Ubatizo Usabvekanji, Pontho Thangwi Yanji Ndi Wakufunika?

1. Ninji pinapangiza kuti ubatizo ndi cibodzi mwa pinthu pyakufunika pinapfundzisa Bhibhlya?

MUNTHU angabatizwa, ife tisatsandzaya kakamwe! Akristu a mu ndzidzi wa apostolo akhalambo na mabvero anewa. Pa nsonkhano wakutoma wa Akristu, iwo aona anthu azinji mbabatizwa. Mu ndzidzi unoyu, mpostolo Pedhru acita nkhani mbafokotoza kuti thangwi yanji tisafunika kubatizwa. (Mabasa 2:38, 40, 41) Mukupita kwa ndzidzi, mpostolo Paulu alemba kuti: “Cipfundziso cinalonga pya ubatizo” cisacita khundu ya “cipfundziso cakutoma cinalonga pya Kristu.” (Aheb. 6:1, 2) Natenepa, ubatizo ndi cibodzi mwa pinthu pyakufunika pinapfundzisa Bhibhlya, pontho tisafunika kubvesesa mwadidi mabvekero awo. Thangwi yanji?

2. Thangwi yanji tisafunika kubvesesa mwadidi mabvekero a ubatizo?

² Nyumba ingakumbirwa mwadidi isakhala yakuwanga. Munjira ibodzi ene, kubvesesa mabvekero na kufunika kwa ubatizo kunatiphedza toera kukhala na cikhulupiro cakuwanga. Mwakukhonda tsalakana khala tiri kuthambaruka toera kubatizwa peno tabatizwa kale, tonsene tisafunika kubvesesa pyenepi. Na thangwi ineyi, mu nsolo uno tinatawira mibvundzo iyi: Ubatizo usabvekanji, pontho thangwi yanji ndi wakufunika? Ubatizo usacitwa tani? Pontho thangwi yanji tisabatizwa mu dzina ya Baba, na ya Mwana na ya nzimu wakucena?

UBATIZO USABVEKANJI, PONTHO THANGWI YANJI NDI WAKUFUNIKA?

3. Ubatizo usapangizanji?

³ Ubatizo usapangiza kuna anthu anango kuti mwatawira undimomwene unalonga thangwi ya Yahova Mulungu na Yezu Kristu, mwatcunyuka madawo anu, pontho mwacita macinjo toera kutumikira Yahova. Ubatizo usapangizambo kuti mwabvesesa kuti Mulungu asaphatisira Yezu toera kutipulumusa ku madawo na kufa. Kusiyapo pyenepi, munthu asapangiza kuti aperekeka kuna Yahova, pontho asacita phembero mbapikira kuti anatumikira iye mu gulu yace. Mungaperekeka na kubatizwa, imwe munatoma kutumikira Yahova, pontho munakwanisa kucita pyenepi kwenda na kwenda.

4. Pisabvekanji kubizwa manungo onsene m’madzi? (Onanimbo foto.)

⁴ Pakubatizwa, munthu asabizwa m’madzi manungo onsene, buluka penepo mbabuluswa.a Pisakhala ninga akhadafa mbafikirwa, buluka penepo mbalamuswa muli akufa. (Onanimbo Akolose 2:12.) Ubatizo usapangiza macinjo makulu adacita imwe mu umaso wanu. Munjira ipi? Mungabizwa m’madzi, imwe musapangiza kuti mwasiya umaso wanu wakale. Mungabuluswa, imwe musatoma umaso upswa mbamutoma kuikha cifuno ca Mulungu pa mbuto yakutoma.

5. Kuwangisira toera kubatizwa, kwalandana tani na kuwangisira kudacita Nowa toera kumanga arka? (1 Ped. 3:18-21)

⁵ Lerini 1 Pedhru 3:18-21. Tinakwanisa kulandanisa kuwangisira kunacita munthu toera kubatizwa na kuwangisira kudacita Nowa toera kumanga arka. Khala imwe mwatoma kupfundza Bhibhlya cincino, panango pinaoneka ninga ndi pyakunentsa kucita macinjo toera kubatizwa, ninga basa idacita Nowa pakumanga arka. Kodi ndi pyakufunikadi kuwangisira? Inde, ndi pyakufunika; Nowa awangisira toera kumanga arka. Mulungu apanga Nowa kuti akhafunika kumanga tani arka, pontho Nowa abvera pitsogolero pidapaswa iye. Na cikhulupiro, pontho na ciphedzo ca Yahova, Nowa abvera mbamanga arka. Iye “acita pyonsene mwakubverana na pidapangwa iye na Mulungu.” Imwe munakwanisambo kucita pibodzi pyene.—Gen. 6:22.

6. Ubatizo usakupulumusani tani?

⁶ Pa vesi 21, mpostolo Pedhru alemba kuti ‘ubatizo usakupulumusani.’ Ndimomwene kuti basi ene kubizwa m’madzi nee kusapulumusa munthu peno kucenesa madawo ace. Pyenepi pisakwanisika basi ene thangwi ya ntsembe ya Yezu. (1 Juw. 1:7) Ngakhale tenepo, kubatizwa ndi kwakufunika kakamwe, thangwi Yahova alonga kuti musafunika kucita pyenepi. Ubatizo ndi njira yakuphemba toera kukhala na “cikumbuntima cadidi kuna Mulungu.” Pontho Yahova asatawira phembo ineyi mwakutsandzaya mbatilekerera madawo athu thangwi ya ntsembe ya Yezu. Ndi munjira ineyi yakuti ubatizo usapulumusa, peno usacitisa kuti tikwanise kukhala na umaso wakukhonda mala.

UBATIZO USACITWA TANI?

7. Ubatizo usafunika kucitwa tani?

⁷ Ife taona kuti pakubatizwa, munthu asafunika kubizwa manungo ace onsene m’madzi. Bhibhlya nee isalonga pinthu pizinji thangwi ya njira inafunika kucitwa ubatizo, mbwenye iyo isalonga pinthu pyakuti pinatiphedza kudziwa kuti tinacita tani ubatizo. Mwacitsandzo, iyo isatiphedza toera kudziwa kuti ale anafuna kubatizwa asafunika kubvala tani, pontho kuti ale anagumanika pa ubatizo asafunika kupangiza makhaliro api. (1 Akor. 14:40; 1 Tim. 2:9) Kazinji kene, anabatiza ndi nkulu wa mpingo. Mbwenye ife nee tisapasa mbiri kakamwe m’bale anatambira mwai unoyu. (1 Akor. 1:14, 15) Pontho kuna Yahova, ubatizo ndi wakutawirika mwakukhonda tsalakana khala adagumanika ndi anthu azinji peno akucepa.—Mabasa 8:36.

8. Ndi mibvundzo ipi inacitwa kuna anthu anafuna kubatizwa, pontho thangwi yanji? (Mabasa 2:38-42) (Onanimbo foto.)

⁸ Bhibhlya isapangiza kuti tisafunika ‘kulonga pakweca cikhulupiro cathu toera tipulumuke.’ (Aroma 10:9, 10; onani nota de estudo yakuti “declarares publicamente.”) Kucita pyenepi pa ntsiku yakubatizwa kwathu, ndi pyakuthema thangwi ubatizo ndi cibodzi mwa pinthu pyakufunika kakamwe toera tipulumuswe. Na thangwi ineyi, isacitwa mibvundzo miwiri kuna ale anafuna kubatizwa. Mbvundzo wakutoma ndi wakuti: “Kodi mwatcunyuka madawo anu, mwaperekeka kuna Yahova, pontho mwatawira kuti iye asaphatisira Yezu Kristu toera kutipulumusa?” Mbvundzo unoyu usatikumbusa nkhani idacita Pedhru mu Pentekoste, pontho cifuniro ca mbvundzo unoyu ndi kudziwa pidacita munthu toera kubatizwa. Mbvundzo waciwiri ndi wakuti: “Kodi musadziwa kuti mungabatizwa munadziwika ninga m’bodzi wa Mboni za Yahova, pontho munatoma kucita khundu ya gulu yace?” Mbvundzo unoyu usalonga pinthu pinafuna kucita munthu pakumala kubatizwa. Iye asapikira kuti anabvera pitsogolero pya Yahova na kuntumikira pabodzi na abale na alongo. Ndi pyenepi pidacita Akristu a mu ndzidzi wa apostolo. (Lerini Mabasa 2:38-42.) Ale anatawira kuti inde na ntima onsene mibvundzo ineyi miwiri, anakwanisa kubatizwa.

9. Ndi pinthu pipi pyakuti ife tonsene tisafunika kupicita toera kutsandzayisa Mulungu?

⁹ Panango mbamudzati kupfundza undimomwene, imwe mukhali na makhaliro adidi, pontho nee mwacita madawo makulu peno mwakuzwa na anyakubala Acikristu akuti akuphedzani toera kufuna Yahova. Ngakhale tenepo, imwe musafunika kutcunyuka mbamubatizwa toera kutsandzayisa Mulungu. Mwakukhonda tsalakana kuti umaso wathu ukhali tani, tisafunika kudzindikira kuti tabalwa m’madawo, pontho pyenepi pisatipingiza toera kukhala axamwali a Mulungu. (Mas. 51:5) Mu ndzidzi unadziwa ife Yahova, tisafunika kuikha cifuniro cace pa mbuto yakutoma. Tisafunika kutcunyuka madawo akhacita ife kale mbatitoma kucita pinthu pinatsandzayisa Babathu wakudzulu. Natenepa, tinakwanisa kubatizwa.—Mabasa 3:19.

10. Musafunika kucitanji khala mwabatizwa kale mu uphemberi unango?

¹⁰ Panango pikhali imwe mu uphemberi unango mwabatizwa kale. Ngakhale tenepo, musafunika kubatizwa ninga m’bodzi wa Mboni za Yahova. Thangwi yanji? Thangwi mu ndzidzi unoyu, imwe nee mukhabvesesa mwadidi undimomwene thangwi ya Mulungu na Yezu. Maseze mukhadacita phembero toera kuperekeka kuna Mulungu, imwe nee mwacita pikiro ineyi thangwi yakubvesesa mwadidi cifuno cace. Ku Efeso mpostolo Paulu, adziwa anthu akuti akhadabatizwa, mbwenye nee akhabvesesa pipfundziso pyakuti Akristu akhafunika kupibvesesa. Na thangwi ineyi, anthu anewa akhafunika kubatizwa pontho.b (Mabasa 19:1-5) Munjira ibodzi ene, lero Yahova basi ene asatawira ubatizo wa munthu wakuti asadziwa mwadidi cifuno cace.

“MU DZINA YA BABA, NA YA MWANA NA YA NZIMU WAKUCENA”

11. Pisabvekanji kubatizwa “mu dzina ya Baba, na ya Mwana na ya nzimu wakucena”? (Mat. 28:18-20)

¹¹ Yezu apanga anyakupfundzace apswa kuti iwo akhafunika kubatizwa “mu dzina ya Baba, na ya Mwana na ya nzimu wakucena.” (Lerini Mateu 28:18-20.) Kodi iye akhafuna kulonganji? M’Bhibhlya, fala inathumburuzwa kuti “dzina,” kazinji kene isalonga pya makhaliro a munthu. Kusiyapo pyenepi, isaphatisirwambo toera kulonga basa na mphambvu iri na dzina ya munthu. (Onanimbo Mateu 10:41 na nota de estudo yakuti “Por ele ser um profeta.”) Natenepa tingabatizwa mu dzina ya Yahova na ya Yezu, ife tisadzindikira kuti iwo ali na ufulu na mphambvu yakutipanga pinafunika ife kucita. Pontho tingabatizwa mu dzina ya nzimu wakucena tisadzindikira basa iri na nzimu wakucena pa kutitsogolera. Cincino tinapfundza kuti tinacita tani pyenepi.

12. Pisabvekanji kubatizwa mu dzina ya Baba? (Apokalipse 4:11) (Onanimbo foto.)

¹² Mu dzina ya Baba. Ife tiri na cinyindiro cakuti Yahova ndi Babathu wakudzulu wakuti atipasa umaso. Iye ndi wamphambvu zonsene, pontho acita pinthu pyonsene. (Lerini Apokalipse 4:11.) Kusiyapo pyenepi, tiri na cinyindiro cakuti iye asabvesera maphembero athu, pontho tisaphatisira dzina yace pakucita phembero kuna iye na kulonga na anango thangwi ya iye. (Mas. 65:2) Mbwenye pana cinthu cinango cakuti tisafunika kucidzindikira thangwi yakubatizwa mu dzina ya Baba. Ale adabvesera nkhani ya Pedhru mu Pentekoste akhadziwa kale Yahova, mbwenye kutomera ntsiku ineyi akhafunika kudzindikira kuti basi ene mbadapaswa umaso wakukhonda mala kubulukira mu ntsembe ya Yezu Kristu. Ifembo tisafunika kucita pibodzi pyene.—Aroma 5:8.

13. Pisabvekanji kubatizwa mu dzina ya Mwana? (Onanimbo foto.)

¹³ Mu dzina ya Mwana. Yezu ndi Mwana wa Mulungu. Iye ndi “njira,” pontho kubulukira mwa iye tinakwanisa kukhala axamwali a Yahova. (Juw. 14:6) Pontho Yezu ndi mpulumusi wathu; iye atifera toera tikhale na umaso. Kudziwa pyenepi kusatikulumiza toera kuntowezera ntsiku zonsene, tayu basi ene pa ntsiku inabatizwa ife. (1 Juw. 2:6) Ninga Yezu, ife tisamwaza mphangwa mwaphinga mbatikhonda kutawirisa kuti pinthu pinango pitipingize kucita pyenepi. (Luka 4:43) Ngakhale titcingwe, ife tiri dzololo toera kutumikira Mulungu mwakukhulupirika. (2 Tim. 3:12) Ife tisalemedza Yezu ninga “nsolo wa mpingo.” Na thangwi ineyi, tisatsandzaya mbatibvera pitsogolero pya ale adakhazikisa Yezu toera kutsogolera mpingo na kutsalakana atowereri ace.—Aef. 4:8, 11, 12; 5:23.

14. (a) Pisabvekanji kubatizwa mu dzina ya nzimu wakucena? (Onanimbo foto.) (b) Ndi mitundu ipi inango ya ubatizo inacita Akristu akudzodzwa? (Onanimbo bokosi ya nsolo wakuti “Mitundu Inango ya Ubatizo Kuna Akristu Akudzodzwa.”)

¹⁴ Mu dzina ya nzimu Wakucena. Ife tisabvesesa undimomwene thangwi ya nzimu wakucena. Tisadziwa kuti iwo nee ndi munthu, pontho nee usacita khundu ya utatu. Mbwenye ndi mphambvu ya Mulungu. Tisabvesesa kuti nzimu wakucena watsogolera aprofeta na anyakulemba Bhibhlya. Na thangwi ineyi, tisaleri Bhibhlya ndzidzi onsene, pontho tisabvera pinapfundza ife. (2 Ped. 1:20, 21) Pontho ife tisawangisira toera tikhonde kucita madawo makulu, thangwi tisadziwa kuti pyenepi pinacitisa kuti ife, ngakhale anango mu mpingo akhonde kutambira nzimu wakucena.—Aef. 4:30.

15. Tisafunika kukhala dzololo toera kucitanji?

¹⁵ Khala imwe mwabatizwa, khalani dzololo toera kubvesesa mwadidi “cipfundziso cinalonga pya ubatizo,”c pontho khalani m’maso mwakubverana na pikiro idacita imwe kuna Yahova pa ntsiku idaperekeka imwe na ntsiku idabatizwa imwe. Ndiye tani khala mwadzati kubatizwa? Kodi pali na cinthu cinakupingizani? Mu nsolo unatowera tinapfundza kuti munapitiriza tani kuthambaruka mpaka kubatizwa.