Utwigoro abantu bagize two kurwanya urupfu

Urupfu ni umwansi ateye ubwoba. Turarurwanya twivuye inyuma. Igihe ruhitanye uwacu, vyoshobora kutugora kuvyemera. Canke na ho igihe tukiritera tukarisama twoshobora kwiyumvira yuko uwo mwansi atazokwigera adushikira, ariko rero kuba ari ukwihenda.

Kera ni bake wasanga biyumvira ivyo kudapfa nk’uko Abafarawo ba kera bavyiyumvira. Abo Bafarawo barakoresheje igihe kinini c’ubuzima bwabo, barakoresha n’abantu ibihumbi n’ibihumbi, kugira ngo batsinde urupfu. Ivyibutso bubatse vyitwa amapiramide birerekana ko ata ko batagize mugabo ko vyabataye ku w’amazi.

Abami b’abami b’Ubushinwa na bo nyene baripfuje gushikira ukudapfa bakoresheje ubundi buryo, ubwo na bwo bukaba ari ukurondera ibintu bonywa vyotuma badapfa. Umwami w’abami yitwa Qin Shi Huang yarasavye abahinga biwe ngo bamuhingurire umuti wo kunywa ufise ubushobozi budasanzwe wotuma adapfa. Ariko rero, myinshi mu miti bahinguye yarimwo ubumara bwitwa merikire, kandi umwe muri iyo miti ushobora kuba ari wo wamwishe.

Mu kinjana ca 16 mu gihe cacu, umugenduzi umwe w’uturere w’Umunyespanye yitwa Juan Ponce de León bivugwa ko yafashe ubwato akaja mu mazinga ya Karayibe arondera iriba ry’ubuto. Muri ico gihe yarubuye akarere ka Floride ko muri Leta Zunze Ubumwe za Amerika, mugabo inyuma y’imyaka mikeya apfira mu mishamirano yagiranye n’Abanyamerika b’imvukira. Nayo rya riba ry’ubuto ntiryigeze riboneka.

Abafarawo, abami b’abami be n’abagenduzi b’uturere, abo bose bararondeye gutsinda urupfu. Naho twoba tudashima uburyo bakoresheje, ni nde muri twebwe yovuga ko ico kintu barondeye gushikako ata kamaro gifise? Tuvugishije ukuri, twese turipfuza kubandanya kubaho.

URUPFU RWOBA RUSHOBORA GUTSINDWA?

Ni kubera iki none turwanya urupfu? Bibiliya irasigura igituma. Ku bijanye n’Umuremyi wacu Yehovaa Imana, Bibiliya ivuga iti: “Ikintu cose yakigize ciza mu gihe caco. Mbere n’igihe kitagira urugero [ni ukuvuga “ibihe bidahera”] yagishize mu mutima wabo.” (Umusiguzi 3:11) Twipfuza kwibera kw’isi ibihe bidahera, atari ukubaho gusa imyaka 80 canke idashika. (Zaburi 90:10) Ico ni co cipfuzo dufise mu mitima yacu.

Kubera iki Imana yashize mu mitima yacu “igihe kitagira urugero,” ni ukuvuga icipfuzo co kubaho ibihe bidahera? Yoba yadushizemwo iciyumviro co kubaho ibihe bidahera kandi bidashoboka? Ivyo nta vyo yokora. Ahubwo, Imana idusezeranira yuko urupfu ruzotsindwa. Bibiliya iravuga akatari gake ko urupfu ruzovaho, ikavuga n’ubuzima budahera Imana yasezeranye.—Raba uruzitiro ruri kumwe n’iki kiganiro ruvuga ngo “Urupfu ruzotsindwa.”

Yezu Kristu ubwiwe yavuze mu buryo butomoye ati: “Kugira ngo baronke ubuzima budahera, ni uko baguma bironsa ubumenyi bwerekeye wewe, Imana yonyene y’ukuri, n’ubwerekeye uwo watumye, Yezu Kristu.” (Yohani 17:3) Urupfu rero ruzoteba rutsindwe. Mugabo rero Yezu yarerekanye ko Imana yonyene ari yo izodukiza urupfu.