Jehová Dios yanapawan allin runa kanaypaq

Aswan admirasqaqa kasharani chaypi llank’aq runakunamantan. Paykunaqa kasqaku wayna hermanokuna sipas hermanakuna iman. Paykunataqa kaq ruwaykunallatapas ruwashankuman jinatan qhawarirqani. Paykunaqa manan uma oqariq jinachu, ni jatunchakuq jinachu imatapas ruwaqku. Aswanmi paykunaqa imachus ruwanankuta kusisqa ruwaqku. Paykunata rikuspan yacharqani imaynas Jehová Diostaqa humilde sonqowan servinay chayta.

Jehová Diosmi yanapawarqan aswan sumaq sonqo runa kanaypaq, chhaynapi payta astawan servinaypaq. Ichaqa ñaupaqtaqa willarisaykichis imaynatas maskharani Diosta budista runa kashaspay chayta.

ERQECHALLARAQ KASHASPAY DIOSTA MASKHANI

Noqaqa Estados Unidos nacionpi kaq Chicago ladopi Illionis llaqtachapin nacerqani wiñarqanipas. Noqaykuqa tawan kayku, noqan kuraq kaq kani. Papaywan mamitaywanqa Japón nacionmantan Chicago llaqtaman astakamusqaku. “Chaypin allinta kausasun” nispas chayman jampusqaku. Paykunaqa noqayku allinta kausanaykupaqsi allin educacionniyoq kanaykuta munaspas chayta ruwasqaku.

Papaypas mamitaypas budismo nisqapin creeqku. Mamitaypa wiñasqan wasipiqa budismo nisqa iglesias kasqa. Papanpas iskaynin turankunapas monjekunas kasqaku. Chaymi noqaqa juch’uyniymanta pacha budismo nisqapi wiñarqani. Colegioymanta chayamuspapas chay Buda idolomanmi inciensota q’apachiq kani, arrozta unuta iman ofrendata jina jaywaq kani. Domingonkunataq iglesiaman riq kayku, chaypin takiq kayku wasiypi kaq jina idoloman. Ichaqa chaypi idoloqa aswan jatunmi karan juj colortaqmi karanpas.

Qanchis watachaypi kashaspaymi wasiypi kaq Buda idolota qhawayuspa noqallataq tapukurqani, “¿imataq noqamantari kanqa wañupuqtiy?” nispa. Budismopiqa yachachiwarqanku “pipas wañupuspaqa espíritu jinan kausashan”, nispan. Chaymi niq kani “jayk’aqllapas wañupusaq chayqa espíritu jinachá kausasaq, ichaqa manañachá runa jinañachu ima munasqaytapas ruwasaq” nispa. Maytan chaymanta llakikuq kani.

Waynacha kashaspayqa manan allinpaqchu qhawariq kani Buda idolomanta mañakusqankuta. Imapas faltawashanman jinan noqapas kaq kani (Mat. 5:3). Sonqoy ukhupiqa “kanpunichá juj tukuy atiyniyoq kausaq Diosqa, reqsiytan munani” nispan nisharani. Chaymi King James nisqa Bibliata rantikurqani tapukusqaykunamanta yachanaypaq. Chay Bibliaqa mauk’añan karan, chaytaqa rantirqani budista nisqa fiestapin.

17 wataypi kashaqtiymi Wilson Bashou sutiyoq hermano callepi purishaqtiy asuykamuwarqan jinaspa tapuwarqan: “¿Yachankichu imatas Dios prometewanchis jamuq tiempopaq chayta?”, nispa. Chaymantan unayta rimarqayku. Chaymantan chay hermanoqa Apocalipsis 17:1 textota leewaran chaymantataq tapuwaran “ima ninantan nishan ¿askha unukunapi tiyaq atiyniyoq ramera warmi? nispa nisqanwan” nispa. Noqan ichaqa mana ima niytapas atiranichu. Chaymi payqa qhawachiwarqan 15 versiculota jinaspa niwarqan: “Chaypi askha unukuna nisqanqa runakunawanmi tupan”, nispa. Chaywanmi noqaqa mayta admirakurani jinaspa nirqani: “Jehová Diospa testigonkunaqa allintamá Bibliataqa estudiasqaku”, nispa. Manaraq ripushaspan payqa regalawarqan “La verdad que lleva a vida eterna” nisqa librota, chay libron vidayta cambiaran.

Chunka p’unchay qhepamantaq juñunakuyman rirqani, chaypiqa munaytan chaskiwarqanku, chaytaqa manan jayk’aqpas qonqasaqchu. Chaymantapachan juñunakuykunamanqa riyta qallarirqani, chaymantataq hermano Wilsonwan Bibliata estudiayta qallarirqani. Biblia estudiayqa anchatan gustawaran chaymi mayninqa pusaq horasta jina estudiaq kayku. Papaywan mamitaywanqa manan munarqankuchu Biblia estudianayta, chaymi jark’akuwarqanku. Noqan ichaqa estudiasqayman jina astawan Diosta reqsirqani jinaspa 1983 watapi bautizakapurqani.

PRECURSOR KANAYPAQ UNIVERSIDADTA SAQEPUNI

Bautizakusqay tiempopiqa juj allin universidadpin estudiasharqani doctor kanaypaq. Papaywan mamitaywanqa imaymanatan ruwarqanku allin estudioyoq kanaypaq. Atiymanmi karan estudiashallaytaqa ichaqa tukuy tiempoywanmi Jehová Diosta serviyta munasharani.

Papaymi ichaqa niwaran: “Sichus estudioykita saqenki chayqa wasiymantan ripunki”, nispa. Chay niwasqanwanqa nishu llakisqan kasharani. Paykunataqa anchatan munakurani chaymi mana llakichiyta munasharanichu. Sapa kutillanmi tutakunata jinaña universidadpa pationta riq kani. Chaypin mañakuq kani: “Diosníy Jehová imatan ruwasaq, ama jinachu yanapaykuway”, nispa. Chay qhepamanmi estudioyta saqepurani, chaymantan papay wasiykumanta qarqopuwaran. Jinan noqaqa ripurani jinaspa hermano Wilsonta wajarani chaykunata willakunaypaq. Payqa paywan tiyanaypaqmi niwaran. Paypa wasinmanmi ripurani juj bolsapi cosasniykunata apariykuspa. Ichaqa thajmi kasharani, sonqoypiqa “allintan kaytaqa ruwashani” nispan nisharani.

Noqaqa imaynan juj pichinkuchata jaulanmanta orqorunkuman jinan kasharani; libren kapurqani tukuy tiempoywan predicanaypaq. Chaymi 1984 watapi precursor kayta qallarirqani.

Chay watakunapin Jehová Diosqa allinta yanapawarqan ama pisipaspa ñaupaqllaman purinaypaq. Juj p’unchaymi mana munasharanichu predicaq lloqsiyta, manan pipas kasharanchu tardenkunata compañawaq. Ichaqa lloqsiranipunin, yaqa iskay hora jinañan predicasharani. Sapallaymi chaypi purisharani, sayk’usqa iman kasharani, paramuyta iman munasharan, chaymi nirani: “Ripushaqchá”, nispa. Ichaqa último kaq edificioman jaykuspan kinsa kaq pisoman seqarani. Chaypin Filipinas nacionmanta juj joven kashasqa, payta qhawayuspan noqaqa piensarani “manachá payqa uyariwayta munanqachu” nispa. Ichaqa payqa uyariwarqanmi jinaspan Biblia estudiayta qallarirqayku. Tiempowanqa iñiqmasinchismi payqa kapurqan.

BROOKLYN BETELPI ASTAWANRAQ YACHANI

Hermano Wilsonwanqa iskay watan tiyarqani chay qhepamanmi 1985 watapi Brooklyn Betelman invitawarqanku. Qallariypi nimusqay jina, chaypiqa librokuna ruwaypi yanapakunaypaqmi niwarqanku. Juj p’unchaymi llak’asharani librokunaq tapan ruwaq maquinapi, chayllamanmi chaykunata askhata malograrqani. Chaymanta encargakuq hermanokunan niwarqanku imachus pasaran chayta willakunaypaq, jinan noqaqa willakurqani. Ichaqa chaymanta encargakuq jujnin kaq hermanon munayllata niwarqan: “allinpunin disculpa mañakuyqa”, nispa. Chayta niwasqanwanmi allinta yacharqani imaynas disculpa mañakuyqa allinpuni chayta, imataña mana allintachu ruwarusunman chaypas mañakunan disculpataqa.

Betelpi kuraq hermanokuna imayna kasqankuta rikuyqa allintan yanapawarqan juj iñiqmasikunata sumaqta qhawarinaypaq. Juj kutinmi Betelpi mijuna horasta tiyasqay mesallapitaq hermano Milton Henschel tiyasharan. Chay p’unchayqa askhan Betelta mijuq jamusqaku. Mijuna serviqkunapas apuraymi servimusharanku, noqaykun ichaqa “susigollawanmá servikamushanku” nispa nisharayku. Hermano Miltontaq mana imata nispalla jatarirqan, jinaspa serviqkunawan kuska unuta, t’antata ima servimuyta qallarirqan. Chay hermanoq humilde sonqo kasqanmi yuyarichiwaran imaynas Jesuspas servirqan apostolninkunata chayta, chayqa umallaypin kashan (Juan 13:​3-5).

JAPONÉS SIMITA YACHANI

1987 watapin Japón nacionta viajarqani. Chaypi hermanokuna allin llank’aq humilde sonqo kasqankuta rikuspan admirakurqani, chaymi paykuna yanapayta munarani ichaqa manan yacharanichu paykunaq rimayninkuta. Papaypas mamitaypas manan yachachiwarqankuchu chay simi rimayta. Betelpin Michiko Oda sutiyoq hermana qhawaykuwaspa niwarqan: “Japonés simita estudiay”, nispa. Chaytapunitaqmi ruwarqani, manan piensallaranipaschu chay hermanaq niwasqan viday cambianantaqa.

Killakuna qhepamanmi Nueva York llaqtapi juj iñiq t’aqaman astakapurqani. Chay iñiq t’aqaqa Japonés simipin karqan, chay simi yachasqayqa allintan yanapawarqan Jehová Diosta astawan servinaypaq. 1989 watapin Los Ángeles California llaqtapi Japonés simi rimaypi ñaupaq kaq asambleayman rirqani. Chay asambleapin Miwako Onami sutiyoq juj hermana munayta ñaupaqmanta actuamurqan, may admirasqan paywan kasharani.

1992 watapin Miwakowan casarakapurqani chaymantataq iskayniyku Brooklyn Betelpi servirqayku. Payqa may munakuqllañan, jujkunatapas tukuy sonqomantan yanapan, chhayna kasqanmi noqatapas yanapawarqan jujkunata allinta qhawarinaypaq. Payqa maytan kusichiwan allintan yanapawanpas. Esposayqa Jehová Diospa sumaq regalonmi.

JAPÓN NACIONMAN RIPUYKU

Esposaypa papanpas mamitanpas Japón nacionpin tiyaranku, ichaqa iskayninkun nishuta onqopuranku. Chaymi 1999 watapi Japón nacionpi sucursalman astakapurayku chhaynapi paykunata cuidanaykupaq.

Japón nacionpi Betelpi kaq hermanokunaqa sumaqtan chaskiwarqanku. Chaypi kashaspayqa hermanokunaq hermanakunaq imayna kasqankun yanapawarqan paykuna jina kanaypaq; munakuq qoykukuq kanaypaq ima. Paykunaqa llank’aspankuqa juj nisqallan tukuy yuyay llank’anku. ¿Imatan chaywan nishani? Japón nacionpi runakunaqa paykunallapi piensanankumantaqa juj nisqallan llank’anku; jujkunatapas munaytan yanapanku. Paykunaq imayna kasqankun noqatapas yanapawarqan humilde sonqowan llank’anaypaq. Juch’uy ruwayllapiña yanapakushani chaypas chaytaqa Jehová Diospaq jinapuni ruwanaypaq.

Chhaynaña karqan chaypas mayninpiqa manan entiendeqchu kani imaraykus wakin ruwaykunata jujniraymanta ruwakuq chayta. Chaypaqqa pacienciakuytan yachanay karan chhaynapi ama rimapakuspa imatapas ruwanaypaq. Tiempoq pasasqanman jinaqa yachakapuranin chhayna llank’ayman. Chaymantapas, tiempoq pasasqanman jinaqa allintan yacharani: Jehová Diosqa bendecinpunin paypa munayninman jina ruwaq runataqa, llaqtanpi ima nikusqantapas kasukuq runataqa. Jehová Diospunin kay llaqtantaqa pusarishan.

Imaynan Moisesqa profeta kananpaq yanapayta chaskiran chhaynatan noqapas Betelpi yanapayta chaskirqani. Moisestaqa Jehová Diosmi yanaparqan humilde sonqo kananpaq munakuq kananpaq ima. 40 watan payqa ovejata michispa purirqan. Noqapas Moisés jinan allin educacionta chaskirqani. Jujkunamanta aswan allinpaq jinan qhawarikuq kani, orgulloso iman kaq kani. Betelpi kaspan ichaqa yacharqani humilde sonqo kayta Jehová Diospi confiayta ima. Imaynan Jehová Dios Moisesta yanaparqan munay runa kananpaq, chhaynallatataqmi noqatapas yanapawarqan sumaq sonqo runa kanaypaq.

Esposaypa papanta mamitantawanqa wañukapunankukaman cuidarqayku, 24 wata junt’an cuidarqayku. Chay watakunapiqa hermanokunaqa sapa kutillanmi wajamuwaqku, llakisqata rikuwaspankun hospitalta ima visitamuwaqku. Esposaypa mamitan Masakoqa nishutan onqopuran ñak’aytan sayariqpas puririqpas. Paypaqqa manan facilchu karqan juñunakuykunamanpas predicacionman riypas. Wañupunanpaq jinaña kashaspaqa silla de ruedasllapiñan puriq. Chhaynaña kasharqan chaypas payqa Jehová Diostaqa munakushallarqanmi, chaymantapas atisqan ratukunapiqa kusisqan Jehová Diosmantaqa willaq. Paypa ejemplonqa maytan yanapawarqan ima sasachakuypiña tarikuspapas kusisqalla Jehová Diosta servinaypaq.

2024 watapin ichaqa qonqaylla vidayku cambiapurqan. Predicacionpi yanapakuq rinaykupaqmi niwarqanku, chay kutikamaqa ñan 30 wataña Betelpi servisharqayku. Kunanqa Okinawa islapin kashayku, chaypin precursor especial jina servishayku. Chay islachapiqa soldadokunaq kasqanku cercallapi kaq runakunaman iman visitayku. Betelpiqa imaymanatan yacharqayku, chay yachasqaykun yanapawashanku llank’anaykuta allinta junt’anaykupaq. Tukuy atisqaykutan kallpachakushayku tiempota ama usuchispa Diospa munayninta ruwanaykupaq. Paypa bendicioninwanmi askha runakunaman estudiota qoshayku, paykunaqa juj familia jinan noqaykupaqqa kanku. Chaymantapas tukuy atisqaykutan kallpachakushayku runakunata astawan munakunaykupaq. Noqaykuqa sapa p’unchaymi Jehová Diosta “gracias” niyku kay sumaq llank’ay qowasqankumanta.

JEHOVÁ DIOSQA YANAPAWASHALLANMI

Familiayqa manañan jark’awanchu Dios servinaytaqa, chaywanpas paykunaqa manan mayqenninkupas Diosmanqa asuykunkuraqchu. Chhaynaña chaypas Jesuspa nisqanpi piensaymi yanapawan, paymi familiankuta saqeqkunamanta rimashaspa niran: “Pachaj kutitawanraqmi kay tiempopi chaskinqa [ . . . ], wayqekunata, panakunata, mamakunata, wawakunata ima”, nispa (Marcos 10:​29, 30). Chayqa cheqaqpunin, mundontinpiqa askhan familiaykuqa kashan. Paykunaqa sumaqtan rikuwanku, kikin familianpas kaykuman jinatan qhawariwanku. Paykunaqa askhapunin kanku, manan paykunataqa llapantaqa yuyariytapas atinichu.

Hermano Wilsonpa qowasqan librotaqa kunankamapas waqaychashallaniraqmi. Chay azul librochan yuyarichiwan imaynas Jehová Diosqa munakuywan llaqtanman pusamuwarqan chayta (1 Crónicas 28:9). Noqaqa mañakullanipunin Jehová Diospa yanapayninta astawanraq sumaq sonqo kanaypaq, jujkunamanpas wiñay kausay ñanta reqsichinaypaq.