‘Ugutabarwa kwanje kuva kuri Yehova’

Imiryango yakomejwe n’ubumenyi bwerekeye Imana

“IGIHOME c’i Berlin”. Ukwo ni ko abubakanye babiri bo muri Arijantine bise igihome bari barubatse ngo kigaburemwo kubiri inzu yabo. Bari bafitaniye ingorane batashobora gutorera umuti; barankana urunuka.

Ikibabaje ni uko abo bubakanye atari bo bonyene ivyabo vyifashe gutyo. Imiryango myishi yuzuyemwo ugushihana, uguhemukiranira, be n’urwanko rweruye. Ivyo birababaje kubera ko umuryango ari indinganizo yashizweho n’Imana ubwayo (Itanguriro 1:27, 28; 2:23, 24). Muri iyo ndinganizo yashinzwe n’Imana, ni ho hantu heza cane ho kugaragariza urukundo rugera kure (Rusi 1:9). Mu gihe abagize umuryango bashize mu ngiro ivyo basabwa n’Imana, barashobora gutera iteka Yehova, kandi umwe wese akabera mugenziwe isôko ry’umunezeroa.

Kubera yuko Imana ari yo yashizeho indinganizo y’umuryango, turakeneye kureka ukuntu ibona ibintu kukagira akosho ku kuntu twebwe dutegera ingene abagize imiryango bakwiye kuvyifatamwo. Ijambo ryayo riratanga impanuro ngirakamaro zitari nke zigenewe gufasha imiryango kuroranirwa, na canecane igihe havyutse ingorane. Ku biraba uruhara rw’abagabo, Bibiliya ivuga iti: “Abagabo . . . bakwiye gukunda abagore babo nk’imibiri yabo bgite”. Igihe umugabo ashikije ico gisabwa, umugore wiwe arahimbarwa no ‘kwubaha cane umugabo wiwe’.​—Abanyefeso 5:25-29, 33.

Ku biraba imigenderanire iri hagati y’abavyeyi n’abana babo, intumwa Paulo yanditse ati: “Namwe ba se, ntimukaratse abana banyu, ariko mubarere, mubahana mubahanūra, uk’Umwami wacu agomba” (Abanyefeso 6:4). Ivyo bica bituma mu muryango harangwa igishika, kigatuma abana boroherwa no kwubaha abavyeyi babo.​—Abanyefeso 6:1.

Ivyo bintu duhejeje kubona birerekana yuko Bibiliya itanga impanuro nziza zijanye n’ubuzima bwo mu rugo. Abenshi iyo bashize mu ngiro ingingo ngenderwako ziva ku Mana, barironkera agahimbare mu rugo iwabo. Fata nk’akarorero wa mugabo n’umugore bo muri Arijantine twavuga mu ntango. Bamaze amezi atatu bigana Bibiliya n’Ivyabona vya Yehova, bompi baratanguye gushira mu ngiro impanuro ziranga ubukerebutsi Bibiliya itanga ku biraba umubano w’ababiranye. Barakoze uko bashoboye kugira ngo baryohore ivyo guseruriranira akari ku mutima, kugira ngo umwe wese yitwararike ivyo mugenziwe akeneye, no kugira ngo babe abantu bakunda guharirana (Imigani 15:22; 1 Petero 3:7; 4:8). Barize gutsinda ishavu no kwitura Imana ngo ibafashe igihe ibintu vyaba bisa n’ibibarengeye (Ab’i Kolosayi 3:19). Bidatevye, ca gihome bita “Igihome c’i Berlin” carasenyutse!

Imana irashobora gukomeza umuryango

Kumenya no gushira mu ngiro ingingo mfatirwako z’Imana birashobora gukomeza umuryango ukananira imikazo. Ivyo birahambaye cane kubera yuko ubuhanuzi bwerekana ko umuryango woshikiwe n’igitero gikaze muri iki gihe cacu. Paulo yaravuze ivyerekeye itituka tubona muri iki gihe ry’inyifato runtu be n’iry’ikibano c’abantu. Yavuze yuko “imisi y’iherezo” yoranzwe n’uguhemukiranira, ‘ukudakunda abo mu muryango’, hamwe n’ukutumvira abavyeyi, mbere no mu bantu “bafise ishusho yo kwubaha Imana”.​—2 Timoteyo 3:1-5.

Kugerageza guhimbara Imana birashobora gukingira umuryango mwene izo nkurikizi zonona. Imiryango myishi yariboneye ko hakenewe umuti uvuye ku Mana kugira ngo uyifashe gutsinda nyinshi mu ngorane ziyihanze. Nimba abagize umuryango bipfuza kuguma bafitaniye n’Imana ubucuti bwiza, imbere ya vyose bakeneye gushira mu ngiro ingingo ngenderwako zo muri Bibiliya no kwemera yuko “Uhoraho iy’atari we yubaka inzu abayubaka baba baruhira ubusa” (Zaburi 127:1). Ikintu nyamukuru gituma mu rugo harangwa agahimbare ni uko abagize umuryango bashira Imana mu kibanza ca mbere mu buzima bwabo.​—Abanyefeso 3:14, 15.

Umugabo umwe yitwa Dennis wo muri Hawayi ivyo yaravyiboneye. Naho yiyita umukirisu, ugutukana n’ukurwana ni vyo vyaranga ubuzima bwiwe. Aho amariye igihe ari mu gisoda, yaciye mbere arushiriza gukara no kuba mubi. Yigana ati: “Nama ndiko ndarwana. Nta co natinya, kandi gupfa nta co vyari bimbariye. Narabandanije gutukana no kurwana. Umugore wanje, uwari Icabona ca Yehova, yarandemesheje kwiga Bibiliya”.

Utwigoro umugore wiwe yagize nta co twabariye Dennis. Ariko rero, inyifato ya gikirisu y’umugore wiwe yarahwamitse inyifato mbi yari afise. Impera n’imperuka, Dennis yaragiye kw’ikoraniro rya gikirisu ari kumwe n’umugore n’abana. Mu nyuma, Dennis yaratanguye kwiga Bibiliya yongera aratera imbere neza. Yarahevye ingeso yo kunywa itabi yari amaranye imyaka 28, yongera arareka kwifatanya n’abagenzi baja mu bintu vyose yariko aragerageza guheba. Dennis arakengurukira Yehova, akavuga ati: “Umuryango wanje waramerewe neza gusumba. Uko tugize umuryango, twarajana ku makoraniro no mu busuku. Abana banje babiri ntibari bakintinya, kubera yuko nize gutsinda ishavu nkongera ngaheba gutukana. Twaraganira tukongera tukagiranira ibiyago bishingiye kuri Bibiliya. Iyo ntahabona ukuri kwo muri Bibiliya, simba nkiriho; nashavura ningoga”.

Imiryango irashobora kuronka agahimbare iyo yihatiye gukora ivyo Yehova agomba. Biramaze kwibonekeza yuko n’igihe nyene umwe mu bagize umuryango ashize mu ngiro ingingo ngenderwako zo muri Bibiliya, ibintu bigenda neza kuruta igihe ata n’umwe muri bo azishira mu ngiro. Kwubaka umuryango wa gikirisu ni igikorwa kitoroshe, gisaba ubuhanga n’umwanya. Mugabo, abari muri iyo miryango barakurwa amazinda yuko Yehova azohezagira utwigoro twubaka bagira. Barashobora gusubiramwo amajambo yavuzwe n’umwanditsi wa Zaburi agira ati: ‘Ugutabarwa kwanje kuva kuri Yehova’.​—Zaburi 121:2.

[Akajambo k’epfo]

[Iciyumviro nyamukuru ku rup. 9]

Imana ni yo “imiryango yose yo mw ijuru n’iyo mw isi yītirirwa”.​—ABANYEFESO 3:15

[Uruzitiro ku rup. 8]

YEHOVA ARAHA AGACIRO INDINGANIZO Y’UMURYANGO

“Imana irabahezagira, iti Ni murondoke, mugwire, mwuzure isi”.​—Itanguriro 1:28.

“Hahirwa uwubaha Uhoraho wese, . . . Umugore wawe azoba nk’umuzabibu wama cane, ari haruguru mu nzu yawe”.​—Zaburi 128:1, 3.