Abantu barokoka Umwuzure

UKO abantu bagwira, ni ko igicumuro n’ubugizi bwa nabi vyakwiragira kw’isi nk’umuriro wa Nyakanga. Umuhanuzi umwe atarenga ntarenguke yariho ico gihe yitwa Henoki yaratanze imburi y’uko umusi uri izina Imana yohoneje abantu batayibanga. Naho vyari ukwo, ikibi cabandanije ciganza, mbere ibintu birushiriza kwunyuka. Abamarayika bamwebamwe baragararije Yehova mu guheba ibibanza bari bafise mw’ijuru, biha imero nk’iy’abantu bo kw’isi, maze n’umunoho n’akantu barongora abakobwa b’abantu. Ukwo guhuza ibitsina kutari gusanzwe kugirwa kwatumye havuka abana badasanzwe, ni ukuvuga abantu b’ibigatanya bahahaza abandi bitwa abanefili, bano bakaba batumye isi irushiriza kubamwo ubukazi n’ugusesa amaraso. Imana yaratuntujwe cane no kubona ibiremwa vyiwe vyo kw’isi biriko birononwa.

Henoki amaze gupfa, muri iyo si mbi hari umuntu umwe gusa yari atandukanye n’abandi. Uwo muntu yitwa Nowa. We hamwe n’abagize umuryango wiwe barihatiye gukora ivyo Imana yabona ko ari vyiza. Igihe Imana yafata ingingo yo guhonya abantu babi bo muri iyo si, yararondeye ukuntu yokingiye Nowa be n’ibikoko vyo kw’isi. Ni ko kumubwira ngo yubake ubwato, buno bukaba bwari bumeze nk’igisandugu amahero. Muri ubwo bwato ni ho Nowa n’umuryango wiwe bozigamiwe, bari kumwe n’ubwoko bwinshi bw’ibikoko, bakarokoka umwuzure wokwiye kw’isi yose wari wegereje. Nowa yaragamburukiye Imana. Mu myaka mirongo Nowa yamaze ariko arubaka ubwo bwato, yari n’“umwamamaji w’ubugororotsi.” (2 Petero 2:5) Yaraburiye abantu ku bijanye n’Umwuzure wari wegereje, ariko bamuraba nk’ico imbwa ihaze. Igihe carashitse c’uko Nowa n’umuryango wiwe binjira muri bwa bwato hamwe n’ibikoko. Imana yarugaye umuryango w’ubwo bwato, imvura iraheza iracuncubuka.

Haheze imisi 40 n’amajoro 40 hariko haragwa imvura y’isegenya gushika n’aho isi irengerwa n’amazi. Ba banyakibi barakuweho. Haciye amezi nk’angahe, amazi amaze kugabanuka, bwa bwato bwaciye busigara buhagaze ku musozi. Mu nyuma, abari muri ubwo bwato barashoboye kubuvamwo badora, babumazemwo umwaka wose. Nowa yarashikaniye Yehova ikimazi kugira ngo amukengurukire. Imana yarakiriye ico kimazi mu gukura amazinda Nowa n’umuryango wiwe yuko itokwigeze isubira guhonya icitwa ubuzima kiri kw’isi yose ikoresheje umwuzure. Yehova yaratanze umunywamazi bwa kintu kiboneka kivyemeza, uno ukaba wobaye icibutsa c’uwo muhango uhumuriza.

Inyuma y’Umwuzure, Imana kandi yarahaye abantu ayandi mategeko. Yarabarekuriye kurya inyama z’ibikoko. Ariko, yarabujije kurya amaraso. Vyongeye, yarategetse uruvyaro rwa Nowa gukwiragira kw’isi yose, yamara hari abagambaraye iryo tegeko. Abo bantu bariyunze hamwe bayobowe n’uwitwa Nimurodi maze batangura kwubaka umunara uhambaye mu gisagara c’i Babeli, ahahavuye hitwa Babiloni. Intumbero bari bafise yari iyo kwiyamiriza itegeko ry’Imana ryabasaba gukwiragira kw’isi yose. Ariko abo bagarariji Imana yarabatesheje uwo mugambi mu kuyoberanya ururimi rwabo maze ituma bavuga indimi zitandukanye. Kubera ko batari bashoboye kwumvikana, barahevye kwubaka uwo munara baca barasabagira.

​—Bivugwa mw’Itanguriro ikigabane ca 6 gushika ku ca 11; Yuda 14, 15.