“Mwigumize mu rukundo rw’Imana”

1. Igitabu “Mwigumize mu rukundo rw’Imana” casohowe ku bw’intumbero iyihe?

¹ Si twe tuzobona harageze ko twiga ca gitabu gishasha “Mwigumize mu rukundo rw’Imana” mu Nyigisho ya Bibiliya y’ishengero guhera ku ndwi yo ku wa 23 Ruhuhuma! Ikete Inama nyobozi yandikiye umuntu wese akunda Yehova rirangizwa n’aya majambo agira ati: “Turizigiye bimwe bivuye ku mutima ko iki gitabu kizogufasha kubandanya ubaho wisunga ukuri, maze uheze wigumize ‘mu rukundo rw’Imana . . . ku bw’ubuzima budahera.’—⁠Yuda 21.”

2. Iki gitabu gishasha kizodufasha mu mice iyihe y’ubuzima?

² Ico twokwitega: Ni gute ingingo ngenderwako zo muri Bibiliya usanga zerekeye mwene iyi mice nk’uguhitamwo abagenzi, ukwiruhura, ukwubaha ubukuru, utumenyero tw’umuntu ku giti ciwe, umubano w’ababiranye, imvugo dukoresha hamwe n’imigenzo? Ijwi ryacu ryo mu mutima rizobumbabubwa hisunzwe ingingo mfatirwako ziri hejuru zigenga ibigororotse zihishurwa mw’Ijambo ry’Imana. (Zab. 19:7, 8) Uko tuzorushiriza gutahura uburyo Yehova yiyumvira, ni ko tuzorushiriza kumugamburukira mu mice yose y’ubuzima tubitumwe n’icipfuzo co kumuhimbara.—⁠Imig. 27:11; 1 Yoh. 5:3.

3. Ni kubera iki dukwiye gukora uko dushoboye kwose kugira ngo tugire uruhara buri ndwi mu cigwa cose kizoba kiriko kirarimburwa?

³ Niwiyemeze kuzogira uruhara: Igihe utegura, niwishingire umugambi wo gushemeza Imana uri mw’ikoraniro ry’abasavyi bayo. (Heb. 13:15) Ishengero ryose uko ryakabaye rizorimburira hamwe ico gitabu gishasha co kwiga. Kubera ko igice c’ivyo tuzokwiga buri ndwi kizoba ari gito cane, bizotuma twese dushobora gutegura tuvyitondeye, bitume tutitinya gusangira n’abandi ivyo tuzoba twize. Insasanuro zacu zateguwe neza kandi ngufingufi zizovyurira abandi ugukundana n’ibikorwa vyiza, zongere zitume ayo mayagwa arimburwa mu buryo burimwo igishika kandi buri n’ico buvuze. (Heb. 10:24) Vyongeye, umunezero wacu uzokwongerekana uko umwe wese muri twebwe azoba ariko araserura ukwizera kwiwe.

4. Ni kubera iki ari ngombwa ko dukurikiza amabwirizwa ya Yehova?

⁴ Mw’ijoro rya nyuma Yezu yamaze kw’isi ari umuntu, yarerekanye ko dukeneye gukurikiza amabwirizwa ya Yehova kugira ngo tugume mu rukundo rw’Imana. (Yoh. 15:10) Tubifashijwemwo n’igitabu ‘Urukundo rw’Imana,’ turashobora kwiyemeza kuruta ikindi gihe cose gushira mu ngiro ingingo ngenderwako zo muri Bibiliya mu buzima bwa misi yose be no ‘kwigumiza mu rukundo rw’Imana.’—⁠Yuda 21.