Ibikoresho ntahara
1. Ni gute abamamaji bakirisu bameze nk’umufundi?
1 Umufundi aba afise ibikoresho bitandukanye. Mu gihe hari ibikoresho akoresha gake ku bw’ibikorwa bidasanzwe, hari ibindi bikoresho ntahara yama akoresha. Umufundi yakanongoreye yama afise ibikoresho ntahara mw’isakoshi y’ibikoresho vyiwe, kandi ivyo usanga azi kubikoresha neza gusumba ibindi. Bibiliya iremesha buri mukirisu wese kwijukira ubusuku no kuba “umukozi atagira ikimutetereza.” (2 Tim. 2:15) Ni igikoresho ikihe gihambaye kuruta ibindi dufise mw’isakoshi yacu y’ibikoresho? Ni ijambo ry’Imana, ca gikoresho nyamukuru dukoresha mu ‘guhindura abantu abigishwa.’ (Mat. 28:19, 20) Ku bw’ivyo, turakwiye kwihatira kuba abahanga mu “[gu]koresha neza ijambo ry’ukuri.” Yamara, hari ibindi bikoresho twama dukoresha mu kwigisha biri mw’isakoshi yacu y’ibikoresho. Ivyo bikoresho abakirisu bose bakwiye kwiga kubikoresha babigiranye ubuhanga kugira ngo bigishe abantu ukuri.—Imig. 22:29.
2. Ibikoresho vyacu ntahara bidufasha kwigisha ni ibihe?
2 Ibikoresho ntahara mu kwigisha: Uretse Bibiliya, ni ibindi bikoresho ibihe dukwiye gukoresha? Igikoresho nyamukuru dufise co kwigisha ukuri kwo muri Bibiliya ni Mu vy’ukuri Bibiliya yigisha iki? Tumaze kurangiza kwiga n’umutohoji ico gitabu, duca twiga igitabu “Mwigumize mu rukundo rw’Imana” kugira ngo tumwigishe gushira mu ngiro ingingo ngenderwako zo muri Bibiliya mu buzima bwa misi yose. Rero, dukwiye kumenya ingene twokoresha neza ivyo bitabu bibiri. Hariho n’utundi dutabu dukwiye gushira mw’isakoshi y’ibikoresho vyacu vy’ukwigisha. Agatabu Inkuru nziza iva ku Mana ni kamwe mu bikoresho nyamukuru dukoresha mu gutanguza inyigisho za Bibiliya. Nimba icibare cacu kirimwo abantu batazi gusoma neza canke kikaba kirimwo abantu bavuga ururimi tudafise ibisohokayandikiro muri rwo canke tukaba dufise bikeyi, turashobora rero gukoresha agatabu Niwumvirize Imana canke agatabu Niwumvirize Imana maze ubeho ibihe bidahera. Igikoresho ntahara dukoresha mu kuyobora abatohoji kw’ishirahamwe ni agatabu Ni bande bariko barakora ivyo Yehova agomba muri iki gihe? Amavidewo afasha cane mu guhindura abantu abigishwa, nk’iyivuga ngo Ni kubera iki ukwiye kwiga Bibiliya?, Ingene tugira amakoraniro ajanye no gusenga, be n’iyivuga ngo Imana yoba ifise izina? na vyo nyene ni ibikoresho dukwiye kwiga ingene twobikoresha neza.
3. Ibikorwa dukorera Ubwami bizoza bizodufasha gukora iki?
3 Ibikorwa dukorera Ubwami bizoza, bizodufasha kuba abahanga mu gukoresha vya bisohokayandikiro ntahara dukwiye kuba dufise mw’isakoshi y’ibikoresho vyacu vy’ukwigisha. Twihatiye gukoresha ivyo bikoresho tubigiranye ubuhanga, tuzoba turiko turashira mu ngiro impanuro yahumetswe igira iti: “Wame wiyubara ubwawe no ku nyigisho yawe. Ivyo ubigumemwo, kuko niwakora ivyo uzokwikiza ugakiza n’abakwumviriza.”—1 Tim. 4:16.