Jujkunaman Jehová Diosta allinta reqsichisun

1. ¿Imaynan tarikunchis estudiantekuna Diospa llaqtanpi ñaupariqtinku?

¿IMAYNAN tarikunchis Bibliamanta yachachisqanchis runa Diospa llaqtanpi ñaupariqtin? ¡May kusisqan kanchis ¿riki?! Arí, paykuna juñunakuyman riyta qallariqtinku, predicaq riyta qallariqtinku, bautizakapuqtinku imaqa maytan kusikunchis. Yachasqanchis jinapas Jehová Diospa yanapaynillanwanmi estudiantekunaqa iñiyninpi astawan wiñarinku. Chaymi Jehová Diosta agradecekunanchis tukuy chaykunamanta (1 Cor. 3:​5-9; 3 Juan 3, 4).

2. ¿Estudiantekuna ima ruwanankutan Jehová Dios munan? (1 Timoteo 2:​3, 4).

² Jehová Diosqa “llapa runapas salvasqa kanankutan munan, cheqaq kaqtapas allinta yachanankutan munan” (leey 1 Timoteo 2:​3, 4). Arí, chaypi nisqan jina Jehová Diosqa llapa runakunapas “cheqaq kaqta” yachanankutan munan, payta allinta reqsinankutan munan. Chaymantapas imakunatas Dios ruwapuwasunchis chayta allinta yachanankuta iman munan (Jer. 9:24). Chaymanta rimaspan Bibliamanta allinta yachaq runa nin: “Griego rimaypiqa “cheqaq kaqmanta” rimaspaqa manan yachayllamantachu rimashan, aswanpas imaynas chay yachasqan juj runata yanapanman kausayninpi cambiananpaq chaymanta iman rimashan” nispa.a Rikusqanchis jina estudiantekunaqa Jehová Diosta reqsisqankuman jinan kausayninkupi cambiokunata ruwayta qallarinku. Yachasqankuman jina kausaspaqa wiñay kausaytapas chaskinqakun (Juan 17:3).

3. ¿Imakunamantan kaypi yachasun?

³ Jehová Diosmi juj munay llank’ayta qowarqanchis, chay llank’ayqa jujkunaman paymanta yachachimuymi. Chaymi kaypi yachasunchis kay kinsa tapuykunamanta. 1) ¿Imaraykun estudiantekuna Jehová Diosta allinta reqsinanku? 2) ¿Imakunata ruwaspan estudiantekunata reparachisunman imayna Jehová Dios kasqanta? 3) ¿Imaynatan paykunata yanaparisunman yachasqankuman jina kausanankupaq?

¿IMAYNATAN YANAPASUNMAN ESTUDIANTEKUNATA?

4. Marcos 12:30 textoq nisqan jina, ¿ima yuyaywanmi estudiantekunata yachachinanchis?

⁴ Jatun kamachikuykunamanta rimashaspan Jesús nirqan: “Jehová Diosniykitan munakunki tukuy sonqoykiwan, tukuy almaykiwan, tukuy yuyayniykiwan, tukuy kallpaykipiwan”, nispa (leey Marcos 12:30). Juj estudiante chayta ruwananpaqqa Jehová Diostan allinta reqsinan. Jehová Diosta allinta reqsinqa chayqa, munakunqan payta, paytan serviyta munanqa chhaynapitaq bautizakapunqa. Manan amigonchis kayta munasqanraykullachu nitaq Bibliapi wakin yachachikuykuna gustasqanraykullachu chaytaqa ruwanqa. Chhaynaqa, ¿ima yuyaywanmi yachachinanchis estudiantekunata? Paykunataqa yanaparinanchis Jehová Diosta allinta reqsinankupaq tukuy sonqo payta munakunankupaq iman.

5. Juj estudiante Jehová Diosta tukuy sonqo munakunqa chayqa, ¿imatan ruwanqa?

⁵ ¿Imaraykun estudiantekuna Jehová Diosta munakunanku? Munakuyqa kasukuymanmi tanqawanchis. Estudiantekuna Jehová Diosta allinta reqsinqaku chayqa munakunqakun payta, chay munakuytaq paykunata tanqanqa Jehová Diosta kasukunankupaq. Jesuspas munakusqanraykun Diostaqa kasukuq. Pay kikinpunin nirqan: “Kay pacha runakuna Taytayta munakusqayta yachanankupaqmi noqaqa Taytaypa kamachiwasqanman jinapuni ruwashani” nispa (Juan 14:31). Chhaynallataqmi pasanman estudiantenchiskunawanpas. Sichus paykuna Jehová Diosta tukuy sonqo munakunqaku chayqa tukuypin payta kasukunqaku, pay sonqollapunin kanqakupas (1 Juan 5:3).

6. ¿Imatan ruwanan juj estudiante Jehová Diosta astawan reqsinanpaq? Juj ejemplota willay.

⁶ Sichus juj estudiante Jehová Diosta allinta reqsinqa chayqa, Diospa sonqonta kusichinanpaq jinan imatapas ruwanqa. Chayta entiendenapaq carro manejay yachayta munaq runapi piensasun. Payqa manan imaynatas carrota manejakun chayllatachu estudianan nitaq señalkunata qhawayllatachu yachanan. Aswanpas tiempotan t’aqanan carro manejayta practicananpaq, chhaynapin experienciata jap’inqa. Practicaspan yachanqa imatas ruwanan imapas qonqaylla pasaqtin chayta. Chhaynallataqmi pasan Biblia estudiaq runawanpas. Payqa manan estudiaspallachu Jehová Diostaqa reqsinqa, aswanpas tukuy yachasqanman jinan imatapas ruwaspan. Bibliaq yuyaychasqanman jina kausaspan sut’ita reparanqa imaynapunis Jehová Dios chayta. Chayta ruwaspan allinta reparanqa imaraykus allinpuni Diospa yuyaychayninkunata kasukuy chaytapas.

7. ¿Iman yanaparqan Joseta qhelli juchaman ama urmananpaq?

⁷ Chaymi yanaparqan ñaupa tiempopi Josetapas. Payqa allintan Jehová Diosta reqsirqan chaymi payqa manapuni urmarqanchu qhelli juchaman. Juch’uyllaraq kashaqtinqa willarankupunichá imas pasaran Adanwan Evawan chaytaqa, imas pasaran Abrahanwan Sarawan chaytapas (Gén. 2:24; 20:​3, 6). Chaychá Joseqa allinta yacharan imatas Dios piensan casarakuymanta, imatas piensan warmi-qhari puñuymanta chaytapas. Payqa allintan Diosta reqsiran chaymi allinta yacharan imakunas allin imakunas mana allin Diospaq chayta. Chaychá payqa mana isqayaspa Potifarpa esposanta nirqan: “¿Imaynapitaq noqari chhayna sinchi mana allinta ruwaspa Dios contra juchallikuyman?”, nispa (Gén. 39:​7-9). Noqanchispas sichus estudiantekunata yanaparisun Jehová Diosta allinta reqsinankupaq chayqa allintan reparanqaku imas allin imas mana allinchu chayta. Imakunas Jehová Diosta kusichin imakunataqsi mana chaytapas. Chhaynapin imataña ruwaspas Jehová Diospa munayninman jinapuni chaytaqa ruwanqaku.

REPARACHISUN IMAYNAS JEHOVÁ DIOS CHAYTA

8. ¿Imaynatan estudiantekunata yanapasunman Kusisqa kausay librowan Jehová Dios imayna kasqanta reparanankupaq, yachanankupaq?

⁸ ¿Imaynatan reparachisunman estudiantekunaman imaynachus Jehová Dios kasqanta? Chaypaqqa tapuykunatan ruwasunman. Chaytan Jehová Diospas ruwarqan. Chaypaq yuyarisun imaynatas Jobta yanaparqan payta astawan reqsinanpaq chayta. Jehová Diosqa 50 más tapuykunatan ruwarqan (Job 38:1–41:34). Noqanchispas chaytapunin ruwananchis. Chayta ruwananchispaqmi yanapawanchis Kusisqa kausay libronchis, chaypiqa askha tapuykunan kashan. Chay tapuykunawanmi estudiantekunata yanaparisun imayna Jehová Dios kasqanta sut’ita reparanankupaq. Chhaynaqa chay tapuykunata tapurisun estudiantekunata (astawan yachanapaq qhaway “Tapuykunawan yachachisun” nisqata).

9, 10. a) ¿Iman yanapanman Biblia leesqanta allinta entiendenanpaq? (Santiago 5:11). b) Bibliamanta ima willakuytapas estudiashaspa, ¿ima tapuykunapi piensaymi yanapanman Jehová Diosta astawan reqsinanpaq? Juj ejemplota willay.

⁹ Bibliamanta yachachisqanchis runataqa kallpachanchismi sapa p’unchay Bibliata leenanpaq ¿riki? Ichaqa ¿imaynatan payta yanaparisunman leesqanta allinta entiendenanpaq? Chaypaqqa nisunman Bibliata leeshaspab ¿Imaraykun Jehová Dios chaykunata qelqachinman karan? ¿Jehová Dios imayna kasqantan reparani kay versiculokunata leespa? nisqa tapuykunapi piensarinanpaq. Santiagopas Job imaynatachus aguantaran chaymanta rimaspaqa Jehová Diosmanta iman rimallarqantaq. Arí, Santiagoqa manan Jobpa aguantasqallanmantachu willaran, willallarqantaqmi Jehová Dios ancha munakuq kasqanmanta khuyapayakuq kasqanmantapas (leey Santiago 5:11).

¹⁰ Estudiantekunata yachachishaspaqa, leesqankuta estudiasqankutapas allinta entiendenankutan munanchis ¿riki? Imakunas Jehová Diosman gustan imakunas mana gustanchu chaykunata allinta reparanankutan munanchis. Chaypaq kaypi piensarisun: Juj estudiantes Kusisqa kausay libronchispi “¿Bibliapi ima partetan ñaupaqta leewaq?” nisqa parteman jaykuspa Daniel leonkunaq t’oqonpi tarikusqanmanta estudiayta munanman. Chayta allinta entiendenanpaqqa yaqapaschá kallpacharisunman ¿Imaraykun Jehová Dios salvarqan Danielta? ¿Imaynatan noqapas Daniel jina Jehová Diospa sonqonta kusichiyman? nispa tapurikunanpaq (Dan. 6:​10, 22). Chaymantapas yaqapaschá nillasunmantaq ¿Iman pasarqan Danielta tumpaq runakunawan?¿Imaynatan Jehová Dios qhawarin mana allin ruwaykunata? nisqa tapuykunapi piensarinanpaq (Dan. 6:​4, 5, 24). Chaymantapas kallpachasunmanmi chaykunata leeshaspa Jehová Dios munakuq khuyapayakuq kasqanta reparananpaqpas (Dan. 6:​26, 27).

11. ¿Imatan reparachisunman Bibliamanta yachachisqanchis runa agradecekuwaqtinchis?

¹¹ Estudiantekuna Bibliamanta yachasqanku allinninkupaq kasqanta reparakuqtinkuqa may kusisqan kanchis ¿riki? Yaqapaschá paykunaqa niwasunman “gracias yachachiwasqaykimanta” o “munaytan yachachinki” nispa. Chayta nisqanqa manan imananpaschu. Ichaqa sut’itan reparachinanchis imaynas Jehová Diospuni payta yachachishan chayta, imaynas paylla allin yachachiqninchis chaytapas, imaynas payllapuni jatunchana kanan chaytapas (Isa. 30:​20, 21).

DIOSMANTA YACHASQANKUWAN YANAPACHIKUNANKUPAQ YANAPASUN

12, 13. Juj estudiante Bibliapi ima willasqantapas mana allintachu entiendeshan chayqa, ¿imaynatan payta yanapanman Jehová Diosmanta imachus yachasqan? (Qhaway kay parrafopaq fotota).

¹² Imachus yachasqanchis allinta yanapawananchispaqqa, chayman jinan imatapas ruwananchis. ¿Imaynatan estudiantekunata yanaparisunman paykunapas chayta ruwanankupaq? Chaypaq kaypi piensasun: Yaqapaschá payqa Bibliapi mayqen willakuytapas mana allintachu entiendeshan. Yaqapaschá tapukushanman “¿imaraykun Jehová Dios wakin runakunata castigarqan wakintataq mana?” nispa. Chhayna kaqtinqa imatachus Jehová Diosmanta yachan chayman jina chaykunata qhawarinanpaqmi yanapasunman. Ichaqa, ¿imaynatan chayta ruwasunman?

¹³ Yaqapaschá kallpachasunman kay tapuykunapi piensarinanpaq: ¿Imaynatan Jehová Dios qhawarin sapanka runaq kausayninta? (2 Ped. 3:9). ¿Imatan ruwarqan pay wañuymantapas juchamantapas librawananchispaq? (Efes. 2:​4, 5). ¿Castiganmanchu pay mana juchayoq runata? ¿Jinatachu pay qhawarin juchayoq runata? (Éx. 34:6, 7). Chaymantapas Bibliapiqa manan llapantapunichu imatapas willan, manan llapantachu willan imaraykus Jehová Dios imatapas ruwan chaytapas, chayta iman allinta entiendechinanchis. Chaymantapas chaykunataqa manan llapantaraqchu yachananchis. Yachasqanchis jinapas Jehová Diosqa munakuq Diosmi chanin Diosmi, allintan payqa imatapas ruwan.

14. Juj estudiante mayqen hermanowanpas mana allintachu apanakushan chayqa, ¿imaynatan yanapasunman?

¹⁴ Kaypi piensallasuntaq: Yaqapaschá juj estudiante juñunakuyman rispa juj hermanowan mana allintachu apanakunman. Yaqapaschá chay hermanoqa payta sientechiran. ¿Imaynatan yanapasunman juj estudiante chhaynapi tarikuqtin? Yaqapaschá kallpachasunman Jehová Dios jina hermanokunata qhawarinanpaq. Chhaynapin Jehová Diosta reqsisqan payta yanapanqa. Yaqapaschá yanapasunman: ¿Imatan Jehová Dios ruwarqan hermanonchiskuna munakusqanta rikuchinanpaq? (Juan 3:16). ¿Imaynatan qhawarin iñiq pura juj nisqalla kausasqanchista? (Sal. 133:1). ¿Imaynatan Jehová Dios qhawarin llapa iñiqkuna juj nisqalla thajpi kausananchispaq kallpachakusqanchista? nisqa tapuykunapi piensarinanpaq (2 Cor. 13:11). Chaymantapas yanaparisun imaynas Jehová Diosta kusichinapaqqa hermanokunaq allinkuna ruwasqanpi piensana chayta reparanankupaq.

15, 16. a) ¿Imaynatan juj estudiante imatapas ruwanan kaqtin Jesusta qatikunman? (Juan 8:29). b) ¿Imaynatan hermana Marianne estudiantenta yanaparqan allin yuyaywan juj llank’anata ajllananpaq? (Qhaway kay parrafopaq fotota).

¹⁵ Kaypi piensallasuntaq: ¿Imatan ruwasunman juj estudiante ima jatun decisiontapas ruwanan kaqtin? Chaypipas yanapasunmanmi Jehová Diosmanta imachus yachasqanwan yanapachikunanpaq. Chaypaqqa yaqapaschá qhawachisunman Kusisqa kausay nisqa libropi 35 yachachikuyta, chaypin nishan “Allinta piensaykuspa imatapas ruwasun” nispa. Ichaqa estudiante ña Diosmanta mañakuranña qelqakunatapas estudiaranña chaywanpas manaraq ima ruwayta atishanchu chayrí. Payqa yaqapaschá Bibliapi askha textokunata tarirqan manataq mayqenwan yanapachikuyta atishanchu. Chhaynapi tarikushan chayqa yaqapaschá kallpachasunman Jesús jina ruwananpaq. Paymi Jehová Diosmanta rimashaspa nirqan “sonqonpaq jinapunin tukuy tiempo imatapas ruwani” nispa (leey Juan 8:29). Chaymantaqa yaqapaschá nisunman: “Ñataq chaykunamanta qelqakunata estudiarunkiña chayqa allintataq reqsinki Jehová Diostapas chayqa, ¿ima ruwasqaykin paypa sonqonta kusichinman?” nispa. Imataña ruwanqa chaypas sichus Jehová Diospa sonqonta kusichinanpaq jina kashan chayqa, allinmi chayqa kanqa.

¹⁶ Chile nacionpi juj señoramanta yachasun. Payqa juj hermanwansi Bibliata estudiashasqa, paytas familian nishuta mat’ipayasqa allin pagoyoq llank’anaman jaykunanpaq. Ichaqa chay llank’anaman jaykuspaqa manas wakin juñunakuykunaman rinanchu kasqa. ¿Imatan pay ruwanman karqan? Payman estudio qoq Marianne hermanchismi nin: “¿Imaynatan chayta Dios qhawarinman, kusisqachu chaywan kanman icha llakikunmanchu? nispan nirqani. Chaymantapas kallpacharqanin Jehová Diosman llapa chaykunata willananpaq. Imaynatas pay yanapashan chayta reparananpaq ima. Payqa manan chay llank’anamanqa jaykurqanchu aswanmi juj llank’anata tarirqan chay llank’anawanqa atirqanmi juñunakuykunaman riyta” nispa. Chaypi rikusqanchis jina, ¿imaynatan hermananchis Marianne yanaparan estudiantenta? Manan “kayta jaqayta ruway” nispachu nirqan, aswanpas Jehová Diospi piensananpaqmi yanaparqan. Chhaynapin chay estudianteqa yacharan Jehová Diospi confiayta yachachiqnin hermanapi confiayta ima. Hermananchis Mariannen nillantaq: “Sut’itan repararqan imaynas Jehová Diosta ñaupaqman churasun chayqa payqa cuidawasunpuni chayta”, nispa.

JEHOVÁ DIOSTA ALLINTA REQSISPAQA BENDECISQAN KASUN

17. ¿Imatan Biblia estudiaqkuna allinta yachananku?

¹⁷ Estudiantekunaqa Bibliata estudiasqankuman jinan imaymanata yachanku. Paykunaqa allintan endiendenku Bibliapi jatun yachachikuykunata, Jesuspa wañupusqanmanta, Diospa gobiernonmanta, imaynapis wañupuqkuna tarikunku chaykunamanta ima. Chaymantapas yachallankutaqmi imayna organizasqas kashan kay pachapi Diospa llaqtan chaymantapas. Yachankun imaynatas aparikun juñunakuyninchiskuna, imakunatas ruwanku umalliqkuna, imakunatas ruwan Umalliq T’aqa chaytapas. Ichaqa kaypi yachasqanchis jina estudiantekunaqa manan chaykunallatachu yachananku, aswanpas Jehová Diosta iman allinta reqsinanku.

18. ¿Ima bendicionkunatan chaskinku Jehová Diosta allinta reqsiqkuna?

¹⁸ ¡May munaymi Jehová Diosmanta jujkunaman yachachiyqa ¿riki?! Payta allinta reqsiqkunaqa tukuy sonqon payta munakunchis yupaychanchis ima, chayraykutaqmi imaymana bendiciontapas chaskinchis. Chaymantapas payta reqsisqanchisraykun kay tiempopipas thaj kausayta munay kausayta ima tarinchis (Sal. 25:​12-15). Jamuq tiempopiqa pichus “Cheqaq kaqta”, Jehová Diosta reqsiqkunaqa wiñay kausaytan chaskisunchis (1 Juan 5:20). Manan chayllapaschu, Bibliaq nisqan jina “pipas Diosta munakuqqa Diospa reqsisqanmi” (1 Cor. 8:3). Chaypi nisqan jina tukuy imata kamaq Diosqa sapankatan reqsiwanchis, amigonta jinan qhawariwanchis. ¡May munaymi chayqa ¿riki?!