Predicanapaq gruponchispi yanapakusun

1, 2. ¿Imaninkun wakin hermanokuna iñiq t’aqapi grupokunaq kasqanmanta?

“ÑAN atiwaqña predicayta” nispa umalliqkuna nisuqtiykikuqa, may kusisqachá karqanki. Chay p’unchaymantapachachá Jehová Diospa testigonkunawan kuska Diosmanta willayta qallarirqanki (Sal. 148:​1, 2, 12, 13). Chaymantapas chay p’unchaymantapachachá predicanapaq juj grupomanta karqanki. Chay grupokunan yanapawanchis Diosmanta allin willakuykunata willananchispaq. Chay willakuyqa lliu pachantinpin aparikushan (Mat. 24:14).

² ¿Imaniwaqmi iñiq t’aqapi chhayna grupokuna kasqanmanta? Chaymanta rimaspan hermananchis Wendy nin:a “Iñiq t’aqapi jujnin grupopi kayqa maytan yanapawarqan. Chay grupopi hermanokunan noqataqa munayllata yachachiwarqanku imayna predicayta imayna yachachiytapas. Chaymantapas imaynatas Jehová Diospa llaqtanpi astawan yanapakuyman chaytapas yachachiwarqankun. Chaymantapas paykunawanqa allin amigontinmi kayku”, nispa. Hermanonchis Rich nillantaq: “Noqaqa juj grupomantan encargakuni. Chaypi yanapakuyqa may munaymi noqapaqqa. Mayqen hermanopas juj runata yanapan bautizakunanpaq chayqa, grupopi encargakuqmi chay bautizakuqta yanapan Jehová Diospa llaqtanpi astawan ñauparinanpaq”, nispa. Hermananchis Dinah nillantaq: “¡May allinpunin iñiq t’aqapi predicanapaq grupokuna kasqanqa! Chay grupopi hermanokunaqa familiay jinan kanku”, nispa.

3. ¿Imakunamantan kaypi yachasunchis?

³ Kaypin yachasunchis imatas ruwananku grupopi umalliqpas yanapaqninpas chayta, imaynatas paykuna yanapanku gruponkupi kaq hermanokunata chaytapas. Yachallasuntaqmi imaynatas sapankanchis yanapakusunman gruponchispi chaytapas. Chaymantataq yachasunchis imaraykus allinpuni juj grupopi kay chayta.

GRUPOMANTA ENCARGAKUQ YANAPAQNINPIWAN

4. a) ¿Ima ruwaykunapin yanapakunku grupomanta encargakuq umalliqkuna? b) ¿Imaynatan qhawarinku grupopi iñiqkunata? (Qhaway “Grupomanta encargakuqkunapaq yanapaykuna” nisqata).

⁴ Grupomanta encargakuqqa juj umalliqmi.b Iñiq t’aqapi umalliqkunan paytaqa churanku jujnin grupopi iñiqmasikunata yanaparinanpaq. Ichaqa, ¿imakunatan ruwan iñiqkunata yanapananpaq? 1) Payqa ima grupopichá kashan chaypi kaq iñiqmasikunatan sapankata allinta qhawarin (Prov. 27:23). Chaymantapas makillan kashan paykunata iñiyninkupi sumaqta yanaparinanpaq kallpacharinanpaq ima (Prov. 12:25; Isa. 32:2; Sant. 2:​15-17). 2) Gruponpi iñiqkunatan sapankata yanapan ama pisipaspa Diosmanta willanankupaq. Paypas tukuy atisqantan kallpachakun gruponpi hermanokunawan predicaq lloqsinanpaq. Sapa semana tukuytan astawanqa chayta ruwananpaq kallpachakun. Chaymantapas kallpachakunmi gruponpi sapanka hermanokunawan predicananpaq, chhaynapi paykunata yanapananpaq kallpachananpaq ima. Mayninpi predicaq mana lloqsiyta atinmanchu chayqa, yanapaqninmanmi encargan chay ruwayta aparinanpaq. Yanapaqnin mana atiqtintaq juj allin iñiqniyoq hermanoman encargan. 3) Qhari hermanokunatan yanapan Diospa llaqtanpi astawan yanapakunankupaq (1 Tim. 3:1). Tukuy sonqomantan paykunata kallpachan, Bibliaq nisqanman jinan yuyaytapas qon. Chaymantapas yanapakuq qhari kanankupaq, umalliq kanankupaq iman yanapan. Rikusqanchis jina, chay llank’ayqa ancha jatun ruwaymi, chaymi iñiq t’aqapi umalliqkunaqa allin capacitasqa umalliqkunata chayta ruwanankupaq ajllanku.

5. ¿Imaraykun mayninpi sasa kanman juj grupomanta encargakuy?

⁵ Mayninqa manan facilchu chay ruwaykunata allinta junt’ayqa. Chaypaq yachasunchis Alemania nacionpi Jörg hermanonchismanta. Payqa umalliqmi, juj grupomantataqmi encargasqa kashan. Chaymantapas iñiq t’aqapiqa imaymana ruwaykunapin yanapakun. Paymi nin: “Iñiq t’aqapiqa imaymanataq ruwanay kan chayqa, mayninqa manan tiempo aypawanchu grupoypi llapa hermanokunawan rimanaypaq”, nispa. Uganda nacionpi hermanonchis Abelmanta yachallasuntaq. Payqa umalliqmi, 70 watanpitaqmi kashan. Paymi nin: “Iñiq t’aqaypiqa pisillan kanku umalliqkunapas yanapakuq qharikunapas. Chaymi predicanapaq grupokunapiqa, askha hermanokuna kanku. Chaymi noqapaqqa sasa sapa kutilla paykunata kallpachay”, nispa. Surinam nacionmanta Obed umalliqmi nillantaq: “Noqamanqa gustawanmi jujkunata yachachiy, ichaqa tiempopaq kallpapaq iman chay ruwayqa. Chaymantapas manan ratullachu hermanokunaqa ñauparinku. Chaymi mayninqa mana ganaswanchu chay ruwayta ruwani”, nispa. ¿Iman yanapanman chhaynapi tarikuq umalliqkunata?

6. ¿Imaraykun predicanapaq grupokunapi pisilla kananku?

⁶ Predicanapaq grupokunapiqa pisillan kananku. Chhaynapin grupomanta encargakuqkunaqa, allinta reqsinqaku gruponkupi kaq hermanokunata, allintataqmi yanapanqakupas iñiyninkupi fuerte kanankupaq. Ichaqa, ¿iñiq t’aqapi umalliqkuna pisilla kankuman chayri? Chaywanpas grupokunapiqa manan nishu askhachu kananku. Pisiña umalliqkuna kanman chaypas, yanapakuq qharikunatan churananku grupokunamanta encargakunankupaq. Sapanka grupopi pisilla kanqaku chayqa, chay grupomanta encargakuq hermanokunaqa, allintan paykunata yanapayta atinqaku.

7. Pisilla umalliqkuna kaqtin, ¿imatan ruwankuman grupomanta encargakuqkuna iñiqkunata allinta qhawarinankupaq? (1 Pedro 5:2; qhaway kay parrafopaq fotota).

⁷ Juj grupomanta encargakushanki, ¿pisitaq umalliqkunapas kanman chayri? ¿Imatan ruwawaq? Yanapaqniykita yachachiy chay ruwaypi allinta yanapanasuykipaq (leey 1 Pedro 5:2). Chaypaqqa niwaqmi wakin ruwaykunata pay ruwananpaq. Mayninqa yaqapaschá pay umallinman predicacionta. Chaymantapas paywan kuska mañakuy, jinaspa rimariychis imaynas grupoykichispi hermanokuna kashanku chaymanta; kallpachakuychistaq pikunas yanapana kashan paykunata yanaparinaykichispaq. Pitapas watukuq sapallayki rinaykimantaqa, pusarikuy yanapaqniykita. Manaraq rishaspa ichaqa willariy imaynatas chayta aparinki chayta. Chayta tukuspataq kallpachay yanapaqniykita, yuyayta ima qoriy. Chayta ruwanki chayqa, yaqapaschá qhepamanqa juj grupomanta pay encargakunman (2 Tim. 2:2). Grupoykipi hermanokunata yanapanaykipaqqa, yaqapaschá valekuwaq jujkunaq yanapaynintapas. Chaypaqqa yaqapaschá precursorkuna allin experienciayoq hermanokunapas mosoqkunawan predicankuman. Paykunaqa allintan yanapanqaku jujkunawan allinta rimayta yachanankupaq, munaqkunaman kutinankupaq, estudiota qonankupaq ima. Kunanqa kinsa ruwaykunamanta yachasun, chhaynapi gruponchispi allinta yanapakunanchispaq.

¿IMAKUNATA RUWASPAN GRUPONCHISPI YANAPAKUSUNMAN?

8. ¿Imakunatan ruwasunman gruponchispi yanapakunapaq? (Romanos 1:12).

⁸ Kallpachakuy predicaq rinapaq. Predicaq risun chayqa, allintan gruponchispi iñiqmasikunawan kallpachanakusun (leey Romanos 1:12). Chaymantapas predicaq rispaqa manan nishutachu runakunawan rimayta manchakusun. Ichaqa, ¿llank’anaykirayku mana predicaq riyta atishankichu chayri? Yaqapaschá llank’anapi jefeykiwan parlariwaq chhaynapi llank’anayki horata atikuqtinqa cambianaykipaq (Neh. 2:​4-6). Nishu kuraqña o nishu onqosqapas kashanki ¿chayri? Chhaynapi tarikushanki chayqa, grupoykimanta encargakuqwan parlariy. Yaqapaschá nisunkiku predicacionta aparikunanpaq juñunakuyman celularninta jaykunaykipaq. Cartata ruwaspa, celularninta imapaschá predicawaqchis. Ichaqa waynapas kashanki, qhalipas kashanki, manataq predicacionman riyta atishankichu ¿chayri? ¿Imatan ruwawaq? Yaqapaschá kallpachakuwaq sapa semana grupoykipi juj hermanowan predicanaykipaq. Chaypaqqa yaqapaschá tiempoykita allinta t’aqanayki kanqa, ima cambiotapaschá ruwanayki kanqa (Rom. 12:11; Col. 4:5). Chaykunata ruwanaykipaq kallpachakunki chayqa, allintan grupoykita yanapanki. Chaymantapas Diospa yanapayninta mañakuy, paymi kallpanta atiynintapas qosunki chayta ruwanaykipaq (Filip. 2:13).

9. ¿Imatan ruwasunman gruponchispi sumaqta kausanapaq? (Romanos 12:13).

⁹ Jujkunata sumaqta chaskisun. Jujkunata sumaqta chaskispaqa, gruponchispi sumaq kausay kananpaqmi yanapakusun (leey Romanos 12:13). Atikuqtinqa yaqapaschá wasinchispi aparikunman predicanapaq juñunakuyta. Wakin iñiq t’aqakunapiqa sapanka grupon chaskinku discurso qoq hermanota. Wakin grupokunaqa, paykunaman tupaqtinmi juñukunku chay hermanowan imallatapas mijunankupaq. Mayninpi chay hermano manaña paykunawan kuskachu kanman chaypas, paykunaqa juñukullankun. Chaypaq yachasunchis hermananchis Sarahmanta. Payqa precursora especialmi, paymi nin: “Wasipi visitata chaskispaqa, mayninqa manchan-manchanmi imatapas ruwani. Ichaqa mijunamanta nishuta llakikunaymantaqa, hermanokunata allinta reqsinaypaqmi kallpachakuni”, nispa. Gruponchispi familia jina sumaqta kausananchispaq kallpachakusun chayqa, aswan allin amigontinmi kasun Jehová Dioswanpas hermanonchiskunawanpas (Neh. 8:10; Hech. 20:35).

10. Imapipas allinyariyta munashanchis chayqa, ¿imatan ruwasunman? (Proverbios 1:5; 27:17; qhaway kay parrafopaq fotota).

¹⁰ Kallpachakuy allin predicaq kanaykipaq. ¿Imaraykun chay allin kanman? Allin predicaq allin yachachiq kasun chayqa, kusisqan gruponchispi hermanonchiskunawan predicasun. Ichaqa, ¿imatan ruwawaq aswan allin predicaq allin yachachiq kanaykipaq? Chaypaqqa juj allin experienciayoq precursorpa yanapaynintan mañakuwaq (Leey Proverbios 1:5; 27:17). Gruponchista qhawariqmanpas willarisunmanmi imakunapis ñaupariyta munashanchis chayta. Willakusun chayqa, paykunaqa yanapawasunpunin chayman chayananchispaq. Chaymanta rimaspan hermananchis Heather nin: “Noqapaqqa manan facilchu runakunawan rimayqa, chaymi juj precursorata valekurqani revisitaykunaman compañawananpaq. Payqa sapa kutilla predicaq rinaykupaqmi niwaq. Chaymantapas yanapawarqanmi visitasqay señorawan Biblia estudiayta qallarinaypaq. ¡Allipaqchá paypa yanapaynintaqa mañakurqani! Chaymi kunanqa kusisqa Diosmanta willashani”, nispa. Rikusqanchis jina, imaymanamantan gruponchispiqa yanapakusunman.

JUJ GRUPOPI KAYQA ALLINPUNIN

11, 12. ¿Imaraykun allinpuni iñiq t’aqapi jujnin grupopi kay? Juj experienciata willay.

¹¹ Iñiypin allin kasun. Juj grupopi kaspaqa allin qhawarisqa allin cuidasqa iman kasunchis. Viudakunapas, wajchakunapas, kuraq hermanokunapas allin cuidasqa allin qhawarisqan kanqaku (Sant. 1:27). Ima llakipiña tarikusun chaypas, faciltan chay gruponchispi kaq hermanonchiskunaqa yanapariwasun (1 Tes. 2:8). Chaymantapas chay grupopin yachasunchis allin predicaq kayta. Qharikunapas Diospa llaqtanpi allinta yanapakunankupaqmi allin capacitasqa kanku (1 Tim. 3:10).

¹² Iskay parrafopi rimamusqanchis hermananchis Wendy nin: “Papayqa manan munarqanchu Testigo kanaykuta. Chaymi mamitayqa wakin semanakunaqa mana predicaq lloqsiyta atiqchu. Noqatan ichaqa papayqa mana jark’awaqchu. Chaymi predicaq lloqsiqtiyqa grupoypi juj precursora hermana allinta yanapawarqan. Paywanqa sapa kutillanmi predicaq kayku. Paymi yanapawarqan predicacionpipas iñiq t’aqapipas allinta yanapakunaypaq. Grupoyta qhawariq hermanopas, sapa kutillanmi Bibliawan yuyaychawaq. Chay yuyaychayninkunaqa kunankamapas yanapawashallanmi”, nispa.

13. ¿Imaraykun nisunman “gruponchispi hermanonchiskunawan allin amigontin kaspaqa allinmi kasun” nispa? (Qhaway fotota).

¹³ Kallpachasqan kasun. Gruponchispi hermanokunawan predicasun chayqa, aswan allintan paykunawan reqsinakusun (Filip. 1:27). Chaymantapas wakin hermanonchiskunaqa manchakunkun jujkunawan rimayta tiempota pasariytapas. Ichaqa gruponchispiqa pisillataq kanchis chayqa, faciltan paykunaqa jujkunawan rimanqaku (2 Cor. 6:13). Manan chayllapaschu, sinchi onqosqaña kasun depresión onqoyña jap’iwasun chaypas, gruponchispi hermanonchiskunaqa yanapariwasunmi (1 Tes. 5:14). Chaymantapas ñataq manchay ñak’ariy tiempo chayamushanña chayqa, kallpachakusun gruponchispi hermanonchiskunawan allin amigontin kananchispaq (Mat. 24:21). Hermanonchiskunaqa manapaschá chinkachinqakuchu sasachakuyninchistaqa, ichaqa paykunaq yanapayninwanqa atisunmi chaykuna aguantayta (Prov. 17:17).

14. ¿Imaraykun nisunman “juj grupopi kasun chayqa allin cuidasqan kasun” nispa?

¹⁴ Allin cuidasqan kasun. Sinchi onqosqaña kasunman chaypas; unu lloqllaña pasanman, qatikachasqaña kasunman chaypas, imapiña tarikusunman chaypas, gruponchispi hermanonchiskunaqa yanapawasunpunin. Manan chayllapaschu, manaraq chaykuna pasashaqtinmi umalliqkunaqa qhawarinku pikunas yanapanata necesitashanku chayta. Chaymantapas ima desgraciapas pasaqtinqa, grupota qhawariq hermanon llapa hermanokunata wajan imaynas kashanku chayta yachananpaq; chayman jinan paykunaman yanapayta apachikun. Chay yanapaykunaqa yaqapaschá kanman p’achakuna, mijuykuna, jampikuna, unu ima. ¡May munaymi Jehová Dios gruponchispi hermanonchiskunawan yanapawasqanchista yachayqa ¿riki?!

15. ¿Imata ruwananchispaqmi kallpachakushanallanchis?

¹⁵ Ñaupaqpi nimusqanchis jina, Jehová Diospa llaqtanqa ancha jatunmi. Janaq pachapiqa waranqa-waranqanpin mana yupay atiyraq angelkuna kashan. Kay pachapipas 9 millones más runakunañan Jehová Diospa llaqtanpi kashanchis (Zac. 8:23; Apo. 5:11). Kay pachapi kaqkunaqa janaq pachapi angelkunawan kuskan allin willakuykunata llapa runakunaman juj nisqalla willamushanchis (Apo. 14:​6, 7). ¡May munaymi chayta yachayqa ¿riki?! Arí, chhaynan kashan. Chhaynaqa tukuy atisqanchista kallpachakusun gruponchispi imaymana ruwaypi yanapakunanchispaq. Chayta ruwaspaqa Jehová Diospa sonqontan kusichisunchis (Sal. 111:1).