Mibvundzo Inacitwa na Anyakuleri

Ndi mu ndzidzi upi unafuna kulongwa “ntendere na citsidzikizo”?

Nsolo wakuti “Mibvundzo Inacitwa na Anyakuleri,” udabuluswa mu Ncenjezi,a walonga kuti mwakukhonda dembuka, Yahova anaikha m’mitima mwa “nyanga khumi” (mautongi onsene anaphedzera cikala) “pinanyerezera iye.” Pyenepi pisabveka kuti mautongi anapereka mphambvu zawo na utongi wawo kuna cikala cakufira, cakuti ndi Nações Unidas. Cikala ceneci cisacemerwambo “dzimunthu ya cikala.” (Apok. 13:14, 15; 17:3, 16, 17) Buluka penepo, “nyanga khumi” na cikala cidatambira mphambvu zawo, pinadzafudza mauphemberi authambi pa dziko yonsene yapantsi. Mphapo ndi mu ndzidzi upi unafuna kulongwa “ntendere na citsidzikizo”?b Pinalongwa Pakumala kufudzwa kwa mauphemberi authambi peno mbadzati?—1 Ates. 5:3.

Ntawiro ndi wakuti, nee tisadziwa mwadidi kuti analonga lini “ntendere na citsidzikizo.” Mbatidadziwa mphangwa zonsene thangwi ya pyenepi, nee mbatidafunika kukhala akuyang’anira. Yezu apanga anyakupfundzace kazinji kene kuti: “Pitirizani kuyang’anira.” (Mat. 24:42; 25:13; 26:41) Tendeni tione cincino pidalemba Paulu mu tsamba yace kuna Atesalonika.

Paulu alemba: “Mu ndzidzi unalonga iwo kuti: ‘Ntendere na citsidzikizo!’ penepo pene kufudzwa kwawo kunafika mwakututumusa.” (1 Ates. 5:2, 3) Mabukhu athu asalonga kuti kulongwa kwa “ntendere na citsidzikizo” kunacitika dhuzi na kutoma kwa nyatwa ikulu, yakuti inatoma na kufudzwa kwa Bhabhilonya Wankulu wakuti ndi mauphemberi onsene authambi. Tikhalonga kuti kulongwa kwa “ntendere na citsidzikizo” mbukudakhala cidzindikiro cakuti nyatwa ikulu iri dhuzi na kutoma.

Natenepa pakumala kudinga mwadidi nkhani ineyi, ife taona kuti tinakwanisa kubvesesa munjira inango. Njira inango ndi yakuti “ntendere na citsidzikizo” pinakwanisa kulongwa pakumala kufudzwa kwa mauphemberi authambi. Thangwi yanji? Tendeni tione mathangwi mangasi.

Uphemberi wauthambi usaphedzera nkhondo. Bhibhlya isalonga kuti: “Mwa iye [“puta wankulu,” Bhabhilonya Wankulu] mwagumanika ciropa . . . ca anthu onsene adaphiwa pa dziko yapantsi.” (Apok. 17:1, 5; 18:24) Pinthu pinacitika pisapangiza kuti uphemberi wauthambi usaphedzera nkhondo, pontho kazinji kene usacitisa pinthu pyauphanga. Natenepa iwo asaphedzera nkhondo na uphanga, tayu ntendere na citsidzikizo. Pyenepi pisaticitisa kubvundzika: Kodi kulongwa kwa “ntendere na citsidzikizo” kunacitika pakumala kwa kufudzwa kwa Bhabhilonya wankulu? Panango. Mbwenye nee tisafunika kukhala na cinyindiro consene.

Ninji pinafuna kucitika pakumala kulongwa “ntendere na citsidzikizo”? Paulu alonga: “Penepo pene kufudzwa kwawo kunafika mwakututumusa.” (1 Ates. 5:3) Natenepa, pisaoneka kuti mauphemberi authambi angamala kufudzwa, atsogoleri a dziko analonga “ntendere na citsidzikizo” buluka penepo, iwo anafudzwa mwakukhonda dikhira.

Kodi mbumba ya Yahova inadzadzudzumika ingaona pyenepi mbapikacitika? Paulu alonga: “Imwe abale nee muli ncidima toera ntsiku ineyi ifike kuna imwe mwakututumusa ninga munatutumuswa mbava na ceza ca ntsiku.” (1 Ates. 5:4) Natenepa, khala “ntendere na citsidzikizo” pinalongwa mauphemberi authambi angamala kufudzwa, mbumba ya Yahova inadziwa kuti kufudzwa kwa mautongi a dziko kuli dhuzi. Mautongi a dziko angamala kulonga kuti “ntendere na citsidzikizo” iwo anapibva kuti ali akutsidzikizika, buluka penepo, anadzafudzwa mwakututumusa ninga kubwera kwa mbava.

Ninji pinadziwa ife? Pinadziwa ife ndi pyakuti thimize pano “nyanga khumi” na cikala pinadzatambira mphambvu mbapifudza mauphemberi authambi. Pyenepi pinatomesa nyatwa ikulu. Pontho tisadziwambo kuti mautongi a dziko anadzalonga “ntendere na citsidzikizo.” Pyenepi pinacitika lini? Talonga midzidzi miwiri yakuti pyenepi pinakwanisa kucitika. Wakutoma: “Ntendere na citsidzikizo” panango pinalongwa mauphemberi authambi mbadzati kufudzwa. Waciwiri: Ntendere na citsidzikizo panango pinalongwa mauphemberi authambi angamala kufudzwa. Mwakukhonda tsalakana kuti pinacitika lini, ife tisafunika kudikhira. Maprofesiya a m’Bhibhlya kazinji kene asabveseswa mwadidi mu ndzidzi unakwanirisika iwo peno angamala kukwanirisika.—Onani Juwau 12:16.

Cinthu cakufunika kakamwe cincino, nee ndi kudziwa ndzidzi unafuna kulongwa “ntendere na citsidzikizo,” mbwenye ndi kupitiriza kukhala akukhulupirika kuna Mulungu. Tisafunika ‘kupitiriza kukhala m’maso na manyerezero adidi,’ toera tikhale akukhunganyika mwakukhonda tsalakana njira inafuna kwanirisika maprofesiya anewa ntsogolo.—1 Ates. 5:6.