Gulu Yakucita Cifuno Ca Yahova,

tsamba 159-163

NSOLO 15

PHINDU YA KUNGONJERA KWAUMULUNGU

KUKHALA akungonjera kwa Mulungu, Ntongi Wankulu Wakudzulu na Pantsi, ndi kwakufunika khala ife tinakwanisa kukhunganyika towera kucita cifuno ca Yahova. Kudzindikira kwathu kuti Mwanace asatsogolera mpingo Wacikristu ndi kwakufunikambo. Na ndi pyakufunika kubvera ntemo wa utsogoleri m’makhundu anango a umaso. Kungonjera kweneku kwaumulungu kusaphindulisa anthu onsene.

Ntemo wakungonjera utongi wakuikhwa waperekwa kwa anthu m’munda wa Edeni. Iwo wakhazikiswa m’matongero a Mulungu anagumanika pa Genesi 1:​28 na 2:​16, 17. Pinyama pikhafunika kungonjera anthu, Adamu na Eva akhafunika kungonjera cifuno na utongi wa Mulungu. Kubvera utongi unoyu waumulungu mbukudakwanisa kubweresa ntendere na makhaliro adidi. Mu kupita kwa ndzidzi, ntemo wa utsogoleri wagomezerwa pa 1 Akorinto 11:⁠3. Mpostolo Paulu alemba: “Ndakudziwisani kuti mwanachinthu [peno nsolo] wa mamuna ndi Kristu. Mwanachinthu wa nkazi ndi mamunache. Mwanachinthu wa Kristu ndi Mulungu.” M’masasanyiro anewa, tisaona kuti kusiyapo Yahova, munthu onsene asafunika kungonjera ku ntundu unango wa utongi.

Anthu azinji lero nkhabe kudzindikira peno kulemedza ntemo wa utsogoleri. Thangwi yanji? Nyatwa yatoma mu Edeni mu ndzidzi udatonga anyakubala athu mwanyakhomo kukhonda kukhala pantsi pa citsogolero ca utongi ukulu wa Mulungu. (Gen. 3:​4, 5) Mbwenye iwo nee akwanisa kukhala na ufulu ukulu kakamwe ukhafuna iwo tayu. Mbuto mwace, iwo adzakhala akungonjera cakucitwa cauzimu cakuipa, Sathani Dyabo. Usanduki wakutoma wacitisa kuti anthu akhale kutali na Mulungu. (Akol. 1:​21) Ninga cakubwereswa, anthu azinji lero akupitiriza kukhala m’manja mwa nyakuipa unoyu.​​—⁠1 Jwau 5:⁠19.

Mu kupfunza undimomwene wa Mafala a Mulungu na kucita pinthu mwakubverana na iwo, ife tasiya kukhala pantsi pa manyengerero a Sathani. Ninga Mboni za Yahova zakubatizwa na zakuperekeka, kodi tisatawira tayu Yahova ninga Ntongi wankulu wa umaso wathu? Kodi ife tisatawirambo tayu pidalonga Mambo wakukhulupirika Davide adadzindikira Yahova ninga “[ntongi wa] pinthu pyonsene”? (1 Pya dziko. 29:​11) Inde tisatawira! Mwakucepeseka tisalonga: “Mbuya ndi Mulungu; ndiye mulengi [peno nciti] wathu na mwanachinthu wathu; ndife mbumba yache na mabira a nkumbi wache.” (Sal. 100:⁠3) Ife tisadzindikira kuti Yahova ndi wankulu na kuti tisafunika kungonjera kwa iye mu njira zonsene, nakuti iye acita pinthu pyonsene. (Apok. 4:​11) Ninga atumiki a Mulungu wandimomwene, ife tisatowezera Yezu Kristu, wakuti apereka citsanzo cadidi kakamwe ca kungonjera Mulungu.

Kodi Yezu apfunzanji na pinthu pidatamba iye mbali pa dziko yapantsi? Ahebere 5:⁠8 isatawira: “Iye, maseze kukhala Mwana wa Mulungu ene, apfundza pyakutawira [peno pyakubvera] na pyakuona nyatwa.” Inde, Yezu apitiriza kungonjera mwakukhulupirika kwa Babace wakudzulu ngakhale pantsi pa nyatwa. Mwakuthimizira, Yezu hadacita tayu na cinthu cene cibodzi na mphambvu zace; iye hadalonga tayu kubulukira m’manyerezero ace ene, pontho nee asaka kupasika mbiri. (Jwau 5:​19, 30; 6:​38; 7:​16-​18) Nkati mwa utumiki wace, iye akhala wakukomerwa na kucita cifuno ca Babace, ngakhale kuti n’khaliro unoyu wabweresa mpingizo na ntcingo. (Jwau 15:​20) Mbwenye, Yezu apangiza kungonjera Mulungu mu ‘kucepeseka’ mpaka “kufa pa ntanda.” Cakubwereswa ca kungonjera kwace Yahova mwakukwana cakhala cakuphindulisa mu njira zizinji, mbipicitisa kuti anthu adzakhale na umaso wakukhonda kumala, mbakuzwa kakamwe, na kubweresa mbiri kwa Babace.​​—⁠Afil. 2:​5-​11; Aheb. 5:⁠9.

MAKHUNDU A KUNGONJERA KWAUMULUNGU

Nakuti Yahova ndi Ntongi Wankulu Wakudzulu na Pantsi, ife tisafunika kungonjera kwa iye mu njira zonsene. (Iza. 33:​22) Mwacigwagwa nyerezerani kuti ninga alambiri akuperekeka a Yahova tinapangiza tani kungonjera kweneku mu umaso wathu wa ntsiku na ntsiku. Mu kuikha Mulungu pa mbuto yakutoma mu umaso wathu, kucita cifuno cace, ife tisatsogolerwa mu njira yadidi. (Sal. 16:⁠8) Ife tisacalira nyatwa zizinji na pinthu pinango pinacitisa kutsukwala, pyakuti pisatambwa na ale anakhonda kungonjera ku utongi ukulu wa Yahova. Nyamalwa wathu, Dyabo, ndzidzi onsene asasaka njira yakutiphata towera kutidya. Ife tinadzapulumuswa kwa nyakuipa unoyu tingathunda macitiro ace na kukhala akucepeseka pamaso pa Yahova mu kungonjera mwakufuna.​​—⁠Mat. 6:​10, 13; 1 Ped. 5:​6-⁠9.

Maphindu a kungonjera Mulungu asaphataniza uxamwali wathu na anango, wakuti usathimizirika kakamwe. Ife tisacalira nyatwa zinathimbana na ale anapangiza nzimu wakutongereka wa dziko ino. Ninga phindu ya kungonjera kwathu Yahova Mulungu, ife tisakhala na umaso wa banja wakutsanzayisa pabodzi na uxamwali wadidi na anzathu a kubasa pabodzi na mapatrau. Ife tisabvera miyambo na tisakhala na cikumbuntima cadidi kuna mautongi a dziko. Pontho tisakhala na axamwali adidi kakamwe, abale athu Acikristu.

M’mpingo Wacikristu, ife tisadzindikira utsogoleri wa Kristu na utongi udapasa iye nsoka wa mbandazi wakukhulupirika na wanzeru. Pyenepi pisakhuya manyerezero na makhaliro athu kwa unango na nzace. Kungonjera kwaumulungu m’mpingo kunadzaticitisa kubvera Mafala a Mulungu m’makhundu onsene aulambiri wathu. Pyenepi pisaphataniza utumiki wathu, kugumanikana pa misonkhano na kucita khundu, kukhala akubverana na akulu a mpingo na kutowezera masasanyiro a gulu ya Mulungu.​​—⁠Mat. 24:​45-​47; 28:​19, 20; Aheb. 10:​24, 25; 13:​7, 17.

Kungonjera kwathu Mulungu kusaticitisa kukhala na ntendere pabodzi na citsidzikizo m’masasanyiro adidi a mpingo Wacikristu. Makhaliro adidi kakamwe a Yahova asapangizika pakati pa mbumba yace yakuti ndi yakubverana. (1 Akor. 14:​33, 40) Pinaona ife na pyakugumana napyo pyathu mu gulu ya Yahova pisaticitisa kulonga mabvero ninga ale a nzakazi wa Mulungu Davide. Pakumala kuona kusiyana kunaoneka pakati pa anzakazi a Yahova na anyakuipa, akuti asagaya na mphambvu pabodzi na mpfuma zawo, mwakukomerwa Davide alonga: “Yakutsandzaya ndi mbumba, Mulungu wache ndi Mbuya!”​​—⁠Sal. 144:⁠15.

M’masasanyiro a banja, “mwanachinthu [peno nsolo] wa nkazi ndi mamunache.” Mu ndzidzi ubodzi ene, amuna asafunika kungonjera Kristu na Nsolombo wa Kristu ndi Mulungu. (1 Akor. 11:⁠3) Akazi asafunika kungonjera amunawo, na anapiana kwa anyakubalawo. (Aef. 5:​22-​24; 6:⁠1) Ntendere usaoneka khala munthu m’bodzi na m’bodzi wa m’banja asatoweza ntemo wa utsogoleri.

Pyenepi pisapangiza kuti amuna asafunika kucita utsogoleri mu njira ya ufuni, mu kusangizira Kristu. (Aef. 5:​25-​29) Iwo angakhonda ku­tonga mwakuipa peno kupwaza utsogoleri wawo, mwakukomerwa nkazi pabodzi na anapiana asakhala akungonjera. Nkazi ndi m’mphedzi, nkhubveka kuti basa yace ndi yakuphedzera. (Gen. 2:​18) Mu kuphedza mamunace mwakupirira na mwakulemedza, nkazi asafuniwa na mamunace na asacitisa kuti Mulungu asimbwe. (1 Ped. 3:​1-⁠4) Amuna na akazi angatowezera uphungu wa Biblya wa utsogoleri, iwo asapereka citsanzo kwa anawo mu kupangiza kungonjera Mulungu.

Kungonjera kwathu Mulungu kusakhuyambo maonero athu kwa “akulu akulu a dziko,” akuti ‘pidzo pyawo pyabuluka kwa Mulungu.’ (Arom. 13:​1-⁠7, Mphangwa Zadidi) Ninga nzika zakubvera mwambo, Akristu asalipa misonkho; iwo asapasa ‘Sezari pinthu pyace, mbapasambo Mulungu pinthu pyace.’ (Mat. 22:​21) Mu kukhala akungonjera na akubvera kwa atongi a dziko, akuikhwa mwakulinganira, ­m’pinthu pyonsene pyakuti nkhabe phonyana na mwambo wakulungama wa Yahova, ife tinakwanisa kuphatisira luso na mphambvu zathu ku basa yakufunika kakamwe ya kumwaza mphangwa zadidi za Umambo wa Mulungu wakuti wakhazikiswa.​​—⁠Mko. 13:​10; Mach. 5:⁠29.

Mu kuphatisira mwadidi mitemo ya Biblya, Akristu asasaka njira za kulungamisa uxamwali wawo pakati pa nyabasa na patrau. Maseze pyenepi m’midzidzi inango pingakwanise kukhala pyakunensa, anzakazi a Mulungu asawangisira kukhala pa ntendere na anthu onsene. Iwo asaphata basa mwakukhulupirika na asakhulupirwa ku mabasa awo a kudziko. (Arom. 12:​18; 1 Ped. 2:​18) Natenepa, iwo nkhabe cita khundu m’pinthu pya ndale peno kucita pinthu pyakuti pisakhondeswa na cikumbuntima cawo cakupfunziswa na Biblya.

Kungonjera kwaumulungu kusakhuya makhundu onsene a umaso. Na maso a cikhulupiro, ife tisaona ntsiku yakuti anthu onsene anadzangonjera Yahova Mulungu. (1 Akor. 15:​27, 28) Ndi nkhombo zikulu tani zinafuna kudzakhala na ale ana­dzindikira mu njira yadidi utongi ukulu wa Yahova, munapitiriza iwo kungonjera kwa iye kwenda na kwenda!