Nyindirani Yahova Ntongi Wamphambvu Zonsene

1. Ndi nyatwa zipi zidatamba Yobe?

YOBE aluza pinthu pyonsene pikhali na iye. Anace afa, iye aphatwa na utenda, pontho mpfuma yace yamala. Kusiyapo pyenepi, anthu a pacisa nee akhamulemedzabve. Pontho ‘axamwaliace’ anango alonga pinthu pyakuti pyantsukwalisa. Ngakhale nkazace atsukwala kakamwe mbampanga toera ‘axole Mulungu, buluka penepo afe pyace.’ (Yobe 2:9; 15:4, 5; 19:1-3) Nyatwa zenezi mbazidacitisa Yobe kusiya kunyindira Yahova, mbanyerezera kuti Iye nee asatsidzikiza ale ananfuna na kuntumikira.

2-3. Ndi pinthu pipi pyakuti panango pinacitika tingatamba nyatwa, pontho tinapfundzanji m’bukhu ya Yobe?

² Ife tikukhala “midzidzi yakugopswa na yakunentsa kupirira.” (2 Tim. 3:1) Na thangwi ineyi, midzidzi inango tisatamba nyatwa zakuti zisatiyesera toera tikhonde kunyindira Yahova. Tingatamba nyatwa zizinji, panango tinadzudzumika kakamwe, mbatinyerezera kuti nee tinakwanisa kupirira. Anthu anango asafika pa kupenula khala mwandimomwene Yahova asaatsalakana.

³ Khala imwe musanyerezera kuti Yahova nkhabe kukutsalakanani, lekani kufewa manungo. Yobe adzindikira kuti Yahova nee asasiya ale akuti ndi akukhulupirika kuna Iye. Ninga Yobe, ife tinakwanisambo kunyindira kuti Babathu Wakudzulu nee anatisiya. Pinafuna kutiphedza toera kunyindira Yahova ndi kupfundza bukhu ya Yobe na kuona pinthu piwiri pinalonga iyo kuna ife: Cakutoma, ndi Yahova basi Mulungu Wankulu Kakamwe. Caciwiri, Mulungu wathu ali na mphambvu yakucita pinthu pinalonga iye, pontho asatitsidzikiza.

SATHANI APITA PAKATI PAWO

4. Mbani adagumanika pa nsonkhano udacitika kudzulu unalongwa m’bukhu ya Yobe?

⁴ Ntsiku inango, “ana a Mulungu wandimomwene” aenda kaonekera pamaso pa Yahova. Bhibhlya isalonga kuti: “Sathani apitambo pakati pawo.” (Yobe 1:6) Unoyu ndi ulendo wakutoma unagumanika fala yakuti “Sathani” m’Bhibhlya. Fala ineyi isabveka “Nyakupingiza.” Sathani ndi Mpingizi wa Yahova. Mu ndzidzi udacitika nsonkhano unoyu kudzulu, Sathani nee akhalibve mwana wakukhulupirika wa Mulungu. Iye akhali nyamalwa wa Yahova, wa aanju na wa atumiki akukhulupirika a pa dziko yapantsi. Pidalonga Yahova mafala anagumanika pa Genesi 3:15, Iye apangiza kuti Sathani nee akhalibve m’bodzi wa aanju ace akukhulupirika. Natenepa, Sathani nee akhalibve wa dzindza ya “nkazi” yakuti mbidabala Yezu. Dzindza ineyi ndi aanju akukhulupirika.

5. Nsonkhano udacitika kudzulu usatipfundzisanji?

⁵ Yahova alembesa m’Bhibhlya pinthu pidalongwa pa nsonkhano unoyu udacitika kudzulu. Mafala a Sathani asapangiza kuti iye ndi nyakuipa kakamwe, pontho asalonga uthambi thangwi ya atumiki a Yahova. (Yobe 1:9; onanimbo Apokalipse 12:10.) Pidacitika pa nsonkhano unoyu, pisatipasambo cinyindiro cakuti Yahova ndzidzi onsene asaphatisira mphambvu zace munjira yadidi na yakulungama. Ife tisapfundzambo kuti Wamphambvu Zonsene asaikha madire toera pinthu pinango pikhonde kucitika.

YAHOVA ASAIKHA MADIRE

6. Yahova apangiza tani kuti ndiye akhatsogolera nsonkhano? (Yobe 1:7, 8)

⁶ Lerini Yobe 1:7, 8. Yahova apangiza kuti ndiye akhatsogolera nsonkhano unoyu. Yahova akhadziwa kuti Sathani akhafuna kuyesera Yobe. Natenepa, Iye atomesa makani mukuncita mbvundzo uyu: “Waona ntumiki wanga Yobe?” Cincino tendeni tione kuti Yahova aphatisira tani mphambvu zace zikulu toera kuphedza ntumiki wace.

7. Mwakubverana na Yobe 1:10, 11, Sathani alonganji thangwi ya atumiki a Yahova?

⁷ Lerini Yobe 1:10, 11. Yahova ndi Mulungu Wankulu Kakamwe. Iye anakwanisa kucita pyonsene pinafuna iye, pontho asadziwa mwadidi kuphatisira mphambvu zace. (Yer. 32:17; Dhan. 4:35) Mbwenye Sathani apambizira Yahova kuti nee akhaphatisira mwadidi mphambvu zace. Mwandimomwene, Sathani alonga kuti Mulungu asapasa anthu pinthu pizinji ninga pidacita iye kuna Yobe, basi ene toera antumikire. Sathani alonga kuti anthu asatumikira Yahova basi ene toera kuwina cinthu. Mphapo Yahova acitanji?

8-9. Yahova atawirisa Sathani kuti acitenji, pontho thangwi yanji? (Yobe 1:12) (Onanimbo foto.)

⁸ Lerini Yobe 1:12. Yahova atawirisa Sathani kuti ayesere Yobe toera kupangiza khala pikhalonga iye pikhali undimomwene peno nkhabe. Mbwenye Yahova ampasa madire. Yahova apanga Sathani: “Leka kufuthula djanja yako toera kun’thabusa!” Aanju onsene abva pidalonga Yahova kuna Sathani toera akhonde kupicita kuna Yobe, pontho Sathani akhafunika kubvera. Iye nee akhali na mphambvu toera kucita pinthu pinango kusiyapo pidantawirisa Yahova. Pyenepi pisacitikambo ntsiku zino. Natenepa, Yahova aphatisira mphambvu zace toera kutsidzikiza Yobe, pontho toera kupangiza kuti iye ndi Mulungu wakulungama na waufuni.

⁹ Mayesero a Sathani nee acitisa Yobe kusiya kutumikira Mulungu. Yobe apitiriza kukhala wakukhulupirika. (Yobe 1:22) Mbwenye Sathani akhafuna kupitiriza kuyesera Yobe.

10. Thangwi yanji Yahova atawirisa Sathani kuti ayesere pontho Yobe? (Yobe 2:2-6)

¹⁰ Lerini Yobe 2:2-6. Sathani ayesera kakamwe Yobe kuti ancitise kusiya kutumikira Yahova. Sathani alonga kuti mwakukhonda penula, Yobe mbadasiya kutumikira Yahova thangwi yakugopa kufa. Toera kupangiza kuti pidalonga Sathani pikhali pyauthambi, Yahova antawirisa kuyesera Yobe na utenda. Mbwenye Yahova akhazikisa pontho madire toera Sathani akhonde kucita pinthu pinango kusiyapo pidatawiriswa iye. Yahova ampanga: “Leka kumupha!” Sathani nee akhali na mphambvu toera kucita pinthu pinango kusiyapo pidantawirisa Yahova. Pyenepi pisapangiza kuti Wamphambvu Zonsene akhatsidzikiza Yobe mu ndzidzi ukhayeserwa iye. Thangwi Sathani nee mbadakwanisa kucita pinthu pinango kusiyapo pidantawirisa Yahova.

YAHOVA AMALISA NYATWA ZA YOBE

11. Pidamala nyatwa za Yobe, ndi nkhombo zipi zidampasa Yahova? (Yobe 42:10-13)

¹¹ Lerini Yobe 42:10-13. Pidapitiriza Yobe kukhala wakukhulupirika, Yahova nee atawirisa kuti Sathani apitirize kuyesera Yobe. Kusiyapo pyenepi, Yahova acita pinthu toera kumalisa nyatwa za ntumiki wace. Natenepa, Sathani nee mbadakwanisabve kuyesera Yobe. Iye nee akhali na mphambvu yakupingiza Yahova kutsidzikiza na kupasa nkhombo Yobe.

12. Yahova asaphatisira tani mphambvu zace toera kuphedza ale anan’nyindira? Fokotozani.

¹² Mu ntsiku zino zakumalisa, anthu azinji asaona Yahova mbakaphatisira mphambvu zace toera kuatsidzikiza. Mu caka ca 1945 mu utongi wa Nazi, Mboni za Yahova zakukwana 230 zakuti zikhali ku mbuto ikhasiyiwa anyakaidi, zapulumuka pakucita ulendo ukhacemerwa Marcha da Morte peno ulendo toera kufa. Pakumala kucitikirwa na pinthu pyenepi pyakunentsa kakamwe, iwo alemba pidaacitikira, pontho alonga kuti Yahova aapulumusa ninga pidapulumusa iye Ahebheri atatu akuti nee anunkha utci pidabuluka iwo mu forno yakugaka moto. Munjira ibodzi ene, abale anewa ayeserwa, mbwenye cikhulupiro cawo cakhala cakuwanga kakamwe, thangwi Yahova aapasa mphambvu. Kusiyapo pyenepi, iwo apibvambo ninga Dhanyeli, wakuti apulumuswa n’djendje ya nkhalamu. Pontho alonga kuti kukhala na mwai wakutumikira Yahova kwenda na kwenda ndi nkhombo ikulu kakamwe.—Onanimbo Dhanyeli 3:27; 6:22.

13. Tingatamba nyatwa tisafunika kukhala na cinyindiro cipi? (Onanimbo mafoto.)

¹³ Ife panango tinatambambo nyatwa zakuti zinaticitisa kuona ninga tiri n’djenje ya nkhalamu. (1 Ped. 5:8-10) Midzidzi inango tisatsukwala kakamwe na nyatwa zathu mbationa kuti nee zinamala. Midzidzi ineyi, kukumbuka pidacitikira Yobe kunatiphedza kakamwe. Tisafunika kukhala na cinyindiro cakuti Yahova ali na mphambvu toera kumalisa nyatwa zathu cincino peno mu dziko ipswa. Yahova akhazikisa ntsiku toera kumalisa pinthu pyakuipa pinacitika pa dziko ino.

YAHOVA ASAFUNA ATUMIKI ACE AKUKHULUPIRIKA

14-15. Ninji pinafuna kudzacita Yahova kuna atumiki ace akukhulupirika, pontho thangwi yanji? (Yobe 14:15) (Onanimbo foto )

¹⁴ Lerini Yobe 14:15. Babathu Wakudzulu ndi wakukhulupirika kuna ale akuti ndi akukhulupirika kuna iye. Iye asaafuna kakamwe, pontho angafa, anadzaalamusa muli akufa. Munjira ineyi, nee tinakhalabve akutsukwala, mbwenye tinakhala akutsandzaya kakamwe.—Iza. 65:17.

¹⁵ Ndimomwene kuti Yobe apitiriza kukhala mu dziko yakutongwa na Sathani. Mbwenye Bhibhlya isalonga kuti Yahova apasa nkhombo Yobe, amuwangisa, pontho ampasa pinthu pizinji kakamwe kupiringana pikhali na iye pakutoma. Nkhombo zenezi zapangiza kuti ntsogolo, Yahova anadzapasa Yobe pinthu pizinji kakamwe. Mwandimomwene, Yahova asafuna kuti atumiki ace onsene akukhulupirika akhale akutsandzaya, pontho na umaso wadidi. Iye anadzacitisa kuti onsene akhale na umaso wakwenda na kwenda m’paraizu pa dziko yapantsi. (Apok. 21:3, 4) Nakuti Yahova ndi Mulungu Wankulu Kakamwe, nkhabe munthu anafuna kumpingiza kucita pinafuna iye kuna atumiki ace. Kunyerezera nkhombo zinafuna kudzatipasa Yahova kusatibalangaza kakamwe tingatamba nyatwa!

16. Ndi thangwi ipi inango inaticitisa kunyindira kuti Yahova ndi Mulungu Wankulu Kakamwe?

¹⁶ Yobe akhala m’maso mu pyaka pizinji, buluka penepo afa. Mbwenye nakuti Yahova ndi Mulungu Wankulu Kakamwe, pontho ndi Wamphambvu Zonsene, iye ali na mphambvu ngakhale yakulamusa anthu adafa. (Dheu. 32:39) Yahova asankhula kale ntsiku inafuna iye kulamusa atumiki ace akufunika, pontho nkhabe munthu anafuna kumpingiza kucita pyenepi.—Aroma 8:38, 39.

NYINDIRANI YAHOVA NA NTIMA ONSENE

17. Ninji pinapangiza kuti Sathani nee anakwanisa kufudza mbumba ya Yahova?

¹⁷ Bukhu ya Yobe isatipfundzisa kuti tiri na mathangwi adidi toera kunyindira Yahova na ntima onsene. Tisapereka takhuta kuna Yahova thangwi yakukhonda tawirisa kuti Sathani afudze mbumba yace! Lero, pa dziko yonsene yapantsi pali na atumiki akukhulupirika a Yahova cifupi na mamiliyau 9. Pyenepi pisapangiza kuti mwandimomwene Yahova ndi wamphambvu zonsene. Ndzidzi onsene, ife tisaona kuti pyonsene pinaphatisira Sathani toera kupingiza mbumba ya Mulungu nee pisaphata basa. (Iza. 54:17) Maseze mautongi na atsogoleri a mauphemberi atione ninga akusowa citsidzikizo, iwo nee asakwanisa kutifudza. Nkhabe cinthu cinafuna kutipingiza kupanga anango thangwi ya Yahova na kupangiza kuti Sathani ndi nyauthambi na wakuipa. Ngakhale kufa nee kunatikunda, thangwi Yahova anadzalamusa muli akufa atumiki ace onsene akukhulupirika.—Oze. 13:14.

18. Thangwi yanji nee tisafunika kugopa pinthu pinafuna kucitika ntsogolo?

¹⁸ Tinganyerezera mwadidi mphangwa zinagumanika m’bukhu ya Yobe, tinawangisa cikhulupiro cathu cakuti Yahova ndzidzi onsene anatiphedza mwakukhonda tsalakana pinafuna kucitika. Mu ndzidzi wa nyatwa ikulu, Sathani na anyankhondo ace ananyerezera kuti mbumba ya Yahova ndi yakusowa citsidzikizo, pontho kuti anaifudza mwakukhonda nentsa. Mbwenye ninga pidacitika mu ntsiku za Yobe, Yahova anapitiriza kutsidzikiza mbumba yace, pontho nee anatawirisa kuti Sathani athabuse mbumba yace kwenda na kwenda. Thimize pano, Yahova anamalisa nyatwa zonsene zinaoneka thangwi ya Sathani. Iye na madimonyo ace anafungirwa mu djenje yakuzika kakamwe mbakhala mwenemo mu pyaka 1.000. (Luka 8:31; Apok. 20:1-3) Buluka penepo, Sathani na ale anam’phedzera anadzafudzwa, mbakhonda kuonekabve ninga pidapikira Yahova.—Gen. 3:15; Aroma 16:20; Apok. 20:10.

19. Ale ananyindira Yahova na ntima onsene asadikhira kutambira nkhombo zipi? (Onanimbo foto.)

¹⁹ Tisafuna kakamwe kuti dziko ipswa ifike toera tikhale na umaso wadidi na wakutsandzayisa. Umaso unadzakhala wadidi kakamwe! Thangwi Yahova apikira: “Ona! Ine ndiri kucita pinthu pyonsene kudza pipswa.” (Apok. 21:5) Pyenepi pisabvekanji? Pisabveka kuti anthu nee anadzathabukabve thangwi ya nyatwa zinacitisa Sathani na madimonyo ace, pontho pyenepi pinadzakhala pyadidi kakamwe! Nee tinadzacimwanabve kugona namasiku thangwi yakudzudzumika na nyatwa zinacitika mu dziko ino yakuipa. Ale anafuna kudzapulumuka pa nkhondo ya Armajedhoni, anadzaona kumala kwa mautenda onsene. Buluka penepo, anthu anafuna ife adamala kufa, anadzatoma kulamuswa. Ife tinadzakhala na umaso wadidi ninga ukhafuna Babathu wakudzulu pakutoma pidacita iye anthu!

20. Muli dzololo toera kucitanji?

²⁰ Tisafunika kukhala acipapo toera tipirire pinentso pya ntsiku zino zakumalisa, mbatipitiriza kukhala akukhulupirika. Kusiyapo pyenepi, tisafunika kupitiriza kunyindira Yahova na ntima onsene, mbatiphedzera Utongi wace. Pontho tisafunika kupangiza ufuni wathu kuna Babathu wakudzulu, mbatipangiza kuti Sathani ndi nyauthambi. Ife tinakwanisa kukhala na cinyindiro cakuti tingapitiriza kukhala akukhulupirika kuna Yahova, Mulungu Wankulu Kakamwe, tinakhala na umaso wadidi kakamwe ntsogolo, thangwi iye asafuna kakamwe kupasa nkhombo atumiki ace akukhulupirika!