‘Yabaremye Umugabo n’Umugore’

‘Imana irema umuntu mw ishusho yayo, mw ishusho y’Imana ni ho yamuremye; ibarema umugabo n’umugore.’—ITANGURIRO 1:27.

1. Ni mu buryo ki ukuri ari umuhezagiro ku Bakirisu b’abagabo n’abagore?

ESE ukuntu biryoshe kuba mu gisata ca Yehova no kuja hamwe n’abagabo n’abagore, abahungu n’abakobwa, abo usanga mu buzima bashira imbere ugukunda Imana n’ukuyigamburukira! Ukuri kandi kuratugira abidegemvya tukiganzura udutima hamwe n’ingeso bidahimbara Yehova Mana, kandi kuratwigisha ukuntu twobaho nk’uko Abakirisu bakwiye kubaho. (Yohana 8:32; Ab’i Kolosayi 3:8-10) Nk’akarorero, abantu mu mihingo yose bari n’imigenzo canke ivyiyumviro vyerekeye ukugene abagabo bakwiye guserura ubugabo bwabo, n’abagore ubugore bwabo. Kwoba ari uko gusa abagabo bǎvukanye ubugabo abagore na bo bakavukana ubugore? Canke hoba hariho ibindi bintu dukwiye kurimbura?

2. (a) Ni igiki gikwiye kwerekana ukuntu tubona ubugabo n’ubugore? (b) Ni igiki cashikiye uburyo abantu babona ivy’abagabo n’abagore?

² Ku Bakirisu, Ijambo ry’Imana ni ryo bukuru tuyobokera, ata kuraba ivyiyumviro twebwe ubwacu dufise biva ku mico kama canke imigenzo twoba twararonse. (Matayo 15:1-9) Bibiliya ntitanga ido n’ido ry’imice yose yerekeye ubugabo n’ubugore. Ahubwo ntibuza ubugabo n’ubugore kwiserura mu buryo butari bumwe, nk’uko tubisanga mu mico kama itandukanye. Kugira babe ico Imana yabaremeye kuba, abagabo bategerezwa kuba abagabo, abagore na bo abagore. Kubera iki? Kubera ko turetse ivy’uko umugabo n’umugore baremwe ngo bunganirane ku mubiri, bari kwunganirana biciye muri kamere z’ubugabo n’iz’ubugore. (Itanguriro 2:18, 23, 24; Matayo 19:4, 5) Yamara, ivyiyumviro vyerekeye ukuba umuhungu canke umukobwa vyarakebanijwe. Kuri bamwe, ubugabo ni ukuganzisha amanyama, ubukare, canke ukwibona igabo. Mu mico kama imwimwe umugabo kuririra mu bantu canke ahiherereye ni ikintu c’imbonekarimwe canke giteye isoni. Yamara, mw isinzi ryari imbere y’uruhafu rwa Lazaro, ‘Yezu yararize.’ (Yohana 11:35) Ivyo kuri Yezu ntivyari ibitabereye, naho ubugabo bwiwe butǎgira agasembwa. Muri iki gihe, abenshi bararengeje urugero ku vyerekeye ubugore, bakabubona nk’ubw’ugukwegēra mu vy’umubiri no mu vy’ukwimara inambu yawo gusa.

Ubugabo Nyakuri n’Ubugore Nyakuri

3. Abagabo n’abagore batandukaniye ku ki?

³ Ubugabo nyakuri ni iki, kandi ubugore nyakuri ni iki? Igitabu The World Book Encyclopedia, kivuga giti: “Abagabo n’abagore benshi baratandukanye, atari gusa ku mubiri, ariko mu kuntu bigenza no mu bibashimisha nyene. Bimwe muri ivyo batandukaniyeko vyerekanwa n’ukuntu umubiri wacu waremwe. . . . Ariko amatandukaniro menshi adashingiye ku kuntu turemwe asa n’ayafatiye ku ruhara rurangurwa n’umugabo canke umugore, urwo umwe wese yiga. Abantu bavuka ari abagabo canke abagore, ariko bariga kugira ubugabo canke ubugore.” Ukuntu twebwe turemye bishobora kuba bituma haba ibintu vyinshi, ariko ugutsimbatara kw’ubugabo canke ubugore bibereye kuva ku kuntu twiga ivyo Imana isaba no ku vyo duhitamwo gukurikirana mu buzima.

4. Bibiliya ihishura iki ku vyerekeye uruhara rw’umugabo n’urw’umugore?

⁴ Inkuru itangwa na Bibiliya iduhishurira yuko uruhara rwa Adamu kwari ukuba senaka. Yabwirizwa kandi kuyobokera ukugomba kw’Imana kwerekeye ukwuzuza isi, kuyiganza no kuganza ibiremwa vyose vyo hasi kw isi. (Itanguriro 1:28) Uruhara rw’umugore mu rugo kuri Eva rwari urw’ukubera Adamu “umufasha” canke “umwunganizi,” akayobokera ubukuru bwiwe, bagasenyera ku mugozi umwe mu vy’ugushitsa umugambi Imana yamenyesheje ko boranguye.—Itanguriro 2:18; 1 Ab’i Korinto 11:3.

5. Ubucuti buri hagati y’umugabo n’umugore bwononywe gute?

⁵ Ariko Adamu ntiyashoboye gushitsa ibanga ryiwe, Eva na we akoresha ubugore bwiwe mu buryo bw’ukujijura Adamu, amukwegēra ngo na we agararize Imana. (Itanguriro 3:6) Aho Adamu yirekeraniye agakora ivyo yari azi ko ari bibi, yari ananiwe n’ukugaragaza ubugabo nyakuri. N’ubugoyagoye n’akantu, yahisemwo kwemera ijambo ry’umutambukanyi wiwe yari yahenzwe aho kwemera ico Se ari na we Muremyi wiwe yari yaravuze. (Itanguriro 2:16, 17) Ntibitevye, abo babiri ba mbere bubakanye ntibatevye gutangura kwibonera ico Imana yari yarabonye imbere y’igihe ko cobaye inkurikizi y’ubugarariji. Adamu uwari yadondoye umukenyezi wiwe mu ntango mu majambo yo kumuhayagiza, yo kumutazira, buno yamuvuganye ubukanyarare ngo ni “umugore wampaye.” Amakemwa yiwe buno yari yononye ubugabo bwiwe yongera arabuyovya, bituma ‘aganza umugore wiwe.’ Eva na we, yohoraniye “inyota” umugabo wiwe, kumbure bikaba mu buryo burenze imbibe canke butarimwo urugero.—Itanguriro 3:12, 16.

6, 7. (a) Imbere y’Umwuzure ubugabo bwakebanijwe gute? (b) Ni icigwa giki dushobora gukura ku vyabayeho imbere y’Umwuzure?

⁶ Ikoreshwa ribi ry’ubugabo n’ubugore ryarigaragaje bimwe bibi imbere y’Umwuzure. Abamarayika bǎhevye icicaro cabo mw ijuru barihaye imibiri y’abantu kugira bumve uburyoherwe bw’uguhuza imibiri n’abagore. (Itanguriro 6:1, 2) Iyo nkuru ivuga gusa abagabo bavutse kuri ukwo kumarana inambu y’umubiri uko bitagirwa. Kandi bisa n’uko uruvyaro rwabo rwari abantu b’imvange, badashoboye kurondoka. Bǎmenyekanye ko ari abahizi, Abanefilimu, canke Abagwishi, kubera ko batuma abandi bagwa. (Itanguriro 6:4, NW; akajambo k’epfo) Biboneka yuko bari inkazi, abasomborotsanyi, ntibagire imbabazi z’ikibabarwe namba.

⁷ Biraboneka yuko ubwiza bw’umubiri, imbumbo y’umutumba, igihagararo canke ubukomezi ubwavyo atari vyo bitanga ubugabo canke ubugore bwiza. Abamarayika bihaye imibiri bisa n’uko bari intore mu bwiza. Kandi abo Banefilimu bari ibigangi kandi bakaba ab’imirya, ariko inyifato yabo y’ubuzirikanyi yari ikebanye. Abo bamarayika bagararije hamwe n’uruvyaro rwabo barujuje isi ubuhumbu n’ubukazi. Ni co gituma Yehova iyo si yayihoneje. (Itanguriro 6:5-7) Mugabo nya Mwuzure ntiwakuyeho inyosha y’amademo, eka mbere ntiwazimanganije inkurikizi z’icaha ca Adamu. Ukundi kugaragaza nabi ubugabo n’ubugore kwarasubiye kugaruka inyuma y’Isegenya, kandi muri Bibiliya harimwo uburorero bwiza na bubi dushobora gukurako icigwa.

8. Ni akarorero keza akahe k’ubugabo bubereye Yozefu yatanze?

⁸ Yozefu hamwe n’umugore wa Potifari bari banyuranye bimwe bikomeye ku vyerekeye ubugabo bubereye n’ubugore bwo mw isi. Umugore wa Potifari yaranyengērewe n’ubutore bwa Yozefu, aragerageza kumukwegakwega. Ico gihe, nta bwirizwa ryanditswe na rimwe riva ku Mana ryariho ribuza ugusambana canke ukurenga ibigo. Ariko nticabujije ko Yozefu ahunga uwo mugore w’igihumbu vyongeye agatanga igihinyuza c’uko we ari umuntu nyawe w’Imana, agarágaza ubugabo bushimwa n’Imana.—Itanguriro 39:7-9, 12.

9, 10. (a) Umwamikazi Vashiti yakoresheje nabi gute ubugore bwiwe? (b) Ni akarorero keza akahe k’ubugore Esiteri yaduhaye?

⁹ Esiteri be n’Umwamikazi Vashiti bari abagore batandukanye koko. Vashiti yoba yariyumviriye yuko ari mwiza cane ku buryo Umwami Ahasuwerusi yokwamye nantaryo amwemerera ivyo yipfuza. Ariko ubwiza bwiwe ntibwarenga urukoba rusa. Yari abuze uguca bugufi be n’ubugore, kuko yananiwe n’ukugaragaza ko ayobokera umugabo wiwe akaba n’umwami. Umwami yaramuhevye acagura umugore w’ubugore vy’ukuri, atinya Yehova, ngo amubere umwamikazi.—Esiteri 1:10-12; 2:15-17.

¹⁰ Esiteri arabera akarorero keza Abakirisu b’abagore. Yari “mwiza w’umunyakaranga,” yamara yaragaragaza ubwisharize bw’“umuntu ahishijwe wo mu mutima, ugushaza kudashira, ni kwo mutima w’ubugwaneza utekereje.” (Esiteri 2:7; 1 Petero 3:4) Ntiyabonye ivy’uko ukwishariza ngo bamubone ari co kintu ca mbere. Esiteri yakoresha ubugenge hamwe n’ukwigumya, akayobokera umugabo wiwe Ahasuwerusi, n’igihe nyene ubuzima bw’abantu b’iwabo bwari bugeramiwe. Esiteri yaguma acereje igihe kugenza gutyo vyaba biranga ubwenge, ariko akavuga adatinya igihe vyaba bikenewe kandi ku gihe vyaba bibereye. (Esiteri 2:10; 7:3-6) Yaremeye impanuro ahawe na Morodekayi mwenesewabo azi utuntu n’utundi. (Esiteri 4:12-16) Yareretse igisata ciwe urukundo agifitiye hamwe n’ukutagihemukira.

Agashusho k’Inyuma

11. Ni igiki tudakwiye kwibagira ku vyerekeye agashusho k’inyuma?

¹¹ Ni igiki kizana ubugore bubereye? Hari umuvyeyi yavuze ati: “Akazuru gusa karahendana, n’ubgiza bgo ku rukoba nta co bumaze, arik’umugore yubaha Uhoraho ni we ashimwa.” (Imigani 31:30) Nuko rero, ugutinya Imana kurimwo ukuyisonera ni akadahara, kandi ubuntu mvarukundo, ubuhimbare, ukwifata ruto, hamwe n’ururimi ngenzabuhoro birafasha cane rwose kugira umuntu agire ubugore kuruta ubwiza bw’umubiri.—Imigani 31:26.

12, 13. (a) Ikibabaje, ni ibiki usanga mu mvugo y’abatari bake? (b) Mu Migani 11:22 hasobanura iki?

¹² Ikibabaje ni uko abagabo n’abagore benshi badateranura akanwa kabo bávuga ivy’ubwenge, eka n’ubuntu mvarukundo ugasanga ntabubari ku rurimi. Imvugo yabo usanga ari mbi, y’akagaye, iteye isoni, y’ibisunitswe n’impwemu. Hari abagabo bamwe biyumvira ngo imvugo y’ubweruzi ni ikimenyetso cerekana ubugabo, kandi abagore bamwebamwe n’ubupfu n’akantu bakabigana. Yamara iyo umugore ari mwiza mugabo akaba atazi kuroranya kandi akaba umuharirizi, umunyakagaye, canke uwishima, wumva yoshobora kuba ari mwiza mu buryo nyabwo, akaba uw’ubugore vy’ukuri? “Umugore w’akazuru gusa arikw atazi kuroranya, ameze nk’impeta y’izahabu yambitswe ingurube mu zuru.”—Imigani 11:22.

¹³ Ubwiza busukiranije n’imvugo ihumanye, akagaye, canke ukubura ukuroranya, yoba inyuranye n’agashusho kose k’ubugore kaboneka ku muntu. Nkako, ukwigenza gutyo kutagiramwo ukwibanga Imana kwoshobora mbere gutuma umuntu w’akabiri k’ubutore aboneka nk’uwushisha. Ntibigoye gutahura yuko imboneko y’umubiri y’umugabo canke umugore ubwayo idashobora gusubirira canke ngo itange impamvu y’umwaduko w’ishavu, ugukankamwa canke imvugo mbi. Abakirisu bose barashobora kandi bakwiye kwigira abanyakaranga ku Mana no ku bandi bantu biciye mu mvugo yabo no mu kuntu bigenza, bishingíye kuri Bibiliya.—Abanyefeso 4:31.

14. Ni ukwishariza nyabaki gushimagizwa muri 1 Petero 3:3-5, kandi wewe ukwiyumvirako iki?

¹⁴ Naho ubugore n’ubugabo bubereye bushingiye kuri kamere z’ivy’impwemu, igihagararo hamwe n’agashusho, dushizemwo ivyambarwa twambara hamwe n’uburyo tuvyambara, biri n’ico vyerekana kuri twebwe. Intumwa Petero ntabuze kuba yariko yiyumvira uburyo bunaka bw’ukwambara n’ugutunganya imishatsi bwo mu kinjana ca mbere, igihe yaha impanuro Abakirisu b’abakenyezi ati: “Ugushaza kwanyu ntikube ukwo ku rukoba kwo gutsiba umushatsi, cank’ukwo kwambara izahabu cank’ukwo kwambara impuzu nziza; ariko kube ukw’umuntu ahishijwe wo mu mutima, ugushaza kudashira, ni kwo mutima w’ubugwaneza utekereje, ni kwo kw’igiciro kinini imbere y’Imana. Ni kw abagore bera bizigira Imana bāshaza kera, bagamburukira abagabo babo.”—1 Petero 3:3-5.

15. Abakirisu b’abakenyezi bakwiye kwihatira kugaragaza iki mu nyambaro yabo?

¹⁵ Muri 1 Timoteyo 2:9, 10, tuhasanga amajambo Paulo yavuze ku nyambaro y’abagore ati: “Kandi n’abagore nyene, ndagomba ko bambara imyambaro biberanye, bagendane isoni badahugumba . . . ariko bashazishe ibikorwa vy’ingeso nziza, nk’uko bikwiye abagore bavuga yuko bubaha Imana.” Ngaho yarashimitse ku vy’uko hakenewe ukwicisha bugufi hamwe n’inyambaro itunganijwe neza igaragaza uburorane bw’umuzirikanyi.

16, 17. (a) Ukwambara kwakoreshejwe nabi gute n’abagabo be n’abagore benshi muri iki gihe? (b) Dukwiye gupfundika iciyumviro ikihe turavye impanuro iri muri Gusubira mu vyagezwe 22:5?

¹⁶ Ku mugabo canke umugore, umuhungu canke umukobwa, gukora canke kwambara mu buryo buvyurira abandi inambu y’umubiri ntivyokuza ubugabo canke ubugore nyakuri, kandi ntibishobora kuba bitera iteka Imana. Abantu benshi mw isi idukikije usanga barenza urugero bakarata ivy’uko ari abagabo canke abagore babicishije mu nyambaro canke mu kuntu bigenza. Abandi baratuma amatandukaniro y’umugabo n’umugore ataboneka, babitumwe n’ivyo bakurikirana vy’ubuhumbu. Ese ukuntu twebwe Abakirisu dukoma amashi kubona Bibiliya ihishura ico Imana yiyumvira! Yehova yamenyesheje Isirayeli ya kera ati: “Ntihaze hagire izinamukobga yambarana impuzu n’izinamuhungu, canke ngo hagire izinamuhungu yambarana n’izinamukobga: kuk’ūkoze ivyo wese aba abaye ikizira k’Uhoraho Imana yanyu.”—Gusubira mu vyagezwe 22:5.

¹⁷ Kuri iki kibazo, kumbure uzoshimishwa n’ugusubiramwo ico Umunara w’Inderetsi (mu Gifaransa) wo ku wa 15 Myandagaro 1988 wavuze ku rupapuro 17: “Ikibazo si uko umudeli munaka woba canke utoba ujanye n’impararo birengeje, ariko ko woba ubereye uwuvuga ko ari umukozi w’Imana. (Abaroma 12:2; 2 Ab’i Korinto 6:3) Impuzu z’imburaburyo canke zifatafata zirashobora gutesha agaciro ubutumwa dushikiriza. Imideli ituma umugabo amera nk’umugore umugore na we akamera nk’umugabo bimwe vy’ubushirasoni kandi bikagirwa nkana, iyo ni ukuba iravamwo. (Gereranya na Gusubira mu vyagezwe 22:5.) Birumvikana, imigenzo y’aho umuntu aba ishobora kuba iri kwinshi, hakurikijwe ukuntu igihe kimeze, ibisabwa n’udukorwa umuntu akora, n’ibindi vyinshi, ku buryo ikorane ry’Abakirisu ridashinga amategeko ntabanduka yohwanya Abavukanyi bo kw isi yose.”

18. Ni intambwe nki dushobora gutera mu vy’ugukurikiza impanuro Bibiliya itanga ku vyerekeye inyambaro n’ugutunganya imishatsi?

¹⁸ Umve iyo mpanuro irimwo urugero kandi ibereye! Birababaje kubona hariho Abakirisu bamwebamwe, abagabo n’abagore, bapfa gukurikira ico cose isi izukurukanye mu vy’inyambaro no mu vy’ugutunganya imishatsi, bataravye ukuntu vyohava bizanira iceyi Yehova n’ikorane ry’Abakirisu. Umwe wese muri twebwe yoshobora kugira umwisuzumo ngo arabe ko twoba twarohejwe n’ukwiyumvira kw’isi. Canke twoshobora kwegera umuvukanyi canke umuvukanyikazi yubahwa, aciye uruma, tukamubaza ico abona twoba dukwiye kugira mu vy’uburyo twambara hanyuma ata gufyina tukaraba hasi hejuru inama atugǐriye.

Abakirisu b’Abagabo n’Abagore—Ni Abagabo Nyakuri n’Abagore Nyakuri

19. Ni inyosha mbi iyihe dukwiye kurwanya?

¹⁹ Imana y’iyi si ni Shetani, kandi inyosha ziwe zirashobora kubonerwa mu rudavagi yateye mu vy’abagabo n’abagore, na vyo si mu vy’ukwambara honyene. (2 Ab’i Korinto 4:4) Mu bihugu bimwebimwe, abagore benshi barahiganwa n’abagabo mu vy’ukuba ben’urugo, bakiyobagiza buhere ingingo zo muri Bibiliya. Ku rundi ruhande na ho, hariho abagabo benshi baheba gusa amabanga yabo y’ukuba senaka, nka kumwe kwa Adamu. Hariho mbere n’abagerageza guhindura uruhara rwabo mu vy’igitsina mu buzima, bakarugira ukundi. (Abaroma 1:26, 27) Bibiliya ntitanga ubundi buryo bw’ukubaho bw’insubirizi bushimwa n’Imana. Kandi aboba imbere y’uko baba Abakirisu bari bayoberaniwe mu vy’akaranga kabo, canke barayoberaniwe n’ico bohitamwo mu vy’ukwimara inambu y’umubiri, boshobora kwizigira yuko bábayeho mu buryo buhuye n’urugero Imana ishinga vyovamwo ineza yabo idashira, rukaba vy’ukuri urugero ruzoshimwa n’abashikira ubukemuke bw’umuntu bose.

20. Ibiri mu B’i Galatiya 5:22, 23 bikwiye gukora iki ku kuntu tubona ubugabo n’ubugore?

²⁰ Ivyanditswe birerekana yuko Abakirisu b’abagabo n’abagore bakeneye gukomeza no kugaragaza ivyamwa vy’impwemu y’Imana—urukundo, umunezero, amahoro, ukwihangana, ubuntu, ubumereneza, ukwizera, igenzabuhoro, n’ukwigumya. (Ab’i Galatiya 5:22, 23) Imana yarakoresheje ubwenge buhambaye bwayo irashoboza abagabo gukuza ubugabo bwabo, n’abagore ubugore bwabo, mu gutsimbataza izo kamere. Umugabo agaragaza ivyamurwa vy’impwemu aroroshe iyubaha, umugore agira atyo na we akoroha ikunda.

21, 22. (a) Ni indorerwako nyabaki Yezu yatanze ku vy’uburyo bw’ukubaho? (b) Yezu yagaragaje ate ubugabo bwiwe?

²¹ Wa muntu mukuru aruta ababayeho bose yari Yezu Kirisitu, kandi uburyo bwiwe bw’ukubaho ni bwo Abakirisu bakwiye kwigana. (1 Petero 2:21-23) Nk’uko Yezu yabigenjeje, abagabo n’abagore bakwiye kugaragaza yuko ari intadohoka ku Mana n’uko bagamburuka Ijambo ryayo. Yezu yaragaragaje kamere z’igitangaza—urukundo, ikibabarwe, n’ikigongwe. Twebwe Abakirisu b’ukuri vyitezwe ko tumwigana tukagaragaza yuko turi abigishwa biwe.—Yohana 13:35.

²² Yezu Kirisitu yari umugabo nyawe, kandi turashobora kubona kamere ziwe z’ubugabo uko twiga inkuru yerekeye ubuzima bwiwe yerekanywe mu Vyanditswe. Ntiyigeze arongora, ariko Bibiliya irerekana yuko mu buryo burimwo urugero yanezererwa kuja hamwe n’abagore. (Luka 10:38, 39) Ubucuti yagirana n’abagabo hamwe n’abagore bwama ari ubutanduye kandi bw’urupfasoni. Ni we ndorerwako ikemutse y’ubugabo. Nta n’umwe yigeze yemerera—yaba umugabo, umugore canke umumarayika mugambarazi—kumwambura ubugabo bwiwe burimwo ukwibanga Imana, hamwe n’ukudahemuka kwiwe kuri Yehova. Ntiyagonanywe kwemera amabanga ashinzwe, kandi ivyo yabigize ata kwidodomba.—Matayo 26:39.

23. Ku biraba uruhara rw’abagabo n’abagore, Abakirisu nyakuri bahezagiwe gute mu buryo bwibonekeje?

²³ Mbega akanyamuneza ga yemwe kuba mu gisata ca Yehova no kuja hamwe n’abagabo n’abagore hamwe n’abahungu n’abakobwa mu buzima bwabo bashira imbere ugukunda Yehova Mana n’ukumugamburukira! Ukugamburukira Ijambo ry’Imana ntikutubohēra. Ahubwo, twaragizwe abidegemvya turiganzura iyi si n’inzira zayo zititura ubwiza, intēgo, n’uruhara rwibonekeje rurangurwa n’abagabo be n’abagore. Turashobora kwibonera ubuhirwe nyakuri buva ku gushitsa uruhara twashinzwe n’Imana mu buzima, twaba turi umugabo canke umugore. Egome, ese ingene dukurira ubwatsi Yehova Mana, we Muremyi, kubera ibintu vyose yatunganije ku neza yacu no kuba yaturemye abagabo n’abagore!

Wewe Wokwishura Ute?

◻ Ni impara zibereye izihe z’abagabo n’abagore zidondorwa na Bibiliya?

◻ Ubugabo bwakebanijwe gute imbere y’Umwuzure, kandi bwo hamwe n’ubugore bwakebanijwe gute muri kino gihe turimwo?

◻ Ni inama iyihe Bibiliya iduha uzorondera gukurikiza ku vyerekeye agashusho?

◻ Abakirisu b’abagabo n’abagore bashobora gute kuranga yuko ari abagabo n’abagore nyabo?

[Ifoto ku rup. 10]

Naho Esiteri yari umunyakaranga, yibukirwa canecane ku kwicisha bugufi kwiwe n’ubutekereji yari afise

[Ifoto ku rup. 12]

Niwitwararike ugushaza kwawe ku buryo bugeze wongera ushimikira cane ku bwiza bw’imbere