Tinakhuya Tani Mitima Ya Ale Anapfundzisa Ife
1. Kodi pipfundziso pya Yezu pyakhuya tani anyakubvesera ace?
1 Yezu Kristu akhuya mitima ya anyakubvesera ace. Ntsiku inango, mitima ya anyakupfundzace ‘yapisa’ mudamala iye kuafokotozera Malemba. (Luka 24:32) Nakuti kubvera Mulungu kusafunika kubulukira muntima, tinathimizira tani kukomerwa kwa ale anapfundzisa ife toera kuaphedza kucita macinjo mu umaso wawo?—Arom. 6:17.
2. Tinaphatisira tani luso na ndzeru toera kukhuya ntima wa munthu?
2 Phatisirani Luso na Ndzeru: Kuna anthu azinji, kuapanga basi kuti ndi pipi pyadidi na pyakuipa nee kunaakulumiza toera kucita macinjo. Mwandimomwene, kupokanya pinakhulupira iwo mukuphatisira malemba mazinji, kunaacitisa kukhonda funa pontho kukubveserani. Toera kukhuya ntima wa munthu, pakutoma tisafunika kudziwa mathangwi anancitisa kukhulupira na kucita pinacita iye. Mibvundzo yakuphemba maonero yakusankhulwa mwaluso inankulumiza toera kulonga pinanyerezera iye. (Mis. 20:5) Basi ene tingamala kucita pyenepi tinakwanisa kusaka mphangwa za m’Mafala a Mulungu zakuti panango zinakhuya ntima wace. Natenepa, tisafunika kupangiza citsalakano na kupirira. (Mis. 25:15) Kumbukani kuti anthu asathambaruka mwauzimu munjira zakusiyana-siyana. Pasani ndzidzi nzimu wakucena wa Yahova toera ukhuye manyerezero na macitiro awo.—Mko. 4:26-29.
3. Tinaphedza tani ale anapfundzisa ife toera kukhala na makhaliro adidi?
3 Aphedzeni Toera Akhale Na Makhaliro Adidi: Mavesi a m’Bhibhlya akuti asapangiza udidi wa Yahova na ufuni wace, anakwanisa kuphedza ale anapfundzisa ife toera kukhala na makhaliro adidi. Tinakwanisa kuphatisira malemba ninga Masalmo 139:1-4 peno Luka 12:6, 7 toera kupangiza kuti Mulungu asatitsalakana mpaka papi. Munatoma iwo kupereka takhuta thangwi ya udidi wakukhonda kutithema wa Yahova, ufuni wawo na kuperekeka kwawo ku mabasa a Mulungu pinadzathimizirika. (Arom. 5:6-8; 1Jwau 4:19) Pontho, iwo angadziwa kuti makhaliro awo asakhuya Yahova, panango anakulumizika kucita pinthu toera kunkomeresa na kumulemedza.—Sal. 78:40, 41; Mis. 23:15.
4. Munapfundzisa ife anthu mu utumiki, tinapangiza tani kuti tisalemedza ufulu wawo wakusankhula?
4 Yahova nkhabe kakamiza munthu toera kubvera mitemo yace. M’mbuto mwace, iye asadembetera anthu mu kuapangiza udidi wa kubvera uphungu wace. (Iza. 48:17, 18) Tisatowezera Yahova tingapfundzisa munthu munjira ya kum’phedza toera acite ekhene cisankhulo. Iwo angaona okhene kufunika kwa kucita macinjo mu umaso wawo, maphindu ace nkhabe mala mwakucimbiza. (Arom. 12:2) Pisaacitisambo kufendedzera kakamwe ‘nyakudinga mitima,’ Yahova.—Mis. 17:3.