Usqhaylla allichay ima problematapas

Chayta entiendenapaq rimasun tullu p’akikuymanta. Sichus tullunchista p’akikusunman manataq imatapas ruwasunmanchu thaninanpaq chayqa nanawashallasunmanmi ¿riki? Manataq jampichikusunmanchu chayqa manan jayk’aqpas allintaqa thaninmanchu. Manataq munanchischu nanawananchista chayqa kaq ratun jampichikunanchis.

Sichus mayqen hermanonchiswanpas phiñachinakusunman chayqa tullu p’akisqa jinan chayqa kanman. Chaymi chaytaqa usqhaylla allichananchis, mana chayqa astawanmi hermanonchispaq phiñakapusunman, manañan amigota jinañachu qhawarinsunmanpas. Chaymanta rimaspan Jesuspas nirqan: “Ñanllapiraq kashaspayki usqhaylla paywan allichapuy”, nispa (Mat. 5:25). Chaypaqmi ichaqa paywan munayllata sut’ita ima rimanayki, mayninpiqa manapaschá facilchu chay ruwayqa kanqa. ¿Imaraykun mayninpi mana facilchu kanman? Chaypaq qhawarisun iskay razonkunata.

Ñaupaq kaq, mayninqa yaqapaschá sasapaq jina qhawarisunman allichayta, “tiempowanqa allichakapullanqan” nispa imapaschá tiempo jinalla pasananta munasunman.b Chaymi pasarqan Evodiawan Sintiquewanpas. Paykunaqa Dios sonqo warmikunan karqanku, chaywanpas manan phiñachinakusqankuta usqhayllachu allicharqanku. Chaymi apóstol Pablopas karupiña kasharan chaypas paykunaq phiñachinakusqankuta yacharurqan. Chay kutipaqqa Pabloqa Romapin kasharqan. Chaymi payqa paykunata yuyaycharqan problemankuta allichanankupaq (Filip. 4:2). Paykuna jujmanta amigantin kanankupaqqa humilde sonqon kananku karqan, sut’itan rimanankupas karqan. Chaymantapas sonqomantan perdonanakunanku karqan.

Iskay kaq, yaqapaschá munasunman phiñachinakusqanchis hermano noqanchisman jamuspa perdonta mañakuwananchista. Chhaynata piensaspaqa yaqapaschá nisunman “¡qanmá juchayoqqa kanki riki!” nispa. Chhaynata rimaspaqa manan allichayta atisunmanchu, aswanpas munayllata rimaspan chaykunataqa allichananchis. Chayta allinta entiendenapaq rimallasuntaq tullu p’akikuymanta. Tulluykita p’akikuwaq chayqa jampiqniyki doctorqa manan tapupayasunkichu imaynatas p’akikurqanki chaytaqa ¿riki? Aswanpas payqa sumaqllatan jampisunki chay tullu p’akikusqayki thanipunanpaq. Chhaynatan ruwana hermanonchiswan rimashaspapas. Manan mayqensi juchayoq chaytachu maskhashananchis, aswanpas sumaqllatan rimananchis chayta allichananchispaq chhaynapi jujmanta sumaqta paywan kausananchispaq.

Chaymanta rimaspan Efesios 4:26 textopi nin: “Aman p’unchay ch’isiyaqqa phiñasqalla kankichischu”, nispa. Chhaynaqa, ¿manachu kunanmantapacha noqanchis kikinchismanta rispa chay hermanowan allichamusunman ima problemanchistapas? Chayta ruwasun chayqa thaj kausay kananpaqmi yanapakusunchis (Efes. 4:​1-3).