Pachantinpi gobiernokunan askha qolqeta gastashanku soldadokunapi armakunapi ima | ¿Imatapas Biblia willashanmanchu chaymanta?

2022 watapin pachantinpi gobiernokuna ancha askha qolqeta (2,24 billones) dolarninpi gastarqanku soldadokunapi guerrapaq armakunapi ima. Chayqa karqan Rusia Ucraniawan guerrapi kasqankumantapachan. 2023 watapin abril killapi Instituto Internacional de Estudios para la Paz de Estocolmo (SIPRI), nisqan khaynata willakamun 2022 watapi imachus pasasqanmanta:

• Europa ladopi gobiernokunaqa 13% más qolqetan gastarqanku 2022 watapi soldadokunapi armakunapipas, chayqa manan rikukurqanchu 1991 watamantapacha.

• Rusia nacionpas 9,2% más qolqetan gastarqanku armakunapi. Chaywanqa quinto lugarpi kashaspan kunanqa tercer lugarpi kapun llapa nacionkunamanta.

• Estados Unidos nacionmi llapa nacionkunamantapas astawanqa qolqeta gastashan armakunapi. Llapa nacionkuna gastasqankumantaqa chay nacionmi 39% qolqeta gastarqan.

SIPRI nisqapi llank’aqkunata yanapaq Dr. Nan Tian nin: “Kay watakunapitaq gobiernokuna soldadokunapi armakunapi ima astawan qolqeta gastashanku chayqa manan thaj kausay kanñachu aswanpas manchasqallañan runakunaqa kausashanku”, nispa.

Bibliapiqa willarqanñan atiyniyoq gobiernokuna paykuna pura qhawanakunankuta, willallantaqmi pillas cheqaq thaj kayta apamunqa chaytapas.

Bibliaqa willarqanñan guerrakuna yapakunanta

• Bibliaq nisqanman jinaqa tukukuy tiempokunapiñan tiyashanchis (Daniel 8:19).

• Daniel libropin willarqanña atiyniyoq nacionkuna cheqninakunankuta. Chay nacionkunaqa maqanakunankun karqan mayqenchus aswan atiyniyoq kasqankuta rikuchinankupaq. Chaypaqqa askha qolqetan gastananku karqan (Daniel 11:40, 42, 43).

Astawan yachayta munanki chayqa qhaway Daniel 11 capitulomanta profeciakuna junt’akusqan nisqa videota.

¿Pillan thaj kausayta apamunman?

• Biblian willan Dios gobiernokunata ch’usaqyachipunanta. Paymi “juj gobiernota sayarichinqa, chay gobiernoqa manan jayk’aqpas ch’usaqyachisqachu kanqa nitaqmi juj runaq makinmanchu qosqa kanqa. Chay gobiernon llapa gobiernokunata ñut’uspa chinkachipunqa, jinaspa chay gobiernollaña wiñaypaq kapunqa” (Daniel 2:44).

• Jehováa Diosmi pisi tiempomanta cheqaq thaj kausayta apamunqa. ¿Imaynatan chayta ruwanqa? Gobiernonwanmi guerrakunata tukuchipunqa, armakunatan ñut’unqa (Salmos 46:8,9).

Imakunatawanchus Diospa gobiernon ruwanqa chaymanta astawan yachanaykipaq leey “El Reino de Dios traerá “paz en abundancia””, nisqa yachachikuyta.