¿Tukuy yuyaychu uyarikushanki?

1, 2. a) ¿Imakunatan Jehová Dios ruwashan iñiypi allin kananchispaq? (Salmos 23:​1, 2, 5). b) ¿Imakunamantan kaypi yachasun?

JEHOVÁ Diosqa kay tiempopiqa, imaymanakunawanmi yachaytapas yuyaytapas qowanchis. Chhaynataq chayqa, David jinachá noqanchispas ninchis: “Jehová Diosmi michiqniyqa, manan imapas pisiwanqachu”, nispa (leey Salmos 23:​1, 2, 5).

² Chay qowasqanchismanta jujninmi kashan juñunakuyninchiskuna. Chaypin Jehová Diosqa imaymanata yuyarichiwanchis. Wakinqa yaqapaschá unayña kashanchis Diospa llaqtanpi. Chhaynaña kanman chaypas, Jehová Diosqa munanmi chaykunata yuyarinanchista (2 Ped. 1:12). Ichaqa wakinninchispaqqa yaqapaschá sasa kanqa chaykunata tukuy yuyaywan uyariy. Chhaynapi tarikushanchis chayqa, kay yachachikuymi allinta yanapawasun. Chaymi kaypi yachasunchis kay tapuykunamanta: ¿Pin juñunakuykunapi yachachiwashanchis? ¿Imaraykun tukuy yuyaywan uyarinanchis? ¿Imakunatan discursota qoqkuna ruwankuman hermanokuna juñunakuyta tukuy yuyaywan uyarikunankupaq? ¿Imakunan yanapawasunman makilla uyarinanchispaq?

¿PIN YACHACHIWANCHIS?

3. ¿Imaynatan Jehová Dios rimapayawanchis? ¿Imaynatan juñunakuypi yachachiqkunapas yachachiwanchis?

³ Jehová Diosmi noqanchistaqa yachachiwashanchis, paymi rimapayawanchis Bibliawan (2 Tim. 3:​16, 17). Jesusqa allintan chaytaqa yacharqan. Chaymi imataña yachachishaspapas, Diospa nisqanman jinapuni yachachirqan. Chaymi runakunapas nirqanku: “¿Imaynapitaq kay runari Diospa simin qelqakunamanta yachan? ¡Payqa manamá riki yachachiqkunaq risqan escuelakunamanqa rirqanchu!”, nispa (Juan 7:15). Dios sonqo runakunaqa, gustowanmi Jesuspa yachachisqanta uyarirqanku. Ñaupa tiempopi wakin iñiqkunapas Diospa siminman jinapunin imatapas yachachiqku. Paykunamanta wakinmi karqan apóstol Pablo Apolos ima (Hech. 17:​2, 3; 18:​24, 28). Kay tiempopipas Diospa llaqtanpiqa Bibliaman jinan ruwakamun qelqakunapas videokunapas, tukuy ima yachachikuykunapas. Chaymantapas juñunakuykunapiqa Bibliaman jinapunin imatapas yachachikun. Chaymi chayllaraq juñunakuyman jamuq runakunaqa, admirakunku chayta rikuspanku. Juñunakuypi yachachiqkunapas Bibliawanpunin imatapas yachachinku. Ichaqa, manan leeyllachu leenku, aswanpas allintan yachachinku imaynatas chayman jina kausasunman chayta (Luc. 24:32).

4. ¿Imamantan Bibliapi rimashan uyariymanta rimaspa?

⁴ Bibliapiqa uyariymanta rimaspaqa, mayninqa kasukuymantan rimashan. Chaymi kasukunanchispaqqa, allinta entiendenanchis. Juñunakuykunapin Jehová Diosqa chay siminta allinta entiendechiwanchis. Chaymi juñunakuykunapiqa tukuy yuyaywan uyarinanchis imachus yachachikusqanta, chhaynapi chayman jina kausananchispaq. Chayta ruwasun chayqa, Jehová Diosqa kusikunqan (Prov. 27:11).

¿IMARAYKUN TUKUY YUYAY UYARINANCHIS?

5. Jehová Diosta astawan munakusun chayqa, ¿imatan ruwasun? (Juan 4:​23, 24; 1 Juan 5:3).

⁵ Jehová Diosta munakusqanchisrayku (Mat. 22:37). Jehová Diosta allinta reqsisun chayqa, astawanmi payta munakusun. Astawan payta munakusun chayqa, munasunpunin simin uyarikuyta, kasukuyta payllata yupaychaytapas (leey Juan 4:​23, 24; 1 Juan 5:3).

6. ¿Imata ruwananchispaqmi juñunakuykunapi yachachiwanchis?

⁶ Runamasikunata munakusqanchisrayku (Mat. 22:39). Juñunakuykunapin Jehová Diosqa yachachiwanchis, imaynatas hermanonchiskunata Diosta mana serviq runakunatapas yachachisunman chayta. Chaypaqqa askha yanapaykunan kashan, jujninmi Munakuq kay nisqa folleto. Chaypin yachachishan imaynatas runakunawan facil-llata rimayta qallarisunman chayta. Wakinpaqqa yaqapaschá sasa jujkunawan rimayta qallariy. Chhayna kaqtinqa, chaupi semana juñunakuykunapi hermanokunaq imayna ruwasqankutan allinta qhawarinanchis.

7. ¿Imaraykun uyarikunanchispuni Jehová Diospa siminta?

⁷ Kausayta munasqanchisrayku. Jehová Diosqa ñaupa tiempomantapachan serviqninkunata kamachirqan siminta kasukunankupaq. Chayta ruwaspallan kusisqa kausayta wiñay kausaytapas tarinanku karqan (Deut. 32:​44-47). Kunanpas kusisqa kausayta tarinapaqqa, paypa simintan kasukunanchis, chaymi juñunakuykunapiqa makilla uyarinanchis. Chaymantapas makilla uyarispaqa kallpachasqan kasunchis mosoq kausayta pacienciawan suyakunapaq (Rom. 8:25). Tukukuy tiempopiñataq kausashanchis chayqa, uyarikunanchispunin Diospa simintaqa. Chhaynapin iñiyninchispipas qaqata sayasunchis (Mat. 24:​42-44; Apo. 1:3).

¿IMAYNATAN YANAPAKUWAQ JUJKUNA MAKILLA UYARIKUNANKUPAQ?

8. ¿Imaraykun tukuy atisqanchista kallpachakunanchis aswan allin yachachiq kananchispaq?

⁸ Juñunakuypi ñaupaqmanta yachachiq hermanokunaqa, maytan yanapawanchis ima yachachikuytapas makilla uyarinanchispaq. Astawanqa discurso qoq hermanokunan chaypiqa allinta yanapariwanchis. Qanpas paykunamanta jujnin kashanki chayqa, tukuy atisqaykita kallpachakuy aswan allin yachachiq kanaykipaq. ¿Imaynatan chayta ruwawaq? Discursota qonaykipaq preparakushaspaqa allintan preparakunayki, Bibliaq nisqanman jinapunitaqmi chay discursoqa kanan. Chayta ruwanki chayqa, runakunaqa astawanmi Diosta reqsiyta munanqaku. Hermanonchiskunatapas yanapanqan imaña kaqtinpas Jehová Diosta servishanallankupaq. Ichaqa llapapas tukuy atisqanchistan kallpachakunanchis aswan allin yachachiq kananchispaq; juñunakuykunapaq parteyoq kaspan chaytaqa ruwasunman. Chhaynataq chayqa, ¿imakunan yanapasunkiman chayta allinta junt’anaykipaq? Chaykunamantan qatimuq parrafokunapi yachasun. Chaykunaqa manan discurso qoq hermanokunallapaqchu, aswanpas llapanchispaqmi. Chaykunan yanapawasun juñunakuypi partenchista allinta junt’ananchispaq (2 Tim. 4:2; Tito 1:9).

9. ¿Imaraykun yachachisqayki fácil entiendenapaq jina kanan?

⁹ Ima yachachisqaykipas fácil entiendeymi kanan. Facilta entiendenapaq jina yachachinki chayqa, uyariqniykikunaqa makillan uyarikunqaku. Mana chayqa, juj ruwaykunapin yuyayninkuta churankuman. Ichaqa, ¿iman yanapasunkiman discursota qoshaspa yachachisqayki fácil entiendey kananpaq? Chaypaqqa kaykunatan ruwawaq: 1) Imakunamantas yachachinki chayta sut’ita willay. 2) Chay yachachikuykunata juj-jujllamanta yachachiy. Chaymantapas sut’itan reparachinayki juj yachachikuymanta juj yachachikuyman pasanaykipaq. Chaypaqqa yaqapaschá juj chhikanta sayariwaq, otaq niwaq imamantas rimanki chayta. 3) Manaraq tukushaspa yuyarichiy imakunamantas yachachirqanki chayta.

10. ¿Imaraykun Bibliapi kaq textokunapi, imamantachus yachachinki chaykunapi yuyaymananayki?

¹⁰ Imamantachus yachachinki chaypi yuyaymanay. Sichus Bibliapi kaq textokunapi, imamantachus yachachinki chaykunapi yuyaymananki chayqa, sonqomantan rimanki (Prov. 2:​4, 5). Chayta ruwanki chayqa, hermanokunapas reparanqakun sonqomanta rimasqaykita (Hech. 4:20). Chaymanta rimaspan Estados Unidos nacionmanta 70 watayoq kuraq hermanonchis nin: “Waynachallaraq kashaqtiymi juj munay discursota uyarirqani. Chay discursopin juj hermano kallpachawarqanku Biblia leesqaykupi yuyaymananaykupaq. Payqa allintan willawarqanku imaynatas chayta ruwaykuman chayta. Payqa munaytan sonqomanta rimapayawarqanku. Chay discursoqa anchatan yanapawarqan. Chay kutimantapachan kallpachakurqani Bibliata leenaypaq, chaypi yuyaymananaypaq ima. Chayta ruwaymi yanapawarqan Jehová Diosta astawan munakunaypaq”, nispa.

11. ¿Imata ruwanaykichispaqmi discursota qoqkuna kallpachakunaykichis? (1 Timoteo 4:​13-16).

¹¹ Imakunapis hermanokuna yanapanata necesitashanku chaypi piensariy, jinaspa chayman jina paykunata yuyaychariy. Discursota qoshaspaqa ama willayllachu imatapas willay. Aswanpas paykunata Bibliawan kallpachariy yuyaychariy ima. Chaytan apóstol Pablopas ruwarqan. Payqa Timoteotan Bibliawan sumaqta yuyaycharqan (leey 1 Timoteo 4:​13-16). Chhaynaqa, piensariy imakunapis hermanokuna yanapanata necesitashanku chaypi, imaynatas paykunata Bibliawan yuyaychariwaq chaypipas.

12. ¿Imaraykun discurso qoqkuna imaynatachus rimanku chayman jinalla yachachinanku?

¹² Discursoykita alto kunkawan practicay, chhaynapin rimashawaqpas jinalla yachachinki. Discursotaqa manan leenachu, aswanpas imaynatachá rimanchis chhaynallatan yachachinanchis. Chaypaqqa alto kunkawanmi practicawaq. Chhaynapin hermanokunapas yachachisqaykita tukuy yuyay uyarikunqaku. Allin leeq allin yachachiq kasun nisqa folletopin juj yuyaychay kashan. Chaypin juj partepi nishan: “Rimasqaykiman jinallan rimanayki ichaqa sonqomantan kanan. Chhaynapin uyariqkuna reparanqaku paykunapi interesakusqaykita, tukuy sonqomanta rimasqaykitapas”, nispa. Chaypi nisqan jina, sichus rimasqaykiman jinalla rimanki, sonqomantataq rimankipas chayqa, hermanokunaqa tukuy yuyaymi uyarikunqaku, yachachisqaykiman jinataqmi ruwanqakupas.

13. Discurso qoqkuna, ¿imaraykun allin experienciayoq hermanoq yanapayninta mañakunaykichis? (Qhaway kay parrafopaq fotota).

¹³ Allin experienciayoq discurso qoq hermanoq yanapayninta mañakuy. Chay hermanoman willay imaynatas discursota qoyta munashanki chayta. Discursoyki qelqasqa kashan chayqa, chayta payman qhawachiy. Chaymantapas niwaqmi discurso practicasqaykita uyarinasuykipaq. Chay qhepaman ima yuyaytapas qosunki chayqa, chayman jina ruway (Prov. 1:5). Sapallanchisqa mayninqa manan reparakunchischu imaynatapunis yachachishanchis chayta. Chayraykun allinpuni jujkunaq yanapayninta mañakuyqa. Sichus allin experienciayoq hermanokunaq yanapayninta mañakusun chayqa, allintan uyariwaqninchis hermanokunata yanapasun Jehová Diospa siminta kasukunankupaq.a

¿IMATAN RUWASUNMAN TUKUY YUYAYWAN UYARINANCHISPAQ?

14. ¿Imaraykun nisunman “Salmos 119 capitulota qelqaq runa jinan agradecekuq kananchis” nispa? (Salmos 119:​24, 111, 167).

¹⁴ Agradecekunanchismi Jehová Diosta yachachiwasqanchismanta. Kay tiempopiqa sinchi sasa tiempokunapitaq kausashanchis chayqa, necesitanchispunin Jehová Diospa yuyaychayninta. Chay yuyaychaykunataqa sapa kutillanmi Jehová Diosqa yuyarichiwanchis (2 Tim. 3:1). Chaypaschá mayninqa nisunman: “¿Imaraykutaq sapa kutillari kaqllamanta yachachikamun?”, nispa. Chay pasawaqtinchisqa Salmos 119 capitulota qelqaq runatan yuyarinanchis. Payqa anchatan kusikuq imachus ruwananta Jehová Dios yuyarichiqtinqa (leey Salmos 119:​24, 111, 167).

15. ¿Iman yanapawasunman Jehová Diospa qowasqanchis espiritual mijunamanta agradecido kananchispaq?

¹⁵ Noqanchispas Salmos 119 capitulota qelqaq runa jinan kananchis. Sapa kutinña juñunakuykunapi kaqllamanta yachachikamunman chaypas, manan chaywanqa aburrikunanchischu, aswanpas Jehová Diostan agradecekunanchis chaykunamanta. Chaypaq juj chhikanta Israel runakunamanta yachasun. Paykuna ch’in ladopi kashaqtinkun Jehová Diosqa maná nisqa mijuyta paykunaman qorqan. Chaywanqa anchatachá paykunaqa kusikurqanku, maytachá Jehová Diostapas agradecekurqanku (Éx. 16:​15, 31). Ichaqa tiempowanqa sayk’upurqankun chay mijuymanta, manañan Jehová Diostapas agradecekurqankuchu (Núm. 21:5). Manan munasunmanchu chay mana agradecekuq Israel runakuna jina kaytaqa ¿riki? Mayninpi kaq yachachikuytaña uyarisunman chaypas, agradecekunanchismi Jehová Diosta chaykunamanta. Ichaqa, ¿iman yanapawasunman agradecido kananchispaq? Chaypaqqa yuyarinanchismi imaynas chay yachachikuykunaqa Jehová Diosmanta jamun chayta, imaynas chay munay espiritual mijunataqa pay preparachipuwanchis chaytapas. Chaymantapas yuyarinanchismi imaynas chaykuna yachasqanchisqa yanapawanchis allin yuyaywan imatapas ruwananchispaq chayta, imaynas chaykunaqa yanapawasun wiñay kausayman chayananchispaq chaytapas (Prov. 3:​13, 16-18; Juan 17:3).

16. ¿Imakunata ruwaymi wakin hermanonchiskunata yanaparqan juñunakuykunata tukuy yuyaywan uyarikunankupaq? (Qhaway “Tukuy yuyaywan uyarinapaq yanapaykuna” nisqata).

¹⁶ ¿Imakunata ruwaymi wakin hermanonchiskunata yanapashan? Kunanqa yachasun imakunata ruwaysi wakin hermanonchiskunata yanaparqan tukuy yuyaywan juñunakuykunata uyarikunankupaq chayta. Ashley hermananchismanta yachasun, payqa 30 watañan Jehová Diosta servishan. Paymi nin: “Noqataqa juñunakuykunapaq preparakuymi yanapawan. Ñaupaqmantapacha preparakuni chayqa, tukuy yuyaymi juñunakuyta uyarini, mana preparakuni chaytaq, facilta umayqa maymanpas pasapun”, nispa. József hermanonchispas 52 watañan Jehová Diosta servishan. Paymi nin: “Kaqllamantaña mayninpi yachachikamunman chaypas, imaymanatan chaykunamantaqa yachani. Mayninqa mana reparayllan mana yachasqaykunata yachani”, nispa. Nillantaqmi: “Manaña juj hermano allin rimaqchu kanman chaypas, noqaqa manan chaypichu mastaqa piensani. Aswanpas imaynatas Bibliamanta yachachimushan chaypin masta yuyayniyta churani”, nispa.

17. ¿Imakunatawanmi ruwasunman juñunakuykunata tukuy yuyaywan uyarinanchispaq? (Qhaway kay parrafopaq fotota).

¹⁷ ¿Imakunatawanmi ruwasunman juñunakuykunata tukuy yuyaywan uyarinanchispaq? 1) Juñunakuykunaman rinayki kaqtinqa pisillata mijuy, chhaynapi ama juñunakuypi puñunaykipaq. 2) Tempranota juñunakuykunaman riy. 3) Celularniykita ch’inñichiy, chhaynapi ama imawanpas yuyayniyki juj ladoman ripunanpaq. 4) Imakunamantachá juñunakuykunapi yachachikamunqa chaykunapi piensariy. 5) Yachachimuq hermanota tukuy yuyaywan uyariy. 6) Juñunakuypi yachasqaykita anotakuy dibujaypas. 7) Piensariy imaynatas hermanoq yachachimusqan leesqan textokunawan tupashan chaypi. 8) Tapukuy: “¿Imaynatan kay yachasqay yanapawanman iñiq t’aqapi hermanokunata yanapanaypaq Diosmanta willanaypaqpas?”, nispa. 9) Manaraq juj asambleanchisman rishaspa qhawariy imakunamantas chaypi yachachikamunqa chayta. Chaypaqqa chay asambleapaq programapin leewaq titulonta textokunata ima. 10) Asambleapi takikunata churakamuqtin jina tiyanaykipi tiyay, jinaspa tukuy yuyaywan uyariy chay takikunata videokunata ima. Chayta ruwaymi yanapasunki asambleata makilla uyarinaykipaq.

UYARIKUSHALLAY JEHOVÁ DIOSTA

18. ¿Imaraykun kallpachakunanchis Jehová Diosta tukuy yuyaywan uyarikushanallanchispaq?

¹⁸ Kallpachakushallasun juñunakuykunata tukuy yuyaywan uyarinanchispaq. Yachasqanchis jinapas, Jehová Diosqa allinninchispaqmi juñunakuykunapiqa yachachiwanchis (Sal. 23:3; 31:3). Sasa tiempokunapitaq kausashanchis chayqa astawanraqmi necesitashanchis Jehová Diospa yuyaychayninkunata ¿riki? Chhaynaqa, allinta qhawarikuy tukuy yuyaywanchus juñunakuykunata uyarishanki icha manachus chayta. Chaymantataq kallpachakuy chaypi yachasqaykiman jina imatapas ruwanaykipaq (Luc. 8:18). Sichus Jehová Diospa rimapayawasqanchista tukuy yuyaywan uyarikusun chayqa kusisqan kasun, jamuq tiempopipas wiñay kausaytan chaskikusun (Sal. 119:​2, 14).