Wangisirani Toera Mubatizwe

1. (a) Thangwi yanji kubatizwa ndi cisankhulo cadidi? (b) Tinapfundzanji mu nsolo uno?

KODI imwe mwaperekeka kuna Yahova mbamubatizwa? Khala mwacita pyenepi, pisabveka kuti imwe mwaphemba Yahova toera akulekerereni madawo anu na kukutawirisani kuti muntumikire na cikumbuntima cakucena. (1 Ped. 3:21) Pinthu pyenepi pidacita imwe, pinaphedza kakamwe ale akuti adzati kubatizwa. Ceneci ndi cisankhulo cadidi. Ndiye tani khala mudzati kubatizwa? Ndimomwene kuti musafuna Yahova, pontho musafuna kucita pinafuna iye. Imwe musadziwa kuti ubatizo unakuphedzani toera kulekererwa madawo anu na kukhala wakutawirika kuna Yahova. (Mabasa 2:38-40) Khala ndi pyakunentsa kucita pyenepi, ninji pinafuna kukuphedzani? Mu nsolo uno, tinapfundza kuti: (1) Thangwi yanji anthu anango nee asabatizwa mwakucimbiza? (2) Thangwi yanji ndi pyakufunika kudziwa kuti tiri kunkhomo kwa dziko ino? Na (3) thangwi yanji ndi pyakufunika kucita macinjo cincino toera kubatizwa?

THANGWI YANJI ANTHU ANANGO NEE ASABATIZWA MWAKUCIMBIZA?

2. Thangwi yanji anango nee asabatizwa mwakucimbiza?

² Anthu anango asadembuka kucita cisankhulo cakubatizwa thangwi yakugopa. Mwacitsandzo, anango asafuna kutumikira Yahova, mbwenye asagopa kucita madodo mbantsukwalisa. Khala musapibva tenepo, lerini malemba a m’Bhibhlya akuti anakuphedzani kukhala na cinyindiro cakuti Yahova, nee asadikhira kuti mucite pinthu pyadidi ndzidzi onsene. Kusiyapo pyenepi, iye asatsandzaya kakamwe mungacita pyonsene pinakwanisa imwe toera kuntsandzayisa. (Mas. 103:13, 14; Akol. 3:23) Khala musagopa kutcingwa, phembani ciphedzo ca Yahova, toera mukhale na cinyindiro cibodzi cene ca nyamasalmo adalemba kuti: “Yahova ali kukhundu yanga; nee ndinadzagopa. Kodi munthu anandicitanji?”—Mas. 118:6.

3. Ndi manyerezero api akuti asacitisa anthu anango kukhonda funa batizwa? (Onanimbo foto .)

³ Anthu anango anafuna Yahova, nee asabatizwa mwakucimbiza, thangwi asaona kuti adzati kupfundza pizinji. Toera munthu abatizwe, asafunika kupfundza mpaka papi? Onani pidacitikira nyakuonera kaidi m’bodzi na banjace. Ntsiku inango namasiku, Yahova acitisa citeketeke toera kusudzula Paulu na Sila nkaidi, pontho iwo akhala na mwai wakumwazira mphangwa nyakuonera kaidi pabodzi na banjace. Pisaoneka kuti mamuna unoyu na banjace abvesesa kuti citeketeke ceneci cikhali cirengo ca Mulungu. Kusiyapo pyenepi, masiku anewa, iwo apfundza cinthu cakufunika kakamwe thangwi ya Yahova na Yezu. Pyenepi pikhadakwana toera iwo ‘abatizwe mwakucimbiza.’ (Mabasa 16:25-33) Natenepa, khala imwe musadziwa Yahova, musanfuna na ntima onsene, mwapfundza pipfundziso pyakutoma pya m’Bhibhlya, mwatcunyuka madawo anu, pontho muli dzololo toera kukhala m’maso mwakubverana na pinafuna Yahova, imwe muli wakukhunganyika toera kubatizwa.—Marko 12:30.

4. Ndi pinthu pipi pinango pyakuti panango pinakupingizani kubatizwa? (Onanimbo foto.)

⁴ Anthu anango anafuna kutsandzayisa Mulungu, asanyerezera kakamwe pinafunika iwo kusiya toera abatizwe. Ndimomwene kuti tisafunika kunyerezera mwadidi mbatidzati kucita cisankhulo. (Luka 14:27-30) Mbwenye anango asadzudzumika kakamwe na macinjo anafunika iwo kucita toera akomerese Mulungu. Candace wakuti apfundza undimomwene pikhali iye mwana, alonga tenepa thangwi ya mabvero ace: “Ine ndikhadziwa pinthu pikhafunika ine kucita toera kukomerese Yahova, mbwenye nee ndikhacita pyenepi thangwi ndikhakomerwa na pinthu pya dziko. Ine ndikhadziwambo kuti mbapidakhala pyakunentsa kusiya kucita pinthu pyenepi.” Anangombo asagopa kuti nee anakwanisa kucita pinthu pinafuna Yahova kuti iwo apicite angamala kubatizwa. Iwo asagopa kucita madawo makulu mbabuluswa mu mpingo. Khala ndi pyenepi pinakupingizani toera kubatizwa, musafunika kucitanji?

5. Pakusankhula khala tinabatizwa peno nkhabe, ninji pinafunika ife kunyerezera? (Mateu 13:44-46)

⁵ Khala tisafuna kugula cinthu, nee tisaona basi ene khala ndi cakudhula peno nkhabe. Mbwenye tisaonambo maphindu anafuna kukhala na ife. Tingaona kuti maphindu anafuna kukhala na ife ndi mazinji, tisagula cinthu ceneci. Munjira ibodzi ene, pakusankhula khala tinabatizwa peno nkhabe, ife nee tisafunika basi ene kunyerezera pinthu pinafunika ife kusiya, mbwenye tisafunikambo kunyerezera kuti uxamwali wathu na Yahova ndi wakufunika kakamwe. Toera kutipfundzisa pyenepi, Yezu alonga misangani miwiri. (Lerini Mateu 13:44-46.) M’misangani ineyi, mamuna m’bodzi agumana cinthu cakufunika kakamwe, pontho mwakutsandzaya agulisa pinthu pyonsene pikhali na iye toera kugula cinthu ceneci. Imwembo mwagumana cinthu cakufunika kakamwe, cakuti ndi undimomwene thangwi ya Umambo. Khala imwe nee muli na cinyindiro cakuti kucita pinafuna Yahova kusaphedza, nyerezerani mwadidi misangani ya Yezu. Imwe munakwanisambo kubvundzika: ‘Kodi ine ndiri na cinyindiro cakuti ndagumana cinthu cakufunika kakamwe? Kodi ine ndisaona kuti uxamwali wanga na Yahova, cidikhiro cidandipasa iye na abale na alongo ndi pinthu pyakufunika?’ Mitawiro yanu inakuphedzani toera kudziwa pinafunika imwe kucita toera musankhule kubatizwa.

6. Munakwanisa tani kukhala na ntima wadidi?

⁶ Mu nsangani wa nyakubzwala mbeu, Yezu alonga kuti ntima wa munthu unakwanisa kumpingiza kuthambaruka. Mbwenye Yezu alongambo kuti anthu a ‘mitima yadidi kakamwe’ anadzatawira mphangwa za Umambo. (Luka 8:5-15) Khala musaona kuti ntima wanu uli wakugawika, peno nee munakwanisa kuphatisira pinapfundza imwe, lekani kubwerera nduli. Na ciphedzo ca Yahova, imwe munakwanisa ‘kucinja ntima wanu na manyerezero anu’ toera mumbvere. Phembani Yahova toera akuphedzeni kukhala na ntima wadidi kuti mufune na kuphatisira pinapfundza imwe.—Ezek. 18:31; 36:26.

7-8. Thangwi yanji aphale na atsikana anango nee asabatizwa mwakucimbiza? (Onanimbo foto.)

⁷ Aphale na atsikana anango akuti asafuna Yahova, nee asabatizwa thangwi ya pinacita peno pinalonga anango. Mwacitsandzo, apfundzisi anango kuxikola, asapanga anyakupfundza awo toera aone pinthu pyakuipa ninga pyadidi. Mbwenye uphungu unoyu unakwanisa kuabweresera nyatwa. (Mas. 1:1, 2; Mis. 7:1-5) Imwe munakwanisa kucalira nyatwa zenezi mungatowezera pidacita nyamasalmo adapanga Yahova kuti: “Ine ndiri na udziwisi kakamwe kupiringana apfundzisi anga onsene, thangwi ndisanyerezera mwadidi macenjezo anu.”—Mas. 119:99.

⁸ Pisaoneka kuti anyakubala anango, asapingiza anawo kubatizwa. Iwo asanyerezera kakamwe pipfundziso pya dziko na ntundu wa basa unafuna kuphata anawo, peno nee asaaphedza toera afune kutumikira Yahova. Kodi imwe musanyerezera kuti anyakubalanu nee ali kukuphedzani toera kubatizwa? Khala ndi tenepo, cedzani nawo. Khalani na cinyindiro cakuti mwakukhonda tsalakana thunga yanu, imwe munakwanisa kukhala na uxamwali wakuwanga na Yahova.—Mis. 20:11.

9. Thangwi yanji anango asadembuka toera kubatizwa?

⁹ Anthu anango akuti ali akukhunganyika toera kubatizwa, nee asabatizwa mwakucimbiza thangwi asafuna kubatizwa pabodzi na axamwali awo peno m’bodzi wa acibale awo. Ndimomwene kuti kufuna kubatizwa pabodzi na munthu anafuna ife nee ndi pyakuipa. Mbwenye pyenepi nee pisafunika kukupingizani kubatizwa cincino. Kumbukani kuti kuperekeka kuna Mulungu ndi cisankhulo ca munthu paekha. Natenepa, toera kubatizwa nee musafunika kunyindira pinthu pinacita anthu anango.—Aroma 14:12.

KUMBUKANI KUTI KUMALA KULI DHUZI

10. Ndi cinthu cipi cinango cinacitisa anango kukhonda kubatizwa mwakucimbiza?

¹⁰ Kusiyapo mathangwi adaona ife mpaka pano, anango nee asabatizwa mwakucimbiza thangwi asanyerezera kuti panango kumala nee kunafika cincino. Kodi ndi pyandzeru kunyerezera tenepo? Yezu acenjeza anyakupfundzace: “Khalani akukhunganyika, thangwi Mwana wa munthu anabwera pa ndzidzi unakhonda imwe kudikhira.”— Luka 12:40.

11. Mwakubverana na Masalmo 119:60, ninji cinaticitisa kubvera matongero a Yahova?

¹¹ Ife tisaperekeka kuna Mulungu thangwi tisanfuna. Tingadziwa mwadidi Mulungu wathu waufuni, tinadziwa mwadidi matongero ace na kuabvera. (Lerini Masalmo 119:60.) Nyakupfundza Tiyago alonga thangwi inango yakufunika inaticitisa kubvera matongero a Yahova mwakucimbiza. Iye alonga kuti nkhabe munthu anadziwa pinafuna kucitika mangwana. Panango nee tinakhala na mwai unango wa “kucita cinthu cadidi.” Natenepa, ndzidzi wakucita cinthu cadidi ndi uno.—Tiya. 4:13-17.

12. Tisapfundzanji na nsangani wa anyabasa a munda wa mauva?

¹² Panango imwe munanyerezera pya nsangani udalonga Yezu, thangwi ya anyabasa a munda wa mauva. Iye alonga pya amuna adaphata basa ndzidzi ubodzi. Ngakhale tenepo, atambira kobiri ibodzi ene na ale adaphata basa ntsiku yonsene. Onani kuti thangwi yanji anyabasa akumalisa nee atoma kuphata basa nakweru. Iwo alonga: “Thangwi nkhabe munthu adaticemera.” Amuna anewa nee akhali akupolola. Basi ene nee aphata basa, thangwi nkhabe munthu adaacemera. Natenepa pidacemerwa iwo, atoma kuphata basa. (Mat. 20:1-16) Lero, Yezu asatiphemba toera tikhale atowereri ace, mbaticita basa yakumwaza mphangwa. Ife tisafunika kutawira ncemerero unoyu mwakucimbiza kakamwe.

13. Tinapfundzanji na pidacitikira nkazi wa Loti?

¹³ Anango asadembuka kucita macinjo thangwi asanyerezera kuti kumala nee kunafika cincino. Undimomwene ndi wakuti tingadikhira, pinakhala pyakunentsa kucita macinjo toera kukomeresa Mulungu. Yezu akhadziwa pyenepi, na thangwi ineyi acenjeza anyakupfundzace: “Kumbukani pidacitikira nkazi wa Loti.” (Luka 17:31-35) Nkazi wa Loti akhadziwa kuti kufudzwa kwa Sodhoma na Gomora kukhali dhuzi. Mbwenye pisaoneka kuti iye nee akhakwanisa kusiya pinthu pikhali na iye. (Gen. 19:23-26) Pinthu pidacitikira nkazi wa Loti pisatipfundzisa kuti ndzidzi udakhazikisa Yahova toera ticite macinjo uli na madire. Ndzidzi unoyu ungamala, nee pinakwanisikabve kucita macinjo.—Luka 13:24, 25.

14. Thangwi yanji musafunika kuona mwadidi kukwanirisika kwa maprofesiya analonga thangwi yakumala kwa dziko ino?

¹⁴ Pinthu pinacitika pa dziko yapantsi, pisapangiza kuti maprofesiya a Bhibhlya analonga thangwi yakumala kwa dziko, ali kukwanirisika. Panango pinthu pyenepi nee pisacitika kuna imwe. Mbwenye kupiona mbapikacitika m’mbuto zakusiyana-siyana, kusafunika kukucitisani kuthambaruka mwakucimbiza. Onani pidalonga mpostolo Pedhru kuna Akristu anango: “Mbwenye kumala kwa pinthu pyonsene kuli cifupi. Natenepa khalani akuyangʼanira.” (1 Ped. 4:7) Pisaoneka kuti pa vesi ineyi, Pedhru akhalonga pya kufudzwa kwa nzinda wa Yerusalemu na Templo. Iye alembera Akristu akhali kutali na nzinda wa Yerusalemu, akuti nee mbadacitikirwa na pinthu pyenepi. (1 Ped. 1:1) Ngakhale tenepo, kuona kukwanirisika kwa profesiya ineyi, kwaaphedza toera kunyindira maprofesiya anango a Yahova. Munjira ibodzi ene, kuona kuti maprofesiya analonga pya kumala kwa dziko ino ali kukwanirisika, kusafunika kukucitisani kukhala akuyang’anira, mbamucita macinjo toera mubatizwe.

15. Tinakumbuka tani ntsiku ya Yahova? (2 Pedhru 3:10-13)

¹⁵ Mu tsamba yace yaciwiri, Pedhru afokotoza kuti tinakhunganyika tani ntsiku ya Yahova mbidzati kufika. Kuna Akristu a mu ndzidzi wa Pedhru, ntsiku ineyi mbidadembuka kakamwe toera kufika. Ngakhale tenepo, Pedhru alonga kuti iwo akhafunika ‘kukumbuka’ ntsiku ya Yahova. (Lerini 2 Pedhru 3:10-13.) Ifembo tinakumbuka tani ntsiku ineyi? Tinacita pyenepi tingakumbuka ndzidzi onsene kuti kumala kwa dziko ino kuli dhuzi, pontho ‘tingakhala na makhaliro akucena, mbaticita pinthu pinapangiza kuti ndife anthu adaperekeka kuna Mulungu.’ Yahova asatsandzaya angationa kuti tiri kucita pinthu pinafuna iye. Pontho iye anatsandzaya kakamwe mungaperekeka kuna iye mbamubatizwa.

THANGWI YANJI TISAFUNIKA KUWANGISIRA CINCINO TOERA KUBATIZWA?

16. Ndi upi ndzidzi wadidi toera kuthambaruka mpaka kubatizwa? (2 Akorinto 6:1, 2) (Onanimbo mafoto.)

¹⁶ Ndzidzi wadidi wakucita macinjo toera kubatizwa ndi uno. (Lerini 2 Akorinto 6:1, 2.) Mamuna wa ku Etiopya pidamwazirwa iye mphangwa na Filipi, adzindikira kufunika kwa kucita pinthu mwakucimbiza. Pidabvesesa iye mphangwa zadidi mbakhala na mwai toera kubatizwa, iye nee anyerezera kuti: ‘Mbandidzati kubatizwa ndisafunika kupfundza pontho pang’ono mphangwa zadidi. Mu ndzidzi unacita ife ulendo pabodzi, ndinagumana madzi anango toera ndibatizwe.’ M’mbuto mwace, iye abvundza Filipi: “Ninji cinandipingiza toera ndikhonde kubatizwa?” (Mabasa 8:26, 27, 35-39) Mamuna unoyu athema kutowezerwa. Pidamala iye kubatizwa, “apitiriza na ulendo wace mwakutsandzaya.”

17. Ndi cinyindiro cipi cakuti munakwanisa kukhala naco?

¹⁷ Khala muli kunyinyirika toera kubatizwa mwakucimbiza, khalani na cinyindiro cakuti Yahova asafuna kukuphedzani toera mukhale na uxamwali wakuwanga na iye. (Aroma 2:4) Iye anakuphedzani mungagopa peno mungadzudzumika na pinthu pinalonga na pinacita anthu anango. Mungamala kubatizwa, imwe munakwanisa kukhala na cikumbuntima cakucena, pontho panango munakwanisa kubvesesa kuti ‘pinthu pidasiya imwe’ nee piri na basabve. (Afil. 3:8, 13) Imwe munanyerezera kakamwe “pinthu piri patsogolo” peno nkhombo zidapikira Yahova kuna ale adaperekeka kuna iye na kubatizwa.—Mabasa 3:19.