Ihwaniro ry’intara ry’Ivyabona vya Yehova ryo mu 2008
1. (a) Ni kubera muri iki gihe vyihutirwa mu buryo budasanzwe gushira mu ngiro impanuro Paulo yahaye abakirisu b’Abaheburayo (Soma Abaheburayo 10:24, 25.)? (b) Ni akaryo akahe twimirije kuronka ko gushira mu ngiro impanuro Paulo yatanze?
1 Intumwa Paulo yarahimirije abakirisu b’Abaheburayo gukoranira hamwe no kuremeshanya, yongera abasaba ko ‘vyorushiriza kumera gutyo’ uko babona wa musi wegereza (Heb. 10:24, 25). Ibimenyamenya vyerekana ko “wa musi” Paulo yavuga wegereje cane, bitera vyongerekana. Ku bw’ivyo, si twe tuzobona harageze ko dukoranira hamwe n’abavukanyi be n’abavukanyikazi bacu kugira ngo turonke inyigisho zo mu vy’impwemu zishobora kutuyobora muri iyi “misi ya nyuma” igenda irushiriza kuba mibi (2 Tim. 3:1). Igihe nk’ico kizoshika ku mahwaniro y’intara yimirije yo mu 2008.
2. (a) Ni kubera iki bihambaye kuzoba ari ho uri imisi yose y’ihwaniro uko ari itatu? (b) Twoshobora gute gutangura kwitegura kugira tuzoryitabe?
2 Uzobe ari ho uri imisi yose uko ari itatu: Tukuremesheje kuzoba ari ho uri imisi yose uko ari itatu. Kugira ngo “[ntiduhebe] kwa gukoranira hamwe kwacu”, ntituzosiba kuri ivyo bifungurwa ngirakamaro vyo mu buryo bw’impwemu (Heb. 10:25). Nutangure kwitegura hakiri kare bishoboka. Vyoba vyiza umenyesheje ivy’iryo hwaniro umukoresha wawe hakiri kare kugira ngo ashobore kugira indinganizo zose zikenewe. Nimba abana bawe bazoba bari kw’ishure igihe muzogira ihwaniro ry’intara, numenyeshe abigisha babo ivyo mutegekanya gukora. Nubamenyeshe ko ihwaniro ari ikintu mwama mugira kijanye n’ugusenga kwanyu. Urashobora kwizigira ko Yehova azohezagira utwigoro ugira mu gushira ivy’Ubwami mu kibanza ca mbere.—Mat. 6:33.
3. Twoshobora kwitwararika abandi mu buryo butandukanye ubuhe?
3 Nufashe abandi kugira baryitabe: Paulo yarasavye kandi abavukanyi biwe ‘kwiyumvirana’ (Heb. 10:24). Abavukanyi n’abavukanyikazi bo mu Nyigisho y’igitabu y’ishengero urimwo, boba bakeneye gusahirizwa kugira bitabe iryo hwaniro? Woba woshobora gufasha abo mwigana Bibiliya kugira ngo muzobe muri kumwe kw’ihwaniro, naho mbere woba ari umusi umwe? Igihe umenyesha abo mu muryango batizeye ivyerekeye imigambi yawe ijanye n’ihwaniro, nubasabe muzojane. Utwigoro turanga urukundo ugira twoshobora kuvamwo ivyiza utari witeze.
4. Dushobora gute kuronka amakuru yerekeye amagenekerezo amahwaniro y’intara azoberako be n’ibibanza azoberamwo?
4 Ukuntu woronka amakuru: Abantu benshi baraterefona ku biro vy’ishami ku mwaka ku mwaka babaza aho amahwaniro azobera be n’igihe azoberako. Abo bantu baterefona nka bose usanga ari abavukanyi n’abavukanyikazi bamaze kuronka ayo makuru. Imbere y’uko uterefona ku biro vy’ishami, turagusavye ubanze usuzume Umunara w’Inderetsi wo ku 1 Ntwarante 2008 mu kirundi canke Igikorwa dukorera Ubwami co muri Ruhuhuma 2008.
5. Dukwiye gukora iki nimba dukeneye kuronka uburaro twitavye irindi hwaniro uretse iryo ishengero ryacu ryasabwe kuzokwitaba?
5 Nimba uzokwitaba ihwaniro atari iryo ishengero ryanyu ryasabwe kuzokwitaba, woshobora kwandikira ibiro vy’ishami. Ivyo bizoca bimenyeshwa uwuhagarikiye ibijanye n’uburaro kw’ihwaniro utegekanya kuzokwitaba.
6. Umuntu ashobora gute kuronka uburaro kw’ishure canke ku Ngoro y’Ubwami, mugabo ni igiki dukwiye kwibuka?
6 Uburaro: Benshi bashima kurara mu mashure canke mu Ngoro z’Ubwami biri hafi y’ahabera ihwaniro. Nimba nawe ari ukwo, turagusavye ubimenyeshe abakurambere bo mw’ishengero ryanyu bagushire muri abo. Ivyo biba ari ibiringo biteye umunezero, mugabo vyabonetse ko hari abaguma batera inkuru bongera batwenga gushika ijoro ryitereye, maze bikabuza abandi kwisinzirira. Turabasavye mwibuke kwitwararika abandi.
7. Twoshobora gute kwisunga indinganizo zashinzwe zijanye n’uburaro?
7 Kubikisha icumba mw’ihoteri: Nimba bikenewe ko Urwego rujejwe uburaro rugufasha kurondera ahoba hari ihoteri ibereye, turagusavye urwandikire hakiri kare. Niwerekane amahera wipfuza kuriha ku musi ku musi ku muntu.
8. (a) Ni mu buryo butandukanye ubuhe twoshobora kuninahaza Yehova igihe twitavye ihwaniro? (b) Ni ibiki abakora mu mahoteri bavuze bitumwe n’inyifato nziza y’abavukanyi bacu?
8 Ibikorwa vyiza: Ukugamburuka itegeko rya Yehova ryo gukoranira hamwe mu gusenga ‘biratugirira akamaro’. N’igihambaye kuruta, biratanga uturyo two kuninahaza izina rya Yehova (Yes. 48:17). “Ibikorwa [vyacu] vyiza . . . biribonekeza icese” ku bantu benshi mu gihe c’amahwaniro y’intara, kandi bamwebamwe baravyuriwe umutima wo guserura inyiyumvo zabo (1 Tim. 5:25). Mu gisagara kimwe, ahari hamaze imyaka myinshi habera amahwaniro yacu, hari umukuru w’ihoteri yavuze ati: “Muri iki gisagara haguma havugwa ivyerekeye Ivyabona vya Yehova be n’ukuntu amahwaniro yanyu atugirira akamaro. Turazi ukuntu abantu banyu basukura kirya kibanza abantu bisamarizamwo, kandi turababona muriko murasukura ahahagarikwa imiduga. Birateye umunezero kwakira abantu banyu mu kiringo c’ici. Turizigiye y’uko tuzobandanya gukorana neza mu myaka iza”. Uwundi mukuru w’ihoteri, amaze kuvuga ingorane yatewe n’iyindi migwi be n’abakina ibikino vyo kwisamaza, yaragize ico avuga ku gatima ko gusenyera ku mugozi umwe no kwihangana abavukanyi bacu bagaragaje igihe bari muri iyo hoteri. Yavuze ati: “Ese iyaba abashitsi bacu bose bari bameze nk’Ivyabona vya Yehova!”. Iyo nyifato y’abavukanyi bacu yatumye havugwa bene ayo majambo hamwe n’ayandi menshi asa n’ayo, itegerezwa kuba inezereza umutima w’Imana yacu Yehova!
9. Muri Matayo 4:4 hashimika gute ku kamaro ko gutega yompi ibice vyose vya porogarama?
9 Yezu yavuze ko ubuzima bwacu buhagaze ku gutega yompi “ijambo ryose riva mu kanwa ka Yehova” (Mat. 4:4). Ku mahwaniro tugira uko umwaka utashe, Yehova aratanga ‘ibifungurwa ku gihe kibereye’ vyo mu buryo bw’impwemu vyateguwe na wa “mushumba w’umwizigirwa kandi w’ubwenge” (Mat. 24:45). Harakozwe vyinshi cane mu gutegura ayo mazimano yo mu buryo bw’impwemu no mu kuyashikiriza. Ese twogaragaza ko dukenguruka ubwitwararitsi buranga urukundo bwa Yehova mu kuzoba ari ho turi no mu gutega yompi ibice vyose vy’iyo porogarama!
[Uruzitiro ku rup. 3]
Ibihe vya porogarama:
Ku wa gatanu
2:30 zo mu gitondo - 10:05 zo ku muhingamo
Ku wa gatandatu
4:30 zo mu gitondo - 11:25 zo ku muhingamo
Ku w’iyinga
2:30 zo mu gitondo - 9:10 zo ku muhingamo