SUMANA 6-12 YA ABRIL YA 2026
NYIMBO 82 “Ceza Canu Cioneke Kuna Anthu”
Tinaphedza Tani Acibale Athu Akuti Nee Asatumikira Yahova?
“Mbatilekeni kubwerera nduli pakucita pinthu pyadidi.”—AGAL. 6:9.
PINAFUNA IFE KUPFUNDZA
Tinapfundza kuti tinawangisa tani uxamwali wathu na acibale athu akuti nee asatumikira Yahova, pontho kuti tinalonga nawo tani thangwi ya Yahova, munjira yakuti anafuna kutibvesera.
1-2. Ninji pyakuti panango pyakucitisani kukhonda kubverana na acibale anu pidatoma imwe kupfundza Bhibhlya?
YEZU apanga mamuna wakuti akhafuna kukhala nyakupfundzace kuti: “Ndoko kunyumba kuna abale ako, ukaapange pinthu pyonsene pidakucitira Yahova.” (Marko 5:19) Yezu alonga mafala anewa, thangwi akhadziwa kuti anthu azinji asakomerwa kupanga acibale peno axamwali awo mphangwa zadidi.
2 Musakumbuka kutsandzaya kudakhala na imwe pidatoma imwe kupfundza Bhibhlya? Panango mwakomerwa kakamwe mbamufunambo kupanga acibale anu pinthu pikhapfundza imwe. Mbwenye panango iwo nee akomerwa na mphangwa zidaapanga imwe peno njira idalonga imwe yacitisa kuti mukhonde kubverana. Khala ndi pyenepi pidakucitikirani, nsolo uno unakuphedzani toera kudziwa kuti munacitanji toera kupitiriza kukhala wakhulupirika kuna Yahova, mbamubverana na acibale anu.
3. Tinapfundzanji mu nsolo uno?
3 Mu nsolo uno, tinapfundza kuti: (1) Tinabvera tani ntsisi acibale athu akuti nee asatumikira Yahova,a maseze nee asafuna kupfundza thangwi ya Yahova? (2) Tinacitanji acibale athu angalonga peno angacita pinthu pyakuti pisatitsukwalisa? (3) Tinakhala tani akupirira mbatidikhira kuti ntsogolo anatumikirambo Yahova? Na (4) tinacitanji toera kupangiza kuti tisaafuna.
KHALANI AKUBVERA NTSISI
4. Yezu akhatsalakana tani anthu akuti nee akhafuna kubva mphangwa zace?
4 Yezu nee asiya kumwazira mphangwa anthu akuti nee akhambvesera. Iye aphatisira nsangani toera kulandanisika na nyakulima wakuti aphatisira njira zakusiyana-siyana toera nsambvu ubale misapo. (Luka 13:6-9) Pidalonga Yezu nsangani unoyu, pakhadapita pyaka pitatu mbakayesera kuphedza Ayuda toera an’khulupire kuti adzakhale anyakupfundzace. Thangwi yanji Yezu akhapitiriza kuamwazira mphangwa? Thangwi iye akhabvera ntsisi anthu. Ndi pyenepi pikham’phedza toera kukhala wakupirira.
5. Thangwi yanji Yezu akhabvera ntsisi Ayuda?
5 Yezu akhabvera Ayuda ntsisi, thangwi atsogoleri auphemberi nee akhaaphedza toera kukhulupira Mulungu. Yezu alonga kuti Ayuda anewa akhali ninga “mabira akusowa nkumbizi.” (Marko 6:34) Pikhali iye dhuzi na kufa, Yezu alira pidaona iye nzinda wa Yerusalemu. Iye akhadziwa kuti anthu azinji akakhala mu nzinda mbadafa thangwi nee akakhulupira iye na Yahova. (Luka 19:41-44) Munjira ibodzi ene, tingabvera acibale athu ntsisi, mbatinyerezera kuti thangwi yanji asafunika kupfundza undimomwene, tinawangisira toera kuaphedza.
6. Thangwi yanji tisafunika kupirira acibale athu akuti nee asakhulupira Yahova? (Agal. 6:9)
6 Lerini Agalata 6:9. Maseze acibale athu akhonde kupfundza thangwi ya Yahova cincino, tisafunika kukhala akupirira mbatiatsalakana “mwakukoma ntima.” Ife tonsene tisadziwa kuti pisakwata ndzidzi toera munthu asiye pinakhulupira iye mbatoma kukhulupira Yahova. Panango kale, “imwe nee mukhali na cidikhiro, pontho nee mukhali na Mulungu pa dziko.” (Aef. 2:12) Mbwenye munthu apangiza kupirira kuna imwe mbakuphedzani toera kupfundza thangwi ya Yahova. Mungapangiza kupirira kuna acibale anu, munaaphedza toera apfundzembo thangwi ya Yahova.
TISAFUNIKA KUCITANJI ACIBALE ATHU ANGALONGA PENO ANGACITA PINTHU PYAKUTI PISATITSUKWALISA?
7. Ninji pyakuti panango pyapingiza abale ace Yezu kuntowera?
7 Abale a Yezu panango abva pirengo pidacita iye ku Galileya. (Luka 4:14, 22-24) Mbwenye pakutoma, iwo nee akhulupira Yezu. (Juw. 7:5) Thangwi yanji? Bhibhlya nee isalonga. Mbwenye iyo yalonga pinthu piwiri pidacitisa Ayuda anango kukhonda kukhala anyakupfundza a Yezu; anango akhagopa kutcingwa na anthu apacisa. (Juw. 9:18-22) Anangombo akhadziwa Yezu kutomera uwana wace. Natenepa pikhali pyakunentsa kuna iwo kukhulupira kuti Yezu akhali Mwana wa Mulungu. (Marko 6:1-4) Panango ndi pyenepi pidacitisa abale a Yezu kunyerezerambo tenepo. Kodi ndi pyenepi pinakucitikiranimbo?
8. Ndi pinthu pipi pinacitisa acibale athu kulonga peno kucita pinthu pyakuti pisatitsukwalisa?
8 Nyerezerani kuti thangwi yanji acibale anu asacita pinthu peno asalonga mafala akuti asakutsukwalisani. Abale a Yezu panango akhakhulupirambo pikhalonga acibale awo anango kuti “iye ali na nsala.” (Marko 3:21) Thangwi yanji iwo akhanyerezera tenepo? Bhibhlya isalonga kuti Yezu akhamala ndzidzi uzinji mbakamwaza mphangwa na kuwangisa anthu mpaka kusowa ndzidzi wakudya. (Marko 3:20) Panango acibale a Yezu akhanyerezera kuti nee akhapidziwa pikhacita iye. Panango acibale athu ananyerezera kuti tiri kubvunga ndzidzi uzinji thangwi ya uphemberi wathu. Khala acibale athu asanyerezera tenepo, tisafunika kucita peno kulonga pinthu pyakuti pinapangiza kuti tisadziwa pinacita ife.
9. Ninji cinafuna kuphedza acibale athu toera kukhala na maonero adidi thangwi ya Mboni za Yahova? (1 Pedhru 3:1, 2) (Onanimbo mafoto.)
9 Pitirizani kukhala wakukoma ntima na wakulinganira. Pinthu pyadidi pinalonga ife na pinacita ife, pinaphedza acibale athu kucinja maonero awo thangwi ya Mboni za Yahova. (Lerini 1 Pedhru 3:1, 2.) Amuna akuti nee ndi Mboni za Yahova, asapibva ninga asiyiwa okhene akazi awo angaenda ku misonkhano na m’basa ya kumwaza mphangwa. Mulongo nee asafunika kucitisa mamunace kupibva tenepo. Na thangwi ineyi, mulongo anakwanisa kucinja ndandanda yace yakutumikira Yahova toera kumala ndzidzi uzinji na mamunace. Mwacitsandzo, mulongo anakwanisa kuenda m’basa ya kumwaza mphangwa mu ndzidzi wakuti mamunace akucita mabasa anango peno nee ali panyumba. Mulongo angakhala wakulinganira, panango anaphedza mamunace toera kucinja manyerezero ace mbakhala na maonero adidi thangwi ya Mboni za Yahova.
Kulonga na kucita pinthu pyadidi kunakwanisa kuphedza mamuna peno nkazi wakuti nee ndi Nkristu toera kucinja maonero ace thangwi ya Mboni za Yahova (Onani ndima 9)g
10. Tinatowezera tani Yezu tinganentswa thangwi ya cikhulupiro cathu?
10 Midzidzi inango, lekani kukakamizika toera kutawira acibale anu angakunentsani. Mu ndzidzi ukhapambizira anthu anango Yezu kuti akhadya na kumwa kakamwe, iye nee aipirwa peno kuyesera kupangiza kuti unoyu ndi uthambi. M’mbuto mwace, iye akhafuna kuti anthu aone okhene khala pyenepi ndi undimomwene. (Mat. 11:19) Iye apangizambo na pinthu pikhacita iye kuti akhali wakulinganira, pontho kuti akhakomerwa kakamwe na pinthu pyadidi. (Onanimbo Juwau 2:2, 6-10.) Acibale anu angakunentsani thangwi ya pinthu pinakhulupira imwe, lekani kukakamizika toera kupangiza kuti iwo aphonyeka. Ninga Yezu, pangizani na pinthu pinacita imwe kuti ndimwe wakulinganira na wakutsandzaya, pontho asiyeni abvesese okhene pyenepi. Pinthu pyadidi pinacita imwe pinaaphedza kubvesesa kuti pinthu pyakuipa pinabva iwo thangwi ya ife nee ndi undimomwene.
KHALANI AKUPIRIRA, PONTHO LEKANI KULUZA CIDIKHIRO
11. Ndi nkhaliro upi udapangiza Yezu kuna acibale ace?
11 Bukhu ya Mateu, Marko, Luka na Juwau isapangiza kuti Yezu akhapirira acibale ace. Pyonsene pidacitika pisapangiza kuti iwo akhali nanthu pidacita Yezu cirengo cakutoma ku Kana. (Juw. 2:11, 12) Ngakhale tenepo, abale a Yezu nee ankhulupira. Mbwenye Yezu nee akhala kutali na iwo. Bhibhlya isapangiza kuti mudapita pyaka pitatu pidamala Yezu kucita cirengo ku Kana, iye apitiriza kukhala wakukoma ntima kuna acibale ace.—Juw. 7:5-8.
12. Ninji pinafuna kutiphedza toera kukhala na cinyindiro cakuti na ntsiku yace, acibale athu anatumikira Yahova?
12 Ife tisadziwa kuti Yahova ndi wantsisi kakamwe. Kukumbuka pyenepi kunatiphedza toera tikhonde kuluza cidikhiro cakuti na ntsiku yace, acibale athu anango anadzafuna kupfundza thangwi ya Yahova. Uphemberi wauthambi ungafudzwa, acibale athu panango anakumbuka kuti ife tikhalonga pyenepi.b (Apok. 17:16) Panango iwo anacita cisankhulo cakutumikira Yahova pabodzi na ife nyatwa ikulu ingatoma. Pyenepi mbapidzati kucitika, tinakwanisa kuphedza acibale athu m’midzidzi ya nyatwa. Angapibva kuti asafuniwa, panango anatawira kupfundza Bhibhlya.
PANGIZANI UFUNI
13. Nakuti tiri na pizinji toera kucita, tisafunika kucalira kucitanji?
13 Ndimomwene kuti tiri na pizinji toera kucita m’basa ya Yahova. Mbwenye nee tisafunika kucitisa acibale athu apibve kuti nee tiri na ndzidzi wakucedza nawo, peno kuti nee tisaafunabve. (Mat. 7:12) Tinapangiza tani kuti tisaatsalakana? Tendeni tione pinthu pingasi.
14-15. Tinapangiza tani kuti tisafuna acibale athu akuti nee ndi Akristu? Fokotozani.
14 Cedzani nawo kazinji kene, pontho pangizani kuti musaafuna. Njira ibodzi inapangiza kuti tisafuna acibale athu, ndi kuapanga ndzidzi onsene kuti tiri tani. Mwacitsandzo, ife tinakwanisa kuatumizira mphangwa na mafoto adabulusa ife pa phwando na axamwali athu peno paulendo. Tingaapasa muoni wakucepa peno kuatumizira mphangwa, pyenepi pinakwanisa kuwangisa uxamwali wathu na iwo. Tingacita pyonsene pinakwanisa ife mbatipangiza makhaliro adidi kuna acibale athu, iwo anapibva kuti tisaafuna.
15 Onani pidacitikira mulongo Anna wa ku Amerika. Acibale ace asamala ndzidzi uzinji pabodzi makamaka m’maphwando a ntsiku zakubalwa na mafiriyadu. Pidapfundza Anna undimomwene, acibale ace akhadzudzumika kakamwe, pontho akhanyerezera kuti thangwi yakupfundza kwace undimomwene, nee mbadakhalabve axamwali. Iwo akhagopambo kuti uphemberi mbudancitisa kukhala na umaso wakunentsa. Ninji pidacita Anna toera kumalisa manyerezero anewa a acibale ace? Iye alonga: “Ndingaenda kaona acibale anga, ine ndisaapanga kuti umaso wanga uli tani, pontho ndisaapanga pyonsene pinacita ine. Inembo ndisaacemera kunyumba kwanga, pontho ndisaapangiza axamwali anga. Natenepa, iwo asadziwa anthu anacedza na ine, pontho asakhala akusudzuka angakhala dhuzi na iwo. Acibale anga azinji andipanga kuti ndisakhala wakutsandzaya, pontho iwo nee asadzudzumikabve na ine.”
16. Yezu apangiza tani kuti akhatsalakana Tiyago? (Onanimbo cidzindikiro capantsi.)
16 Pangizani kuti imwe musaatsalakana. Pakumala kulamuswa muli akufa, Yezu aonekera kuna Tiyago wakuti ndi m’bale wace, pontho acedza naye. (1 Akor. 15:7) Panango Tiyago atsandzaya kakamwe pidadzindikira iye kuti Yezu akhapitiriza kunfuna. Pisaoneka kuti ndi ndzidzi unoyu udakhala iye na cinyindiro cakuti Yezu akhali Mesiya. Buluka penepo, Tiyago panango aphedza acibale ace toera kutawirambo kuti Yezu akhali Mesiya.c—Mabasa 1:14.
17. Tinakwanisa tani kuphatisira pinalongwa pa Aroma 12:15? (Onanimbo foto.)
17 Lerini Aroma 12:15. Tingakhala na acibale athu pabodzi midzidzi yadidi na yakunentsa, iwo anakhala na maonero adidi thangwi ya ife.d Mwacitsandzo, wacibale wathu angakhala na mwana, tinakwanisa kuncita bweraniko na kumpasa muoni toera kupangiza kuti tiri akutsandzaya na iye. Acibale athu angaferwa, ife tinakwanisa kulonga peno kulemba mphangwa toera kuabalangaza. Kusiyapo pyenepi, tinakwanisambo kuapasa cinthu toera kuaphedza. Ndimomwene kuti ife nee tisafunika kusiya kualigariri, kuatumizira mphangwa na kuenda kaaona, makamaka angathimbana na nyatwa.
Mungakhala pabodzi na acibale anu midzidzi yakupambulika na midzidzi inafuna iwo ciphedzo, pyenepi pinakwanisa kucinja manyerezero awo thangwi ya pinthu pinakhulupira imwe (Onani ndima 17)h
18. Tinatowezera tani Andreya?
18 Phedzani acibale anu toera adziwe abale na alongo anango. Pidadzindikira Andreya kuti Yezu akhali Mesiya, iye akwata Pedhru, wakuti ndi m’bale wace, mbaenda naye kuna Yezu toera andziwembo. (Juw. 1:40-42) Kodi imwe munakwanisa kucitambo pibodzi pyene? Mwacitsandzo, imwe munakwanisa kucemera wacibale wanu toera kugumanika pa misonkhano, peno kucedza naye pabodzi na axamwali anu. Acibale anu angadziwa abale na alongo anango, anabvesesa kuti ndife anthu ninga iwo, pontho basi ene tisafuna kucita pinthu pyadidi.
19. Maseze acibale athu akhonde kubvesesa pinakhulupira ife, tisafunika kuatsalakana tani? (1 Pedhru 3:15)
19 Lerini 1 Pedhru 3:15. Acibale athu panango nee anabvesesa kuti thangwi yanji nee tisacita pinthu pinango, mbwenye iwo ndzidzi onsene anakumbuka kuti tisaatsalakana mwakukoma ntima na mwacilemedzo. Nakuti nee tisakhala nawo pabodzi m’maphwando na mafiriyadu, iwo anatsandzaya angaona kuwangisira kwathu toera kucedza nawo. Mwacitsandzo, tinakwanisa kuenda kaaona, kuacemera toera kudya nawo pabodzi na kuapasa miyoni m’maulendo anango. Khalani na cinyindiro cakuti na ntsiku yace, acibale anu anatumikira Yahova.
PITIRIZANI KUPHEDZA ACIBALE ANU
20. Pinthu pidacita Tiyago pisatipfundzisanji?
20 Tiyago nee atowera Yezu mu ndzidzi wa utumiki wace pa dziko yapantsi. Mbwenye mukupita kwa ndzidzi, Tiyago adzakhala m’bodzi wa anyakupfundza a Yezu. Pontho akhakomerwa kakamwe na pinthu pidapfundzisa Yezu. (Agal. 1:18, 19; 2:9) Mwacitsandzo, tsamba idalemba Tiyago kuna Akristu iri na mphangwa zizinji zakulandana na zidapfundzisa Yezu pa Nkhani ya Paphiri.e
21. Thangwi yanji nee tisafunika kusiya kuphedza acibale athu akuti nee ndi Akristu?
21 Maseze tiwangisire kakamwe, panango acibale athu anapitiriza na maonero akuphonyeka, peno kukhonda kupfundza thangwi ya Yahova. Mphapo thangwi yanji nee tisafunika kuluza cidikhiro? Thangwi tisapangiza kukoma ntima, mbatitowezera ntsisi za Yahova na Yezu. (Luka 6:33, 36) Thangwi ya makhaliro adidi anapangiza ife, panango mukupita kwa ndzidzi acibale athu anakhala na maonero adidi thangwi ya Mboni za Yahova. Panango iwo anakumbuka pinthu pinakhulupira ife, pyakuti taapanga nduli. Tingakhonda kubwerera nduli, mbatipitiriza kuphedza acibale athu, tinakhala akutsandzaya kuona anango a iwo mbakatumikira Yahova pabodzi na ife!
NYIMBO 60 Pisabveka Umaso Wawo
a MABVEKERO A MAFALA ANANGO: Mu nsolo uno mafala akuti “ale akuti nee asatumikira Yahova,” asaphatisirwa toera kulonga acibale athu akuti nee ndi Mboni za Yahova.
b Onani nsolo wakuti “Tisadziwanji Thangwi ya Kutonga Kunafuna Kudzacita Yahova?” mu Ncenjezi wa Maio wa 2024, tsa. 11, ndima 11-13.
c Tiyago na Yuda akuti akhali abale a Yezu, akhala Akristu pidamala Yezu kulamuswa muli akufa.
d Onani bokosi yakuti “Ndisafunika Kugumanika pa Phwando ya Kumanga Banja Peno pa Ciliro ca Wacibale Wanga?”
e Onani Tiyago 1:2 na Mateu 5:11, 12; Tiyago 1:19 na Mateu 5:22; Tiyago 1:22; 2:24 na Mateu 7:21; Tiyago 2:13 na Mateu 5:7; 6:14, 15.
f Toera kuona mphangwa zinango thangwi ya pyenepi, onani nsolo wakuti “Perguntas dos Leitores” mu Sentinela 15 de Maio de 2002 na mu Sentinela 15 de Novembro de 2007.
g MAFALA ANAFOKOTOZA FOTO: Mulongo mbadzati kuenda kamwaza mphangwa, ali kutoma kukhunganyira mamunace cakudya.
h MAFALA ANAFOKOTOZA FOTO: Mulongo m’bodzi ene aenda kaona mebzwalace wakuti nee ndi Mboni wa Yahova.