¿Llakikunchu Dios roqt’u runakunamanta?
Kay pachapiqa 70 millón runakuna jinan roqt’u kanku, paykunaqa jujkunawan rimanankupaqqa makinkuwan señaskunata ruwanku, señaspi rimaykunaqa 200 clase masmi kan. Roqt’u runakunaqa jujkunaq pisichasqanmi kanku, wakinmanta yachasun:
“Pachantinpin roqt’u runakunaq, sasata uyariq runakunaq derechonkuta mana respetankuchu” (Asociación Nacional de Sordos de Estados Unidos).
“Wajcha nacionkunapiqa manan roqt’u runakunapaqqa kanchu educacionpas llank’anapas, chaymantapas paykunaqa juj runakunamantapas aswan wajchan kanku” (Federación Mundial de Sordos).
¿Llakikunchu Dios roqt’u runakunamanta? ¿Imaninmi Bibliapi roqt’u runakunamanta? ¿Imaynatan Jehová Diospa testigonkuna roqt’u runakunata yanapashanku?
¿Llakikunchu Dios roqt’u runakunamanta?
Bibliapiqa willanmi Jehováa Dios roqt’u runakunamanta llakikusqanta. Payqa munanmi roqt’u runakunata allinta rikunanchista, chaymantapas Diosqa munanmi roqt’u runakuna paymanta yachanankuta.
Bibliapin nishan: “Aman roqt’u runataqa ñakankichu”, nispa (Levítico 19:14).
¿Imatan chaywan nishan? Ñaupa Israel llaqtaman qosqan kamachikuypipas karqanmi leykuna roqt’u runakunata allinta rikunapaq.
Bibliapin nishan: “Diosqa lliutapas igual-llatan rikun”, nispa (Hechos 10:34).
¿Imatan chaywan nishan?: Jehová Diosqa llapa runakunamantan llakikun, waj llaqtamantaña kaqtinkupas, ima simitaña rimaqtinkupas, roqt’u runaña kaqtinkupas.
Bibliapin nishan: “Jesusqa llapa llaqtakunata llapa ayllukunatawanmi purirqan, [...] Diospa gobiernonmanta allin willakuykunata willaspa”, nispa (Mateo 9:35).
¿Imatan chaywan nishan?: Jesusqa astawanqa rimarqan Diospa gobiernon imakunatachus ruwananmantan, chay gobiernoqa roqt’u runakunaq allinninpaqpas imaymanatan ruwanqa (Mateo 6:10).
Bibliapin nishan: “Jesusqa roqt’ukunatapas uyarichirqanmi, mana rimay atiqkunatapas rimarichirqanmi”, nispa (Marcos 7:37).
¿Imatan chaywan nishan?: Diospa gobiernon kamachimuqtinqa roqt’u runakunan uyaripunqaku, mana rimay atiqkunapas rimaripunqakun. Juj kutipin Jesusqa juj roqt’u runata qhaliyachirqan, manaraq qhaliyachishaspan ichaqa makinkunawan señasta ruwaspa willarqan qhaliyachipunanpaq (Marcos 7:31-35).
Bibliapin nishan: “Roqt’ukunaq ninrinpas kicharikunqan”, nispa (Isaías 35:5).
¿Imatan chaywan nishan?: Jehová Diosqa willachirqanñan roqt’u runakunaq uyaripunanta (Isaías 29:18).
¿Imaynatan Jehová Diospa testigonkuna roqt’u runakunata yanapashanku?
Jehová Diospa testigonkunaqa pachantinpi tiyaq roqt’u runakunamanmi willashayku jamuq tiempopi sumaq kausay kananmanta. ¿Imakunatan ruwashayku roqt’u runakunata yachachinaykupaq? Pachaj clase más makillawan rimaykunapin videokuna kashan Bibliata leenapaq, estudianapaq ima. Chaymantapas yachayta munaq roqt’u runakunamanmi Bibliamanta yachachishayku, chaymantapas juñunakuykunatan ruwashayku makillawan rimaqkunapaq. Tukuy chaykunataqa gratisllan ruwashayku, Jesusmi nirqan: “Gratisllan chaskirqankichis, gratisllataqmi qonkichispas”, nispa (Mateo 10:8).
¿Maypin chay yanapaykunata tariwaq? Chaypaqqa kaykunaman jaykuy:
JW.ORG nisqa paginaman. Chaypin maskhawaq mayqen señas rimaypichus munanki chayta, jinaspa chaypi maskhawaq imachus yachay munasqaykimanta.
Chaymantapas celularniykipi JW Library nisqa aplicacionta descargawaq, chaypin qhawawaq pachaq más makiwan rimaypi videokunata.
¿Ima yanapaykunan kashan Bibliata estudianaykipaq?
Señas simipi Biblia. Roqt’u runakunapaq ñaupaq kaq lloqsimuq Bibliaqa Traducción del Nuevo Mundo lenguaje de señas americano nisqa Biblian karqan. Kunanqa Traducción del Nuevo Mundo nisqa Bibliaqa imaymana clase señaspin kashan, wakin señaspiqa llapa Biblian kashan, wakinpitaq Nuevo Testamentolla. (Ima señaskunapichus kashan chayta yachanaykipaq qhaway “Traducción del Nuevo Mundo askha señas simikunapi” nisqa recuadrota).
Imaynatas Bibliata señaspi t’ijrakun chayta yachanaykipaq qhaway “La Traducción del Nuevo Mundo completa en lenguaje de señas americano ya está disponible” nisqa videota.
Sichus lenguaje de señas nisqapi Bibliata leeyta munanki chayqa descargawaqmi JW Library nisqa aplicacionta, chaypin facil-llata tarinki Bibliamanta ima textotapas.
Dmytrowan Vitawanqa roqt’un kanku, iskaynin wawankunan ichaqa mana roqt’uchu kanku. Chaywanpas paykunaqa wawankuwan kuskan sapa p’unchay señaspi Bibliamanta yachashanku.
Bibliamanta yachanapaq videokuna. Jehová Diospa testigonkunaqa askha videokunatan ruwashayku roqt’u runakunapaq, chaymi paykunata yanapan Bibliaq nisqanta entiendenankupaq, chaypi kaq consejokunata kasukunankupaq ima. ¿Pikunapaqmi chaypi consejokuna kashan?
Sapankaman Bibliamanta yachachiyku. Noqaykuqa atisqankuman jinallan señaspi yachachiyku Bibliamanta pi munaqmanpas, sapankatan juj iñiqmasiyku yachachin. Sichus yachayta munanki imaynatachus yachachisqaykuta chayqa, niwaqmi mayqen iñiqmasiykutapas yachachinasuykipaq, chay cursokunaqa gratisllan.
Jeson Senajonon runan Filipinas llaqtapi tiyan, paytan Bibliamanta yachachirqayku, chaymi yanaparqan Dioswan amigontin kananpaq. Paymantan kaypi yachawaq.
Mario Antúnez runan Honduras llaqtapi tiyan, payqa juj iglesia evangelicamantan pastor karqan. Imaymanatan Bibliamanta tapukuq, jinaspa chaykunamanta pisi-pisimanta yacharqan, paymanta yachanaykipaq leey “Tenía muchas preguntas y pocas respuestas” nisqa yachachikuyta.
Juñunakuyniyku, asambleayku. Askha llaqtakunapin makiwan rimaqkunapaq juñunakuykuna aparikun, chayqa sapa semanan aparikun, chaypiqa Diostan adorayku, paymanta ima yachayku. Chaymantapas sapa watanmi jatun juñunakuykuna aparikullantaq, chay juñunakuykunatan asamblea nispa niyku, chaypipas Bibliamantan yachayku. Chay juñunakuykunapiqa yachachillaykutaqmi mana rikuq roqt’u runakunatapas. Chaymantapas ñausa runakunapaqmi braile nisqapi qelqakunata gratislla qoyku.
Llaqtaykipi juñunakuyniyku wasita maskhanaykipaq.
Asambleayku jayk’aqchus aparikunanta yachanaykipaq.
Jesuspa wañupusqantan watapi juj kutita yuyariyku, chay juñunakuyman jamunaykipaq kaypi maskhawaq.
José Luis Ayalaqa Mexicopin tiyan. Payqa nacesqanmantapachan roqt’u karqan, qhepamantaq ñausaman tukupurqan. Payqa jujkunaq yanapayninwanmi Bibliamanta allinta yachachishan, paymantan kaypi yachawaq.
a Diospa sutinqa Jehová nisqan (Salmos 83:18). Qhaway “¿Pitaq Jehová Diosri?” nisqa yachachikuyta.