Lekani Kuduwala Pinthu Pyakufunika Kakamwe

1-2. Ninji cinapangiza kuti pinthu pyakufunika pinakwanisa kutidzudzumisa?

NYEREZERANI kuti muli kutekenya, pontho munthu ali kukuligaririni. Maseze kutawira munthu anakuligaririni ndi pyakufunika, mu ndzidzi unoyu nee musafunika kudzudzumika na pinthu pinango thangwi muli kutekenya. Munjira ibodzi ene, pali na pinthu pizinji pyakufunika pinaticitikira mu umaso wathu. Mbwenye tisafunika kudzindikira kuti ndi pinthu pipi pyakufunika kakamwe toera kupicita mu ndzidzi unoyu.

² Ife tonsene tiri na pinthu pizinji pyakufunika toera kucita. Mbwenye tisadziwa kuti cinthu cakufunika kakamwe ndi mabasa athu auzimu.a (Mat. 6:33) Anyakutekenya adidi asacita pyonsene pinakwanisa iwo toera akhonde kudzudzumiswa na pinthu pinango. Munjira ibodzi ene, atumiki a Yahova asawangisira toera akhonde kudzudzumiswa na pinthu pyakuti pinaapingiza kuikha Yahova pa mbuto yakutoma mu umaso wawo.—Mis. 4:25; Mat. 6:22.

3. Ndi mibvundzo ipi inafuna ife kutawira mu nsolo uno?

³ Ife nee tisafunika kudzudzumiswa na pinthu pyakuti pinaticimwanisa kuikha Yahova pa mbuto yakutoma. Mbwenye undimomwene ndi wakuti pinthu pizinji pinacitika mu umaso wathu pinakwanisa kutidzudzumisa. (Luka 21:34-36) Toera kutiphedza kutumikira Yahova mwakukhonda kudzudzumiswa, mu nsolo uno tinatawira mibvundzo mitatu: (1) Ndi pinthu pipi pyakuti pinakwanisa kutidzudzumisa? (2) Yezu acitanji toera akhonde kudzudzumiswa? Na (3) tisafunika kucitanji toera tikhonde kudzudzumiswa?

NDI PINTHU PIPI PYAKUTI PINAKWANISA KUTIDZUDZUMISA?

4-6. Ndi pinthu pipi pyakuti panango pinakwanisa kutidzudzumisa?

⁴ Pali na pinthu pizinji mu umaso wathu pyakuti tisafunika kupicita. Mwacitsandzo, panango tinadzudzumika thangwi ya ungumi wathu, banja yathu peno pinthu pinango. Ndimomwene kuti pyenepi ndi pyakufunika, pontho tisafunika kupitsalakana. Mbwenye tingakhonda kucita mphole-mphole, pinakwanisa kutidzudzumisa kakamwe. Munjira ipi? Pyenepi pinakwanisa kutidzudzumisa m’manyerezero, pontho pinatimalira ndzidzi na mphambvu.

⁵ Kusiyapo pyenepi, azinji a ife asakhala m’mbuto zakuti zisacitika uviyaviya, kusoweka kwa kobiri, mautenda akuti asamwazika mwakucimbiza na nyatwa zinango zakuti zisacitika mu ntsiku zino zakumalisa. (2 Tim. 3:1) Tingatamba nyatwa ninga zenezi, panango tinakhala akudzudzumika kakamwe mbaticimwana kunyerezera pinthu pinango.

⁶ Panango alipo anadziwa imwe wakuti agwerwa na nyatwa, pontho umaso wace wacinja mwakucimbiza kakamwe. Kazinji kene, pyenepi pingacitika munthu asamala ndzeru. Yahova nee acita anthu toera athabuke peno akhale akudzudzumika ndzidzi onsene. Anango asadzudzumika angadzindikira kuti nee anakwanisabve kukhala na umaso ukhali na iwo kale. Natenepa toera kumalisa kudzudzumika kweneku, iwo asamala ndzidzi uzinji na masendzekero peno ubalangazi. Imwe munacitanji khala muli kucitikirwa na nyatwa ninga zenezi? Tendeni tione kuti pinthu pidacita Yezu pinatiphedza tani toera tipitirize kuikha Yahova pa mbuto yakutoma mu umaso wathu.

YEZU ACITANJI TOERA AKHONDE KUDZUDZUMISWA?

7. Ndi pinthu pipi pyakuti panango mbapidacitisa Yezu kukhala wakudzudzumika?

⁷ Pakhali na pinthu pizinji pyakuti mbapidadzudzumisa Yezu, ninga makhaliro a anthu na pinthu pikhacita mautongi. Mu ndzidzi unoyu, anthu azinji akhali na mautenda, pontho akhali atcerengi. (Mat. 14:14; Marko 14:7) Iwo akhatsalakanwa mwakusowa ulungami na Aroma, pontho na Ayuda anango. Pidaona anthu kuti Yezu akhali na mphambvu yakucita pirengo, iwo akhafuna kuti iye akhale mambo wawo. (Juw. 6:14, 15) Kusiyapo pyenepi, Sathani ayesera kupasa Yezu mautongi onsene a dziko. Panango Yezu mbadatoma kunyerezera kuti kukhala ntongi wa dziko cikhali cinthu cadidi. (Mat. 4:8, 9) Pontho mpostolo Pedhru wakuti akhali m’bodzi wa axamwali a ponda ndi pondembo a Yezu, ntsiku inango ampanga toera acite pinthu pyakuphonyeka toera amalise nyatwa zace. Iye alonga: “Mbuya, bverekani ntsisi mwekhene.”—Mat. 16:21, 22.

8. Yezu akhacitanji toera akhonde kudzudzumiswa?

⁸ Yezu akhacitanji toera akhonde kudzudzumiswa? Cakutoma, iye akhanyerezera ninga Yahova. (Juw. 8:28; 14:9) Caciwiri, iye akhaphatisira ndzidzi wace m’basa yakumwaza mphangwa na kupfundzisa. (Mat. 9:35) Na cacitatu, iye akhadziwa kuti ndi pinthu pipi pyakufunika kakamwe. (Juw. 4:34) Yezu akhonda mwacipapo pidayeserwa iye na Sathani, mbabvesesa kuti Pedhru panango akhali na mathangwi adidi. Mbwenye ceneci nee cikhali cifuniro ca Yahova. (Mat. 4:10; 16:23) Yezu nee atawirisa kuti manyerezero a anthu, pinthu pikhalonga iwo na pikhacita iwo pimpingize kucita cifuniro ca Yahova. Lero, pinthu pyakuti pinatipingiza kuikha Yahova pa mbuto yakutoma, panango pinakhala pyakusiyana na pikhacitika mu ndzidzi wa Yezu. Mbwenye kutowezera citsandzo cace kunatiphedza toera tikhonde kudzudzumiswa.

TISAFUNIKA KUCITANJI TOERA TIKHONDE KUDZUDZUMISWA?

9. Tinakwanisa tani “kubvesesa kuti ninji pinafuna Yahova?” (Aefesi 5:17)

⁹ Pfundzani kunyerezera ninga Yahova. Pyenepi pinakuphedzani toera “kubvesesa kuti ninji pinafuna Yahova.” (Lerini Aefesi 5:17.) Imwe munakwanisa kupfundza thangwi ya pinthu pinafuna Yahova mungaleri Bhibhlya na kunyerezera mwadidi pinaleri imwe. Maseze Bhibhlya nee isalonga pinthu pyonsene pinafunika ife kucita, tinakwanisa kucita pinthu pinatsandzayisa Yahova. Tinacita tani pyenepi? Tingadziwa mwadidi njira inanyerezera Yahova na kuphatisira mwadidi pinthu pinapfundza ife.

10. Tinapfundza tani kunyerezera ninga Yahova?

¹⁰ Ife tinakwanisa kupfundza kunyerezera ninga Yahova tingapfundza Bhibhlya na kuonesesa mwadidi njira inatsalakana iye anthu. (Yer. 45:5) Tingaleri pinthu pidalembwa m’Bhibhlya, tisafunika kubvundzika: ‘Pyenepi pisandipfundzisanji thangwi ya Yahova? Ndinaphatisira tani pyenepi toera kucinja njira inanyerezera ine?’ Ife tisadziwa kuti Yahova ndi waudziwisi kakamwe kupiringana ife. (Iza. 55:9) Ndi thangwi yace, tisacita phembero toera atiphedze kubvesesa kuti tinacita tani cifuniro cace. (Mas. 143:10) Pontho tingacita phembero kuna iye, tisakhala na cinyindiro cakuti anatiphedza toera kunyerezera ninga iye na kuona pinthu ninga munapionera iye.—1 Juw. 5:14.

11. Ndi pinthu pipi pyakuti Yahova nee asafuna kuti piticitikire?

¹¹ Mu ndzidzi unapfundza ife kunyerezera ninga Yahova, tisabvesesa kuti iye nee asafuna kuti tidzudzumiswe na cinthu. Mbwenye asafuna kuti tikhale akukhunganyika mbidzati kufika ntsiku yakumala kwa dziko ino. (Mat. 24:44) Iye nee asafuna kuti tidzudzumike na pinthu pizinji. (Mat. 6:31, 32) Khala tiri kudzudzumika thangwi ya ungumi wathu, basa, mbuto yakukhala, banja peno nyatwa zinango, tisafunika kunyindira ciphedzo ca Yahova. Iye anakwanisa kutipasa udziwisi na mphambvu toera kudziwa pinthu pinafunika ife kucita thangwi ya nyatwa zenezi.—Mas. 55:22; Mis. 3:5-7.

12. Ninji pinafuna kutiphedza toera tikhonde kukhala akudzudzumika? (Mateu 5:3)

¹² Pitirizani kucita mabasa auzimu. Ife tonsene tisadzudzumika thangwi ya pinthu pyakuipa pinacitika n’dziko ino pyakuti nee tisakwanisa kupimalisa. Mbwenye m’mbuto mwakudzudzumika na pinthu pyenepi, tisafunika kuikha manyerezero athu m’basa ya Yahova. Natenepa, tingapitiriza kucita pyonsene pinakwanisa ife toera kukhala na uxamwali wakuwanga na Yahova, tinakhala akutsandzaya. (Lerini Mateu 5:3.) Tinakhala na uxamwali wakuwanga na Yahova, tingapfundza Bhibhlya na kucita pyonsene pinakwanisa ife m’basa yace. Tingacita pyenepi, tinakwanisa kuphatisira mwadidi ndzidzi wathu toera kukomeresa Yahova.—Mis. 23:15.

13. Tinaphatisira tani ‘mwadidi kakamwe ndzidzi wathu?’

¹³ Ninga atumiki a Yahova, ife tiri dzololo toera ‘kuphatisira mwadidi kakamwe ndzidzi wathu.’ (Aef. 5:15, 16) Bhibhlya nee isalonga basi ene pya ndzidzi unaphatisira ife toera kucita mabasa athu a ntsiku na ntsiku. Mbwenye isatikumbusambo kuti tisafunika kuphatisira mwadidi ndzidzi wathu kumala mbakudzati kufika. Tinacita tani pyenepi? Tingamala ndzidzi uzinji mbatikaona mphangwa zakuipa, pinaticitisa kukhala akudzudzumika na akutsukwala, pontho nee tinakhala na ndzidzi toera kucita pizinji m’basa ya Yahova. Tisafunika kupungula ndzidzi unamala ife na kuona, peno na kubvesera mphangwa zenezi. Tingacita pyenepi, tinakwanisa kukhala na ndzidzi uzinji, pontho na mphambvu toera kucita pizinji m’basa ya Yahova na kunyerezera njira zipswa zakuthimizira basa yathu yakumwaza mphangwa, ninga kucita maulendo akubwereza. Kusiyapo pyenepi, tisabvesesa kuti ndi pyakufunika kakamwe kuphatisira ndzidzi wathu toera kuphedza anthu toera “apulumuswe, pontho adziwe mwadidi undimomwene.”—1 Tim. 2:4.

14. Ndi mathangwi api ali na ife toera tipitirize kuphatisira ndzidzi uzinji m’basa ya Yahova? (Onanimbo foto.)

¹⁴ Tingaphatisira ndzidzi uzinji m’basa ya Yahova, pinatiphedza toera tikhonde kuduwala kuti thangwi yanji pinthu pyakuipa pisacitika n’dziko ino. Ife tingaona uviyaviya, utcerengi na mautenda nee tisadzudzumika kakamwe thangwi tisadziwa kuti pinthu pyenepi pyalembwa kale m’Bhibhlya kuti mbapidacitika. Natenepa, m’mbuto mwakutawirisa kuti kugopa kutidzudzumise, ife tiri na cinyindiro cakuti pyonsene pidalonga Yahova thangwi ya ntsogolo pinakwanirisika. Mbwenye pyenepi mbapidzati kucitika, tisafunika kukhala akukhurudzika mbatinyindira kuti Yahova anatiphedza.—Mas. 16:8; 112:1, 6-8.

15. Pisabvekanji kukhala “na ndzeru zadidi,” pontho thangwi yanji pyenepi ndi pyakufunika? (1 Pedhru 4:7)

¹⁵ Kumbukani pinthu pyakufunika kakamwe. Anthu azinji lero asamala ndzidzi uzinji na masendzekero, m’mbuto mwakunyerezera kuti kumala kuli dhuzi. Maseze ubalangazi ndi wakufunika, tisafunika kukhala “na ndzeru zadidi” gopa tinakhala na manyerezero ninga a anthu a dziko. (Lerini 1 Pedhru 4:7.) Pisabvekanji kukhala na ndzeru zadidi? Pisabveka kunyerezera mwadidi toera kucita cisankhulo cakuti cinatiphedza kukhala na maonero adidi thangwi ya ubalangazi. Tingacita pyenepi, tinanyerezera ninga Yahova, mbaticita pinthu pinapangiza kuti tisadziwa pinthu pyakufunika kakamwe.—2 Tim. 1:7.

16. Ndi pinthu pipi pikhanyerezera Yezu m’midzidzi yakumalisa ya umaso wace pa dziko yapantsi?

¹⁶ Ndzidzi onsene Yezu akhakumbuka pinthu pyakufunika kakamwe. M’midzidzi yakumalisa ya umaso wace pa dziko yapantsi, Yezu akhanyerezera basi ene pyakukhala wakukhulupirika kuna Mulungu na kucita cifuno cace. Toera akwanise kucita pyenepi, iye akhacita phembero kazinji kene. Mbwenye anyakupfundzace nee apitiriza kukhala m’maso; “iwo akhadaneta thangwi yakutsukwala” mbagona.—Luka 22:39-46; Juw. 19:30.

17. Thangwi yanji anthu azinji asaphatisira interneti, pontho ndi pinthu pipi pyakuti panango pinaacitikira? (Onanimbo foto.)

¹⁷ Ninga anyakupfundza a Yezu, midzidzi inango tinakhalambo akuneta. Thangwi ya pinthu pinacitika mu ntsiku zino zakumalisa, panango tinakhalambo akudzudzumika. Natenepa anthu azinji lero asamala ndzidzi uzinji mu interneti toera kuduwala nyatwa zawo. Mwacitsandzo, iwo asaphatisira interneti toera kutumiza mafoto kuna axamwali awo, acibale awo na kuapanga pinthu pinaacitikira mu umaso wawo. Pontho asaphatisirambo interneti toera kuona mavidhyu mazinji na kugwa magemi. Anango asamala ndzidzi uzinji mbakaona pinthu pinacitika, pontho pyenepi pisaanetesa na kuamalira ndzidzi. Toera pyenepi pikhonde kuticitikirambo, tisafunika kubvundzika: ‘Kodi pinthu pinaona ine mu interneti mwandimomwene pisandiphedza peno pisandipingiza kucita pinthu pyakufunika kakamwe?’

18. Thangwi yanji tisafunika kukhala na ndzeru zadidi pakusankhula pinthu pinafuna ife kuona mu interneti?

¹⁸ Pakuona mavidhyu mu interneti peno pakugwa magemi, tisafunika kukhala na ndzeru zadidi. Pyenepi pyonsene panango pinatiphedza toera kubalangazika pang’ono. Mbwenye ndzeru zadidi zinatiphedza toera kuona kuti tinaona mavidhyu mangasi, pontho ndi ntundu wanji wa mavidhyu anafuna ife kuona. M’maplikativo anango tingamala kuona vidhyu ibodzi isabwera inango. Tingamala ndzidzi uzinji m’maplikativo anewa, panango tinamalisira kuona mavidhyu auphanga na aulukwali. Ndi pyenepi pidacitikira m’bale unango ku Azya. Iye atoma kuphatisira interneti toera kuona mavidhyu anango acigwagwa. Mu ndzidzi ukhapitiriza iye kuona mavidhyu anewa, atoma kubuluka mavidhyu anango akhapangiza pyaulukwali. Mukupita kwa ndzidzi, iye atoma kuona ucipezipezi. Pyakutsandzayisa ndi pyakuti na ciphedzo ca akulu a mpingo na ca axamwali ace, iye akwanisa kufudza maplikativo anango mbapungula ndzidzi ukhamala iye na kuphatisira telefoni. Pinthu pidacitikira m’bale unoyu pisapangiza kuti tisafunika kukhala na ndzeru zadidi pakusankhula pinthu pinafuna ife kucita mu ndzidzi wakuti nee tiri kuphata basa.

19. Khala tisaikha ubalangazi pa mbuto yakutoma, ninji pinafuna kucitika?

¹⁹ Ife tisafunikambo kukhala na ndzeru zadidi tingafuna kuenda kaona mbuto zinango peno tingacita pinthu toera kubalangazika. Ndimomwene kuti midzidzi inango tisafunika kubalangazika. Pyenepi ndi pyakufunika toera ungumi wathu ukhale mwadidi. Mbwenye tingaikha pa mbuto yakutoma pinthu pyenepi mu umaso wathu, panango pinatimalira ndzidzi uzinji mbatisowa ndzidzi wakucita pinthu pyakufunika kakamwe. (Afil. 1:10) M’bodzi na m’bodzi asafunika kusankhula ekha kuti anaphatisira tani ndzidzi wace. Mbwenye mungafuna kucita pinthu pyenepi, bvundzikani: ‘Kodi ndzidzi unamala ine na kupaseari na kucita ubalangazi usapangiza kuti ndiri na ndzeru zadidi? Ndisaikha pa mbuto yakutoma pinthu pyakufunika kakamwe toera ndikhale wakukhunganyika “kumala kwa pinthu pyonsene” mbakudzati kufika?’

20. Thangwi yanji ndi pyadidi kucalira kudzudzumiswa?

²⁰ Ndi pyakufunika kakamwe kucita mphole-mphole na pinthu pyakuti panango pinakwanisa kutidzudzumisa m’basa ya Yahova. (Iza. 48:17) Tingacita pyenepi, na ciphedzo ca Yahova tinakwanisa kupirira nyatwa zathu. Kusiyapo pyenepi, pinthu pinacitika n’dziko nee pinatipingiza, pontho ubalangazi nee unakhala cinthu cakufunika kakamwe mu umaso wathu. Natenepa tisafunika kuwangisira toera kunyerezera ninga Yahova, kupitiriza kuphatisira ndzidzi wathu uzinji m’basa ya Yahova, mbatidzindikira kuti ndi pinthu pipi pyakufunika kakamwe. Tingacita pyenepi, nee tinadzudzumiswa, pontho ‘tinaphatisisa na manja mawiri umaso wandimomwene.’—1 Tim. 6:19.