Ananu Ndi “Muoni Wakubuluka Kuna Yahova”

MUSANYEREZERANJI mungabva fala yakuti “muoni”? Panango musanyerezera kobiri, mbuto toera kumanga nyumba peno cinthu cakuti musacifuna panyumba panu mu pyaka pizinji. Mwakukhonda tsalakana pinanyerezera imwe, muoni ndi cinthu cakuti musafuna kakamwe kucitsalakana.

Bhibhlya isalonga kuti ana ndi “muoni wakubuluka kuna Yahova.” (Mas. 127:3) Anyakubala akuti asafuna Yahova, asaona ana ninga muoni wakubuluka kuna Pai wawo wakudzulu. Na thangwi ineyi, iwo asacita pyonsene pinakwanisa iwo toera kuatsidzikiza na kuatsalakana.

Mbwenye anyakubala anango nee asaona ana ninga muoni wakubuluka kuna Mulungu. (Iza. 49:15; 2 Tim. 3:1-3) Anango asafuna kutsalakana anawo, mbwenye asathimbana na pinentso pizinji, mbanyerezera kuti ndi pyakunentsa kucita pyenepi. Ndi pipi pinango mwa pinentso pyenepi? Yahova asafuna kuti anyakubala acitenji? Anyakubala anakuza tani anawo mwakutsandzaya?

PINENTSO

Mikakamizo ya acibale na ya anango. Mbuto zinango munthu angabala ana azinji, asalemedzwa kakamwe na acibale na anthu anango. Na thangwi ineyi, mabanja anango asakakamizika kubala ana azinji, akuti panango nee anakwanisa kuatsalakana.
Kudzudzumika na pinthu pya ntsogolo. Mbuto zinango nee muli na pyakudya pyakukwana, maxipitari akukwana, pontho muli na mautenda mazinji. Na thangwi ineyi, mabanja anango ali na ana azinji toera anango angafa, anango apitirize kukhala m’maso. Kuna mabanja anangombo kubala ana azinji kusaapasa cinyindiro cakuti anango a iwo anaatsalakana angakalamba. Pyenepi pisacitika kazinji kene m’madziko akuti atongi nee asaphedza anthu akukalamba.
Ndi pyakunentsa kucalira kukhala na mimba. Mbuto zinango, mabanja anango nee ali na njira yakucalira kukhala na mimba. Mbuto zinango muli na mitombwe, mbwenye anthu anango asagopa kuthabuka nayo thangwi nee ndi yadidi. Anangombo nee asaigula thangwi ndi yakudhula kakamwe.a

YAHOVA ASAFUNA KUTI ANYAKUBALA ACITENJI?

Banja iri kucedza mwakutsandzaya mu parki. Baba ali kubvesera mu ndzidzi unalonga mwanawo wankulu, pontho mama ali kumenya bhola ya manja na mwanawo wang’ono. — Cedzani na m’bodzi na m’bodzi wa ananu

Kutsalakana ana. Yahova apasa basa anyakubala ya kutsalakana anawo mbaciri ang’ono. Iye asadikhira kuti anyakubala aphate basa mwakuwanga toera kupasa anawo cakudya, cakubvala na pakugona. Yahova asafuna kuti anyakubala alange anawo. Na thangwi ineyi, anyakubala asafunika kukhala nawo pabodzi mpaka kukula, m’mbuto mwakuasiya mbaenda kakhala kutali toera kupfundza xikola. Kusiyapo pyenepi, anyakubala asawangisira toera kubvesesa mwana m’bodzi na m’bodzi kuti apibve wakutsidzikizika, wakutsalakanwa, pontho kuti asafuniwa. Mbwenye ndi pyakufunika kukumbuka kuti Yahova ndi wakulinganira, pontho nee asadikhira kuti anyakubala akhale akupfuma. Ndi pyenepi pidancitisa kusankhula banja yakutcerenga, yakuphata basa mwakuwanga toera kukuza Mwanace.—Mat. 13:55, 56; Luka 2:24.

Pinalonga Bhibhlya: “Mwandimomwene, khala munthu nkhabe kutsalakana anthu akuti ndiye asafunika kuatsalakana, makamaka anthu a panyumba pace, iye asakhonda cikhulupiro, pontho ndi wakuipa kakamwe kupiringana munthu wakusowa cikhulupiro.”—1 Tim. 5:8.

Yahova asabvesesa kuti anyakubala panango anafuna ciphedzo mu ndzidzi unakalamba iwo. Njira ibodzi yakuti ana anapangiza cilemedzo kuna anyakubala awo ndi kuatsalakana mu ndzidzi unakalamba iwo. (Eks. 20:12; 1 Tim. 5:4) Mbwenye Yahova asatsandzaya angaona anyakubala mbakatsalakana anawo, m’mbuto mwakufuna kutsalakanwa na anawo.—2 Akor. 12:14.

Kupfundzisa ana thangwi ya Yahova. Anyakubala Acikristu alimbo na basa yakupfundzisa anawo kufuna na kulambira Yahova. Kuna Yahova pyenepi ndi pyakufunika kakamwe.—Dheu. 6:6, 7.

Pinalonga Bhibhlya: “Pitirizani kuakuza kubulukira mu kualanga na kuapfundzisa mwakubverana na pinalonga Yahova.”—Aef. 6:4.

YAHOVA ASAFUNA KUKUPHEDZANI TOERA MUKUZE ANANU MWAKUTSANDZAYA

Banja iri kucedza. Bhibhlya iri yakufungula pameza yakuti iri kutsogolo kwawo. — Cedzani kuti munabala ana angasi

Nyerezerani pya ntsogolo. Khala mukunyerezera kubala ana, nyerezeranimbo makhaliro a ntsogolo. Kodi imwe munadzakwanisa kuapasa cakudya, pyakubvala na pakugona? Khala nee munakwanisa, cedzani kuti munabala ana angasi. Kumbukani kuti musafunika kutsalakana mwana m’bodzi na m’bodzi ninga munafunira Yahova. Ndimomwene kuti Yahova asadziwa kuti pyonsene nee pisacitika ninga munafunira ife. (Ekle. 9:11) Mbwenye iye anakupasani nkhombo mungawangisira toera kukhala nyakubala wadidi.

Pinalonga Bhibhlya: “Munthu waphinga pinanyerezera iye kucita pisafamba mwadidi, mbwenye onsene anacita pinthu mbadzati kunyerezera mwadidi anatcerenga.”—Mis. 21:5.

“Mbani mwa imwe wakuti angafuna kumanga nyumba, pakutoma nkhabe kukhala pantsi toera kuona khala kobiri yace inakwana?”—Luka 14:28.

Ikhani Yahova pa mbuto yakutoma. Kulambira Yahova kusafunika kukhala cinthu cakufunika kakamwe pa banja panu. Khala imwe muli na ana, phedzani m’bodzi na m’bodzi toera afune Yahova. Phedzani ananu kuti abvesere mwadidi pa misonkhano toera aphindule nayo. Citani Kulambira Kwa Banja masumana onsene. Pfundzisani ananu kumwaza mphangwa. Lekani kunyindira mwananu wankulu peno munthu unango toera kucita mabasa anu ninga nyakubala. Kukuza ana kusaphemba ndzidzi na kuwangisira, mbwenye imwe munatsandzaya kakamwe mungaona ananu mbakatumikira Yahova mwakutsandzaya.

Pinalonga Bhibhlya: “Nkhabepo kutsandzaya kukulu kakamwe kuli na ine kupiringana uku: Kubva kuti ananga asapitiriza kufamba mu undimomwene.”—3 Juw. 4.b

Nyindirani Yahova. Khala imwe muli kunyerezera kubala ana peno muli na ana, khalani na cinyindiro cakuti kucita pinafuna Yahova ndi pyakufunika kakamwe kupiringana kutowezera misambo peno pinthu pyakuti pisacitwa kazinji kene mu cisa canu.

Mafoto: 1. Anyakubala akhala pabodzi na mwanawo pa misonkhano n’Nyumba ya Umambo. Mwana alamusa nkono toera kutawira. 2. Banja iri kumwaza mphangwa pabodzi. Baba abuluka na mwana wankulu, pontho mama abuluka na anawo awiri ang’ono. — Kutsalakana pifuno pyauzimu pya ana, kusaphemba ndzidzi na kuwangisira

Khala imwe mwasankhula kubala ana akucepa, nyindirani kuti Yahova anapitiriza kukutsalakanani mungakalamba. Mwakukhonda tsalakana pinanyerezera anango, lekani kunyerezera kubala ana azinji, basi ene toera akhale na kobiri izinji kuti mungakalamba akuphedzeni. Lekani kugopa kuti munadzathawiwa. Yahova apikira kuti anakutsalakanani, pontho iye ndzidzi onsene asakwanirisa mapikiro ace.—Yos. 23:14.

Pinalonga Bhibhlya: “Nyindira Yahova na ntima wako onsene, leka kunyindira ndzeru zako. Usafunika kunkumbukira munjira zako zonsene, iye anadzalungamisa njira zako.”—Mis. 3:5, 6.

“Kutomera uphale wanga mpaka kukalamba kwanga, cipo ndaona munthu wakulungama mbathawiwa, nee anace mbakaphemba cakudya.”—Mas. 37:25.

“Natenepa, pitirizani kuikha pa mbuto yakutoma Umambo wa Mulungu na ulungami wace, pinthu pinango pyonsene munadzapithimizirwa.”—Mat. 6:33.

Ana ndi muoni wakufunika udapasa Yahova anyakubala. Yahova asatsandzaya angaona anyakubala mbakwanirisa mabasa awo na kutsalakana mwadidi anawo! Ndi pyakufunika kakamwe kuna anyakubala kutowezera pitsogolero pya Yahova, m’mbuto mwakutowezera misambo yapacisa. Na thangwi ineyi, anyakubala asapasa anawo pinthu pinafuna iwo, pontho asacita cisankhulo cakuti anabala ana angasi. Angacita pyenepi, anyakubala asapangiza kuti asafuna kakamwe anawo, pontho asaaona ninga muoni wakubuluka kwa Yahova.”

Iwo Nee Asatsumbikika

Kodi anyakubala asathabuka angasankhula kubala ana akucepa? Anyakubala azinji anakhala m’mbuto zakunentsa kugumana kobiri asacitika mbvundzo unoyu. Onani pinalonga anyakubala anango Acikristu anakhala mbuto zenezi.

Kodi imwe musakakamizwa toera kubala ana azinji?

“Inde, anango anandikakamiza ndi abale na alongo athu. Banja ibodzi yandibvundza: ‘Thangwi yanji muli na mwana m’bodzi basi? Muno mu Afrika kukhala na mwana m’bodzi, ndi sawasawa na kusowa mwana. Kukhala na ana awiri ndi sawasawa na kukhala na mwana m’bodzi.’ Buluka penepo, tabala mwana unango m’bodzi wankazi, ngakhale tenepo anthu apitiriza kutikakamiza.”—Jeremias

Kodi imwe mwathabuka thangwi yakubala ana akucepa?

“Nkhabe. Ine na nkazanga thangwi yakusankhula kubala ana akucepa, takwanisa kuatsalakana mwadidi. Ine ndakula m’banja ikulu, pontho ndisakumbuka kuti pikhali pyakunentsa kuna anyakubalanga kutipasa pyonsene pikhafuna ife na kutipfundzisa kuxikola.”—Jeremias

Ananu asapibva tani thangwi ya cisankhulo cidacita imwe?

“Kazinji kene anyakubala akuti ali na ana azinji, nee asakwanisa kuatsalakana mwadidi. Pyenepi pisacitisa ana kuthabuka. Mbwenye anathu ali akutsandzaya thangwi asatsalakanwa mwadidi.”—Filipe

“Anathu akhali akutsandzaya thangwi akhapibva kuti akhali akutsidzikizika, akhatsalakanwa mwadidi, pontho akhafuniwa. Ife tikhacemera panyumba pathu abale na alongo akuwanga mwauzimu akuti akhali citsandzo cadidi kuna anathu, pontho akhawangisa ife tonsene toera kucita pizinji m’basa ya Yahova. Kusiyapo pyenepi, tisaona kuti anathu ali kutowezera citsandzo cawo cadidi.”—Carlos

Ndi maphindu api adakhala na imwe thangwi yakusankhula kubala ana akucepa?

“Pikhali pyakukhonda nentsa kutsalakana anathu. Ine ndikhali na basa yadidi, mbwenye ndabuluswa basa pyaka pitatu nduli. Nakuti tikhali na ana akucepa, pyakhala pyakukhonda nentsa kuthimbana na macinjo anewa, thangwi nee tikhafunika kukhala na kobiri izinji toera kugula pinthu pikhafuna ife.”—Jeremias

“Thangwi ya cisankhulo ceneci, ife takwanisa kutsalakana m’bodzi na m’bodzi wa anathu mwakukhonda nentsa. Kusiyapo pyenepi, tikhali na ndzidzi wakuenda kamwaza mphangwa kumbuto ikhali na amwazi mphangwa akucepa. Lero anathu onsene ali kutumikira Yahova, pontho asafuna kucita pizinji m’basa yace.”—Lenadi

Ninji pinafuna imwe kulonga kuna anyakubala anango?

“Ine ndaona kuti mafala anagumanika pa Masalmo 34:10b, ndi andimomwene. Lemba ineyi isalonga kuti ‘ale anasaka Yahova nkhabe kusowa nee cinthu cibodzi cadidi.’ Yahova atipasa pyonsene pikhafuna ife.”—Rafael

a Banja ibodzi na ibodzi, ndiyo inasankhula kuti anabala ana angasi, anatoma lini kubala, peno khala anaphatisira mitombwe toera akhonde kukhala na mimba. Nkhabe munthu anatonga anyakumanga banja thangwi ya pisankhulo pyawo. (Aroma 14:4, 10-13) Mbwenye iwo nee asafunika kuphatisira njira zinango peno mitombwe toera kutaya mimba. Mu ndzidzi unacita banja pisankhulo pyenepi, iwo asafunikambo kukumbuka uphungu unagumanika pa 1 Akorinto 7:3-5.

b Pa vesi ineyi, fala yakuti “ana” isalonga pya Akristu adapfundziswa undimomwene na Juwau. Mbwenye anyakubala asakhalambo na mabvero mabodzi ene angaona anawo mbakatumikira Yahova.