Isaías libroqa imaymanapin yanapawasunman

1, 2. ¿Imatan Jehová Dios ruwan llakisqa tarikuqtinchis?

JUJ chikuchapi piensasun: Payqa khuyaytas waqashanman, familian juj ladoman astakusqanraykus amigochankunamanta waqashanman. Wakin wawakunaqa imatapas juchaparukuspan waqayta yachanku, ¿imaraykuña chay wawa waqashanman chaypas imatan mamitan ruwanqa? Munayta abrazaykuspan atento payta uyarinqa ¿riki? “Munakuykin waway” nispa iman ninqa ¿riki?

² Jehová Diostapas juj munakuq mamawanmi tupanachikun. Chaymanta willaspan Isaías 66:13 texto nin: “Imaynan juj mamaqa wawanta khuyapayan, munayta munaykapun, chhaynatan noqapas qankunata khuyapayasaykichis”, nispa. Chaypi nisqan jina Jehová Diosqa may munakuqmi. Paypa munakuyninqa juj taytaq munakuyninmantapas juj mamaq munakuyninmantapas aswan jatunmi (Isa. 49:15). Llakisqa nanasqa kashanchis chayqa Jehová Diosqa simin qelqawanmi yanapawanchis chaywanmi kallpata qowanchis (Rom. 15:4).

3. ¿Imakunamantan kaypi yachasunchis?

³ Isaías libropin willashan imaynas Jehová Diosqa serviqninkunata imaymana formapi kallpacharqan chayta (Isa. 40:1). Chay librotaqa llaqtan sinchi llakipi tarikushaqtinmi Jehová Diosqa qelqachirqan. Noqanchispas manchakuy sinchi sasa tiempokunapin tiyashanchis (2 Tim. 3:1). Kay tiempopin astawanraq necesitanchis kallpata fuerzata ima, chaymi kaypi t’aqwirisunchis Isaías libropi wakin textokunata. Chaykuna yachasqanchismi yanapawasun 1) imapas qonqay cambiaqtin, 2) ñaupaqpi ima juchapakusqanchismantapas nishuta llakikuqtinchis, 3) mayqen familianchispas o amigonchispas wañukapuqtin.

IMAPAS QONQAY CAMBIAQTIN

4. ¿Imaynan tarikusunman imapas qonqaylla cambiaqtin?

⁴ Mayninqa qonqayllan imapas cambianman (Ecl. 9:11; 1 Cor. 7:31). Mayninqa yaqapaschá onqopusunman, qolqenchis imapaschá pisiyanman. Mayninqa gobierno contra imapaschá runakuna jatarinkuman, mayninqa yaqapaschá maypichus llank’ashanchis chaymanta juj ladoman cambiawasunman. Chhaynakunapi tarikuspaqa yaqapaschá nisunman: “¿Kunanrí imatataq ruwasaq?”, nispa. Chaymi pasasqa hermano Josephtapas. Payqa 17 watañas Betelpi llank’ashasqa chaymantas ichaqa cambiapusqaku. Campoman rinanpaqsi nisqaku, paymi nin: “Unayñataq Betelpi llank’arani chayqa sasan noqapaqqa karan chay llank’ayman yachakuy manan imaynamanta qallariytapas atirqanichu”, nispa. ¿Imaynatan Jehová Dios Isaías librowan yanapawasunman chhaynapi tarikuqtinchis?

5. ¿Imaninantan nishan Isaías 42:16 textopi? (Qhaway kay parrafopaq fotokunata).

⁵ (Leey Isaías 42:16). Isaías libropi nisqan jina, Jehová Diosqa “ñausakunatan mana reqsisqanku ñanninta” pusan “laqhayaqtan k’anchayman tukuchin”. Ichaqa, ¿imatan nishanman: Ñausakuna, mana reqsisqanku ñan, laqhayaq, moqo-moqo ñan nispa nisqanwan? Chaytaqa nishan qonqay imapas cambiaqtin imaynachus tarikusqanchismantan. Qonqay imapas cambiaqtinqa mana reqsisqanchis sach’a-sach’a sonqotapas pasashasunman jinan, mana reqsisqanchis ñantapas purishasunman jinan. Chhaynakunapi tarikuqtinchismi Jehová Diosqa yanapawanchis. Arí, payqa imaña jayk’aña kanqa chaypas pusawasunpunin, makinchismantan payqa pusawasun, ñanninchistan k’anchawasun. Ichaqa, ¿imaynatan chayta ruwan? Palabran Bibliawan, llaqtanpi imaymana qelqakunaq lloqsimusqanwan iman; chaykunawanmi yuyayta qowanchis (Sal. 119:105; Isa. 30:21). Chaymantapas hermanonchiskunawan juj runakunawan iman yanapachiwanchis. Manaña yachanchischu paqarin minchhakuna ima pasananta chaypas, Jehová Diosqa yanapawasunpunin, munakuwanchistaq chayqa payqa pusariwasunpunin (Isa. 41:10; 1 Ped. 5:​6, 7).

6. Mayninpi qonqay ima llakipipas tarikusun chayqa, ¿pin yanapawasunpuni?

⁶ ¿Imaynatan Jehová Dios yanapanman karqan tawa parrafopi rimamusqanchis hermanonchis Josephta? Payta esposantawansi sumaqta cuidasqa, paykunan ninku: “Jehová Diosqa sapa kutillanmi imaymanapi yanapawaqku. Mayninqa hermanokunawanmi yanapachiwaqku, tiempollanpin ima necesitasqaykutapas qowaqku. Llakisqa tarikuqtiykupas tiempollanpin kallpachawaqku, kunankamapas chaytaqa ruwashallanmi”, nispa. Noqanchispas chhaynata qonqaylla ima llakipipas tarikusun chayqa Jehová Diosqa yanapawasunpunin, paymi kallpata yuyayta ima qowasunchis (Isa. 54:10; 58:11). Hermano Joseph nillantaq: “Munay takikuna nisqapi jujnin kaq takin gustawan, chaypin nin: “Manan Diosniyqa saqewanqachu, ima llakikuyña jamuqtinpas Jehová Diosmi chaypi riysiwanqa”, nispa.a Mayninqa manapaschá imapas piensasqanchisman jinachu kanqa ichaqa Jehová Diosqa noqanchiswanpunin kashanqa” nispa.

JUCHAMANTA NISHU LLAKISQA TARIKUQTINCHIS

7. ¿Imaynan wakin tarikushankuman ñaupaqmi juchapakusqankurayku?

⁷ Mayninpi ima jatun juchamanpas urmaspaqa umalliqkunamanmi willakunchis ¿riki? Paykunaqa munaytan kallpachawanchis. Chaymantaqa tukuy atisqanchistan kallpachakunchis amaña jujmanta chay juchaman urmanapaq (Prov. 28:13; Sant. 5:​14-16; 1 Juan 1:9). Chaywanpas mayninpiqa yaqapaschá sonqonchis nananmanraq. Yaqapaschá nisunman “Jehová Diosqa manachá jayk’aqpas perdonawanqachu”, nispa (2 Cor. 2:7). Mayninpi chhaynata piensayqa manan imananpaschu, yachasqanchis jinapas imapipas juchapakuranchis chayqa llasa q’epi jinan chayqa noqanchispaq. Rey Davidpas chhayna juchapakusqanmanta rimashaspan nirqan: “Juchay jawan tulluykunapiqa mana thaj kay kanchu”, nispa. Chaymantapas “cuerpoypas ñut’un kashan, manan kuyuriytapas atiniñachu”, nispan nillarqantaq (Sal. 38:​3, 8). Pay jina tarikushanchis chayqa Isaías libron yanapawasunchis kallpata jap’inanchispaq.

8, 9. Isaías 1:18 textopi nisqan jina, ¿imatan Jehová Dios ruwan juchanchiskunawan?

⁸ (Leey Isaías 1:18). Isaías libropin Jehová Diosqa juj tupanachiyta willashan, chaywanmi rikuchishan imaynas juchanchistaqa llapantapuni perdonapun chayta. Chaypi nisqan jina, “rauraq puka” jinaña juchanchis kayman chaypas payqa “rit’ita jinas yuraqman” tukuchin. Rauraq puka colorqa k’anchashaq jinaraqmi, chay colorwan imapas qhellichakunman chayqa nishu sasatan lloqsin. Chhaynaña chaypas Jehová Diosqa perdonaspaqa llapantan juchanchista pichapun, manan ni ima qhellipas puchunchu.

⁹ Rey Davidmanta rimallasuntaq. Jujpa warminwanña pantarqan chaypas juj runataña wañuchirqan chaypas, Jehová Diosqa perdonapurqanmi payta, chaymantaqa ch’uya sonqota jinan paytaqa qhawarirqan (2 Sam. 11:​3, 4, 14, 15; 12:13; 1 Rey. 9:​4, 5). Arí, Jehová Diosqa Davidta yuyarispaqa manan chay pantasqantachu yuyariq aswanpas tukuy sonqo servisqantan, chhaynatan payqa noqanchiswanpas ruwan. Ima juchanchismantapas arrepientekunchis chayqa Diosninchis Jehová Diosqa perdonawanchismi, yanapawanchistaqmi ama juchachakuspa ch’uya sonqowan servinanchispaq. Kunanqa juj textotañataq t’aqwirisun, chaypas yanapawasunmi ama nishuta juchachakunanchispaq.

10. ¿Ima munay willakuymi kashan Isaías 38:17 textopi?

¹⁰ (Leey Isaías 38:17). Isaías libron nishan: “Llapa juchaykunatan qhepaykiman wijch’upurqanki”, nispa. ¿Imaninantan chaywan nishanman? Imaynan imatapas wijch’upuspaqa manaña chaytaqa yuyanchischu, chhaynatas Jehová Diosqa juchanchista wijch’upuspaqa manaña yuyanñachu. Bibliamanta rimaq juj diccionarion chay textomanta nin: “Chaypiqa, manapas ima juchatapas ruwaymanchu karan jinatan qhawaripuwanki, nillanmantaqmi”, nispa. Chhaynaqa Jehová Diosqa juchanchista perdonasqan qhepamanqa manapas jayk’aqpas ima juchatapas ruwasunmanchu karqan jinatan qhawaripuwanchis. Arí, manañan payqa chay juchataqa jayk’aqpas yuyarichiwasunchu. Paypunin nin: “Manañan juchaykikunataqa yuyasaqñachu”, nispa (Isa. 43:25). ¡May kusikunapaqmi chayta yachayqa ¿riki?! Juzgaqninchis Jehová Diospas manañataq yuyanñachu juchanchista chayqa, ¿imaraykutaq noqanchisri yuyashanallanchis?

11. ¿Imapin astawan piensan Jehová Dios? (Qhaway kay parrafopaq fotota).

¹¹ Ñaupaqpi juchapakusqanchismanta imaynapipas jujmanta llaki qatiriwasun chayqa, Jehová Diospa munakuyninpin piensananchis. Yachasqanchis jinapas payqa llapantan juchanchistaqa perdonapuwanchis. Yaqapaschá juj runakunaqa p’enqakunman noqanchismanta, cheqnipakuwasunman imapaschá. Jehová Diosmi ichaqa mana jayk’aqpas chaytaqa ruwanqachu (Isa. 57:16). Payqa kunan imaynachus kashanchis, imayna kananchispaqsi kallpachakushanchis chaypin piensan, manan ñaupaqkunapi imatachus ruwarqanchis chaypichu piensan (Isa. 55:7). ¡May munaypunin Jehová Dios chhayna munakuq chhayna perdonakuq kasqanqa ¿riki?! Amapuni dejasunchu ñaupaqpi juchanchiskuna kunan kusi kausayninchista qechuwananchistaqa, ni jamuq tiempopi bendicionkuna chaskinanchista qechuwananchistapas.

MAYQEN FAMILIANCHISPAS WAÑUKAPUQTIN

12. ¿Imaynan mayninpi tarikusunman mayqen familianchispas wañukapuqtin?

¹² Mayqen familianchispas amigonchispas wañupuqtinqa yaqapaschá sinchi llakisqa sonqo nanasqa tarikusunman. Yaqapaschá mayninqa nisunman: “¿Imaraykutaq Jehová Diosri jinallata kaykunata qhawan?”, nispa. Chaysi pasasqa hermano Michaeltapas, paypa papan mamitan imas wañukapusqaku juj incendiopi. Paymi nin: “ Nishu sonqo nanasqan kasharqani, phiñasqan kasharani Jehová Diospaqpas. Manaña paychu chaypaq juchayoq karan chaypas ¿imaraykutaq manari jark’aranchu? nispan nisharqani”, nispa. ¿Jayk’aqllapas chhaynapi tarikurankichu? Chhayna kaqtinqa Isaías libron yanapasunkiman chaypi.

13. ¿Imaninmi Jehová Dios Isaías 25:8 textopi?

¹³ (Leey Isaías 25:8). Bibliapi nisqan jina Jehová Diosqa wañuytapas wiñaypaqmi chinkachipunqa. May munaychá kanqa chay p’unchay chayamuqtinqa, manañan pipas wañunqachu manañan pipas waqanqachu familianmanta (Isa. 35:10). Arí, manañan panteonkunapas kanqañachu. Chay tiempo chayamuqtinqa familianchiskunapas amigonchiskunapas tukuy tiempon noqanchiswan kuska kanqaku, qhalillan kausanqakupas. Chaykunaqa manan mosqoyllachu, tukuy atiyniyoq Jehová Diospunin nin chhayna kananta, paytaq nin chayqa chhaynapunin chaykunaqa kanqa (Apo. 21:​4, 5).

14. ¿Imaniwaqmi kausarimpuy kananmanta Bibliaq willasqanmanta? (Isaías 26:19; qhaway kay parrafopaq fotota).

¹⁴ (Leey Isaías 26:19). Nimusqanchis jina, Jehová Diosqa chinkachipunqan wañuyta. Ichaqa manan chayllatachu ruwanqa wañusqakunata iman kausarichimpunqa, pay kikinpunin nirqan: “Wañuqniykunan kausarimunqa”, nispa. ¿Ima ninantan chaywan nishan? Diosqa paypa wañuqninkunata jinan qhawarin wañupuq kamachin runakunataqa, llapankun paypa yuyayninpi kashanku tiempollanpitaqmi kausarichimpunqa. Imaynan chhulla plantakunata llanllarichin chhaynatan Jehová Dios paykunawan ruwanqa llapankutan jujmanta jatarichimpunqa. ¡May munaychá kanqa chay familianchiskunawan jujmanta tupayqa! (Tupanachiy Marcos 5:42 textowan).

15. ¿Imaynatan yanapawasunman kausarimpuypi piensay?

¹⁵ Kaypi yachasqanchis jina Jehová Diosqa kausarichimpunqan wañupuq familianchista. Yachanchisña chayta chaypas manapaschá chaywanpas sonqonchispa nanasqanqa chinkanqachu, ichaqa yanapawasunmi chay nanayta aguantananchispaq. 12 parrafopi rimamusqanchis hermano Michaeltapas yanapansi chaypi piensay. Paymi nin: “Isaías 26:19 textota leespan allinta repararqani imaynas Jehová Diosqa papaytapas mamitaytapas paypa wañuqninta jina rikun chayta. Maytan paykunataqa munakun, yuyayninpin waqaychashan, tiempo chayamuqtintaq kausarichimpunqa. Chaykunapi piensaymi noqataqa allinta yanapawan, kallpata iman qowan”, nispa. Chhaynatan noqanchispas kausarimpuypi piensananchis. Chay p’unchay chayamuqtin imakunatas wañupuq familianchiswan ruwasun chaykunapin piensananchis. Chayta ruwasun chayqa manan nishutañachu sonqonchis nananqa.

16. ¿Bibliapi ima texton yanaparasunki sinchi llakipi tarikushaqtiyki?

¹⁶ Kaypin yacharanchis imaynatas Isaías libro yanapawasunman imapas qonqay cambiaqtin, ñaupaqpi ruwasqanchis juchakuna nishuta sonqonchista nanachiqtin, mayqen familianchispas wañupuqtin chaykunamanta. ¡May munaypunin chaykunata yachayqa ¿riki?! Chhaynatan Jehová Diosqa palabranwan kallpachawanchis (Sal. 94:19). ¿Qantarí ima texton yanapasunki chhayna sasachakuykunapi tarikuqtiyki? ¿Chay textota umaykipi grabakuwaq chayrí? Chaymantapas allinmi kanman chay textota qelqaspa may rikusqayki partemanpas churawaq chayqa. Chay textoqa Diospa simintaq chayqa allintan kallpachasunki.