Namaze imyaka 50 ndi umutsimvyi adasanzwe

MU 1964, nararungitswe kuba umutsimvyi adasanzwe mw’ishengero ritoyi ry’i Manokwari, mu burengero bwa Papouasie. Abakuru b’amadini b’aho barahama cane iryo shengero. Haciye igihe gito nshitse, hari umupasitori w’umuporoti nagiye mbona anteye muhira.

Nagiye numva akankama ati: “Ngira mbomore iyi nzu, nomore n’Ivyabona vya Yehova i Manokwari.”

Kubera ko nigeze kuba umupolisi, iryo terabwoba ryiwe ntiryankanze. Ariko ntiwumve namwishuranye ubwitonzi, maze asubira inyuma ata co yononye.​—1 Pet. 3:15.

Ico gihe i Manokwari hari abamamaji umunani. Ubu inyuma y’imyaka 50, hariyo amashengero indwi. Abantu barenga 1.200 baritavye ihwaniro ryabereye muri ako karere mu 2014. Iyo mbonye ivyo Yehova yakoze vyose aha hantu hari iyo catawe, numva mpimbawe vy’ukuri.