WARI UBIZI?

Kubera iki igisagara ca kera ca Ninewe ciswe “igisagara gisesa amaraso”?

Ninewe wari umugwa mukuru w’Inganji y’Abashuri. Cari igisagara gikomeye kirimwo ibirimba n’insengero vy’akaroruhore, n’amabarabara yagutse be n’ibihome amahero. Umuhanuzi w’Umuheburayo Nahumu yacise “igisagara gisesa amaraso.”—Nahumu 3:1.

Ayo majambo arakidondora neza, kubera ko amashusho yo ku mpome z’ikirimba c’Umwami Senakeribu yemeza yuko Abashuri bafata abantu bunyamaswa. Imwe muri ayo mashusho irerekana Umwashuri ariko arahotora ururimi rw’imbohe yaryamitswe hasi idunujwe. Izo mpome ziriko n’amajambo yo kwihayagiza avuga yuko mu gutwara imbohe, Abashuri bakoresha imigozi iboheye ku vyuma vyigonze nk’igera baba bacumise ku mazuru canke ku minwa y’izo mbohe. Abakuru baba bafashwe, barabambika mw’izosi imitwe baciye y’abami babo, bakayambara nk’imigufu iteye ikinya.

Umuhinga mu vya kahise k’Abashuri yitwa Archibald Henry Sayce aradondora ubunyamaswa Abashuri bakora bahejeje gufata igisagara, ati: “Aho umukuru wabo yaba yigaruriye yasiga aharunze imitwe y’abishwe; abahungu n’abakobwa baraturirwa babona canke bagakorerwa amabi aruta ayo; abagabo baramanikwa, bakabamyora urukoba bakibona, bakabanogora amaso, canke bakabaca ibikonjo n’ibirenge, amatwi be n’amazuru.”

Kubera iki Abisirayeli bashira ku nzu zabo igitangirizo gikikuza igisenge?

Imana yategetse Abisirayeli iti: “Niwubaka inzu nshasha, uze ukore igitangirizo c’igisenge cawe, kugira ntukwegere amaraso inzu yawe, kuko hogira uwukoroka avuye kuri co.” (Gusubira mu vyagezwe 22:8) Ico gitangirizo cari gikenewe kubera ko Abisirayeli bo mu bihe vya kera bakunda gukoresha ibisenge vy’inzu zabo.

Inzu z’Abisirayeli benshi zari zifise ibisenge bibase. Ico kibanza co hejuru y’inzu wasanga ari ahantu heza ho kwotera akazuba, gusamira akayaga no gukorera udukorwa tw’i muhira. Mu ci, haba haryoshe cane kurara. (1 Samweli 9:26) Umurimyi yarahanikira intete imbere yo kuzisya canke akahanikira insukoni n’inzabibu.—Yosuwa 2:6.

Vyongeye, ico kibanza carakoreshwa mu gusenga Imana y’ukuri canke ibigirwamana. (Nehemiya 8:16-18; Yeremiya 19:13) Igihe kimwe intumwa Petero yaraduze hejuru ku nzu gusenga, hakaba hari nk’isaha zitandatu. (Ivyakozwe 10:9-16) Igihe aho hantu haba hari ibigazi canke ibiterwa birandaranda ku nzu bigatuma haba igitutu, wasanga haryoshe kuruhukira.

Igitabu kimwe (The Land and the Book) kivuga yuko inzu z’Abisirayeli zari zifise ingazi iduga hejuru ku nzu, ikaba yari “hanze y’inzu, mu kigo c’inyuma.” Uwayibamwo yarashobora rero kuva hejuru ku gisenge akururuka adaciye mu nzu. Yezu ashobora kuba yafatiye kuri ico kintu igihe yabwira abigishwa biwe ngo bazove mu gisagara cotikijwe badatebaganye. Yavuze ati: “Uwuzoba ari hejuru ku nzu ntaze amanuke gutora ibintu mu nzu yiwe.”—Matayo 24:17.