Woba ubona ibintu vyeranda nk’uko Yehova abibona?

“Muraba neza ngo . . . ntihabeho umusambanyi, canke umuntu adaha agaciro ibintu vyeranda”.​—ABAHEBURAYO 12:15, 16, NW.

1. Ni agatima akahe abantu bo muri iki gihe bafise, gatandukanye n’ako abasavyi ba Yehova bafise?

ABANTU muri rusangi bagenda barushiriza kutitwararika ibintu vyeranda. Umuhinga mu vy’imibano w’Umufaransa yitwa Edgar Morin yavuze ati: “Ibintu vyose imico runtu ishingiyeko, ni ukuvuga Imana, ibiriho, igihugu kavukire, kahise, ubwenge, ntibikibonwa ko ari ibintu ntayegayezwa. . . . Abantu ni bo basigaye bihitiramwo imico bagendera”. Ivyo biragaragaza “impwemu y’iyi si”, ari yo “mpwemu ikorera mu bantu b’intabarirwa” (1 Ab’i Korinto 2:12; Abanyefeso 2:2). Abiyeguriye Yehova kandi bayobokera n’umutima ukunze ukugaba n’ukuganza afitiye uburenganzira, ntibafise ako gatima ko gusuzugura ibintu vyeranda (Abaroma 12:1, 2). Ahubwo riho, abasavyi b’Imana baratahura yuko ubweranda bufise ikibanza gihambaye cane mu vyo gusenga Yehova. Ni ibintu ibihe mu buzima bwacu dukwiye kubona ko ari vyeranda? Iki kiganiro kiraza kurimbura ibintu bitanu abasavyi b’Imana bose babona ko ari vyeranda. Ikiganiro gikurikira na co cibanda ku kuntu amakoraniro yacu ya gikirisu ari meranda. Ariko none ijambo “ceranda” canke “mweranda” mu vy’ukuri risobanura iki?

2, 3. (a) Ivyanditswe bishimika gute ku bweranda bwa Yehova? (b) Twerekana gute ko izina rya Yehova tubona yuko ari ryeranda?

² Mu giheburayo Bibiliya yanditswemwo, ijambo “ceranda” canke “mweranda” ritanga iciyumviro c’ukuba ikintu carashizwe ku ruhande. Mu bijanye n’ugusenga, iryo jambo ryerekeza ku kintu cashizwe ku ruhande ngo ntigikoreshwe ibintu bisanzwe. Yehova ni mweranda bimwe bitagira agahaze. Yitwa “Umweranda Ruheta” (Imigani 9:10; 30:3, NW). Muri Isirayeli ya kera, umuherezi mukuru yarambara ku gitambara yazingira ku mutwe akantu kabase k’izahabu kanditsweko ngo “Ubweranda ni ubwa Yehova” (Kuvayo 28:36, 37, NW). Ivyanditswe bivuga yuko mw’ijuru abakerubi n’abaserafi bakikuje intebe ya Yehova batangaza bati: “Uwera, Uwera, Uwera ni we Uhoraho” (Yesaya 6:2, 3; Ivyahishuriwe 4:6-8). Kuba basubiramwo ngo “Uwera”, ni ukuvuga mweranda, birashimika ku vy’uko Yehova ari mweranda, atanduye kandi atyoroye ku rugero rw’agaheta. Ku bw’ivyo, ni we Sôko ry’ubweranda bwose.

³ Izina rya Yehova ni ryeranda. Umwanditsi wa Zaburi yavuganye inyiyumvo ati: “Ni batazire izina ryiwe rihambaye riteye ubgoba: ni [“ryeranda”, NW]” (Zaburi 99:3). Yezu yatwigishije gusenga ngo “Data wa twese wo mw ijuru, izina ryawe [“niryezwe”, NW]” (Matayo 6:9). Nyina wo kw’isi wa Yezu, ari we Mariya, yatangaje ati: “Ubugingo bganje butazira Umwami Imana . . . Iy’ubushobozi inkoreye ibikomeye, kand’izina ryayo n’iryera” (Luka 1:46, 49). Twebwe abasavyi ba Yehova, tubona ko izina ryiwe ari ryeranda akaba ari co gituma twirinda gukora ikintu ico ari co cose coshobora kurisiga iceyi. Vyongeye, tubona ubweranda nk’uko Yehova abubona, ivyo bikaba bisobanura yuko ibintu abona ko ari vyeranda na twebwe tubona ko ari vyeranda.​—Amosi 5:14, 15.

Igituma twubaha Yezu bimwe bigera kure

4. Ni kubera iki Bibiliya ivuga yuko Yezu ari “Uwera”?

⁴ Yezu, we “Mwana w’ikinege” w’Imana nyeranda Yehova, yaremwe ari mweranda (Yohana 1:14; Ab’i Kolosayi 1:15; Abaheburayo 1:1-3). Ni co gituma yitwa “Uwera w’Imana” (Yohana 6:69). Igihe ubuzima bwiwe bwimurwa akava mw’ijuru akaza ngaha kw’isi, yagumye ari mweranda kubera yuko ivuka ryiwe avyawe na Mariya ryabaye biciye ku bubasha bw’impwemu yera. Umumarayika yari yarabwiye Mariya ati: ‘Impwemu yera izokuzako, [“uwo uzovyara azoba mweranda”, UB], Umwana w’Imana’ (Luka 1:35). Mw’isengesho abakirisu b’i Yeruzalemu batuye Yehova, barerekeje ku Mwana w’Imana incuro zibiri mu kuvuga ngo “Umushumba wawe yera Yesu”.​—Ivyakozwe n’intumwa 4:27, 30.

5. Ni igikorwa ceranda ikihe Yezu yaranguye ngaha kw’isi, kandi ni kubera iki amaraso yiwe ari ay’igiciro kinini?

⁵ Yezu yari afise igikorwa ceranda yaje kurangura ngaha kw’isi. Igihe yabatizwa mu 29 G.C., yarasizwe aca aba Umuherezi Mukuru wo muri rwa rusengero ruhambaye rwa Yehova rwo mu buryo bw’impwemu (Luka 3:21, 22; Abaheburayo 7:26; 8:1, 2). N’ikindi kandi, yabwirizwa gupfa urupfu rwo kwitangako inkuka. Amaraso yiwe yosheshwe yobaye incungu yotumye abantu b’abanyavyaha bashobora gukira (Matayo 20:28; Abaheburayo 9:14). Rero, amaraso ya Yezu tubona ko ari ikintu ceranda, ikintu c’“igiciro kinini”.​—1 Petero 1:19.

6. Kirisitu Yezu tumubona gute, kandi kubera iki?

⁶ Intumwa Paulo yarerekanye ko twubaha bimwe bigera kure Umwami wacu akaba n’Umuherezi Mukuru, Kirisitu Yezu, igihe yandika ati: “Imana [yashize Umwana wayo] hejuru cane, [imuha] rya zina rirengeye ayandi mazina yose: kugira ngw amavi yose az’apfukame mw izina rya Yesu, ay’ivyo mw ijuru n’ay’ivyo kw isi n’ay’ivy’i kuzimu, kand’indimi zose zize zature yuko Yesu Kristo ar’[“Umukama”, UB], ngo biheshe Imana Data wa twese icubahiro” (Ab’ i Filipi 2:9-11). Turerekana ko tubona ibintu vyeranda nk’uko Yehova abibona mu kuyobokera tubigiranye umunezero Indongozi yacu akaba n’Umwami aganza, Kirisitu Yezu, we Mutwe w’ishengero rya gikirisu.​—Matayo 23:10; Ab’i Kolosayi 1:18.

7. Twerekana gute ko tuyobokera Kirisitu?

⁷ Kuyobokera Kirisitu birimwo no kwerekana ko duha icubahiro gikwiriye abagabo akoresha kugira ngo baje imbere muri ca gikorwa ariko arayobora muri iki gihe. Uruhara abasizwe bagize Inama Nyobozi barangura be n’urwo abacungezi bagenywe n’abo basizwe barangurira mu mashami, mu ntara, mu mizunguruko be no mu mashengero, dukwiye kubona ko ari ibanga ryeranda bajejwe. Rero, turakwiye kwubaha bimwe bigera kure iyo ndinganizo kandi tukayiyoboka.​—Abaheburayo 13:7, 17.

Igisata ceranda

8, 9. (a) Ni mu buryo ki Abisirayeli bari igisata ceranda? (b) Yehova yafashije gute Abisirayeli gutahura ico ari co ubweranda?

⁸ Yehova yaragiraniye isezerano n’ihanga rya Isirayeli. Ubwo bucuti bwatumye iryo hanga rishasha riba iridasanzwe. Abisirayeli barejejwe, ni ukuvuga barashizwe ku ruhande. Yehova ubwiwe yababwiye ati: “Muze mumbere abera, kuko jewe Uhoraho nd’uwera, kandi nabatandukanije n’ayandi mahanga ngo mube abanje”.​—Abalewi 19:2; 20:26.

⁹ Kuva iryo hanga ry’Abisirayeli rikivuka, Yehova yarabafashije gutahura ubweranda ico ari co. Bategerezwa mbere kudakora kuri wa Musozi Sinayi Imana yabahereyeko ya Mabwirizwa Cumi, ahandi ho bociye bapfa. Ico gihe rero, uwo musozi wabonwa ko ari mweranda mu buryo bunaka (Kuvayo 19:12, 23). Ubuherezi, ihema be n’ivyari birigize, na vyo nyene vyategerezwa kubonwa ko ari vyeranda (Kuvayo 30:26-30). Tuvuge iki none ku bijanye n’ishengero rya gikirisu?

10, 11. Ni kubera ki dushobora kuvuga yuko ishengero ry’abakirisu basizwe ari ryeranda, kandi ivyo bigira ico bikoze gute ku bagize “izindi ntama”?

¹⁰ Yehova abona ko ishengero ry’abakirisu basizwe ari ryeranda (1 Ab’i Korinto 1:2). Nkako, abakirisu basizwe, mu gihe ico ari co cose bakiri kw’isi, bose uko bagize umugwi, bagereranywa n’urusengero rweranda, ariko ivyo bikaba bidasobanura yuko bagize rwa rusengero ruhambaye rwa Yehova rwo mu buryo bw’impwemu. Yehova aba muri urwo rusengero rweranda biciye ku mpwemu yiwe yera. Intumwa Paulo yanditse ati: “Muri we [ni ukuvuga, Kirisitu Yezu] ingoro yose, yubatswe neza, irakura, ngw ibe urusengero rwera [“rwa Yehova”, NW]. Muri we namwe murubakanwa, kugira ngo muheshwe n[’im]pwemu kuba ingoro Imana ibamwo”.​—Abanyefeso 2:21, 22; 1 Petero 2:5, 9.

¹¹ Paulo yandikiye kandi abo bakirisu basizwe ati: ‘Mbega ntimuzi yuko muri urusengero rw’Imana, kandi ko impwemu y’Imana iba muri mwebwe? Urusengero rw’Imana ni urwera, kandi urwo rusengero ni mwebwe’ (1 Ab’i Korinto 3:16, 17). Yehova, abicishije ku mpwemu yiwe yera, ‘aragerēra’ mu basizwe akongera ‘akagendera muri bo’ (2 Ab’i Korinto 6:16). Arabandanya kuyobora “umushumba” wiwe wo kwizigirwa (Matayo 24:45-47). Abagize “izindi ntama” baraha agaciro agateka batewe ko kwifatanya n’umugwi w’abagize urwo “rusengero”.​—Yohana 10:16; Matayo 25:37-40.

Ibintu vyeranda mu buzima bw’abakirisu

12. Ni ibintu ibihe tubona ko ari vyeranda mu buzima bwacu, kandi kubera iki?

¹² Ntibitangaje rero kubona ibintu vyinshi bifitaniye isano n’ubuzima bw’abakirisu bagize ishengero ry’abasizwe be na bagenzi babo, bibonwa ko ari vyeranda. Ubucuti dufitaniye na Yehova ni ikintu ceranda (1 Ngoma 28:9; Zaburi 36:7). Ubucuti dufitaniye n’Imana yacu Yehova ni ubw’agaciro kanini kuri twebwe ku buryo ata kintu na kimwe canke umuntu n’umwe twemerera ko yobwonona (2 Ngoma 15:2; Yakobo 4:7, 8). Amasengesho arafise uruhara ruhambaye mu kudufasha kuguma dufitaniye na Yehova ubucuti bwa hafi. Umuhanuzi Daniyeli yarabona ko amasengesho ari ikintu ceranda cane ku buryo yabandanije akamenyero yari asanganywe ko gusenga Yehova naho vyashobora gutuma ahasiga ubuzima (Daniyeli 6:7-11). ‘Amasengesho y’abera’, ari bo bakirisu basizwe, agereranywa n’umubavu wakoreshwa mu gusenga kwabera mu rusengero (Ivyahishuriwe 5:8; 8:3, 4; Abalewi 16:12, 13). Ico kigereranyo kirashimika ku kuntu amasengesho ari ikintu ceranda. Ese ukuntu ari agateka kuba dushobora kuvugana na Segaba w’isi n’ijuru! Ntibitangaje rero kuba tubona ko isengesho ari ikintu ceranda mu buzima bwacu!

13. Ni inguvu iyihe ari nyeranda, kandi ni gute dukwiye kuyireka igakorera mu buzima bwacu?

¹³ Hariho inguvu ikorera mu buzima bw’abakirisu basizwe be na bagenzi babo, babona vy’ukuri ko ari nyeranda, iyo na yo ikaba ari impwemu yera. Iyo mpwemu ni inguvu ikora ya Yehova. Kubera yuko yama ikora ihuza n’ivyo Imana nyeranda igomba, uca wumva ko bibereye yuko yitwa ‘impwemu yera’ (Yohana 14:26; Abaroma 1:4). Yehova, abicishije ku mpwemu yera, araronsa abasavyi biwe ubushobozi bwo kwamamaza inkuru nziza (Ivyakozwe n’intumwa 1:8; 4:31). Yehova aronsa impwemu yiwe ‘abamwumvira’, ‘baguma bagendeshwa n’impwemu’ aho kugendeshwa n’ivyipfuzo vy’umubiri (Ivyakozwe n’intumwa 5:32; Ab’i Galatiya 5:16, 25; Abaroma 8:5-8). Iyo nguvu ikomeye irafasha abakirisu kwama ‘ivyo impwemu yama’, ivyo na vyo akaba ari kamere nziza, ikongera ikabafasha kugira “ingeso zera” no gukora ibikorwa biranga “ukwubaha Imana” (Ab’i Galatiya 5:22, 23; 2 Petero 3:11). Niba tubona yuko impwemu yera ari nyeranda, tuzoheza twirinde gukora ikintu cose coyibabaza, ni ukuvuga coyibuza gukorera mu buzima bwacu.​—Abanyefeso 4:30.

14. Ni agateka akahe abasizwe batewe babona ko ari ikintu ceranda, kandi ni mu buryo ki ako gateka bagasangiye n’abo mu zindi ntama?

¹⁴ Agateka twatewe ko kwitirirwa izina ry’Imana nyeranda Yehova no kuba Ivyabona vyayo na ko nyene ni ikintu tubona ko ari ceranda (Yesaya 43:10-12, 15). Yehova yarashoboje abakirisu basizwe kuba “abakozi b’isezerano risha” (2 Ab’i Korinto 3:5, 6). Ku bw’ivyo, bafise igikorwa co kwamamaza “ubu butumwa bgiza bg’ubgami” be no ‘guhindura abantu bo mu mahanga yose abigishwa’ (Matayo 24:14; 28:19, 20, NW). Bariko barangura ico gikorwa badahemuka, kandi abantu amamiliyoni bameze nk’intama bariko baracitabira, bakamera nk’aho bariko babwira abo basizwe bati: “Turajana, kuko twumvise yukw Imana iri kumwe namwe” (Zekariya 8:23). Mu buryo bw’impwemu, abo bantu bakorana umunezero ari ‘abakorera mu mirima’ be n’‘abakorera mu nzabibu’ ku bw’“abasavyi b’Imana yacu” basizwe. Muri ubwo buryo, abagize izindi ntama barafasha cane abasizwe mu kurangura ubusuku bajejwe kw’isi yose.​—Yesaya 61:5, 6.

15. Ni igikorwa ikihe intumwa Paulo yabona ko ari ceranda, kandi ni kubera iki natwe tukibona nk’ukwo nyene?

¹⁵ Intumwa Paulo ni umwe mu bantu babona ko ubusuku bwo mu ndimiro barangura bwari ikintu ceranda. Ubwiwe yavuze ko ari “umusuku wa Kristo Yesu ku banyamahanga, [“akora igikorwa ceranda”, NW] [c’]ubutumwa bgiza bg’Imana” (Abaroma 15:16). Igihe Paulo yandikira abakirisu b’i Korinto, yavuze yuko ubusuku yarangura bwari “ubutunzi” (2 Ab’i Korinto 4:1, 7). Biciye ku busuku bwo mu ndimiro turangura, turamenyesha abantu “amajambo meranda y’Imana” (1 Petero 4:11, NW). Rero, twaba turi abasizwe canke abo mu zindi ntama, ukugira uruhara mu gikorwa co gushinga intahe tubona yuko ari agateka keranda.

“Kuba abera tugushikishe kwubaha Imana”

16. Ni ibiki vyodufasha kwirinda kuba abantu ‘badaha agaciro ibintu vyeranda’?

¹⁶ Intumwa Paulo yahanuye abakirisu bagenziwe ngo birinde ntibabe abantu “[ba]daha agaciro ibintu vyeranda” (NW), ahubwo riho babe abantu ‘bakurikira ukwezwa’, “baraba neza”(NW) kugira ngo “ntihagire umuzi wo kurura umera, ukabahagarika imitima, abenshi bakāndura” (Abaheburayo 12:14-16). Imvugo ngo “umuzi wo kurura” canke urimwo ubumara, yerekeza ku bantu bakeyi bo mw’ishengero rya gikirisu borondera gutora amahinyu uburyo ibintu bikorwa. Nk’akarorero, boshobora kutemera yuko umubano w’abubatse ari ikintu ceranda nk’uko Yehova awubona, canke ntibemere yuko kudahumana mu nyifato runtu bikenewe (1 Ab’i Tesalonike 4:3-7; Abaheburayo 13:4). Canke na ho boshobora kugira uruhara mu vyo gukwiragiza ivyiyumviro vy’ubuhuni, ivyo na vyo bikaba ari ‘amajambo y’ubusa ahumanya’ ibintu vyeranda, akwiragizwa n’“abāzimiye bakava mu vy’ukuri”.​—2 Timoteyo 2:16-18.

17. Ni kubera iki abasizwe basabwa kuguma bihatira kwerekana ko babona ubweranda nk’uko Yehova abubona?

¹⁷ Paulo yandikiye abavukanyi biwe basizwe ati: “Bakundwa, . . . twiyuhagire ubuhumane bgose bg’umubiri n’ubg’umutima, kuba abera tugushikishe kwubaha Imana” (2 Ab’i Korinto 7:1). Ayo majambo arerekana ko abakirisu basizwe, bano bakaba ari “abasangiye ihamagarwa riva mw ijuru”, bategerezwa kuguma bihatira kwerekana mu mice yose y’ubuzima bwabo yuko babona ubweranda nk’uko Yehova abubona (Abaheburayo 3:1). Intumwa Petero na we nyene yarahimirije abavukanyi biwe bavyawe biciye ku mpwemu ati: “Mumere nk’abana bagamburuka, ntimwishushanye n’ukwifuza kwanyu kwa kera kwo mu gihe c’ukutamenya kwanyu. Ariko nk’ukw Iyabahamagaye ar’iyera, namwe abe ari ko muba abera mu ngeso zanyu zose”.​—1 Petero 1:14, 15.

18, 19. (a) Abagize “ishengero ryinshi” berekana gute ko babona ibintu vyeranda nk’uko Yehova abibona? (b) Ni uwundi muce mweranda uwuhe w’ubuzima bwacu bwa gikirisu urimburwa mu kiganiro gikurikira?

¹⁸ Bite ho ku bagize “ishengero ryinshi” bazorokoka “wa mubabaro mwinshi”? Na bo nyene bategerezwa kwerekana ko babona ibintu vyeranda nk’uko Yehova abibona. Mu gitabu c’Ivyahishuriwe, badondorwa ko barangurira Yehova “umurimo mweranda” (NW) bari mu kigo co kw’isi ca rwa rusengero rwiwe rwo mu buryo bw’impwemu. Barizeye inkuka y’incungu ya Kirisitu, ivyo bikaba bigereranywa no kuba ‘baramesuye imvune zabo bakazezesha amaraso ya wa Mwagazi’ (Ivyahishuriwe 7:9, 14, 15). Ivyo bituma baba abadahumanye imbere ya Yehova bigatuma kandi bategerezwa ‘kwiyuhagira ubuhumane bwose bw’umubiri n’ubw’umutima, kuba abera bakagushikisha kwubaha Imana’.

¹⁹ Umuce umwe uhambaye mu buzima bw’abakirisu basizwe be na bagenzi babo, ni uwujanye n’ugukoranira hamwe badahorereza kugira ngo basenge Yehova bongere bige Ijambo ryiwe. Yehova abona ko imitororokano y’abasavyi biwe ari ikintu ceranda. Ukuntu be n’igituma dukwiye kubona ibintu vyeranda nk’uko Yehova abibona mu bijanye n’uwo muce uhambaye cane, ni vyo turimbura mu kiganiro gikurikira.

Isubiramwo

• Ni agatima akahe abantu muri rusangi bafise gatandukanye n’ako abasavyi ba Yehova bafise?

• Ni kubera iki Yehova ari we Sôko ry’ibintu vyose vyeranda?

• Twerekana gute ko twubaha ubweranda bwa Kirisitu?

• Ni ibintu ibihe dukwiye kubona ko ari vyeranda mu buzima bwacu?

[Ifoto ku rup. 23]

Muri Isirayeli ya kera, ubuherezi, ihema be n’ivyari birigize, vyategerezwa kubonwa ko ari ibintu vyeranda

[Ifoto ku rup. 24]

Abakirisu basizwe bakiri kw’isi bagize urusengero rweranda

[Ifoto ku rup. 25]

Isengesho be n’ubusuku bwo mu ndimiro ni uduteka tweranda twatewe