Turashashaye gukorera Yehova aho ari ho hose

AHO hari mu 1949, hakaba haciye imyaka irenga 60, mugabo inkuru inyerekeye yatanguye kera cane imbere y’aho. Dawe Hendrik yakora ibirato akongera agakorera mu busitani i Donderen, kano kakaba ari akagwati kari mu buraruko bwa Drenthe mu Buholande. Aho ni ho navukiye mu 1927, nkaba ngira kane mu bana indwi. Inzu yacu yari kw’ibarabara ry’ibivu mu ntara yo hagati mu gihugu. Benshi mu babanyi bacu bari abarimyi, kandi narakunda ubuzima bw’abarimyi. Mu 1947, igihe nari mfise imyaka 19, narumvise ukuri biciye kuri umwe mu babanyi bacu yitwa Theunis Been. Ndibuka yuko ntakunze Theunis igihe namubona ari bwo bwa mbere, mugabo inyuma gato y’Intambara ya kabiri y’isi yose, yarabaye Icabona ca Yehova, kandi narabonye ko yari asigaye afise umutima mwiza kuruta uko yahora. Ukwo kuntu yari yarahinduye kamere kwarankwegereye, akaba ari co gituma namwumvirije igihe yambwira ibijanye n’Iparadizo yo kw’isi Imana yasezeranye. Sinatevye kwemera ukuri, kandi twaramaze igihe kirekire turi abagenzi.a

Natanguye kwamamaza muri Rusama 1948, maze mu kwezi kwakurikiye, ni ukuvuga ku wa 20 Ruheshi, ndabatizwa kw’ihwaniro ryabereye i Utrecht. Ku wa 1 Nzero 1949 naratanguye ubutsimvyi maze ndungikwa gukorera i Borculo, mu buseruko bw’Ubuholande, hakaba hari ishengero ritoyi. Nabwirizwa kugenda ibilometero nka 130 kugira ngo nshikeyo, akaba ari co gituma nafashe ingingo yo kugenda n’ikinga. Niyumvira ko nokoresheje amasaha nk’atandatu, mugabo kubera imvura nyinshi n’umuyaga ukomeye wanturuka imbere, nakoresheje amasaha 12, naho nyene nafashe igariyamoshi hasigaye ibilometero 90! Mw’ijoro, nahavuye nshika iyo nariko ndaja, ku muhana w’umuryango w’Ivyabona twabana igihe nariko ndakorera ubutsimvyi muri ako karere.

Muri iyo myaka y’inyuma y’intambara, abantu bari batunze ibintu bikeyi. Nta kindi nari mfise atari ikoti imwe n’ipantalo imwe, nya koti ikaba yari nini cane, iyo pantalo na yo ikaba ngufi cane! Nk’uko nabivuze mu ntangamarara, ukwezi kwa mbere namaze i Borculo ntikwari kworoshe, mugabo Yehova yarampezagiye ndaronka inyigisho za Bibiliya zitari nke. Haciye amezi icenda, narungitswe gukorera i Amsterdam.

MVA MU GIHUGU HAGATI NKAJA MU GISAGARA

Nari nakuriye mu ntara y’uburimyi, ico gihe na ho nkaba nari nshitse i Amsterdam, igisagara kinini kuruta ibindi vyose vyo mu Buholande. Ubusuku bwarimbuka cane. Mu kwezi kwa mbere, natanze ibisohokayandikiro biruta ivyo nari maze gutanga muri ayo mezi icenda. Bidatevye, nari nsigaye nyobora inyigisho za Bibiliya zitari munsi y’umunani. Aho mariye kugenwa bwa musuku w’ishengero (ubu akaba yitwa umuhuzabikorwa w’inama y’abakurambere), narashinzwe gushikiriza insiguro y’icese ya mbere. Ico kintu carampagaritse umutima rwose, akaba ari co gituma niruhukije cane igihe nimurirwa mu rindi shengero imbere gato y’uko ndayishikiriza. Ico gihe sinari nzi na gato yuko uko imyaka yogiye irahaca, noshikirije insiguro zirenga 5.000!

Muri Rusama 1950, narungitswe gukorera i Haarlem. Mu nyuma narasabwe gukora igikorwa co kugendera amashengero. Namaze imisi itatu ntatora n’iry’imbwa. Nabwiye Robert Winkler, umwe mu bavukanyi bakorera ku biro vy’ishami, yuko niyumvamwo ko ntabishoboye, mugabo ambwira ati: “Uzuza gusa izo nkaratasi. Uzovyiga.” Haciye igihe gito, naramaze ukwezi ndiko ndamenyerezwa maze ndatangura gusukura ndi umusuku (umucungezi) w’umuzunguruko. Igihe nari nagendeye ishengero rimwe, naramenyanye na Janny Taatgen, akaba yari umutsimvyi akiri muto w’umunyagishika yakunda cane Yehova akagira n’agatima ko kwitanga. Twubakanye mu 1955. Mugabo imbere y’uko mbandanya inkuru inyerekeye, Janny agira asigure ukuntu yabaye umutsimvyi be n’ukuntu twasukuye turi kumwe tumaze kwubakana.

DUSUKURA UKO TWUBAKANYE

Janny: Mawe yabaye Icabona mu 1945 igihe nari mfise imyaka 11. Yaciye ubwo nyene abona ko bihambaye kwigisha Bibiliya abana biwe batatu, mugabo dawe yararwanya ukuri, akaba ari co gituma mawe yatwigisha igihe dawe yaba atari i muhira.

Ikoraniro rya mbere nitavye ryari ihwaniro ryabereye i La Haye mu 1950. Haciye indwi imwe, naritavye ikoraniro ari bwo bwa mbere ku Ngoro y’Ubwami i Assen (Drenthe). Dawe yarashangashiwe maze aranyirukana. Mawe yambwiye ati: “Urazi aho ushobora kuba.” Nari nzi ko yariko avuga abavukanyi n’abavukanyikazi banje bo mu buryo bw’impwemu. Nabanje kuja kuba ku muryango w’Ivyabona waba hafi yacu, mugabo dawe yaguma ambuza amahoro, akaba ari co gituma nimukiye mw’ishengero ry’i Deventer (Overijssel), iryari ku bilometero nka 95. Ariko rero kubera ko nari nkiri muto, abakuru mu vy’intwaro baramutatiye kubera ko yari yanyirukanye. Ivyo vyatumye ambwira ko nshobora kugaruka i muhira. Naho dawe atigeze yemera ukuri, yahavuye anyemerera kwitaba amakoraniro yose no kuja kwamamaza.

Haciye igihe gito ngarutse i muhira, mawe yararwaye cane bica biba ngombwa ko nza ndakora ibikorwa vyose vy’i muhira. Naho vyari ukwo, narabandanije gutera imbere mu vy’impwemu maze mbatizwa mu 1951 mfise imyaka 17. Mu 1952, mawe amaze gutora mitende, naramaze amezi abiri nkorana n’abavukanyikazi batatu b’abatsimvyi ndi umutsimvyi wo mu buruhuko (ni ukuvuga wo gufasha). Twaba mu bwato maze tukamamaza mu bisagara bibiri vy’i Drenthe. Nabaye umutsimvyi asanzwe mu 1953. Haciye umwaka umwe, hari umucungezi w’umuzunguruko w’umusore yagendeye ishengero ryacu. Yari Markus. Twubakanye muri Rusama 1955, kubera ko twabonye yuko dushobora kurushiriza gukorera Yehova turi kumwe.—Umus. 4:9-12.

Markus: Inyuma y’ubugeni bwacu, twabanje kurungikwa gukorera ubutsimvyi i Veendam (Groningen). Twaba mu kumba gatoya cane kapima imetero 2 kuri 3 gusa. Naho vyari ukwo, Janny yaratunganya ako kumba akongera agatuma gasusuruka. Buri joro, twabwirizwa kwigizayo imeza be n’udutebe tubiri twacu kugira ngo tumanure igitanda cari gifashe ku ruhome.

Haciye amezi atandatu, twasabwe gukora igikorwa co kugendera amashengero mu Bubiligi. Mu 1955, muri ico gihugu hari abamamaji nka 4.000 gusa. Ubu hari abangana n’ico gitigiri incuro zitandatu! I Flandres mu buraruko bw’Ububiligi, abantu bavuga ururimi rumwe n’uruvugwa mu Buholande. Ariko rero, kubera ko mu Bubiligi barwatura mu buryo butandukanye no mu Buholande, vyabaye ngombwa ko tubanza gutsinda intambamyi y’ururimi.

Janny: Igikorwa co kugendera amashengero gisaba ko umuntu aba afise agatima ko kwitanga vy’ukuri. Twagendera amashengero dukoresheje amakinga yacu tukongera tukaba mu ngo z’abo dusangiye ukwemera. Kubera ko tutari dufise ahantu hacu bwite tuja duhejeje kugendera ishengero, twaguma aho baduhaye indaro gushika ku wa mbere, tukaja mw’ishengero rikurikira ku wa kabiri mu gitondo. Mugabo twama tubona ko umurimo wacu ari umuhezagiro uva kuri Yehova.

Markus: Mu ntango, nta n’umwe mu bavukanyi na bashiki bacu bo muri ayo mashengero twari tuzi, mugabo bari bafise umutima mwiza bakaba n’abakiranyi. (Heb. 13:2) Uko imyaka yagiye irahaca, twaragendeye akatari gake amashengero yose yo mu Bubiligi akoresha ururimi rw’igiholande. Ivyo vyatumye twironkera imihezagiro myinshi. Nk’akarorero, twaramenyanye n’abavukanyi be na bashiki bacu nka bose bo mu ntara ivugwamwo igiholande, kandi twarabakunze cane. Twariboneye abakiri bato amajana bakura mu buryo bw’umubiri no mu buryo bw’impwemu maze bakiyegurira Yehova, bagashira ivyungura Ubwami imbere y’ibindi mu buzima bwabo. Birahimbaye vy’ukuri kwibonera benshi muri bo bakorera Yehova badahemuka mu murimo w’igihe cose. (3 Yoh. 4) Ukwo “guhanahana indemesho” kwatumye bitworohera kubandanya igikorwa cacu n’umutima wacu wose.—Rom. 1:12.

URUGAMBA RUTOROSHE BE N’IMIHEZAGIRO NYAKURI

Markus: Kuva twubakanye, twaripfuza kwitaba Ishure rya Gileyadi. Buri musi, twaramara n’imiburiburi isaha imwe turiko turiga icongereza. Ariko rero, ntivyari vyoroshe kwiga icongereza dukoresheje ibitabu gusa, akaba ari co gituma twafashe ingingo yo kuja mu Bwongereza mu gihe c’akaruhuko kacu kugira ngo twimenyereze kuvuga urwo rurimi turiko turamamaza ng’aho. Amaherezo, mu 1963 twararonse ibahasha rivuye ku cicaro gikuru i Brooklyn. Ryarimwo amakete abiri, iryanje n’irya Janny. Ikete ryanje ryari ubutumire bwo kwitaba ivyigwa bidasanzwe vya Gileyadi vyari kumara amezi icumi. Ivyo vyigwa vyokwibanze ahanini ku kumenyereza abavukanyi no kubaronsa ubuyobozi bujanye no gutunganya ibintu mw’ishirahamwe. Ni co gituma mu banyeshure 100 batumiwe, 82 bari abavukanyi.

Janny: Mw’ikete naronse uwo musi, nasabwe kurimbura ndabijanisha n’isengesho nimba nokwemera kuguma mu Bubiligi mu gihe Markus yobaye ari muri ivyo vyigwa. Mvugishije ukuri, nabanje kuvunika umutima. Wamenga Yehova ntiyari yahezagiye utwigoro nari naragize ndondera gukwiza ibisabwa. Ariko rero, nariyibukije intumbero y’Ishure rya Gileyadi, iyo na yo ikaba ari iyo gufasha abaryitaba kurangura igikorwa co kwamamaza inkuru nziza kw’isi yose. Naciye rero nemera gusigara maze nshingwa gukorera ubutsimvyi budasanzwe mu gisagara ca Ghent co mu Bubiligi ndi kumwe na Anna Colpaert be na mwene wabo Maria, bakaba bari abatsimvyi badasanzwe babiri bazi utuntu n’utundi.

Markus: Kubera ko nabwirizwa kuryohora icongereza canje, nasabwe kuja i Brooklyn hasigaye amezi atanu ngo iryo shure ritangure. Nakorera mu Rwego rujejwe kurungika ibisohokayandikiro no mu Rwego rw’umurimo. Gukorera ku cicaro gikuru no gufasha mu vyo gutegura kurungika ibisohokayandikiro muri Aziya, i Buraya no muri Amerika y’Epfo vyatumye ndushiriza gutahura umuryango w’abavukanyi ukwiye kw’isi yose. Ndibuka canecane umuvukanyi A. H. Macmillan, yari yarabaye umusuku w’ingenzi mu gihe c’umuvukanyi Russell. Ico gihe yari ageze mu zabukuru akaba kandi atumva na gato, yamara yaritaba amakoraniro yose y’ishengero adahorereza. Ivyo vyarankoze ku mutima cane vyongera biranyigisha ko tudakwiye kwigera dufata minenerwe ivyo kwifatanya n’abakirisu bagenzi bacu.—Heb. 10:24, 25.

Janny: Twe na Markus twarandikiranira akatari gake mu ndwi. Twarakumburana cane! Yamara, Markus yarakunda ukumenyerezwa yariko araronswa kw’Ishure rya Gileyadi, nanje ngahimbarwa vy’ukuri n’ubusuku. Igihe Markus yataha avuye muri Leta Zunze Ubumwe za Amerika, nayobora inyigisho za Bibiliya 17! Ni ivy’ukuri ko kumara amezi 15 tutari kumwe rwari urugamba, mugabo narabona ko Yehova yaduhezagira ku bw’utwigoro twagira. Umusi Markus yagaruka, indege yaracerewe amasaha atari make, akaba ari co gituma igihe amaherezo yashika, twagumbiranye turira. Kuva ico gihe, ntitwasubiye kuvana.

TURAKENGURUKA AGATEKA KOSE K’UMURIMO TWATEWE

Markus: Igihe nagaruka mvuye kw’Ishure rya Gileyadi muri Kigarama 1964, twashinzwe gukorera kuri Beteli. Naho tutari tubizi ico gihe, ntitwobandanije gukorera ng’aho. Haciye amezi atatu gusa, twashinzwe igikorwa co kugendera imizunguruko i Flandres. Igihe Aalzen Wiegersma n’umukenyezi wiwe Els barungikwa kuba abamisiyonari mu Bubiligi, bashinzwe igikorwa co kugendera imizunguruko, maze dusubira kuri Beteli aho nakorera mu Rwego rujejwe umurimo. Kuva mu 1968 gushika mu 1980, twarahinduriwe ibikorwa akatari gake, tugakorera kuri Beteli tukongera tukagendera amashengero. Amaherezo, kuva mu 1980 gushika mu 2005, narasubiye kuba umucungezi w’intara.

Naho twahinduriwe ibikorwa akatari gake, ntitwigeze twibagira ko twari twariyeguriye Yehova kugira ngo tumukorere n’ubuzima bwacu bwose. Twarahimbarwa vy’ukuri n’igikorwa ico ari co cose twashingwa, twizigiye ko amahinduka ayo ari yo yose yaba mu murimo turangura yari afise intumbero yo guteza imbere ivyungura Ubwami.

Janny: Narahimbawe canecane n’agateka kadasanzwe ko guherekeza Markus i Brooklyn mu 1977 be n’i Patterson mu 1997 igihe yongera kumenyerezwa ari umwe mu bagize Komite y’ishami.

YEHOVA ARAZI IVYO DUKENEYE

Markus: Mu 1982, Janny yarabazwe hanyuma arakira neza. Haciye imyaka itatu, ishengero ry’i Louvain ribigiranye umutima mwiza ryaraduhaye aho tuba hejuru y’Ingoro y’Ubwami yaryo. Mu myaka 30 yari iheze, ryari ryo rya mbere turonka ahantu hatoya hacu bwite ho kuba. Ku wa kabiri, igihe twaba twatekeye ibintu kugira ngo dutangure kugendera ishengero rinaka, nabwirizwa kumanuka nongera ndunga ingazi 54 incuro zitari nke, manukanye imizigo yacu! Mu 2002 haratunganijwe ivy’uko tworonka aho tuba mu nzu yo hasi, ivyo bikaba vyaraduhimbaye cane. Igihe nashikana imyaka 78, twashinzwe kuba abatsimvyi badasanzwe mu gisagara ca Lokeren. Turahimbawe cane kuba dushobora gusukura muri ubwo buryo no kuba tugishobora kuja mu ndimiro buri musi.

Janny: Twese hamwe tumaze imyaka irenga 120 mu murimo w’igihe cose! Twariboneye ukuri kw’ivyo Yehova yasezeranye yuko ‘atazogenda adutaye’ be n’uko nitwamusukurira tudahemuka, ‘ata co tuzobura.’—Heb. 13:5; Gus. 2:7.

Markus: Igihe twari tukiri bato, twariyeguriye Yehova. Ntitwigeze twironderera ibintu bihambaye. Turiteguriye kwemera igikorwa ico ari co cose dushingwa kubera ko twemera tudakeka yuko igihambaye atari aho dukorera canke igikorwa dukora, ahubwo ari uwo dukorera.