi yanji Akristu asatamba nyatwa zizinji?

⁴ Akristu asatamba nyatwa zizinji thangwi asabvera Yezu. Mwakubwereza-bwereza, Yezu apanga anyakupfundzace kuti iwo mbadatcingwa thangwi ya cikhulupiro cawo. (Mat. 24:9; Juw. 16:2) Na thangwi ineyi, nee tisadzumatirwa tingatcingwa. Ife tisadziwa mathangwi anaticitisa kutcingwa, pontho tisafuna kupitiriza kukhala akukhulupirika. (1 Ates. 3:3, 4) Mwandimomwene, tingatamba nyatwa thangwi ya cikhulupiro cathu, tisakhala na cinyindiro cakuti tiri kufamba munjira inatsogolera ku umaso wakukhonda mala. Kusiyapo pyenepi, tisapangiza kuti tisaphedzera Yahova, tayu Sathani. Ubodzi mwa uthambi unalonga Sathani ndi wakuti anthu nee asafunadi Mulungu, basi ene asantumikira thangwi pinthu piri kuafambira mwadidi. Natenepa, Sathani asatcinga atumiki a Yahova toera kuacimwanisa kukhala akukhulupirika. (Yobe 1:9-11) Tingapirira tisapangiza kuti mwandimomwene tisafuna Yahova, pontho iye asatsandzaya.—Mis. 27:11.

5. Tisapfundzanji na bukhu ya Ekleziaste 7:13, 14? (Onanimbo mafoto.)

⁵ Yahova asatawirisa nyatwa. Yahova nee ndi wakuipa, pontho nee asafuna kutiyesera. (Tiya. 1:13) Mphapo thangwi yanji Salomoni alemba kuti “ntsiku ya nyatwa” ndi “mabasa a Mulungu wandimomwene”? (Lerini Ekleziaste 7:13, 14.) Salomoni nee akhafuna kulonga kuti ndi Yahova anacitisa nyatwa, mbwenye akhafuna kulonga kuti Iye asatawirisa kuti nyatwa zicitike. Mphapo tisapfundzanji na mafala adalonga Salomoni pa Ekleziaste 7:13, 14? Tisapfundza kuti mu dziko ino ya Sathani ntsiku zinango tinakhala mwadidi, mbwenye ntsiku zinango tinatamba nyatwa. Tingakhala mwadidi, tinakwanisa kupereka takhuta kuna Mulungu, mbationa pyenepi ninga muoni udatipasa iye. Salomoni atikumbusa kuti ‘nee tinakwanisa kudziwa pinafuna kuticitikira kutsogolo.’ Natenepa, nee tinakwanisa kudziwa ntsiku inafuna ife kutamba nyatwa peno ntsiku inafuna ife kukhala mwadidi. Pyenepi pisabveka kuti pinthu pyakuipa pinakwanisa kucitikira anthu akuipa na adidi ene.

6. Thangwi yanji Yahova asatawirisa kuti titambe nyatwa? (Ahebheri 12:7, 11)

⁶ Yahova ali kutipfundzisa toera tikhonde kunyindirika, mbwenye tinyindire iye. Yahova asaona nyatwa zonsene zinatamba ife, pontho ndzidzi onsene asatitsalakana. Maseze asatawirisa kuti tifambe “n’gowa ya cidima cikulu,” Yahova asapitiriza kutitsogolera, kupangiza kuti asatifuna na kutipasa mphambvu toera kupirira. (Mas. 23:4) Nyatwa zinatamba ife zisatiphedza kudzindikira pinthu pinafunika ife kusasanyira, pontho na ciphedzo ca Mulungu, ife tinakwanisa kusasanyira pyenepi. (Lerini Ahebheri 12:7, 11.) Mwacitsandzo, Yobe akhafunika kukhala wakucepeseka. Yahova nee acitisa Yobe kutamba nyatwa. Mbwenye atawirisa kuti nyatwa zenezi zicitike, pontho aziphatisira toera kupfundzisa Yobe pinthu pyakufunika kakamwe. (Yobe 42:1-6) Mwakukhonda tsalakana nyatwa zinatamba ife, tisadziwa kuti Yahova nee anatawirisa kuti nyatwa zenezi zitithabuse kwenda na kwenda. Tingapirira mbatipitiriza kukhala akukhulupirika, tinakwanisa ‘kuwina mu pinthu pyenepi pyonsene.’—Aroma 8:35-39.

7. Thangwi yanji munakwanisa kukhala wakutsandzaya mungatcingwa?

⁷ Tingatcingwa, tinakwanisa kukhala akutsandzaya. Khala muli kutcingwa thangwi ya cikhulupiro canu, lekani kunyerezera kuti Yahova nee asakuphedzani. M’mbuto mwace, kutcingwa kusapangiza kuti ndimwe wakutawirika kuna iye. (Mat. 5:10-12) Mungaona pinthu munjira ineyi, imwe munakwanisa kukhala wakutsandzaya mungatcingwa, ninga pidacita apostolo. (Mabasa 5:40-42) Kusiyapo pyenepi, imwe munakwanisa kuphedza anango kudziwa undimomwene thangwi ya Yahova na ‘kunsimba.’ (1 Ped. 2:12) Nyerezerani pidacitikira Zuze pidaendeswa iye ku Ejitu. Yahova amphedza, pontho ampasa nkhombo m’midzidzi ya nyatwa na yadidi. Yahova anatiphedzambo tingatamba nyatwa.—Gen. 39:3, 23.

8. Ninji pontho pinafuna kutiphedza toera tikwanise kupirira m’midzidzi ya nyatwa?

⁸ Yahova akhazikisa ntsiku inafuna iye kumalisa nyatwa. Pidacitikira Yobe pisatikumbusa kuti nyatwa zinatamba ife zinamala. Bhibhlya isalonga kuti “Yahova apasa nkhombo kakamwe Yobe kukhundu yakumalisa ya umaso wace kupiringana pakutoma.” (Yobe 42:12) Munjira ibodzi ene, Yahova anatipasa nkhombo mu dziko ipswa. Umaso wathu wa ntsiku zino ndi wakucepa kakamwe, pontho uli na nyatwa zizinji tingaulandanisa na umaso unafuna kukhala na ife mu dziko ipswa, wakuti ndi wakwenda na kwenda. Mwandimomwene, kunyerezera pyenepi kunatiphedza toera tipirire mpaka kunkhomo.—Mat. 24:13.

NINJI PINAFUNA KUTICITIKIRA TINGAKHONDA KUKHALA NA MAONERO ADIDI THANGWI YA NYATWA ZATHU?

9. Ninji pinafuna kuticitikira tingakhala na maonero akuphonyeka thangwi ya nyatwa zathu?

⁹ Tingakhala na maonero akuphonyeka thangwi ya nyatwa zathu, panango tinatekeresa pinthu. Mwacitsandzo, panango tinanyerezera kuti ndi Yahova anacitisa nyatwa zinatamba ife. M’midzidzi inango, Yobe anyerezera kuti ndi Yahova akhacitisa nyatwa zikhatamba iye. Mbwenye maonero anewa akuphonyeka ancitisa kuyesera “kupangiza kuti akhali wakulungama kupiringana Mulungu.” (Yobe 32:2) Kusiyapo pyenepi, pakutoma Noemi apasambo mulando Yahova thangwi ya nyatwa zace. (Rute 1:13, 20, 21) Yobe na Noemi mbadapitiriza na manyerezero anewa, mbadaipirwa na Yahova, pontho panango mbadaluza uxamwali wawo na iye. (Mis. 19:3) Yahova aaphedza kukhala na maonero adidi thangwi ya nyatwa zawo, pontho aapasa nkhombo thangwi yakukhulupirika kwawo.

10. Ndi pinthu pipi pyakuti panango tinapinyerezera tingatamba nyatwa?

¹⁰ Maseze tisadziwa kuti Yahova nee ali na mulando thangwi ya nyatwa zathu, panango tinatoma kubvundzika khala iye aciri kutitsalakana. Manyerezero anewa akuphonyeka anamalisa mphambvu zathu. (Mis. 24:10) Mambo Dhavidhi na mprofeta Abhakuki atambambo nyatwa, pontho midzidzi inango akhabvundzika khala Yahova akhabvesera maphembero awo. (Mas. 10:1; Abha. 1:2) Mbwenye iwo nee asiya kucita phembero. Yahova atawira maphembero a amuna anewa akukhulupirika, pontho apitiriza kuaphedza. Yahova anacitambo pibodzi pyene na imwe.—Mas. 10:17.

11. Ninji pinafuna kucitika tingakhonda kukhala na maonero adidi thangwi ya nyatwa zathu?

¹¹ Tingakhonda kukhala na maonero adidi thangwi ya nyatwa zathu, panango tinanyerezera kuti pinthu pyenepi nee pikhafunika kuticitikira. (1 Ped. 4:12) Anyakupfundza a Yezu akhanentseka toera kubvesesa kuti iwo mbadatcingwa kakamwe. (Luka 18:33, 34) Yezu akhadaapanga kuti iye mbadathabuswa. Pedhru nee atawira pyenepi, thangwi akhanyerezera kuti Mulungu mbadatsidzikiza Yezu. Mbwenye Yezu akhadziwa kuti mbadanyerezera ninga Pedhru, mbapidakhala pyakunentsa kuna iye kucita cifuno ca Yahova na kupirira nyatwa. (Marko 8:31-33) Ngakhale pidafa Yezu, anyakupfundza adembuka kubvesesa kuti thangwi yanji iye akhafunika kufa. Mbwenye Yezu apitiriza kuaphedza. Pidamala iye kulamuswa muli akufa, Yezu aphedza anyakupfundzace toera akhale na maonero adidi thangwi ya nyatwa. Iye acita pyenepi ‘mukuafokotozera mwadidi malemba.’ (Luka 24:25-27, 32, 44-48) Thangwi yakunyerezera pikhapfundzisa Yezu, anyakupfundza akhala akukhunganyika toera akwanise kupirira kutcingwa. Tinakwanisa kucita pibodzi pyene tinganyerezera pinalonga Bhibhlya pyakuti pinatiphedza kukhunganyika toera kupirira nyatwa.

12. Ndi mabvero api anafuna kukhala na ife tingakhala na maonero akuphonyeka thangwi ya pinthu pyakuipa pinaticitikira?

¹² Tingakhala na maonero akuphonyeka thangwi ya pinthu pyakuipa pinaticitikira, panango tinapitekeresa. Yezu apangiza kuti pyenepi pinacitika tani, mu nsangani wa anyabasa a munda wa mauva. Anyabasa anango akhadungunya thangwi akhanyerezera kuti nee atambira kobiri yakuthema. Mbwenye mwanaciro munda apanga m’bodzi wa iwo: “Xamwali, ine sidakupundza tayu.” (Mat. 20:10-13) Iwo akhadungunya, tayu thangwi kobiri ikhali yakucepa, mbwenye thangwi akhadikhira pinthu pyakuti nee akhafunika kupidikhira. Lero, panango abale na alongo anango asanyerezerambo tenepo. Mwacitsandzo, abale na alongo anango panango ananyerezera kuti ali kutsalakanwa mwakusowa ulungami angacimwana kukwanirisa pifuno pyawo peno angafunika kusiya miyai yakutumikira. Mphapo tisafunika kucitanji toera tikhale na maonero adidi m’midzidzi ya nyatwa?

MUSAFUNIKA KUCITANJI MUNGATAMBA NYATWA?

13. Ndi pinthu pipi pyakuti panango pinacitika mungatamba nyatwa?

¹³ Panango musadziwa mavesi mangasi a m’Bhibhlya analonga thangwi ya nyatwa, pontho mwaaphatisira toera kuphedza anthu anango. Mbwenye khala ndimwe anatamba nyatwa, panango pinakhala pyakunentsa kukhala na maonero mabodzi ene na a Yahova. Mwacitsandzo, panango tinanyerezera kuti Yahova ali kutitcunyusa peno nee ali kubva maphembero athu. Mungatoma kunyerezera tenepo, musafunika kucitanji?

14. Mungatamba nyatwa, munalonganji m’maphembero anu? (Afilipi 4:13)

¹⁴ Phembani Yahova toera akuphedzeni. Pangani Yahova pyonsene pinakudzudzumisani na mabvero anu. Imwe munakwanisa kulonga m’phembero cinthu cinafuna imwe kuti Yahova akucitireni. Phembani Yahova toera akupaseni nzimu wakucena, mphambvu na udziwisi toera mupirire. Mbwenye kumbukani kuti Yahova anakwanisa kutawira maphembero anu munjira yakuti nee musaidikhira. (Aef. 3:20) Iye anakwanisa kuphatisira aanju na abale na alongo toera kukuphedzani. (Mas. 34:7) Natenepa, tawirani ciphedzo cinakupasani Yahova, pontho perekani takhuta thangwi ya pyenepi. Iye anakupasani nzimu wace wakucena mwakubverana na nyatwa zinatamba imwe.—Lerini Afilipi 4:13.

15. Ninji pinafuna kukuphedzani kupirira nyatwa? (Onanimbo foto.)

¹⁵ Pitirizani kucita pinthu pinawangisa uxamwali wanu na Yahova. Wangisirani toera kucita pyonsene pinakwanisa imwe, maseze pikhale pyakusiyana na pikhacita imwe kale. Mungatamba “nyatwa,” wangisirani kunyerezera ninga munanyerezera Yahova. (Mas. 119:143) Pitirizani kuleri Bhibhlya ntsiku zonsene, kuipfundza na kunyerezera pinaleri imwe. Citani pyonsene pinakwanisa imwe m’basa yakumwaza mphangwa, gumanikani pa misonkhano, pontho perekani mitawiro. Khalani dhuzi na abale na alongo, pontho wangisirani toera mukhonde kukhala mwekhene maseze pikhale pyakunentsa midzidzi inango.—Mis. 18:1.

16. Ndi pinthu pipi pyakuti panango munapipenula, pontho munapimalisa tani? (2 Akor. 10:4, 5)

¹⁶ Phatisirani Bhibhlya toera kucinja manyerezero anu. Tingatamba nyatwa, panango tinakhala na manyerezero akuipa akuti anaticitisa kupenula thangwi ya ife ene, peno thangwi ya Yahova. Manyerezero anewa panango anakhala ninga “pinthu pidakhomereka kakamwe,” pyakuti ndi pyakunentsa kupifudza. (Lerini 2 Akorinto 10:4, 5.) Ife tinakwanisa kumalisa kupenula tingaphatisira “cidziwiso ca Mulungu” cinagumanika m’Bhibhlya na m’mabukhu anapereka gulu yathu. Mwacitsandzo, kodi musapenula khala Yahova asakufunani? Khala ndi tenepo, pfundzani pinalonga Bhibhlya thangwi ya mpostolo Paulu. Mu utumiki wace, atamba nyatwa zizinji. Mbwenye pyonsene pidatamba iye pyathimizira cinyindiro cace cakuti akhali wakutawirika kuna Yahova na kuna Yezu. (2 Akor. 11:23-27) Kodi musabvundzika khala mwandimomwene Yahova alekerera madawo adacita imwe nduli? Natenepa, citani ndandanda ya malemba anapangiza kuti Yahova asalekerera madawo. (Iza. 43:25) Buluka penepo, lerini malemba anewa, pontho anyerezereni mwadidi. (Mas. 119:97) Kodi mwagwerwa na cidengwa mbamupenula khala Mulungu asatsidzikizadi atumiki ace? Fufudzani m’mabukhu athu mathangwi anacitisa Mulungu kutawirisa nyatwa na njira inatsidzikiza iye atumiki ace, mwakukhonda tsalakana pidakucitikirani. (Mas. 91:9-12) Lerini pidacitikira abale na alongo adatamba nyatwa mbapitiriza kutumikira Yahova mwakutsandzaya.a

17. Musafunika kucitanji mungatamba nyatwa?

¹⁷ Panango nee muli kutamba nyatwa zakunentsa cincino. Khala ndi tenepo, bandzani mwai uno toera kupereka takhuta kuna Yahova thangwi ya pinthu pyonsene pyadidi pinakupasani iye. (Ekle. 7:14) Mbwenye mungatamba nyatwa, pitirizani kukhala na maonero adidi na nyindirani Yahova. Natenepa, Yahova “anadzakusakirani njira yakubuluka nayo, toera mukwanise kupirira.” (1 Akor. 10:13) Mphapo tinacitanji pinthu pyakuipa pingacitikira abale na alongo athu? Tinapfundza pyenepi mu nsolo unatowera.