¿Allintachu reqsinki Jehová Diosta?

1. ¿Imaynatan qhawarikunchis Jehová Diospa ancha jatun yachayninpi piensaspa, imachus ruwasqanpipas piensaspa?

¿JAYK’AQLLAPAS piensarankichu may jatunchus Diospa yachaynin chaypi? ¿Piensarankichu ancha jatun ruwaykuna ruwasqanpipas? Chaykunapi piensaspaqa sinchi juch’uypaqmi qhawarikunchis ¿riki? Chaymantapas chaykunapi piensaspaqa yaqapaschá apóstol Pablo jina nisunman. Paymi nirqan: “¡May jatunpunin Diospa qokuyninpas, yachayninpas, yuyayninpas! ¡Manapunin pipas llapantaqa yachanmanchu imachus piensasqantaqa, manataqmi pipas llapantaqa entiendenmanchu imachus ruwasqankunatapas!” nispa (Rom. 11:​33, 34).

2. ¿Imaraykun nisunman “atisunmanmi Jehová Diosta reqsiytaqa” nispa?

² Manapaschá jayk’aqpas yachasunchu imaynapunis Jehová Dios chayta, chaywanpas atisunmanmi payta reqsiytaqa. Chaymanta rimaspan rey David wawan Salomonta nirqan: “Kallpachakuy taytaykiq Diosninta reqsinaykipaq, kusisqa payta serviy tukuy sonqowan […]. Sichus Diosta maskhanki chayqa tarinkin”, nispa (1 Crón. 28:9). Unay tiempo qhepamanmi apóstol Juanpas nirqan: “Diospa Churinmi kay pachaman jamuspa allin reparaq kayta qowarqanchis pichus cheqaq kaqmanta yachananchispaq”, nispa (1 Juan 5:20). Arí, Jesusmi Diostaqa reqsichiwanchis. Pay kikinmi nirqan: “Manan pipas janaq pacha Taytataqa allintaqa reqsinchu, aswanpas Churillan, pimanchus Churi reqsichiyta munan chayllapiwan”, nispa (Mat. 11:27).

3. ¿Imakunamantan kaypi yachasunchis?

³ Bautizasqaña kashanki chayqa ñachá imaymanakunataña Jehová Diosmantaqa yachanki. Chaywanpas atisunmanmi payta astawan reqsiytaqa (Juan 17:3; qhaway willakuytapas). Chaymi tukuy atisqanchista kallpachakunanchis imakunas payta kusichin chayta yachananchispaq, imaynapis paypi astawan confiasunman chayta allinta entiendenanchispaq ima. Chaymi kaypi yachasunchis kinsa tapuykunamanta. 1) ¿Iman Jehová Diosta reqsiy? 2) ¿Imaraykun kallpachakunanchis astawan payta reqsinanchispaq? 3) ¿Imaynatan payta astawan reqsisunman? Jayk’a wataña Diosta servishanchis chaypas allintan chaykunapi piensarinanchis.

¿IMAN JEHOVÁ DIOSTA REQSIY?

4. ¿Iman Jehová Diosta reqsiy?

⁴ Imas Jehová Diosta reqsiy chayta allinta entiendenapaq, piensarisun imaniranchus pay Babiloniamanta kutimpuq Judío runakunata chaypi. Paykunatan Jehová Diosqa nirqan: “Noqata reqsiy munaq sonqotan paykunaman qosaq”, nispa (Jer. 24:7). Babiloniamanta kutimpuq Judío runakunaqa ñachá Jehová Diosmantaqa yacharankuña, ichaqa manan yachayllachu paymantaqa yachananku karan. Aswanpas tukuy atisqankutan kallpachakunanku karqan payta allinta reqsinankupaq. Sonqomantan chaytaqa ruwananku karqan. Chaymanta rimaspan juj qelqapi nin: “Manan igual-llachu Diosta allinta reqsiywan Diosmanta yachaywanqa. Chaypaq kaypi piensasun: jujniraymi munakuymanta yachaywan pitapas munakuywanqa ¿riki?”, nispa (The Interpreter’s Bible). Chhaynan Jehová Dioswanpas. Manan sutillantachu yachananchis, ni Dios kasqallantachu yachananchis. Aswanpas imaynapunis pay chaytan allinta yachananchis.

5. Rey Josiasmanta Bibliaq willasqanman jina, ¿iman Jehová Diosta reqsiy?

⁵ Jehová Diosmanta astawan yachaspaqa allintan entiendesun imas payman gustan imas mana gustanchu chayta. Chayta entiendenapaq rey Josiasmanta rimasun. Paymanta rimaspan Bibliapi nin: “Josiasqa pusaq wataña kamachikushaspan, waynachallaraq kashaspan, ñaupa taytan Davidpa Diosninta serviyta qallarirqan”, nispa (2 Crón. 34:3). Arí, payqa Jehová Diosmantan yachayta qallarirqan. Ichaqa manan yachayllachu yacharqan, aswanpas yachasqanman jinan ruwarqan. Chaymi Jehová Diosqa profeta Jeremiaswan willachirqan: “Payqa wajchakunamanmi sayapakurqan, sarunchasqakunapaqmi justiciata ruwapurqan”, nispa. Jehová Diosqa nillarqantaqmi: “¿Manachu chhaynata ruwanan reqsiwaqniy runaqa?”, nispa (Jer. 22:​15, 16).

6. ¿Iman pasanqa Jehová Diosta astawan reqsisun chayqa? (Salmos 9:10).

⁶ (Leey Salmos 9:10). Jehová Diosta allinta reqsisun chayqa astawanmi paypi confiasun. Chaymi pasarqan apóstol Pablowanpas, chaymi wañupunanña kashaqtin carcelpi qelqarqan: “Manan p’enqakunichu. Noqaqa allintan reqsini pipichus iñisqaytaqa”, nispa (2 Tim. 1:12). Chaypi nisqan jina, apóstol Pabloqa tukuy sonqon confiaran Jehová Diospiqa. ¿Imaynapin pay yachanman karqan Diospi confiayta? Llapa imachus pasasqanpin payqa allinta rikuran imaynas Diosqa yanaparqanpuni chayta. Chaymantapas allintan yacharqan imaynas Diosqa manapuni qonqananchu karqan paypa tukuy ima ruwasqanta chayta. Allintan yacharqan payta kausarichimpunantapas.

¿IMARAYKUN ASTAWAN JEHOVÁ DIOSTA REQSINANCHIS?

7. Unayña Jehová Diosta servishanchis chayqa, ¿iman yaqapas pasawasunman?

⁷ Unayña Testigo kanchis chayqa yaqapaschá manaña kallpachakusunmanchu Jehová Diosta astawan reqsinanchispaq. ¿Imaraykun chay pasawasunman? Mayninqa Bibliata leespapas juñunakuyman rispapas yaqapaschá masta piensanchis imaynatas chaypi yachasqanchis noqanchista yanapawasunman chaypi, imaynatas chaykunawan jujkunata yanapasunman chaypipas. Ichaqa, ¿malchu kanman chaykunapi piensay? Manan. Chayta ruwanapaqmi Bibliapipas nin (2 Tim. 3:​16, 17). Ichaqa Bibliapiqa willashanmi chaypi simikunata qelqachiq Diosmantapas (Sal. 25:​8-10). Chaymi mana imaynatas yanapawasunman noqanchista, imaynatas chaywan jujkunata yanapasunman chaykunallapichu piensananchis. Tapukunanchismi “¿imatan kay yachachiwan Jehová Diosmanta?” nispapas.a

8. ¿Iman pasanqa Jehová Diosta astawan reqsiqtinchis? (Salmos 73:​24-28).

⁸ Astawan Jehová Diosta reqsisun chayqa, astawanmi payta munakusunchis. Chaypaq piensasun kaykunapi: ¿Imaynan kanki Bibliata leespayki chaypi allinta piensasqayki qhepaman? ¿Imaynan kanki sapa killan JW Canal programata qhawaspayki, juj asambleaman rispaykipas? ¿Manachu chaykuna qhepamanqa astawanraq Jehová Diosta munakunchis? ¿Imaraykun chay pasawanchis? Paymanta astawan yachasqanchisraykun, chayraykun paytaqa sonqomanta “gracias” ninchis jatunchanchis ima. Salmos librota qelqaq jujnin runapas imaymanapi yanapasqanmantan nirqan: “Diosmi sonqoytaqa kallpachan, paymi pakakunay qaqaqa”, nispa (leey Salmos 73:​24-28). Chhaynaqa kallpachakusunpuni Jehová Diosta astawan reqsinanchispaq, chhaynapin paytaqa astawan munakusunchis.

9. ¿Jehová Diospi piensasun chayqa imaynatan imatapas ruwasunchis? Juj ejemplota willay.

⁹ Jehová Diospi allinta piensasun, imachus llakichin imachus kusichin chaykunapi piensasun chayqa, allinta piensaspan imatapas ruwasunchis (Prov. 3:​5, 6). Chayta entiendenapaq kaypi piensarisun: Wakin hermanokunapas hermanakunapas qosankuq o esposankuq fotontan llank’ananku mesapi, celularninkupi o imankupipas churanku. Chayta qhawaspan paykunaqa imataña ruwananku kaqtinpas ñaupaqtaqa allintaraq piensarinku. Chaytan ruwana Jehová Dioswanpas. Tukuy tiempo paypi piensasun chayqa munayninman jinan imatapas ruwasunchis (Sal. 19:​13, 14).

10. Jehová Diosmanta astawan yachasun chayqa, ¿imayna kananchispaqmi kallpachakusunchis?

¹⁰ Noqanchisqa Jehová Diospa imaynachus kasqanman jinan ruwasqa kashanchis (Gén. 1:26). Chhaynataq chayqa, atisunmanmi pay jina kaytaqa. Arí, payta astawan reqsisun chayqa, atisunmi pay jina munakuq sumaq sonqo kayta. Jesuspa tiemponpi fariseokuna kamachikuy simita yachachiqkuna iman ichaqa mana chhaynachu karqanku. Paykunaqa kamachikuy simipi llapa ima nisqantaña junt’achiyta munaqku chaypas, kamachikuy simimanta aswan allin kaqkunataqa mana ruwaqkuchu. Chaykunan “chanin kay, khuyapayakuq kay, junt’aq kay ima” (Mat. 23:23). Chhaynaqa amapuni chay runakuna jinaqa kasunchu. Aswanpas tukuy atisqanchista kallpachakusun Diospa siminpi imata leespapas imatas Jehová Diosmanta yachasunman chayta allinta reparananchispaq. Chayta ruwasun chayqa kallpachakusunmi pay jina munakuq sumaq sonqo kananchispaq (1 Juan 4:​8, 11).

¿IMAYNATAN JEHOVÁ DIOSTA ASTAWAN REQSISUNMAN?

11. ¿Imaynatan Jehová Diosta reqsiranki?

¹¹ ¿Imaynapin Jehová Diosmanta yacharanki? Yaqapaschá papaykipas mamitaykipas Jehová Diosta servinku, paykunapaschá Diosmantaqa yachachirasunkiku. Allintachá willarasunkiku imayna Dios-si pay chayta. Wakintaqa yaqapaschá Diosta serviq juj hermano yachachiwaranchis. Yaqapaschá Kusisqa kausay nisqa libroq yanapayninwan allinta entiendechiwaranchis imaynas Jehová Dios chayta. Kay pachapi llapa kamasqankunata qhawarichispa imachá yachachiwaranchis Jehová Diosmantaqa (Neh. 8:8; Hech. 14:17).b Chhaynaña karqan chaypas, ¿imatan ruwasunman Jehová Diosta astawan reqsinanchispaq? Chayta qatiqpi yachasun.

12, 13. ¿Imatan ruwananchis Jehová Diosmanta astawan yachananchispaq? Juj ejemplota willay (Jeremías 39:​15-18; qhaway dibujota).

¹² Ñaupaq kaq, Jehová Diosta astawan reqsinapaqqa allintan simin qelqata estudiananchis. Chay qelqapiqa wakin partepiqa willashanmi imaynas Jehová Dios chayta (Éx. 34:​6, 7). Ichaqa chaypiqa astawanqa willashan ñaupa tiempo runakunamanta, imakunatas ruwaranku chaykunamanta iman. Chaykunata estudiaspapas allintan piensarinanchis imatas Jehová Diosmanta yachachiwanchis chaypipas.

¹³ Chaypaq yachasunchis Bibliapi juj willakuymanta. Jeremías 38:​6-13 textopin willashan Etiopía llaqtayoq Ébed-Mélec runamanta. Paymi profeta Jeremiasta juj t’oqomanta orqochirqan. Chayta leespaqa ratullan reparanchis imaynas Ébed-Melecqa Diosta serviq runakunata munakurqan chayta ¿riki? Imaynas valiente karqan chaytapas. Ichaqa, ¿reparashankichu imatas Jehová Diosmanta yachasunman chayta? (Leey Jeremías 39:​15-18). ¿Mayqen versiculopin willashan Jehová Dios agradecekuq kasqanmanta? ¿Maypin willashan chanin Dios, llapa imata rikuq Dios kasqanmantapas? ¿Imakunatawanmi Jehová Diosmanta yachasunman chay textokunapi? Chhaynaqa Bibliata leespaqa piensarisunpuni imatas Jehová Diosmanta yachasunman chaypipas. Chayta allinta reparaspataq agradecekusun Diosta, jatunchasun ima.

14. Jehová Diosmanta astawan yachayta munanchis chayqa, ¿imatan ruwananchis kamasqankunata qhawarispa?

¹⁴ Iskaypi, Jehová Diosta allinta reqsinapaqqa kamasqankunapi iman allinta piensarinanchis (Sal. 145:​9, 10). Ichaqa ima kamasqantapas qhawaspaqa mayninqa manapaschá imatapas reparasunchu. Wakin runakunapas allintaña estudianku imaymana animalkunata plantakunata ima chaypas manan yachankuchu Diosmantaqa imatapas. Chaymi kamasqankunata qhawaspa Diosta reqsinapaqqa allinta piensananchis chay kamasqankunapi. Chaymanta rimaspan apóstol Pablo nirqan: “Diostaqa manaña rikunchischu chaypas, paypa wiñay atiyninpas Diospuni kasqanpas kay pacha kamasqa kasqanmantapachan sut’ita rikukun”, nispa (Rom. 1:20). Juj Bibliapi nisqan jina, allinta piensaqsi allinta reparaqsi, Diospa imayna kasqantaqa yachanqa. Chhaynaqa Diosta allinta reqsinapaqqa, kamasqankunapi iman allinta piensarinanchis.

15. ¿Imatan hermano Patrick ruwaran Jehová Diosta astawan reqsinanpaq? ¿Imaynatan paypa ejemplonta qatikusunman? (Qhaway kay parrafopaq fotota).

¹⁵ Wakinqa yaqapaschá tiyanchis jatun llaqtakuna ukhupi, chhayna chayqa manapaschá noqanchispaqqa facilchu Jehová Diospa kamasqankunata qhawariyqa. Chhaynaña kanman chaypas atiwaqmi Diospa kamasqankunamanta astawan yachaytaqa. Chaytan ruwasqa Patrick sutiyoq hermanopas. Payqa República del Congo nacionpi Brazzaville llaqtapin tiyan. Paymi nin: “Plantakunata animalchakunatapas qhawarinaypaqmi wasiypi balconman rini. Chaymantaqa rikukunmi kuruchakunapas phalaq animalchakunapas. Juj kutinmi rikurani phalaq animalchakunata q’esan ruwakushaqta. Paykunaqa tiyasqay partemantan imaymanata aparanku q’esankupaq”, nispa. Kay hermanoqa manas chayta rikuspallachu pasapusqa, aswanpas kamaqninchis Diospi imas piensarisqa. Paymi nillantaq: “Chayta rikuspan allinta repararqani imaynas Jehová Diosqa llapa kamasqankunata sumaqta qhawarin chayta. Wakin juch’uy animalchakunaman runakuna manaña cuentata churankuchu chaypas, Jehová Diosqa rikushanmi paykunata. Chayta rikuspan repararqani imaynas Jehová Diosqa mana imatapas faltachiwanqachu chayta”, nispa.

16. ¿Iman Jesuspa mamitan Mariata yanaparqan Jehová Diosta astawan reqsinanpaq, imaynatan paypa ejemplonta qatikusunman? (Qhaway kay parrafopaq fotota).

¹⁶ Kinsapi, Jehová Diosta allinta reqsinapaqqa imaynatas ñaupaqkunapi yanapawarqanchis chaykunapi iman allinta piensarinanchis. Chaytan ruwarqan Jesuspa mamitan Mariapas. Payqa ñan reqsiranña Jehová Diostaqa, yacharanmi paywan kashasqantapas (Luc. 1:30). Ichaqa qonqaymi willarqanku juj jatun ruwaypi yanapakunanpaq, Jesustan onqokunan karqan. Mariaqa admirasqa manchasqa iman chaywan kasharqan. Chaymi Jehová Diosqa ángel Gabrielwan kikin familianmanta kaq Elisabetwan ima payta kallpacharqan. Chaykuna qhepamanmi Mariaqa chaykuna pasasqanpi piensarqan. Chaypin repararqan imaynas Jehová Diosqa ancha atiyniyoq, khuyapayakuq, mana piman sayapakuq chayta. Repararqanmi imaynas mana valeqpaq jina qhawarisqa runakunatapas Jehová Diosqa ancha allinpaq qhawarin chaytapas (Luc. 1:​46-55). Chaykunamantan Mariaqa anchatapuni Jehová Diosta agradecekurqan. Noqanchistapas Jehová Diosqa imaymanapin yanapawanchis, chaymi chaykunamanta agradecekunanchis (Heb. 4:16). Chayrayku, jayk’aqllapas chaskikunki Jehová Diospa yanapayninta chayqa tapukuy: “¿Imatan kay yachachiwan Jehová Diosmanta? ¿Imayna Dios kasqantan kaypi rikuni?”, nispa.

JEHOVÁ DIOSMANTAQA YACHASHALLASUNMI

17, 18. ¿Imaraykun nisunman “Jehová Diosmantaqa yachashallasunpunin imatapas” nispa?

¹⁷ Jehová Dios kay pachata gobiernapuqtinqa astawanmi payta reqsisunchis. Chaymantapas Bibliapi nisqan jina, mosoq qelqa k’uyukunatan chaypiqa chaskisun. Chaypin yachasun imakunatas ruwananchis kanqa chayta (Apo. 20:12). Chaymantapas chaypiqa plantakuna animalkuna chaupipin kausasunchis (Isa. 11:​6-9). P’unchaykunaq pasasqanman jinan astawanraq kamaqninchis Diostapas reqsisunchis. Paypa llapa ima ruwasqankunatan allinta reqsisunchis. Rikusunmi familianchiskunaq kausarimpusqantapas. Cuerponchispas p’unchaykunaq pasasqanman jinan mana juchayoq ch’uyaman tukupunqa.

¹⁸ Jehová Diosqa wiñaypaq kausaq Diostaq chayqa, “yachayninpas mana entiendey” atiytaq chayqa, paytaqa reqsishallasunpunin (Sal. 90:2; 147:5). Chaywanpas “runakunaqa manan jayk’aqpas llapantaqa entiendesunchu Diospa ruwasqankunataqa” (Ecl. 3:11). Chhaynaqa, jayk’a wataña Testigo kashanchis chaypas, kallpachakushallasun kamaqninchis Diosta astawan reqsinanchispaq.