Mwakukhonda Tsalakana Thunga Yanu, Khalani Citsandzo Cadidi Kuna Anango—Mphangwa izi zabuluswa mu Anuário das Testemunhas de Jeová de 2015
Europa
Baba wa Citsandzo Cadidi
Tsamba 71, ndima 2 mpaka tsamba 72, ndima 5
Jemima, wa ku Espanya, apfundziswa undimomwene mbali mwana. Mbwenye, mukhali iye na pyaka pinomwe pyakubalwa, akhadacinja umaso wace. Mai wace atonga kusiya khala Mboni ya Yahova mbalekana na babace Jemima. Mukhali iye na pyaka khumi na pitatu, Jemima asiya kusonkhana na Mboni za Yahova mbatoma kukhonda ciphedzo consene cauzimu cikhampasa babace.
Mudakula Jemima, apita m’misoka ya anyandale, na cifuno ca kusakira anthu “ulungami.” Mukupita kwa ndzidzi, babace mudaona iye kuti Jemima nee ali na basa, ampanga toera kuphata pabodzi na iye basa ya kupintari.
Ntsiku inango mukhaphata iwo basa pabodzi, Domingo aphemba Jemima toera kupfundza Bhibhlya. Iye akhonda, mbalonga kuti angafuna kupfundza, anadzandziwisa. Domingo akhabvesera Bhibhlya na marevista akugravarwi mu ndzidzi ukhaphata iwo basa ya kupintari, mbwenye mwanace akhabvesera nyimbo za pop.
Mu Bingu caka 2012, Domingo wakuti akhadamanga banja papswa, atambira ncemerero toera kuenda ku Xikola ya Bhibhlya kwa Akristu Akumanga Banja. Jemima akhuiwa kakamwe mudaona iye kuti babace mbadasiya basa na pinthu pyonsene toera kuenda ku xikola ya Bhibhlya ya nthanda ziwiri yakuti buluka penepo mbadaenda konsene kukhafuna kutumizwa iye. Paulendo wakutoma, Jemima adzindikira kuti undimomwene ukhali na mitcitci kakamwe mu ntima mwa babace na iye akhasaka kudziwa thangwi yanji.
Jemima asiya kubvesera nyimbo za pop mbatoma kubvesera maaudyo akhabvesera babace. Iye atomambo kucita mibvundzo. Ntsiku inango, mukhali Domingo pa maxikada mbakapintari, Jemima alonga: “Musakumbuka pidalonga ine kuti mbandidakupangani ndingafuna kupfundza Bhibhlya? Cincino ndisafuna.”
Domingo akomerwa kakamwe kubva mafala anewa. Mu Thongwe caka 2013, iye atoma kupfundza Bhibhlya kawiri pa sumana. Xikola yatoma mu Bwinja na Domingo apitiriza kucitisa pfundziro ineyi mukuphatisira vidyu ya mu Interneti. Ntsiku ikhamalisa babace xikola, Jemima abwera na akomerwa kakamwe na programu. Pa ntsiku 14 ya Maindza ya caka 2013, Jemima abatizwa.
Jemima alonga: “Yahova asapangiza kupirira kakamwe kuna ine, pontho ndisapidziwa kuti cipo aneta na ine. Iye andipasa cinthu cakuti cipo ndaciona ku dziko—axamwali andimomwene. Ubale wa pa dziko yonsene yapantsi usandicitisa kuthimiza kupereka takhuta ku ufuni wa Yahova.”