Oceania

Kodi ndi Mwana Kakamwe Toera Kumwaza Mphangwa?

Tsamba 76 na 77

Ntsiku inango namacibese, Teariki m’phale wa pyaka pinomwe pyakubalwa, wa ku ntsuwa ya Tawara, yakuti isacita khundu ya Kiribati, akhamwaza mphangwa pabodzi na babace, Tueti, mudafika iwo pa nyumba inango agumana nsoka wa amuna na akazi a m’pyaka 20 wa anthu cifupi khumi. Mudamala babace Teariki kumwazira mphangwa nsoka unoyu, m’bodzi wa mu nsoka abvundza: “Ife tisaona imwe monsene musamwaza mphangwa pabodzi na ananu ang’ono. Thangwi yanji musamwaza nawo pabodzi? Iwo ndi ang’ono kakamwe toera kumwaza mphangwa zinalonga pya Mulungu.”

Tueti antawira: “Usafuna kuona khala mwananga asakwanisa? Ndinaenda kalimira kutali pang’ono na bveserani pinafuna kulonga iye.” Nsoka onsene watawira, “Inde tisafuna kubvesera kuna iye.”

Mudaenda Tueti kalimira kutali pang’ono, Teariki abvundza nsoka, “Musaidziwa dzina ya Mulungu?”

M’bodzi mwa iwo atawira, “inde, ndi Yezu!” Unango alonga, “ndi Mulungu.” Unangombo alonga, “ndi Mbuya.”

Teariki alonga: “Tendeni tione kuti Bhibhlya isalonganji. Tendeni tileri tonsene pa Izaiya 42:5.” Mudamala iwo kuleri lemba, aabvundza, “Kodi lemba iyi ikulonga pya ani?”

M’phale m’bodzi pa nsoka atawira, “Mulungu.” Teariki alonga: “Inde, Mulungu wandimomwene. Tingaleri vesi yacisere, Mulungu asatipanganji? ‘Ndine Yahova. Ineyi ndi dzina yanga; mbiri yanga nkhabe kuipasa mulungu unango.’ Kodi mwaiona dzina ya Mulungu?”

Nsoka watawira, “ndi Yahova.”

Nakuti onsene akhabvesera, Teariki abvundza: “Ndi ipi phindu yakuphatisira dzina ya Mulungu, Yahova? Tendeni tione pa Machitiro 2:21. Isalonga: ‘onsene anacemera dzina ya Yahova anadzapulumuswa.’ Mwaona phindu yakuphatisira dzina ya Mulungu?”

M’phale m’bodzi pa nsoka atawira, “Toera tipulumuswe.”

Pa ndzidzi unoyu babace Teariki abwerera. Iye abvundza nsoka ule: “Ok, musaona tani? Anathu asakwanisa kumwaza mphangwa peno nkhabe? Mphyakuthema kufamba nawo tingaenda kamwaza mphangwa?” Nsoka watawira pabodzi pene kuti anang’ono asamwaza mphangwa mwadidi pontho mphyakuthema kakamwe kufamba nawo pakumwaza mphangwa. Buluka penepo Tueti alonga, “Imwe munakwanisa kupangambo anango undimomwene wa Bhibhlya, ninga pidacita Teariki, mungadziwa pinalonga iyo.”