“Amafeza n’ayanje, n’amazahabu nyene n’ayanje”

MU KINJANA ca gatandatu B.G.C., Umwami Kuro w’Ubuperesi yarakuye abasavyi b’Imana mu bunyagano barimwo i Babiloni. Ibihumbi n’ibihumbi muri bo baragarutse i Yeruzalemu kugira ngo basubire kwubaka urusengero rwa Yehova rwari umusaka. Ivyabo ntivyari vyifashe neza mu vy’ubutunzi, kandi ababanyi babo buzuye urwanko bararwanije ico gikorwa co gusubira kwubaka urwo rusengero. Ku bw’ivyo, bamwe muri abo bubatsi baribaza niba botevye bakarangiza ico gikorwa cari gihambaye cane.

Yehova yarasubirije umutima mu nda abo bubatsi abicishije ku muhanuzi wiwe Hagayi, arabereka yuko yari kumwe na bo. Yehova Imana yavuze ati: “Nzohindisha amahanga yose agashitsi, kand’ivy’igiciro vyo mu mahanga yose bizoza, nanje nzokwuzuza iyi ngoro ubgiza”. Ku bijanye n’ingorane zo mu vy’ubutunzi abo bubatsi bari bafise, Hagayi yatanze ubu butumwa bugira buti: “Amafeza n’ayanje, n’amazahabu nyene n’ayanje, ni k’Uhoraho Nyen’ingabo agize” (Hagayi 2:7-9). Haciye imyaka itanu Hagayi avuze ayo majambo aremesha, ico gikorwa barakirangije.​—Ezira 6:13-15.

Ayo majambo ya Hagayi yaravyuriye kandi ingiro abasavyi b’Imana bo mu bihe vya vuba cane igihe bariko barangura ibikorwa vyinshi cane vyerekeye ugusenga Yehova. Igihe mu 1879 umugwi wa wa mushumba w’umwizigirwa kandi w’ubwenge watangura gusohora iki kinyamakuru, ico gihe kikaba citwa Umunara w’Inderetsi w’i Siyoni n’integuza y’ukuhaba kwa Kristu (mu congereza), carimwo aya majambo agira ati: “‘Umunara w’Inderetsi w’i Siyoni’, nk’uko tubizi, YEHOVA ni we awufashe mu mugongo, kandi bikimeze gutyo ntuzokwigera usegerereza canke ngo wambambire abantu kugira bawufashe. Igihe Umwe avuga ati: ‘Amazahabu n’amafeza yose yo ku misozi ni ayanje’ azoba atakituronsa amahera akenewe, tuzoca tubona yuko hageze ko duhagarika gusohora ico kinyamakuru”.

Ico kinyamakuru nticigeze kireka gusohorwa. Ku bijanye n’iyo nomero ya mbere, hacapuwe amakopi 6.000 mu congereza gusa. Muri iki gihe, kuri buri nomero yose isohotse, hacapurwa incahagati y’amakopi 28.578.000 mu ndimi 161a. Ku bijanye n’ikinyamakuru Réveillez-vous! kigenzi c’Umunara w’Inderetsi na co, hacapurwa incahagati y’amakopi 34.267.000 mu ndimi 81.

Ivyabona vya Yehova baratanguye kurangura ibikorwa vyinshi bifise intumbero nk’iyo ikinyamakuru Umunara w’Inderetsi gifise, iyo na yo ikaba ari iyo gushira hejuru Yehova Umukama Segaba w’ibiriho vyose no gutangaza inkuru nziza yerekeye Ubwami bwiwe (Matayo 24:14; Ivyahishuwe 4:11). Ivyabona bo muri iki gihe bafise ukujijuka nka kumwe nyene kwaserurwa muri iki kinyamakuru mu 1879. Baremera ko Imana ari yo ifashe mu mugongo igikorwa barangura, bakanemera ko amahera yo gushigikira ibikorwa ishima azoguma aboneka. Ariko none, neza na neza amahera Ivyabona vya Yehova bakoresha ava hehe? Kandi, ni ibikorwa bwoko ki bariko bararangura kugira ngo bamamaze inkuru nziza kw’isi yose?

Amahera bakoresha ava hehe?

Kubera ko Ivyabona vya Yehova bamamaza ku mugaragaro, baramenyereye kwumva abantu babaza ngo “Burya mwebwe ntimuhembwa?”. Inyishu ni oya, ntibahembwa. Bakoresha umwanya wabo ku buntu. Abo bamamazanjili baramara amasaha menshi bariko babwira abandi ivyerekeye Yehova be n’imihango dusanga muri Bibiliya ijanye na kazoza keza, ivyo bakabigira babitumwe n’ugukenguruka. Barakengurukira Imana kubera ivyo yabagiriye be n’uko ubutumwa bwerekeye inkuru nziza bwagize ikintu kinini buryohoye ku buzima bwabo no ku kuntu bahoze babona ibintu. Ku bw’ivyo, baripfuza kubwira abandi ivyo bintu vyiza. Mu kubigenza gutyo, baba bashize mu ngiro ingingo ngenderwako Yezu yavuze igira iti: “Mwahawe ku buntu, mutange ku buntu” (Matayo 10:8). Mu vy’ukuri, icipfuzo bafise co gushingira intahe Yehova na Yezu kirabavyurira umutima wo gutanga amahera yabo bwite kugira ngo babwire abantu ivyo bemera, mbere n’ababa mu turere twa kure cane.​—Yesaya 43:10; Ibikorwa 1:8.

Uravye urugero ico gikorwa co kwamamaza kigezeko ubu be n’ivyo bakoresha kugira ngo bakirangure, ni ukuvuga amacapuriro, inyubakwa z’ibiro, Ingoro z’amateraniro, inzu abamisiyonari babamwo, n’ibindi, usanga bitwara amahera menshi cane. None ayo mahera ava hehe? Amahera akoreshwa mu kurangura ivyo bikorwa vyose ava mu ntererano zitangwa n’abavyishakiye. Ivyabona vya Yehova ntibatoza mu bagize ishengero amahera yo gushigikira mu bijanye n’imirimo ishirahamwe rirangura, canke ngo barihishe abo bashikiriza ibitabu. Uwo ari we wese ashimye gutanga intererano kugira ngo ashigikire igikorwa co kwigisha Ivyabona barangura, barahimbarwa no kuyakira. Reka turimbure ico bisaba ku bijanye n’umuce umwe gusa w’utwigoro tugirwa kugira ngo inkuru nziza yamamazwe kw’isi yose, uwo na wo ukaba ari ubuhinduzi.

Ibitabu birahindurwa mu ndimi 437

Ibitabu bisohorwa n’Ivyabona vya Yehova biramaze imyaka mirongo biri mu bitabu bihindurwa mu ndimi nyinshi kuruta ibindi kw’isi. Udupapuro tw’inkuru nziza, udutabu, ibinyamakuru be n’ibitabu ubu bihindurwa mu ndimi 437. Emwe, cokimwe n’ibindi bikorwa bijanye n’ukwamamaza inkuru nziza, ubuhinduzi na bwo nyene busaba uburyo bwinshi. Uti none igikorwa c’ubuhinduzi gikorwa gute?

Igihe abajejwe gutegura ibitabu vy’Ivyabona vya Yehova bahejeje gutunganya igisomwa mu congereza, imigwi y’abahinduzi bamenyerejwe muri ico gikorwa yo hirya no hino kw’isi iraronswa ico gisomwa biciye kuri bwa buhinga bwa elegitoronike. Umugwi umwumwe wose w’ubuhinduzi ni wo ujejwe guhindura ibitabu muri rumwe mu ndimi bisohorwamwo. Bivanye n’igitigiri c’ivyo iyo migwi iba iriko irahindura be n’ukuntu ururimi babihinduramwo ruba rugoye, usanga umwumwe wose muri iyo ushobora kuba ugizwe n’abantu bava nko kuri 5 bagashika kuri 25.

Igisomwa kiba cahinduwe kirakosorwa kikongera kigasuzumwa ko capanzwe neza. Abahinduzi baba bafise intumbero yo gushikiriza ivyiyumviro vyo mu gisomwa co mu congereza mu buryo butagiramwo amakosa kandi butomoye uko bishoboka kwose. Abakora ico gikorwa usanga bahura n’ingorane zitandukanye. Igihe abahinduzi be n’abasuzuma ko igisomwa capanzwe neza baba bariko bahindura igisomwa gikoresha amajambo agoye, biraba ngombwa ko bagira ubushakashatsi bwimbitse mu congereza (canke mu zindi ndimi basanzwe bikorako nk’igifaransa, igisupanyoli canke ikirusiya) no mu rurimi bagihinduramwo, kugira ngo biyemeze neza ko ivyo bahindura ata makosa aza kuba arimwo. Nk’igihe ikiganiro co mu kinyamakuru Réveillez-vous! coba gica irya n’ino ivy’ubuhinga canke ivya kahise, harakenerwa ko hagirwa ubushakashatsi bugera kure.

Abahinduzi benshi usanga bakorera ku biro vy’amashami y’Ivyabona vya Yehova, baba ari abakora igihe cose canke abakora igihe gito. Hari n’abandi usanga bakorera mu turere tuvugwamwo nya rurimi bahinduramwo. Abahinduzi ntibahembwa. Abakora igihe cose bararonswa gusa uburaro n’ibifungurwa be n’insubizanyo ibayabaye y’amahera baba bakoresheje mu kwironsa ibindi bintu vya nkenerwa. Hirya no hino kw’isi, hari Ivyabona bashika 2.800 bakora ari abahinduzi. Gushika ubu, ibiro vy’amashami 98 y’Ivyabona vya Yehova ni vyo bifise imigwi y’abahinduzi canke bihagarikiye imigwi yo mu tundi turere. Dufate akarorero kamwe gusa: Ibiro vy’ishami ryo mu Burusiya bihagarikiye abahinduzi bakora igihe cose be n’abakora igihe gito barenga 230 bahindura ibitabu vyacu mu ndimi zirenga 30, muri izo hakaba harimwo n’izo usanga zitazwi cane mu turere twa kure, nk’igicuvashi, ikinyawoseti be n’urwitwa Uighur.

Uburyo bwo kuryohora ubuhinduzi

Nk’uko uwo ari we wese yigeze kugerageza kwiga urundi rurimi abizi, si aho gutuma umwana guhindura mu buryo butagiramwo amakosa ivyiyumviro bigoye. Intumbero abahinduzi baba bafise ni iyo gufata ibintu vyabaye koko be n’ivyiyumviro bivugwa mu gisomwa co mu congereza bakabishira mu rurimi bahinduramwo, muri ico gihe nyene bagatuma ivyo bahinduye vyoroha gusoma, bikaba ari nk’aho vyateguwe muri urwo rurimi nyene babihinduyemwo. Bisaba ubuhanga kugira ngo bashike kuri iyo ntumbero. Usanga bisaba imyaka n’iyindi kugira abahinduzi bashasha bamenyere ico gikorwa, kandi Ivyabona vya Yehova barabaronsa porogarama ibandanya igenewe kubigisha. Rimwe na rimwe abigisha baragendera iyo migwi kugira ngo bayisahirize mu bijanye n’ukuryohora ubuhanga bwayo bwo guhindura no mu bijanye n’ugukoresha amaporogarama yo muri orodinateri.

Ukwo kumenyerezwa kuriko kuravamwo ivyiza utoraba. Nk’akarorero, ishami ry’Ivyabona vya Yehova ryo muri Nikaragwa rivuga riti: “Bwari bwo bwa mbere abahinduzi bacu b’ikimisikito bamenyerezwa mu bijanye n’uburyo be n’ubuhinga bwo guhindura babifashijwemwo n’umwigisha wo kw’ishami ryo muri Megizike. Ivyo vyatumye haba itandukaniro rikomeye mu kuntu abahinduzi bacu basigaye barangura ibikorwa bajejwe. Ubuhinduzi bwararyohowe bimwe biboneka”.

Amajambo akora ku mutima

Utwigoro tugirwa kugira ngo hasohorwe Bibiliya be n’ibisohokayandikiro bishingiye kuri yo mu rurimi abantu bonse, tuba dufise intumbero yo kubakora ku mutima, kandi ivyo ni vyo neza na neza biriko biraba. Mu 2006, Ivyabona vya Yehova bo mu gihugu ca Biligariya baranezerejwe cane n’isohorwa rya Bibiliya y’Impinduro y’isi nshasha y’Ivyanditswe vy’ikigiriki mu kinyabiligariya. Ishami ryo muri ico gihugu riravuga yuko ryaronse ubutumwa bwinshi buserura ugukenguruka ku bw’iyo Bibiliya. Abagize ishengero rimwe bavuga ko “ubu Bibiliya idakora ku mizirikanyi yabo gusa, ariko yuko ibakora ku mutima koko”. Umutama umwe wo mu gisagara citwa Sofia yavuze ati: “Nari maze imyaka myinshi nsoma Bibiliya, yamara sinaribwigere nsoma impinduro yoroshe gutahura kandi inyengetera mu mutima ukuraho”. No mu gihugu ca Alubaniya, inyuma y’aho icabonakazi waho aronkeye Bibiliya yose yuzuye y’Impinduro y’isi nshasha mu kinyalubaniya, yavuze ati: “Ese ukuntu Ijambo ry’Imana rinyura amatwi mu kinyalubaniya! Mbega agateka twatewe kubona Yehova atuyagisha mu rurimi rwacu kavukire!”.

Guhindura Bibiliya yose uko ingana mu rundi rurimi bishobora gusaba umugwi w’ubuhinduzi imyaka itari mike. Mugabo, igihe ivyo bitumye abantu amamiliyoni bashobora mu vy’ukuri gutahura Ijambo ry’Imana bakirisoma, ntiwovuga none ko utwigoro twose tuba twagizwe ari utw’ingirakamaro?

“Turi abakozi bakorana n’Imana”

Mu vy’ukuri, ubuhinduzi ni kimwe gusa mu bikorwa vyinshi bikenewe kurangurwa kugira ngo ubutumwa bwiza bwamamazwe mu buryo ngirakamaro. Igikorwa co kwandika ibitabu bivuga ivyerekeye Bibiliya, kubicapura no kubirungika hamwe n’ibindi bikorwa vyinshi bijanye n’ivyo birangurirwa ku mashami, mu mizunguruko no mu mashengero y’Ivyabona vya Yehova, usanga bisaba inguvu nyinshi be n’uburyo bwinshi. Yamara, abasavyi b’Imana “b[ar]itanga babikunze” kugira ngo barangure ico gikorwa (Zaburi 110:3). Babona ko kuba bashoboye kugira ico ubwabo baterereye ari agateka batewe be n’uko ari icubahiro bahawe kuko Yehova abona ko ari ‘abakozi bakorana na we’.​—1 Abakorinto 3:5-9.

Ni ivy’ukuri yuko ukuba igikorwa c’Umwe avuga ngo “amafeza n’ayanje, n’amazahabu nyene n’ayanje” kirangurwa, atabikesha amahera yo kugishigikira dutanga. Yamara, Yehova yarateye iteka abasavyi biwe ryo kugira uruhara mu bijanye n’ukweza izina ryiwe biciye ku mahera baterera bashigikira igikorwa co kwamamaza ukuri kurokora ubuzima “ku mahanga yose” (Matayo 24:14; 28:19, 20). Ivyo none ntibikuvyuriye umutima wo gukora uko ushoboye kwose kugira ngo ushigikire ico gikorwa kitazokwigera gisubira gukorwa?

[Utujambo tw’epfo]

[Picture/Uruzitiro ku rup. 18]

“BIRADUFASHA KUZIRIKANA ATA GUFYINA”

Akigeme kamwe k’imyaka 14 karandikiye ibiro vy’ishami vy’Ivyabona vya Yehova vyo muri Kameruni gati: “Igihe nari mpejeje kugura ibikoresho vy’ishure nzokoresha umwaka wose, narashoboye kugurisha ibitabo nakoresheje mu myaka ibiri iheze, maze ndonka amafaranga 2.500 [nk’amarundi 5.000]. Ndaterereye ayo mahera be n’aya yandi 910 [nk’amarundi 1.820] nari naraziganije. Nipfuza kubaremesha kubandanya ico gikorwa ciza muriko murangura. Ndabashimiye cane ku bw’ibinyamakuru Umunara w’Inderetsi na Réveillez-vous!. Biradufasha kuzirikana ata gufyina”.

[Uruzitiro ku rup. 18]

INTERERANO IDASANZWE

Ishami ry’Ivyabona vya Yehova ryo muri Megizike ryararonse iri kete ryanditswe n’umwana akenguruka w’imyaka itandatu yitwa Manuel aba muri Leta ya Chiapas. Kubera ko ataramenya kwandika, yasavye umugenzi aba ari we amwandikira. Manuel avuga ati: “Nyokuru yarangabiye ingurube ivyara. Igihe iyo ngurube yavyara, naciye ncaguramwo ikibuguru ciza kuruta ibindi maze ndacorora mfashijwe n’abavukanyi bo mw’ishengero. Ndarungitse n’urukundo rwinshi intererano y’amahera nagurishije iyo ngurube. Nayigurishije ifise ibiro 100, maze ndonka amapeso 1.250 [nk’amarundi 110. 000]. Ndabingize ayo mahera muyakoreshe ku bwa Yehova”.

[Uruzitiro ku rup. 19]

‘NIMUKORESHE AYA MAHERA MU GUHINDURA BIBILIYA’

Ku mahwaniro y’intara Ivyabona vya Yehova bo muri Ukraine bagize mu 2005, harasohowe Impinduro y’isi nshasha y’Ivyanditswe vy’ikigiriki mu kinya Ukraine. Bukeye bwaho, mu gasandugu kamwe k’intererano zigenewe ihwaniro basanzemwo ubutumwa bugira buti: “Mfise imyaka icenda. Ndashimye cane ku bw’ibi Vyanditswe vy’ikigiriki. Twe na musanzanje mutoyi mawe yaraduha amahera kugira ngo dufate ibisi yatujana kw’ishure. Mugabo igihe imvura itaba iriko iragwa, twaca tugenda n’amaguru gutyo tukaba twarabitse amagirivina 50 [nk’amarundi 10.000]. Twe na musazanje twipfuza ko mukoresha aya mahera mu guhindura Bibiliya yose uko ingana mu kinya Ukraine”.

[Uruzitiro ku rup. 20, 21]

UBURYO BUTANDUKANYE BAMWEBAMWE BAHITAMWO GUTANGA

INTERERANO KU BW’IGIKORWA KIRANGURIRWA KW’ISI YOSE

Abenshi barashira ku ruhande amahera, canke bakabika igitigiri kinaka c’amahera bazoshira mu dusandugu tw’intererano twanditseko ngo “Intererano ku bw’igikorwa kirangurirwa kw’isi yose.​—Matayo 24:14”.

Ku kwezi ku kwezi, amashengero ararungika ayo mahera ku biro vy’Ivyabona vya Yehova bihagarikiye ibihugu akukira. Izo ntererano z’amahera zitangwa n’abavyishakiye, zoshobora no kurungikwa ata handi ziriwe ziraca kuri aderese ikurikira: Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201- 2483, canke na ho zikarungikwa ku biro vy’ishami vy’Ivyabona vya Yehova bihagarikiye igihugu ubamwo. Amasheki arungikwa kuri iyo aderese akwiye kuba yanditsweko yuko amahera yohabwa “Watch Tower”. Ibintu vyo mu mabuye y’agaciro canke ibindi bintu vy’agaciro na vyo nyene vyoshobora gutangwa. Ivyo bintu vyoba bitanzweko intererano bikwiye guherekezwa n’ikete rigufi rivuga yuko ari ingabirano.

INDINGANIZO Y’IVYO GUTANGA AMAHERA YOSHOBORA GUSUBIZWA

Amahera yoshobora kurungikirwa ishirahamwe Watch Tower kugira riyakoreshe mu gikorwa kirangurirwa kw’isi yose. Ariko rero, ayo mahera yoshobora gusubizwa mu gihe nyene kuyatanga abisavye. Ushaka kumenya vyinshi kuri ico kibazo, turakwinginze ubaze Ibiro vy’Umushingwabigega ukoresheje aderese yamaze gutangwa.

KURINGANIZA IVYO GUTANGA UMUNTU AVYISHAKIYE

Uretse ingabirano z’amahera, hariho ubundi buryo bwo gutanga intererano zo guteza imbere umurimo w’Ubwami urangurirwa kw’isi yose. Muri ubwo buryo harimwo ubu bukurikira:

Soransi: Izina Watch Tower ryoshobora gutangwa ngo iryo shirahamwe ribe ari ryo ryakira amahera ya soransi y’ubuzima bw’umuntu canke imbitso y’amahera umuntu azokwikorako mu gihe akukurutse canke ahawe pansiyo.

Amakonte yo muri banki: Amakonte yo muri banki, impapuro zemeza amahera yabikishijwe muri banki, canke amakonte y’umuntu yakukurutse, birashobora kubikishirizwa ishirahamwe Watch Tower canke bigashingwa yuko bizohabwa iryo shirahamwe nyene vyo niyapfa, hisunzwe ibisabwa n’ibanki y’aho umuntu aba.

Umutahe umuntu afise ahantu be n’ivyete bitanga uburenganzira bwo kwakira amahera aho ayafise: Ivyo na vyo nyene vyoshobora guhabwa ishirahamwe Watch Tower bwa ngabirano.

Itongo canke inzu: Itongo canke inzu, kibure vyompi uko ari bibiri, mu gihe ari ibishobora kugurishwa, birashobora gutangwa bwa ntererano mu kubigaba. Mu gihe ari aho umuntu aba, nyene kubitanga arashobora gusigirwa aho aba arabaye, agashobora kubandanya kuhaba igihe cose asigaje kubaho. Imbere yo kugira amasezerano yo gushikiriza ico ari co cose muri ivyo, urabanza ubivugane n’ibiro vy’ishami vyo mu gihugu ubamwo.

Ukuza uraronka amahera ku yo uba waratanzeko ingabirano: Muri iyo ndinganizo, umuntu araha urwego kanaka rukoreshwa n’Ivyabona vya Yehova amahera canke inzandiko zemeza ko ayafise ahantu. Nyene gutanga na we, canke umuntu yagenywe na we, araronka amahera kanaka ku mwaka ku mwaka amufasha kubaho. Ku mwaka biba vyemejwe ko nyene gutanga ayo mahera agengwa n’iyo ndinganizo, aragabanirizwa ikori yahora ayatangako.

Ivyete vy’iragi be n’imbitso: Itongo canke amahera birashobora kuragwa ishirahamwe Watch Tower biciye ku cete c’iragi canditswe mu buryo bwemewe n’amategeko, canke bigashobora kwitwa ko ishirahamwe Watch Tower ari ryo rigabiwe icete cemeza imbitso umuntu afise ahantu. Imbitso iteza imbere ishirahamwe ry’ivy’idini irashobora gutuma umuntu akurwako amakori amwamwe.

Imvugo ngo “kuringaniza ivyo gutanga umuntu avyishakiye” yerekana ko nyene gutanga abanza kubitegekanya. Mu ntumbero yo gusahiriza abantu bipfuza guteza imbere igikorwa Ivyabona vya Yehova barangurira kw’isi yose biciye ku buryo bunaka bwo gutanga intererano, harateguwe agatabu mu congereza be no mu gisupanyoli kerekeye ugutanga kwo gushigikira umurimo w’Ubwami urangurirwa kw’isi yose (Charitable Planning to Benefit Kingdom Service Worldwide). Ako gatabu kateguwe kugira gatange amakuru ajanye n’uburyo butandukanye ingabirano zishobora gutangwa haba ubu canke biciye ku kubiraga ishirahamwe. Abantu benshi, bamaze gusoma ako gatabu no kubiganira n’abahanuzwajambo babo mu vy’amategeko canke mu vy’amakori, barashoboye gushigikira ibikorwa Ivyabona vya Yehova barangurira kw’isi yose bijanye n’ivy’idini be n’ivy’ugufasha abari mu ngorane, muri ico gihe nyene bararushiriza kuhungukira rwose mu bijanye no kuriha amakori. Ako gatabu umuntu arashobora kukaronka mu kugasaba ku biro biraba ivy’ukuringaniza ivyo gutanga umuntu avyishakiye.

Nimba ushaka kumenya ayandi makuru kuri ivyo, wobiganira n’ibiro vy’ishami vy’Ivyabona vya Yehova, mu kwandika ikete ukoresheje iyo aderese ishizwe aho hepfo canke mu guterefona kuri ivyo biro ukoresheje izo nomero zerekanywe aho hepfo.

Ivyabona vya Yehova

B.P. 2150 Bujumbura

Telefone: (257) 22241110

[Ifoto ku rup. 19]

Abahinduzi b’ikinyamisikito, kw’ishami rya Nikaragwa