SUMANA 27 YA ABRIL–3 YA MAIO YA 2026
NYIMBO 99 Nsoka Ukulu wa Abale
Munacitanji Mungathimbana na Pinentso Pakumala Kubatizwa?
“Ndiphedzeni toera ndipitirize kufamba munjira zanu.”—MAS. 17:5.
PINAFUNA IFE KUPFUNDZA
Ale adamala kwene kubatizwa, anakhunganyika tani toera kuthimbana na pinentso pyakuti panango anagumanikana napyo?
1-2. Ninji cinafuna kutiphedza toera tipitirize kukhala na uxamwali wakuwanga na Yahova tingathimbana na pinentso pakumala kubatizwa? Perekani citsandzo.
IFE tisadziwa kuti tinathimbana na pinentso mu dziko ino ya Sathani. Yezu apanga anyakupfundzace kuti: “Anadzaoneka anthu anafuna kucitisa anango kugwa m’madawo.” (Mat. 18:7) Natenepa, panango tinathimbana na pinentso pyakuti pinafewesa cikhulupiro cathu. Panango tinatsukwalisana na m’bale peno mulongo, mbwenye tisafunika kuwangisira toera tipitirize kukhala na uxamwali wakuwanga na Yahova mwakukhonda tsalakana pinentso pyenepi.
2 Nyerezerani basi. Ndzidzi onsene atumiki a Yahova asatambira pitsogolero toera akhale akukhunganyika pangaoneka cidengwa. Tisakhunganyika tani? Pakutoma, tisafunika kudziwa ntundu wa pidengwa pyakuti panango pinacitika mu cisa cinakhala ife. Pyenepi ndi pyakufunika kakamwe makamaka khala ndife mupswa pacisa. Tingamala kudziwa pidengwa pyakuti panango pinacitika, tisafunika kudziwa kuti tinacitanji toera tikhale akutsidzikizika. (Mis. 21:5) Munjira ibodzi ene, tisafunika kudziwa kuti ndi pinentso pipi pyakuti panango tinathimbana napyo pakumala kubatizwa toera tikwanise kupirira. Tingacita pyenepi, tinakwanisa kupirira pinentso mwakukhonda nentsa, mbatipitiriza kukhala na uxamwali wakuwanga na Yahova. (Mas. 17:5) Mu nsolo uno, tinapfundza thangwi ya pinentso pitatu pyakuti panango tinathimbana napyo pakumala kubatizwa, pontho tinapfundza kuti tisafunika kucitanji cincino toera tikhale akukhunganyika mbatipirira tingathimbana na pinentso pyenepi.a
KUTSUKWALISWA NA M’BALE PENO MULONGO
3. Ndi cinentso cipi cakuti panango tinathimbana naco pakumala kubatizwa?
3 Musakumbuka kutsandzaya kudakhala na imwe paulendo wakutoma udasonkhana imwe na Mboni za Yahova? Ufuni udapangiza iwo wakucitisani kufunambo kutumikira Yahova. (Juw. 13:35; Akol. 3:12) Ndi pyenepi pidacitikira Blanca.b Ndzidzi ungasi pidamala iye kubatizwa, acitikirwa na pinthu pyakuti nee akhadikhira. Iye alonga: “Mulongo unango anditsalakana mwakuipa, pontho ndabva kuti iye akhalonga mwakuipa abale na alongo mu mpingo. Ine ndapfundza kuti Mboni za Yahova zisakhala mu ntendere na mwaufuni.” Ndimomwene kuti atumiki a Yahova asawangisira kakamwe toera kupangiza makhaliro adidi. Mbwenye midzidzi inango asalonga peno kucita pinthu pyakuipa. (Aef. 4:23, 24; 1 Juw. 1:8) Na thangwi ineyi, midzidzi inango panango m’bale peno mulongo analonga peno kucita pinthu pyakuti pinatitsukwalisa. (Tiya. 3:8) Mwakutsukwalisa, abale na alongo anango asiya kutumikira Yahova thangwi ya kutsukwaliswa na anango.
4. Ninji pinafuna kutiphedza tingatsukwaliswa na m’bale peno mulongo? (Aefesi 4:32)
4 Mungatsukwaliswa na m’bale peno mulongo, musafunika kucitanji toera mupitirize kutumikira Yahova? Phatisirani uphungu unagumanika pa Aefesi 4:32. (Lerini.) Mungawangisira toera kukhala akukoma ntima na akukhurudzika, munabverana kakamwe na anango. Lekererani mwakucimbiza anango angakudawirani. Ninji pinafuna kukuphedzani toera kucita pyenepi? Kumbukani kuti kazinji kene, imwe musaphemba Yahova toera akulekerereni, pontho iye asakulekererani. (Mat. 6:12) Kukumbuka kukoma ntima kunapangiza Yahova toera kukulekererani, kunakuphedzani toera kulekererambo anango angakudawirani.
5. Ndi uphungu upi wa m’Bhibhlya wakuti unatiphedza tingatsukwaliswa? (Misangani 19:11) (Onanimbo mafoto.)
5 Lerini Misangani 19:11. Bhibhlya isalonga kuti udziwisic unatiphedza toera tikhonde kuipirwa mwakucimbiza tingatsukwaliswa. Mafala anewa aphedza Rima, wakuti abatizwa mu pyaka pingasi nduli. Iye alonga: “Ndingaona abale peno alongo mbalonga peno mbacita pinthu pyakuti pisanditsukwalisa, ine ndisanyerezera Misangani 19:11. Ndisasaka kudziwa pinthu pidaacitikira nduli, pontho thangwi yanji iwo acita pinthu pyakuti pyanditsukwalisa. Buluka penepo, ndisaaphemba toera timwaze mphangwa pabodzi. Kucita pyenepi kusandiphedza toera kuadziwa mwadidi.” Ndi pyadidi kakamwe kudziwa abale na alongo athu cincino, thangwi pinakhala pyakukhonda nentsa kualekerera angatitsukwalisa.
Mungatsukwalisana na m’bale peno mulongo mu mpingo, m’phembeni toera mumwaze mphangwa pabodzi (Onani ndima 5)
6. Ninji pinafuna kutiphedza toera kukhala na uxamwali wakuwanga na abale na alongo?
6 Ninji pinafuna kukuphedzani toera mukhale na uxamwali wakuwanga na abale na alongo mu mpingo? Ndzidzi unadziwa imwe abale na alongo, onani makhaliro awo adidi. (Onanimbo Misangani 10:12; Aroma 12:10; Afil. 2:2, 3) Onani kuti pyenepi pyaphedza tani m’bale Mark adabatizwa kwene cincino. Pidamala iye kubatizwa, akhamala ndzidzi uzinji na abale na alongo a mu mpingo wace. Natenepa, iye atoma kudzindikira makhaliro anango a abale akuti nee akhakomerwa nawo. Ninji cidaphedza Mark toera kupitiriza kukhala na uxamwali wakuwanga na Yahova, pontho na abale na alongo? Iye alonga: “Ine ndadzindikira kuti madodo a abale na alongo athu ndi akucepa kakamwe ndingaalandanisa na madawo makulu anacita anthu a dziko. Natenepa, ndadzindikira kuti nee ndisafunika kunyerezera kakamwe madodo anacita abale na alongo. M’mbuto mwace, cincino ndisanyerezera makhaliro awo adidi.” Kunyerezera makhaliro adidi anapangiza abale na alongo athu, kunatiphedza toera kukhala na uxamwali wakuwanga na iwo.
KUNYEREZERA PINTHU PIDASIYA IMWE NDULI
7. Ninji pinafuna kuticitisa kunyerezera pinthu pidasiya ife nduli?
7 Pidadziwa imwe undimomwene, mwatsandzaya kakamwe thangwi yakusiya kucita khundu ya dziko ino ya Sathani. Panango munanyerezera kuti nkhabe munthu anafuna kusiya undimomwene. Mbwenye mungathimbana na pinentso panango munatoma kunyerezera pinthu pidasiya imwe mbamudzati kukhala Mboni wa Yahova. (Onanimbo Numero 11:4-6.) Mwacitsandzo, abale azinji asiya mabasa awo toera kucita pizinji m’basa ya Yahova. Abale anango pidatoma iwo kupfundza Bhibhlya, axamwali awo akale nee akhafunabve kucita uxamwali na iwo. Abale anango awangisira kakamwe toera kusiya pinthu pikhakomerwa na iwo pyakuti Yahova asapiida. Ndi pyakutsukwalisa kakamwe Nkristu angatawirisa kuti pinthu pidasiya iye nduli pincitise kuluza uxamwali wace na Yahova! Ninji cinafuna kukuphedzani toera mukhonde kubwerera nduli mungathimbana na nyatwa?
8. Tisapfundzanji na pidacita Abhrahamu na Sara?
8 M’Bhibhlya tisaleri pinthu pidacita amuna na akazi akukhulupirika akuti panango mbadanyerezera pinthu pidasiya iwo nduli. Mwacitsandzo, Abhrahamu na Sara abvera pidapangwa iwo na Yahova toera abuluke mu nzinda wakutsidzikizika wa Uri, mbaenda kakhala m’misasa. (Aheb. 11:8, 9) Midzidzi inango, panango iwo akhanyerezera pinthu pyadidi pikhali na iwo ku nzinda wa Uri. ‘Kupitiriza kunyerezera pyenepi’ peno kutsuwa umaso wadidi ukhali na iwo ku Uri, panango mbapidaacitisa kubwerera nduli. Mbwenye nee ndi pyenepi pidacita Abhrahamu na Sara. Iwo apitiriza kunyerezera pinthu pyadidi pidapikira Yahova kuti mbadaapasa ntsogolo.—Aheb. 11:15, 16.
9. Paulu akhaona tani pinthu pidasiya iye toera kutumikira Yahova? (Afilipi 3:7, 8, 13)
9 Mpostolo Paulu asiyambo pinthu pizinji mu umaso wace toera kutumikira Yahova. Mbadzati kukhala Nkristu, Paulu akhadapfundza Mwambo Waciyuda na Gamaliyeli, mpfundzisi wakuti akhalemedzwa kakamwe na Ayuda. (Mabasa 22:3) Paulu mbadakhala ntsogoleri wakudziwika kakamwe wauphemberi Waciyuda. (Agal. 1:13, 14) Mbwenye pidapfundza iye undimomwene unalonga thangwi ya Kristu, asiya pinthu pyonsene. Umaso wa Paulu ukhali tani pidasankhula iye kukhala Nkristu? Iye amenywa, aikhwa nkaidi, pontho atcingwa na Ayuda andzace. (2 Akor. 11:23-26) Paulu mbadanyerezera umaso ukhali na iye kale mbadzati kukhala Nkristu, mbadatsumbikika thangwi yakukhala nyakupfundza wa Yezu. Mbwenye Paulu nee acita pyenepi. M’mbuto mwakunyerezera kakamwe umaso wadidi ukhali na iye nduli, Paulu apitiriza kunyerezera nkhombo yakukhala nyakupfundza wa Yezu Kristu na umaso wadidi ukhafuna khala na iye ntsogolo. Pontho akhali na cinyindiro consene cakuti kukhala nyakupfundza wa Yezu, ndi kwakufunika kakamwe kupiringana pinthu pyonsene pidasiya iye!—Lerini Afilipi 3:7, 8, 13.
10. Tisafunika kunyerezeranji ndzidzi onsene? (Marko 10:29, 30) (Onanimbo mafoto.)
10 Tisapfundzanji? Mungatoma kunyerezera pinthu pidasiya imwe toera kukhala Nkristu, nyerezeranimbo kuti thangwi yanji mwapisiya. (Ekle. 7:10) Landanisani pinthu pidasiya imwe nduli na nkhombo ziri na imwe cincino thangwi yakudziwa undimomwene. Cincino muli na uxamwali wakuwanga na Yahova. (Mis. 3:32) Pa dziko yonsene yapantsi, imwe muli na abale na alongo akuti asakufunani kakamwe. (Lerini Marko 10:29, 30.) Nyerezerani pidapikira Yahova kuti anadzakupasani ntsogolo! (Iza. 65:21-23) Ndzidzi onsene munganyerezera nkhombo ziri na imwe thangwi yakutumikira Yahova, pinakuphedzani toera mukhonde kunyerezera pidasiya imwe nduli.
M’mbuto mwakudzudzumika kakamwe na pinthu pidasiya imwe nduli, tsandzayani na basa yakufunika kakamwe yakumwaza mphangwa idakupasani Mulungu (Onani ndima 10)e
11. Mwapfundzanji na pidacita mulongo Rosemary?
11 Mulongo Rosemary abatizwa pikhali iye cifupi na pyaka 50 pyakubalwa. Onani pidacita iye toera akhonde kunyerezera pinthu pidasiya iye nduli. Iye alonga: “Pakutoma, ndzidzi wa Natali ungafika ndikhatsukwala kakamwe, thangwi ndikhakomerwa kakamwe kukhala pabodzi na acibale anga ntsiku ineyi. Ine ndikhakomerwa kakamwe kupasa miyoni anthu akhafuna ine. Ndikhakomerwa kuona ananga na adzukulu anga mbakatsandzaya angafungula miyoni idaapasa ine.” Ninji cidamphedza? Iye alonga: “Ine ndagumana njira inango yakukhala wakutsandzaya pabodzi na acibale anga, m’mbuto mwa kucita pyenepi pa ntsiku ya Natali. Pyaka pyonsene ndisacemera acibale anga toera tikhale pabodzi. Mu ntsiku zakusiyana-siyana ndisaapasa miyoni, pontho ndisaapanga kuti thangwi yanji ndisafuna m’bodzi na m’bodzi wa iwo.” Mulongo Rosemary akhathimbanambo na cinentso cinango. Iye alonga: “Pidakhala ine Mboni wa Yahova, axamwali anga akuti nee asatumikira Yahova nee akhafunabve kucedza na ine. Na thangwi ineyi, midzidzi inango ndikhapibva kuti ndiri ndekhene.”d Ninji pidamphedza? Iye acita masasanyiro akubuluka na alongo akusiyana-siyana m’basa yakumwaza mphangwa. Iye alonga: “Pidacita ine pyenepi, ndakhala na axamwali apswa azinji akuti ndisaafuna, pontho ndisaalemedza.” Mwapfundzanji na pidacita mulongo Rosemary? Maseze mutsuwe pinthu pikhakutsandzayisani mbamudzati kutumikira Yahova, kumbukani kuti munadzakhala na pinthu pyakutsandzayisa kakamwe kupiringana pidasiya imwe. (Afil. 4:8, 9) Pontho kumbukani kuti Yahova ndzidzi onsene asakupasani pizinji kupiringana pidasiya imwe thangwi yakuntumikira.
ANANGO ANGASIYA KUTUMIKIRA YAHOVA
12. Ndi pinthu pipi pyakuti pingacitika mu mpingo panango pinakhala pyakunentsa kupirira?
12 Pidakhala imwe Mboni wa Yahova, imwe mwatsandzaya kakamwe thangwi yakusiya kucita khundu ya dziko ino ya Sathani. (Iza. 65:14) Ngakhale tenepo, mukupita kwa ndzidzi, panango munabva kuti m’bale peno mulongo acita madawo makulu mbabuluswa mu mpingo. (1 Akor. 5:13) Onani kuti pyenepi pyakhuya tani mulongo Samar. Iye alonga: “Ndzidzi ungasi pidamala ine kubatizwa, nkulu wa mpingo m’bodzi acita madawo makulu mbabuluswa mu mpingo. Pyenepi pyanditsukwalisa kakamwe, thangwi nee ndikhadikhira kuti nkulu wa mpingo mbadacita madawo mbatsukwalisa Yahova na abale na alongo mu mpingo.” Ndimomwene kuti ndzidzi onsene tisafunika kunyindira kuti abale na alongo asafuna Yahova, pontho asafuna kukhala akukhulupirika kuna iye. (1 Akor. 13:4, 7) Ngakhale tenepo, pyaka pyonsene abale na alongo anango asabuluswa mu mpingo. Panango pinakhala pyakunentsa kupirira khala xamwali wanu, m’bale wanu peno munthu wakuti musamulemedza kakamwe asiya kutumikira Yahova.
13. Tisafunika kucitanji cincino toera tikhale na cikhulupiro cakuwanga munthu anafuna ife angasiya kutumikira Yahova?
13 Musafunika kucitanji cincino toera mupitirize kukhala na cikhulupiro cakuwanga, khala m’bale wanu peno xamwali wanu asiya kutumikira Yahova? Pitirizani kuwangisa uxamwali wanu na Yahova. (Tiya. 4:8) Kumbukani kuti imwe mwasankhula kutumikira Yahova, tayu kutowezera anthu anango. Mwacitsandzo, ife tisalambira Yahova pabodzi na anthu a panyumba pathu na abale na alongo mu mpingo. Mbwenye m’bodzi na m’bodzi wa ife asafunika kucita phembero na kuleri Bhibhlya paekha.—Mas. 1:2; 62:8.
14. Tisapfundzanji na pidacita mpostolo Pedhru? (Juwau 6:66-68)
14 Ife tisafunikambo kutowezera pidacita mpostolo Pedhru mu ndzidzi wakuti anyakupfundza azinji asiya kutowera Yezu. Mu ndzidzi unoyu panango pakhali na pinthu pyakuti mbapidadzudzumisa Pedhru. Mbwenye onani pidalonga iye mwakubverana na Juwau 6:66-68. (Lerini.) M’mbuto mwakunyerezera kakamwe pinthu pikhacita anango, Pedhru akhanyerezera undimomwene udampfundzisa Yezu. Pyenepi pyaphedza Pedhru toera apitirize kutumikira Yahova. Munjira ibodzi ene, anango angasiya kutumikira Yahova, kumbukani undimomwene udapfundza imwe thangwi ya Yahova mu gulu yace. Pitirizani kulemedza pinthu pidapfundza imwe mbamupitiriza kukhala wakukhulupirika kuna Yahova. Samar adalongwa pakutoma athimiza: “Ndzidzi onsene ndisakumbuka kuti munthu angacita pinthu pyakuipa, nee pisabveka kuti onsene mu mpingo ali na makhaliro akuipa peno gulu ya Yahova isapfundzisa pinthu pyakuipa. Pontho nee pisabveka kuti anthu onsene mu mpingo nee akupangiza makhaliro adidi.”
15. Mwapfundzanji na pidacitikira Emily?
15 Nyerezerani pidacitikira Emily. Sumana ibodzi pidamala iye kubatizwa, mai wace abuluka panyumba, pontho abuluswa mu mpingo. Emily alonga: “Ine cipo ndanyerezera kuti mai wanga mbadacita pyenepi. Ceneci ndi cinthu cakunentsa kakamwe cidandicitikira mu umaso wanga. Ndatsuwa kakamwe mai wanga.” Ninji cidaphedza Emily? Iye alonga: “Ine nee ndiri ndekhene. Pai wanga asandiphedza kakamwe, kuphatanizambo abale na alongo mu mpingo akuti ndi ninga anthu a pabanja pathu. Anthu onsene anatumikira Yahova asatamba nyatwa. Na thangwi ineyi, ndi pyakufunika kakamwe kukhala pabodzi na kuwangisana unango na ndzace.” (1 Ped. 5:9) Imwe nee musafunika kudikhira kuthimbana na nyatwa toera muwangise uxamwali wanu na abale na alongo. Wangisirani toera kudziwa mwadidi abale na alongo cincino. Mungacita pyenepi, mwakukhonda tsalakana pinafuna kukucitikirani, munaona kuti nee muli mwekhene.
16. Tisafunika kukumbukanji? (Onanimbo foto.)
16 Kumbukani kuti Yahova asalanga ale anafuna iye. (Aheb. 12:6) Yahova asafuna kuti onsene adasiya kuntumikira abwerere kuna iye. (2 Ped. 3:9) Natenepa munthu anafuna imwe angabuluswa mu mpingo, khalani na cinyindiro cakuti akulu a mpingo anacita pyonsene pinakwanisa iwo toera iye abwerere kuna Yahova.—2 Tim. 2:24, 25.
Xamwali wanu peno m’bale wanu angabuluswa mu mpingo, kumbukani kuti akulu a mpingo asafuna kumphedza toera abwerere kuna Yahova (Onani ndima 16)f
17. Tisafunika kukhala na cinyindiro cipi?
17 Mu nsolo uno, basi ene tapfundza pinentso pingasi pyakuti panango munathimbana napyo pakumala kubatizwa. Mbwenye imwe munakwanisa kutumikira Yahova mwakukhulupirika, mwakukhonda tsalakana pinentso pyenepi. Pali na pinthu pizinji pyakuti munakwanisa kupicita toera mukhale wakukhunganyika. Pontho kumbukani kuti ndzidzi onsene, Yahova anakuphedzani toera mupitirize kukhala wakukhulupirika kuna iye. Yahova ali dzololo toera kukuphedzani, pontho asafuna kukuphedzani kwenda na kwenda. (1 Ped. 5:10) Ndzidzi onsene iye anakuphedzani toera mukwanise kupirira pinentso. Mungapitiriza kutawira ciphedzo ca Yahova, imwe munapitiriza kukhala na uxamwali wakuwanga na iye mwakukhonda tsalakana pinentso.—Mas. 119:165; Aroma 8:38, 39.
NYIMBO 154 Ufuni Wakukhonda Mala
a Maseze nsolo uno wakhunganyirwa makamaka ale adamala kwene kubatizwa, ife tonsene tinakwanisa kuphedzeka na mphangwa zenezi.
b Madzina anango acinjwa.
c Udziwisi usaphataniza luso yakudzindikira pinthu. Nkhaliro unoyu unatiphedza kudzindikira kuti thangwi yanji munthu alonga peno acita pinthu pyakuti pyatitsukwalisa.
d Ife tonsene, tayu basi ale anacitisa mapfundziro a Bhibhlya, tisafunika kuphedza anyakupfundza Bhibhlya na ale adabatizwa kwene cincino toera apibve kuti ndi akufunika mu mpingo. Onani ndima 15 na 16 ya nsolo wakuti “Abale na Alongo mu Mpingo Anaphedza Tani Anyakupfundza Bhibhlya Toera Athambaruke Mpaka Kubatizwa?” mu Ncenjezi wa Março wa 2021.
e MAFALA ANAFOKOTOZA FOTO: Mu ndzidzi unamwaza mulongo mphangwa, akuona akazi anango mbakagwa bhola, pontho ali kukumbuka mu ndzidzi ukhagwambo iye bhola. Mukupita kwa ndzidzi, mulongo unoyu akumwazira mphangwa nkazi wakuti panango kale akhagwa naye pabodzi bhola.
f MAFALA ANAFOKOTOZA FOTO: Akulu a mpingo awiri akucedzera mamuna m’bodzi wakuti abuluswa mu mpingo, iwo akum’phedza toera abwerere kuna Yahova.