Computadorakunaqa runa jinañas piensashanku, ¿allinninchispaqchu chay kanman? ¿Imatapas Biblia chaymanta willashanmanchu?

Computadorakunaqa runa jinañan piensashanku imatapas ruwashanku, chaytan nikun “inteligencia artificial” nispa. Kay pachapi kamachikuqkuna, tecnología nisqamanta yachaq runakuna, científico runakuna iman chay “inteligencia artificial” nisqamanta rimarqanku. Paykunaq nisqanman jinaqa runa jina piensaq computadorakunaqa yanapawasunmansi, ichaqa llakisqan kashanku wakin runakuna chay “inteligencia artificial” nisqata mana allinpaq utilizanankumanta.

• Kamala Harris nisqanmanta yachasun, payqa Estados Unidospi vicepresidentan. Paymi nin: “Chay “inteligencia artificial” nisqa imaymana ruway atisqanqa admirakunapaqmi. Chaykunata allinta utilizaqtinchisqa yanapawasunmanmi, mana allinta utilizaqtinchismi ichaqa imaymana sasachakuykunata apamunman. Chay kausan thaj kausay chinkanman, manañan jujkunapipas confiasunmanñachu, runakunaq derechonpas manañan valepunmanñachu”, nispa (4 mayo 2023).

• Doctor Frederik Federspielmi pachantinmanta juj t’aqa doctorkunata umallishan, paykunan ninku: “Chay runa jina piensaq computadorakunaqa saludninchispin yanapawasunman, mayninpin ichaqa chay kikin computadorakuna mana allinta ruwawasunman”, nispa (BMJ Global Health, 9 mayo 2023).a

• The New York Times nisqa qelqan nin: “Kay tiempopiqa chay runa jina piensaq computadorakunan llulla willakuykunata internetpi ch’eqerichishanku. Yaqapaschá pisi tiempollamanta chay computadorakunaña ima llank’aytapas ruwanqaku, chaywantaq runakuna mana llank’anayoq tarikunqaku. Chay “inteligencia artificial” nisqaqa llapa runakunatan imaymana sasachakuykunapi churawasunman”, nispa (1 mayo 2023).

Chay “inteligencia artificial” nisqa allinninchispaqchus kanqa icha manachus chayta yachananchispaqqa suyakunanchismi kanqa. Ichaqa, ¿imatapas Biblia chaymanta willashanmanchu?

¿Imaraykun runakunaq ruwasqankuna mana llapanpipunichu allin?

Bibliaqa sut’itan rikuchin imaraykus tecnología nisqapi runakunaq ñauparisqan manapuni llapanpichu allinninchispaq kasqanta:

1. 1. Runakuna allinta yuyaykuspaña imatapas ruwanman chaypas, manan yachankuchu imapichus chay tukunqa chayta.

   • Proverbios 14:12 nin: “Kanmi runaq piensasqanman jina allinman rijch’akuq ñan, chay ñanmi ichaqa wañuyman apan”, nispa.

2. 2. Runakunaqa manan yachanchischu llank’asqanchiskunata jujkuna allinpaqchus icha mana allinpaqchus utilizanqaku chayta.

   • Eclesiastés 2:18, 19 nin: “Chaymantapas kay pachapi kallpawan llank’aspa imaymana tarisqaytan cheqnikurqani, llapa chaykunata qhepayta jamuq runaman saqepunay kasqanrayku. ¿Pin yachanman chay runa yachayniyoqchus icha mana yuyayniyoqchus kanqa chayta? Imaynaña chay runa kanqa chaypas, paymi kay pachapi may sasawan llapa tarisqayta jap’ikapunqa. Chaypas yanqapaqmi”, nispa.

Chhaynapin runakunaqa tarikunku Diospa ñanninmanta karunchakusqankurayku.

Jehová Diospin confiananchis

Jehová Diosninchisqa manan jinallataqa qhawanqachu runakunapas runakuna jina piensaq computadorakunapas kay pachata chinkachinantaqa.

• Eclesiastés 1:4 nin: “Kay pachaqa kaqllan wiñay-wiñaypaq kashan”, nispa.

• Salmos 37:29 nin: “Chanin runakunan kay jallp’ataqa jap’ikapunqaku, paykunan wiñaypaq chaypi tiyanqaku”, nispa.

Jehová Diosqa Bibliaq yachachikuyninkunawanmi juj mosoq pachaman pusawasun, chaypiqa thajpin mana imata manchakuspan kausasun. Chaymanta Bibliaq astawan willasqanta yachanaykipaq qhaway “¿Imatan ruwanayki jamuq tiempopi allinta kausanaykipaq?” nisqa yachachikuyta, chaymantapas qhaway “La esperanza real de un mañana mejor” nisqa yachachikuytawan.