Ko ‘twamenye Imana,’ hasigaye iki?

1. Ni kubera iki umudereva w’indege abanza gusuzuma urutonde runaka imbere y’uko ahaguruka?

ABADEREVA b’indege baroranirwa kuruta abandi bose muri ico gikorwa usanga bafise urutonde rw’ibintu birenga 30 babanza gusuzuma imbere y’uko indege ihaguruka. Mu gihe abo badereva badasuzumye neza ibiri kuri urwo rutonde igihe cose bagomba guhaguruka, baba batumye birushiriza gushoboka ko bagira isanganya rikomeye. Woba uzi umudereva ahimirizwa canecane gusuzuma urwo rutonde igihe cose indege igira ihaguruke? Ni umudereva abimenyereye cane! Uwo mudereva yakanongoreye yoshobora bitagoranye kwijajara maze ntasuzume akantu kose imbere y’uko ahaguruka.

2. Ni ukwisuzuma ukuhe abakirisu basabwa kugira?

² Cokimwe n’umudereva w’indege yitwararika cane ivyo kwirinda amasanganya, urashobora gukoresha urutonde runaka rw’ibintu rwogufasha kwisuzuma kugira ngo wiyemeze neza ko ukwizera kwawe kutazogoyagoya igihe uzoba ugukeneye cane. Waba uheruka kubatizwa canke umaze imyaka myinshi ukorera Imana, birahambaye ko uza urasuzuma ukuntu ukwizera kwawe be n’ukwihebera Imana kwawe bimeze. Kutaza urabisuzuma ubigiranye umwete birashobora gutuma umererwa nabi mu vy’impwemu. Bibiliya itugabisha iti: “Uwiyumvira ko ahagaze yiyubare ntagwe.”—1 Kor. 10:12.

3. Abakirisu b’i Galatiya bari bakeneye gukora iki?

³ Abakirisu b’i Galatiya bari bakeneye gusuzuma ukuntu ukwizera kwabo kwari kumeze no gukenguruka umwidegemvyo wabo wo mu vy’impwemu. Biciye ku nkuka Yezu yatanze, yari yaratumye bishoboka ko abamwizera bamenya Imana mu buryo budasanzwe, ivyo bikaba vyasobanura ko bashobora gucika abana b’Imana. (Gal. 4:9) Kugira ngo abo Bagalatiya bagume bafitaniye n’Imana ubwo bucuti budasanzwe, babwirizwa guheba inyigisho z’Abayuda bumira ku migenzo yabo, bano bakaba baguma basaba bashimitse yuko bakurikiza Itegeko rya Musa. Igitangaje ni uko Abanyamahanga batagenyerewe bari mu mashengero batari barigeze mbere bagengwa n’iryo Tegeko! Abo Bayuda n’abo Banyamahanga bari bakeneye gutera imbere mu vy’impwemu. Ivyo vyasaba yuko batahura ko batashobora kwishingira ubugororotsi bwabo bwite biciye kw’Itegeko rya Musa.

INTAMBWE ZA MBERE ZISHIKANA KU KUMENYA IMANA

4, 5. Ni impanuro iyihe Paulo yahaye Abagalatiya, kandi ni kubera iki ihambaye kuri twebwe?

⁴ Impanuro intumwa Paulo yahaye Abagalatiya yaranditswe ku bw’intumbero kanaka, iyo na yo ikaba ari iyo kubuza abakirisu b’ukuri bo mu kiringo ico ari co cose gutera umugongo itunga ry’ukuri kwo muri Bibiliya maze bagasubira ku biri inyuma. Yehova yahumekeye iyo ntumwa kuremesha abari muri iryo shengero ry’i Galatiya be n’abasavyi biwe bose ngo bagume bashikamye.

⁵ Vyoba vyiza twese twibutse ukuntu twakuwe mu buja bwo mu vy’impwemu tukaba Ivyabona vya Yehova. Kugira ngo uvyibuke, rimbura ibi bibazo bibiri: Woba wibuka intambwe wateye kugira ngo ukwize ibisabwa vyo kubatizwa? Woba wibuka ukuntu wamenye Imana ukongera ukamenywa na yo gutyo ukiyumvamwo yuko ufise umwidegemvyo nyakuri wo mu vy’impwemu?

6. Ni urutonde uruhe tugira twihweze?

⁶ Muri rusangi, twese twateye intambwe icenda. Izo ntambwe, izogereranywa n’urutonde rwo mu buryo bw’impwemu ruriko ibintu tubwirizwa gusuzuma, ziri mu ruzitiro ruvuga ngo “Intambwe zishikana kw’ibatisimu no kw’ikura ribandanya.” Kwama twiyibutsa izo ntambwe icenda bizodukomeza kugira ngo twirinde gusubira ku bintu vyo mw’isi. Nk’uko nyene wa mudereva w’indege abimenyereye mugabo yiyubara abandanya gutwara indege atagira amasanganya mu kubanza gusuzuma urutonde rwiwe imbere y’uko ahaguruka, ni na ko uzofashwa kuguma ukorera Imana udahemuka mu gusuzuma urutonde runaka rwo mu buryo bw’impwemu.

ABAMENYWE N’IMANA BARABANDANYA GUKURA MU VY’IMPWEMU

7. Ni icitegererezo ikihe dukwiye gukurikiza, kandi kubera iki?

⁷ Urutonde rw’ibintu umudereva w’indege asuzuma ruramwibutsa yuko hariho ivyo akwiye kwama akurikiza neza igihe cose agira ahaguruke. Na twebwe nyene turashobora kwama twisuzuma tugasuzuma n’ivyo twagiye turagira kuva tubatijwe. Paulo yandikiye Timoteyo ati: “Ugumye ca citegererezo c’amajambo ngirakamaro wanyumvanye hamwe n’ukwizera n’urukundo bijanye na Kristu Yezu.” (2 Tim. 1:13) Ayo “majambo mazima” ari mw’Ijambo ry’Imana. (1 Tim. 6:3) Nka kurya nyene igicapo umuhinguzi w’utugenegene acafye yihuta kitwereka muri rusangi ishusho y’ikintu kinaka, ni na ko ‘icitegererezo c’ukuri’ kiduha muri rusangi iciyumviro kidufasha kumenya no gukurikiza ivyo Yehova adusaba. Nimuze ubu twihweze intambwe zadushikanye kw’ibatisimu kugira turabe ko turiko turahuza n’ico citegererezo c’ukuri.

8, 9. (a) Ni kubera iki dukwiye kubandanya gukura mu bumenyi no mu kwizera? (b) Tanga akarorero kerekana igituma bihambaye ko dukura mu vy’impwemu be n’igituma ari ikintu kibandanya.

⁸ Ikintu ca mbere kiri ku rutonde rw’ivyo dusuzuma ni uko dukeneye kwironsa ubumenyi. Turaheza tugatsimbataza ukwizera. Mugabo turakwiye kubandanya gukura muri iyo mice yompi. (2 Tes. 1:3) Gukura bisaba ko tugenda turagira amahinduka. “Gukura” bisobanura kwongerakana, kwaguka. Ku bw’ivyo tumaze kubatizwa, turakeneye kubandanya gukomeza kamere yacu y’ivy’impwemu kugira ngo ikura ryacu ntirihagarare.

⁹ Ugukura kwo mu vy’impwemu kwacu twoshobora kukugereranya n’ugukura kw’igiti. Igiti coshobora gukura kikaba kinini cane, na canecane igihe imizi yaco igera kure. Nk’akarorero, amwamwe mu masederi maninimanini y’i Lebanoni arashobora kureha n’inyubakwa y’amagorofa 12, akagira imizi ikomeye kandi ishika kure cane, umutumba wayo na wo ukagira umuzingi w’imetero 12. (Ind. 5:15) Mwene ico giti kimaze gukura kigashika aho umenga ntikigikura, kirabandanya gukura mugabo mu buryo butibonekeza. Uko haca umwaka, umutumba uraguka, imizi na yo ikarushiriza kwinjira mu kuzimu no gukwiragira irya n’ino, bigatuma ico giti kirushiriza gukomera. Ukwo nyene ni ko bigenda mu bijanye n’ugukura mu vy’impwemu kw’umukirisu. Mu gihe dutanguye kwiga Bibiliya, twoshobora gukura ningoga mu vy’impwemu hanyuma tukabatizwa. Abo mw’ishengero barahimbarwa no kubona iterambere ryacu. Twoshobora mbere gukwiza ibisabwa tukaba abatsimvyi canke tugaterwa utundi duteka. Mu myaka ikurikira, ukubandanya gukura mu vy’impwemu kwacu kwoshobora kuba kutacibonekeza. Ariko rero, tuba tugikeneye gukura mu kwizera no mu bumenyi “tugashikira urugero rw’umugabo akuze, urugero rw’igihagararo rw’ukunengesera kwa Kristu.” (Ef. 4:13) Ni nk’aho rero tuba turiko turakura tuva ku kuba urugemwe tuja ku kuba umukirisu ahumuye, tukaba nk’ igiti c’inganzamarumpu.

10. Ni kubera iki bikenewe ko n’abakirisu bahumuye babandanya gukura?

¹⁰ Mugabo ugukura kwacu ntigukwiye kugarukira aho. Ubumenyi bwacu bukwiye kwongerekana, ukwizera kwacu na kwo kugakomera. Gutyo, turarushiriza gushinga imizi mw’ivu rigereranya Ijambo ry’Imana. (Imig. 12:3) Mw’ishengero rya gikirisu, hari bene wacu na bashiki bacu benshi babigize. Nk’akarorero, hari mwene wacu amaze imyaka irenga 30 ari umukurambere yavuze ko abandanya gukura mu buryo bw’impwemu. Agira ati: “Nararushirije rwose guha agaciro Bibiliya. Nama ndonka utundi turyo two gushira mu ngiro ingingo ngenderwako n’amategeko vyo muri Bibiliya mu buryo butandukanye. Vyongeye, ndarushiriza guha agaciro ubusuku.”

NURUSHIRIZE KUGIRANIRA UBUGENZI N’IMANA

11. Dushobora gute kurushiriza kumenya Yehova uko haca igihe?

¹¹ Ugukura kwacu gusaba kandi ko turushiriza kwiyegereza Yehova nka we Mugenzi wacu akaba na Dawe. Yipfuza yuko twiyumvamwo ko twemerwa. Yipfuza ko tumenya yuko dukundwa be n’uko dutekaniwe nk’uko nyene umwana yumva ko akundwa be n’uko atekaniwe igihe agumbiriwe n’umuvyeyi amwitwararika canke twiyumva igihe turi kumwe n’umugenzi nyakuri kandi w’intahemuka. Nk’uko ubizi, kugiranira na Yehova ubwo bugenzi somambike si ikintu kiba mu kanya gatoya. Hategerezwa guca igihe kugira ngo tumumenye twongere tumukunde. Kugira rero urushirize kumenya Yehova, niwiyemeze gutegekanya umwanya wo gusoma Ijambo ryiwe buri musi. Vyongeye, nusome inomero imwimwe yose y’Umunara w’Inderetsi na Be maso! hamwe n’ibindi bisohokayandikiro bishingiye kuri Bibiliya.

12. Ni ibiki dukeneye gukora kugira ngo tumenywe na Yehova?

¹² Abagenzi b’Imana barakura mu buryo bw’impwemu biciye ku masengesho avuye ku mutima batura no ku kwifatanya n’abantu beza. (Soma Malaki 3:16.) ‘Amatwi ya Yehova ari ku gutakamba kwabo.’ (1 Pet. 3:12) Cokimwe n’umuvyeyi munyarukundo, Yehova aradutega yompi igihe tumutakambiye mw’isengesho tumusaba ngo adufashe. Ni co gituma dukwiye ‘gushishikara gusenga.’ (Rom. 12:12) Ntidushobora kuguma turi abakirisu bahumuye tudafashijwe n’Imana. Imikazo yo muri iyi si irakomeye cane ku buryo tutoshobora kuyinanira twenyene. Turetse gushishikara gusenga, tuba twibujije kuronka inkomezi nyinshi zamaho Imana yiteguriye kandi ishoboye gutanga. Woba ubona ko amasengesho utura abereye canke ubona yuko ukeneye kubandanya gutera imbere muri uwo muce?—Yer. 16:19.

13. Ni kubera iki kwifatanya n’abakirisu bagenzi bacu bihambaye kugira ngo tubandanye gukura mu vy’impwemu?

¹³ Yehova arahimbarwa n’“abaronderera ubuhungiro muri we” bose. Ku bw’ivyo, naho tuba tumaze kumenya Imana, twipfuza kubandanya twifatanya n’ishengero ry’abandi bantu bayizi. (Nah. 1:7) Mw’isi yuzuyemwo ibintu bica intege, tuba tubaye inkerebutsi twifatanije na bene wacu be na bashiki bacu baremesha. Ni ivyiza ibihe bivamwo? Mw’ishengero urahasanga abantu bakuvyurira “ugukundana n’ibikorwa vyiza.” (Heb. 10:24, 25) Urwo rukundo Paulo yandikiye Abaheburayo rusaba ko haba umuryango w’abavukanyi, ikibano c’abasavyi b’Imana banama rimwe, ni ukuvuga ishengero. Kugaragaza urwo rukundo bisaba ko wifatanya n’abandi bakirisu. Nuze uritaba amakoraniro wongere uyagiremwo uruhara, umere nk’aho ushize akamenyetso kuri uwo muce kuri rwa rutonde rw’ivyo ubwirizwa gusuzuma.

14. Ni mu buryo ki ukwigaya n’uguhindukira ari ikintu kibandanya?

¹⁴ Kugira ngo tube abakirisu vyasavye ko twigaya maze tugahindukira, ari kwo guheba ibicumuro vyacu. Ariko rero, ukwigaya ni ikintu kibandanya. Kubera ko turi abanyagasembwa, turacafise igicumuro kibunze muri twebwe nka kurya kw’inzoka yaziritse, yiteguriye gukomora umuntu. (Rom. 3:9, 10; 6:12-14) Nimuze tugume turikanuye, ntitwirengagize amakosa yacu. Igishimishije ni uko Yehova atwihanganira mu gihe twihatira n’ubwira gutsinda ubugoyagoye bwacu maze tukagira amahinduka akenewe. (Flp. 2:12; 2 Pet. 3:9) Ikintu gihambaye codufasha, ni ukuraba neza ukuntu dukoresha umwanya be n’ivyo dutunze, tukirinda gukurikirana imigambi y’ubwikunzi. Mushiki wacu umwe yandika ati: “Narerewe mu kuri, yamara nakuze mbona Yehova mu buryo butandukanye n’uko benshi bamubona. Nabona ko ategerezwa gutinywa cane, kandi niyumvira ko ntokwigeze vy’ukuri nshobora kumuhimbara.” Uwo mushiki wacu yahavuye amera nk’agati kari mu ruzi mu buryo bw’impwemu kubera intambamyi zitari nke yari afise. Abandanya ati: “Ntivyatumwe n’uko ntakunda Yehova, ahubwo vyatumwe n’uko ntari ndamuzi vy’ukuri. Ariko rero, maze gutura amasengesho menshi, naratanguye guhindukira.” Yongeyeko ati: “Narabonye ko Yehova yanyoboye nk’umwana, aramfasha gutsinda intambamyi imwimwe, aranyereka abigiranye ukwengenga ico nari nkeneye gukora.”

15. Ni ibiki Yezu na Se babona?

¹⁵ “Mugume mubwira abantu” inkuru nziza. Umumarayika w’Imana yabwiye Petero n’izindi ntumwa ayo majambo aho bamariye gukurwa mw’ibohero ku gitangaro. (Ivyak. 5:19-21) Egome, kugira uruhara mu busuku bwo mu ndimiro buri ndwi ni ikindi kintu kiri ku rutonde rwacu rw’ivyo tubwirizwa gusuzuma. Yezu na Se barabona ukwizera kwacu n’ubusuku bwacu. (Ivyah. 2:19) Nk’uko wa mukurambere twavuga avyerekana, “ubusuku bwo mu ndimiro burahambaye cane kuri twebwe.”

16. Ni kubera iki ari vyiza ko tuzirikana ku kwiyegurira Yehova kwacu?

¹⁶ Nuzirikane ku kwiyegura kwawe. Ikintu c’agaciro kuruta ibindi vyose dutunze ni ubucuti dufitaniye na Yehova. Arazi abiwe. (Soma Yesaya 44:5.) Nusuzume ubijanisha n’isengesho ukuntu ubucuti ufitaniye na we bumeze. Ku bijanye n’ico kintu, uribuka ya tariki ihambaye wabatirijweko. Ico na co nyene kizogufasha kwibuka yuko ibatisimu yawe igereranya ingingo ihambaye kuruta izindi zose umaze gufata.

NUGUME WIYEGEREJE YEHOVA MU KWIHANGANA

17. Ni kubera iki dukeneye kwihangana kugira ngo tugume twiyegereje Yehova?

¹⁷ Igihe Paulo yandikira Abagalatiya, yarashimitse ku vy’uko bari bakeneye kwihangana. (Gal. 6:9) Ivyo birahambaye no ku mukirisu muri iki gihe. Uzoshikirwa n’ibigeragezo, mugabo Yehova azogufasha. Nugume umusaba impwemu nyeranda. Uzokwumva uruhuriwe niyagukurako intuntu akaguha umunezero, akagukurako umubabaro akaguha amahoro. (Mat. 7:7-11) Iyumvire iki kintu: Nimba Yehova yitwararika inyoni, ntarushiriza none kukwitwararika wewe umukunda kandi wamwihebeye? (Mat. 10:29-31) Naho woshikirwa n’imikazo imeze gute, ntiwigere usubira inyuma; ntiwigere utana n’akabando. Mbega itunga ryiza igitangaza twifitiye kubera ko tuzwi na Yehova!

18. Ko ‘wamenye Imana,’ wipfuza gukora iki ubu?

¹⁸ Nimba rero uheruka kumenya Imana kandi ukabatizwa, hasigaye iki? Nubandanye kurushiriza kumenya Yehova, ube umuntu ahumuye mu vy’impwemu. Vyongeye, nimba umaze imyaka myinshi ubatijwe, hasigaye iki? Na wewe nyene utegerezwa kubandanya kurushiriza kumenya Yehova. Ese tutokwigera twijajara mu bijanye n’ubucuti dufitaniye na we! Ahubwo nyabuna, twese dukwiye kuza turasuzuma urutonde rwacu rwo mu buryo bw’impwemu kugira ngo twiyemeze neza ko turiko turabandanya gukomeza ubucuti dufitaniye na Dawe wa twese munyarukundo, akaba n’Umugenzi wacu be n’Imana yacu, ari we Yehova.—Soma 2 Abakorinto 13:5, 6.