Pangizani Luso Yakubvesesa Toera ‘Pinthu Pikufambireni Mwadidi’

1-2. Ninji luso yakubvesesa, pontho n’khaliro unoyu unatiphedza tani?

KODI imwe mwatsalakanwa kale mwakusowa cilemedzo? Mwatsukwaliswa kale na munthu unango? Peno mwacitikirwa kale na pinthu pyakuti pyakucitisani kugopa? Khala ntawiro wanu ndi inde, imwe musadziwa kuti ndi pyakunentsa kucita pinthu pyadidi pyenepi pingacitika. Bhibhlya isalonga pya n’khaliro wakufunika kakamwe wakuti unatiphedza m’midzidzi yakusiyana-siyana. N’khaliro unoyu ndi luso yakubvesesa.

² Luso yakubvesesa ndi luso yakunyerezera mwadidi mbatidzati kucita pinthu. N’khaliro unoyu usatiphedza kubvesesa mathangwi adacitisa munthu kucita pinthu. Luso yakubvesesa inatiphedza toera kucita pinthu mwandzeru na mwaudziwisi. Iyo inatiphedzambo toera kudziwa kuti ndi ndzidzi upi unafunika ife ‘kumatama’ na ‘kucita mphole-mphole na mafala analonga ife.’ (Mis. 10:19; Mas. 4:4) Munthu angatitsukwalisa, luso yakubvesesa inatiphedza toera tikhonde kuipirwa kakamwe mbatimulekerera. Kusiyapo pyenepi, luso yakubvesesa inatiphedza toera kubvera uphungu na kutawira kulangwa. (Mis. 19:20) Tingapangiza kuti tiri na luso yakubvesesa, tisakomeresa Yahova, tisaphedzeka, pontho tisaphedzambo ale akuti panango asadziwa pinthu pidalonga ife peno pidacita ife. N’khaliro unoyu ndi wakufunika kakamwe tingacitikirwa na pinthu pyakuti panango pinaticitisa kucita pinthu mwakukhonda nyerezera. Mu nsolo uno tinaona anthu atatu analongwa m’Bhibhlya adapangiza kuti luso yakubvesesa inatiphedza tani toera tipitirize kukhala akucepeseka, akukhurudzika, mbatinyindira Yahova na ntima onsene.

KHALANI AKUCEPESEKA, TAYU AKUDZIKUZA

3. Namani akhali ani?

³ Toera ticite pinthu pyadidi, tisafunika kukhala akucepeseka. (1 Ped. 5:5) Luso yakubvesesa inatiphedza toera kucita pinthu pyadidi. Pinakwanisika tani? Onani pidacitikira Namani. Iye akhali wa ku Sirya, dzindza yakuti ikhali kunterero kwa Izraeli. Namani akhali mamuna wakulemedzwa kakamwe, thangwi iye akhali nkulu wa anyankhondo a ku Sirya. Mbwenye akhali na utenda wa matanya, pontho utenda unoyu ukhali wakugopswa kakamwe.—2 Ama. 5:1.

4. Namani apangiza tani kuti akhali na luso yakubvesesa?

⁴ Nkazi wa Namani akhali na nyabasa wantsikana wakuti akhali Muizraeli. Ntsikana unoyu apanga nkazi wa Namani kuti ku Izraeli kukhali na mprofeta wakuti mbadawangisa mamunace. (2 Ama. 5:2, 3) Namani panango mbadanyerezera: ‘Kodi mwana unoyu asanyerezera kuti ndi ani toera kundipanga pinafunika ine kucita?’ Mbwenye Namani apangiza kuti akhali na luso yakubvesesa. M’mbuto mwakudzikuza, mbapwaza pidalonga ntsikana unoyu wakuti akhali wa dzindza ya anyamalwa ace, Namani acepeseka, mbacita pidapangwa iye. Natenepa, iye aphemba mambo wa ku Sirya toera antawirise kuti aende ku Izraeli kawangiswe.—2 Ama. 5:4, 5.

5. Ninji pidacitika pidafika Namani ku Izraeli?

⁵ Namani aenda kuna mambo Yeoramu wa ku Izraeli, mbadikhira kuwangiswa matanya ace. Mbwenye Yeoramu anyerezera kuti Namani aenda kweneko thangwi mambo wa ku Sirya akhafuna kumenyana naye. Pidadziwa mprofeta Elizeu, iye aphemba mambo Yeoramu toera apange Namani kuti aende kuna iye. (2 Ama. 5:6-9) Mbwenye pinthu nee pyacitika ninga mukhapidikhira Namani. Elizeu nee abuluka kunja toera kuntambira, peno toera kulonga naye. Mbwenye atuma munthu toera kupanga Namani pinthu pikhafunika iye kucita toera awange.—2 Ama. 5:10.

6. (a) Thangwi yanji Namani aipirwa na pitsogolero pya Elizeu? (b) Atumiki a Namani apangiza tani kuti akhali na luso yakubvesesa, pontho ninji pidacitika? (2 Amambo 5:13, 14)

⁶ Pakutoma, Namani nee akomerwa thangwi nee atambirwa na mprofeta, pontho nee akomerwa na pitsogolero pidapaswa iye na ntumiki wa Elizeu. Namani “aipirwa,” buluka penepo, ‘aenda mwakuipirwa.’ (2 Ama. 5:11, 12) Thangwi yanji iye acita pyenepi? Nakuti iye akhali nkulu wa anyankhondo wakulemedzwa kakamwe, panango aona kuti nee atsalakanwa mwacilemedzo. Panango Namani anyerezera kuti pitsogolero pidampasa Elizeu pikhapangiza kuti iye akhapwaza dziko ya Sirya. Mwakukhonda tsalakana mathangwi ace, Namani akhafuna kubwerera kunyumba kwace, nee kuwangiswa utenda wace. Mbwenye atumiki ace apangiza kuti akhali na luso yakubvesesa pidam’phemba iwo toera anyerezere mwadidi. Natenepa, Namani asiya kukhala wakudzikuza, acepeseka, mbacita pidalonga Elizeu. Pakumalisa iye awangiswa utenda wace!—Lerini 2 Amambo 5:13, 14.

7. Pidacita Namani pisatipfundzisanji? (Misangani 22:4) (Onanimbo mafoto.)

⁷ Pidacita Namani pisatipfundzisanji? Ife tinapangiza kuti tiri na luso yakubvesesa tinganyerezera mwadidi mbatidzati kucita pinthu peno kunyerezera pinthu pinafuna kucitika. Tinapangizambo kuti tiri na luso yakubvesesa tingakhonda kutsogolerwa na manyerezero athu. Luso yakubvesesa isatiphedza toera kukhala akucepeseka, mbatidzindikira kuti nee tisadziwa pinthu pyonsene. Ife tisafuna ciphedzo ca anango, makamaka ca Yahova. Maseze Namani nee akhadziwa mwadidi Yahova, iye apangiza kuti akhali na luso yakubvesesa, thangwi acepeseka, pontho acita pidapangwa iye na anango. Iye acita pidalonga ntsikana wa Muizraeli wakuti akhali nyabasa wa nkazace, acita pidampanga atumiki ace, pontho acita pidalonga Elizeu ntumiki wa Yahova. Namani asiya kukhala wakudzikuza, acita pidapangwa iye, mbawangiswa. Mbatidzati kucita peno kulonga pinthu, pakutoma tisafunika kunyerezera mwadidi. Panango munthu anatipasa uphungu wakuti nee tinakomerwa nawo; na thangwi ineyi, tisafunika kunyerezera mbatibvundzika khala pinalonga ife na pinacita ife pisapangiza kuti ndife wakucepeseka peno wakudzikuza.—Lerini Misangani 22:4.

CITANI PINTHU MWAKUKHURUDZIKA, TAYU MWAKUIPIRWA

8. Ndi midzidzi ipi yakuti pisanentsa kukhala wakukhurudzika?

⁸ Luso yakubvesesa inatiphedza toera tipitirize kukhala akukhurudzika tingacitikirwa na pinthu pyakutsukwalisa. Ndimomwene kuti ndi pyakunentsa kucita pyenepi, makamaka khala munthu atitsalakana mwakuipa peno mwakusowa ulungami. (Aef. 4:26 onani nota de estudo yakuti “Fiquem irados.”) Tendeni tione kuti Dhavidhi na Abhigaili apangiza tani luso yakubvesesa mu ndzidzi wakunentsa.

9. Nabhale atsalakana tani Dhavidhi?

⁹ Onani basi: Dhavidhi na anyankhondo ace akhathawa Sauli; iwo akhali n’thando ya Parani. (1 Sam. 25:1) Pikhali iwo kweneko, atsidzikiza akumbizi na mabira a mamuna wakupfuma akhacemerwa Nabhale. (1 Sam. 25:15, 16) Pidafika ndzidzi wa kukwedza maweya a mabira, Dhavidhi atuma anthu toera mwakucepeseka na mwacilemedzo aphembe Nabhale kuti aapase pinthu pikhakwanisa iye. (1 Sam. 25:6-8) Mbwenye Nabhale nee apangiza kupereka takhuta na pinthu pidacita Dhavidhi na amuna akhali na iye. Nabhale nee atawira phembo ya Dhavidhi, pontho atikana Dhavidhi na amuna akhali na iye.—1 Sam. 25:10, 11.

10. Dhavidhi na Abhigaili apangiza tani kuti akhali na luso yakubvesesa? (1 Samweli 25:32, 33) (Onanimbo foto.)

¹⁰ Khala pyenepi pyacitikira imwe, mbamudacitanji? Tisakwanisa kubvesesa kuti thangwi yanji Dhavidhi aipirwa kakamwe. Dhavidhi akhali munthu wakukhurudzika, mbwenye pa ulendo unoyu iye aipirwa mpaka funa kupha Nabhale. (1 Sam. 25:13, 21, 22) Pikhaenda Dhavidhi kapha Nabhale, nkazi wa Nabhale wakuti akhali wandzeru aenda kalonga na Dhavidhi. Abhigaili apangiza tani kuti akhali na luso yakubvesesa? Iye adzindikira kuti Dhavidhi akhali munthu wadidi, maseze akhadaipirwa kakamwe. Natenepa Abhigaili acita pinthu toera kuphedza Dhavidhi kuti akhonde kucita pinthu mwakuipirwa, mbwenye mwaudziwisi. Abhigaili akwata muoni toera kapasa Dhavidhi, pontho mwakucepeseka ampasa uphungu wadidi. (1 Sam. 25:18, 23-31) Dhavidhi apangiza kuti akhali na luso yakubvesesa pidabvesera iye mwadidi mafala adalonga Abhigaili. Pontho thangwi yakudzindikira kuti mafala anewa akhabverana na pikhafuna Yahova, pyaphedza Dhavidhi toera akhurudzike mbakhonda kucita madawo makulu.—Lerini 1 Samweli 25:32, 33.

11. Luso yakubvesesa inatiphedza tani tingatsukwaliswa? (Misangani 19:11)

¹¹ Pidacita Dhavidhi na Abhigaili, pisatipfundzisanji? Luso yakubvesesa inatiphedza toera tikhale akhurudzika maseze tikhale na mathangwi toera kuipirwa. Luso yakubvesesa inatiphedzambo toera kunyerezera pinafuna kucitika thangwi ya pinalonga ife na pinacita ife. (Lerini Misangani 19:11.) Abhigaili pidakumbusa iye Dhavidhi kuti pikhafuna iye cita mbapidatsukwalisa Yahova, Dhavidhi akhurudzika. Khala munthu peno cinthu cinango cakucitisani kuipirwa, nyerezerani mwadidi mbamudzati kucita pinthu. (Tiya. 1:19) Citani phembero kuna Yahova, pontho nyerezerani kuti Yahova asaona tani pinafuna imwe kucita. Panango pyenepi pinakuphedzani toera kukhala wakukhurudzika.

12. Anango anatiphedza tani toera tipangize luso yakubvesesa mbatikhala akukhurudzika?

¹² Yahova aphatisira Abhigaili toera kuphedza Dhavidhi kubvesesa nyatwa ikhafuna kuoneka thangwi ya cisankhulo cace. Iye anakwanisambo kuphatisira anthu anango toera kutiphedza kubvesesa nyatwa inafuna kuoneka thangwi ya pisankhulo pyathu. Khala mwaipirwa thangwi ya cinthu cidakucitikirani, cedzani na Nkristu wakukola mwauzimu wakuti panango anakuphedzani toera kuona pinthu munjira yakusiyana. (Mis. 12:15; 20:18) Mbwenye khala xamwali wanu aipirwa thangwi ya pinthu pidancitikira, munatowezera tani Abhigaili? Kodi munakwanisa kuphedza xamwali wanu toera aone pinthu ninga munapionera Yahova? Mwakukhonda penula, Yahova anakuphedzani toera mulonge pinthu pyadidi na kuphedza anango kuti akhale na luso yakubvesesa, mbakhurudzika.

MUNGAGOPA NYINDIRANI YAHOVA

13. Luso yakubvesesa inatiphedza tani toera tikhonde kugopa?

¹³ Tingacitikirwa na pinthu pyakuti pisaticitisa kugopa, luso yakubvesesa inatiphedza toera kubvesesa pinthu pinango kusiyapo pire pinagopa ife. Pinthu pyonsene pinaticitikira mu dziko ino, maseze pikhale pyakugopesa, ipyo ndi ping’ono kakamwe tingapilandanisa na mphambvu ikulu ya Yahova. (Mas. 27:1) Yahova anakwanisa kutiphedza toera kupirira nyatwa, ngakhale zire zinaona ife kuti nee tinakwanisa kuzipirira. Pidacitikira Yona pisapangiza pyenepi. Iye akhali na uxamwali wakuwanga na Mulungu. Mbwenye iye akhafunika kuthimizira luso yace yakubvesesa toera acite basa yakunentsa idapaswa iye.

14. Thangwi yanji Yona agopa kucita pidampanga Yahova?

¹⁴ Yahova apasa Yona basa yakuti yancitisa kugopa. Iye akhafunika kuenda ku Ninive toera akalonge mphangwa zakutonga kwa Yahova. (Yona 1:1, 2) Khala ndimwe adapaswa basa ineyi, mbamudacitanji? Yona akhafunika kucita ulendo wakunentsa buluka ku Izraeli kuenda ku Ninive. Pa ulendo unoyu, iye mbadamala mwezi wantero mbakafamba na miyendo. Anthu a ku Ninive akhadziwika kuti akhali anthu auphanga na aukali kakamwe. Nzinda wa Ninive wadzacemerwa “nzinda wakuti anthu a mwenemo asapha andzawo.” (Nau. 3:1, 7) M’mbuto mwakutawira basa ineyi, Yona athawa.—Yona 1:3.

15. Ninji pidaphedza Yona toera anyindire kakamwe Yahova? (Yona 2:6-9)

¹⁵ Mu ndzidzi ukhathawa Yona, Yahova ankumbusa kuti iye ali na mphambvu kakamwe. Yahova apangiza mphambvu zace kuna Yona mu ndzidzi udampulumusa iye mwacirengo. (Yona 1:15, 17) Yona abvesesa mwadidi. Iye atoma kunyerezera pinthu pyadidi pyakuti mbapidacitika thangwi yakucita basa ineyi yakuti ikhaoneka ninga yakunentsa. Iye atoma kunyindira kuti Yahova mbadantsidzikiza. (Lerini Yona 2:6-9.) Buluka penepo, pidampanga Yahova kaciwiri toera aende ku Ninive, iye nee athawabve. Iye aenda ku Ninive, pontho anthu a kweneko abvesera mphangwa zace, mbapulumuswa.—Yona 3:5.

16. Ninji pinafuna kutiphedza tingacitikirwa na pinthu pyakuti pinaticitisa kugopa? (Misangani 29:25) (Onanimbo mafoto.)

¹⁶ Pidacita Yona pisatipfundzisanji? Ife nee tisafunika kutawirisa kuti cinthu cinango peno kugopa anthu kuticimwanise kulambira Yahova. (Lerini Misangani 29:25.) Luso yakubvesesa yaphedza Yona toera kuona pinthu pyadidi pikhafuna kucitika na kunyerezera kuti Yahova mbadamphedza. Munjira ibodzi ene, ife nee tisafunika kunyerezera basi ene pinthu pinagopa ife. Mbwenye tisafunika kunyerezera kuti Yahova atitsidzikiza tani, pontho atiphedza tani nduli. Tisafunikambo kunyerezera pinthu pidacita abale na alongo adanyindira Yahova, mbakwanisa kupirira, peno adakwanisa kucita mabasa akhaona iwo kuti akhali akunentsa.a (Aheb. 13:6) Ife tinapangiza kuti tiri na luso yakubvesesa na udziwisi tinganyindira Yahova na ntima onsene mbatiphedzambo anthu anango toera kucita pibodzi pyene.

PITIRIZANI KUNYEREZERA NINGA YAHOVA

17. Ninji pinafuna kutiphedza toera kuthimizira luso yathu yakubvesesa?

¹⁷ Mu nsolo uno, tapfundza kuti luso yakubvesesa inatiphedza toera kunyerezera mwadidi tingacitikirwa na pinthu pyakutsukwalisa. Tisafunika kucitanji toera tithimizire luso yathu yakubvesesa? Yahova anakwanisa kutiphedza mwadidi kakamwe kupiringana anthu. Thangwi ndiye anapasa luso yakubvesesa. Iye asaphatisira Bhibhlya na nzimu wace wakucena, toera kutiphedza kuti tikhale na luso yakubvesesa. (Neh. 9:20; Mas. 32:8) Iye asatipasa uphungu wakuti usatiphedza toera kucita pisankhulo pyadidi tingaipirwa mbatikhonda kucita pisankhulo pyakuipa. (Mas. 119:97-101) Tinganyerezera mwadidi pinalonga Bhibhlya, mbatiphemba Yahova nzimu wace wakucena, tinathimizira luso yathu yakubvesesa. Tingacita pyenepi, tinakwanisa kuona pinthu ninga munapionera Yahova, mbaticita pinthu ninga munafunira iye.—Mis. 21:11, cidzindikiro capantsi.

18. Muli dzololo toera kucitanji?

¹⁸ Tisafunika kupitiriza kuthimizira luso yathu yakubvesesa idatipasa Yahova, mbationakuti ndi yakufunika kakamwe. (Mas. 14:2) Tingacita pyenepi, cipo tinasiya ‘kukhala na luso yakubvesesa.’ (Mis. 21:16) Mbwenye tinafuna kakamwe kupangiza luso yakubvesesa ndzidzi onsene. Natenepa, ‘pinthu pinatifambira mwadidi,’ pontho tinatsandzayisa Yahova.