Kallpachakusun allin yachachiq kanapaq

1. ¿Imata ruwananchispaqmi sapankanchispas kallpachakunanchis? (2 Timoteo 4:2; qhaway kay parrafopaq dibujota).

JUJ kutinmi Jesusqa qatikuqnin runakunata nirqan: “Llapa nacionmanta runakunaman riychis, jinaspa yachachimuychis [ . . . ]. Qankunaman llapa kamachisqaykunata imaynatachus kasukunanku chayta paykunaman yachachimuychis”, nispa (Mat. 28:​19, 20). Chaypi Jesuspa nisqan jina, llapa iñiqkunan yachananchis jujkunaman yachachiyta. Ichaqa yaqapaschá pipas ninman: “Jehová Diosmá riki allin sonqo runakunataqa pusamushan, angelkunapas chaypiqa yanapakushankumá ¿riki?”, nispa (Hech. 13:48; Juan 6:44; Apo. 14:6). Arí cheqaqmi chayqa, ichaqa noqanchispas sapankanchismi kallpachakunanchis paykunaman yachachinanchispaq. Chaypaq yuyarisun Pablota Bernabetawan. Paykunaqa Iconio llaqtaman jaykuspan “allinta yachachirqanku, jinan askha judiokuna griego runakuna ima iñipurqanku” (Hech. 14:1). Rikusqanchis jina, paykunaqa allin yachachiqkunan karqanku (leey 2 Timoteo 4:2). Noqanchispas llapanchismi kallpachakunanchis paykuna jina kananchispaq.

2. ¿Imaraykun wakin hermanokuna ninkuman “manan atiymanchu jujkunaman yachachiytaqa” nispa?

² Wakinqa yaqapaschá mana atiqpaq jina qhawarikunkuman. Yaqapaschá ninkuman: “Noqaqa mana estudioyoqmi kani, manan atiymanchu jujkuna yachachiytaqa”, nispa. Bibliaq willasqan wakin runakunapas chhaynatan qhawarikuqku (Éx. 4:10; Jer. 1:6). Wakinqa yaqapaschá jujkunaman mana yachachiyta atispa ninkuman: “Manan noqaqa valenichu jujkunata yachachinaypaqqa, atiyman chayqa juj hermanokuna jinachá askhata estudiota qoshayman”, nispa. Ichaqa yachasqanchis jinapas, manan llapa runakunachu uyarikuyta munanku, chaymantapas manan noqallanchismantachu imapas kanqa. Ñaupaqpi yachamusqanchis jina, Jehová Diospa yanapayninwan angelkunaq yanapayninwan iman allin sonqo runakunataqa tarisun. Chaywanpas noqanchisqa tukuy atisqanchistan kallpachakunanchis runakunaq sonqonman chayanapaq jina yachachinanchispaq. Chaypaqmi kaypi yachasunchis kinsa yanapaykunamanta.

KHUYAPAYANANCHISMI RUNAMASINCHISKUNATA

3. ¿Imaraykun runakuna Jesuspa yachachisqanta uyarikuqku?

³ Bibliapin Jesusmanta nin: “Yacharqanmi runaq sonqon imayna kasqanta”, nispa (Juan 2:25). ¿Imatan chaywan nishanman? Jesusqa allintan yachaq runaq imayna piensasqanta sonqon ukhupi ima kasqantapas. Chayman jinan payqa runakunata rimapayaq, sonqoman chayaqta jinan imatapas niq. Chaymantapas Jesusqa allintan yacharqan runakuna pisi iñiyniyoq kasqankuta. Paykunamanqa religionpi umalliqkunan imaymana mana junt’ay atina kamachikuykunata qoqku (Mat. 9:36; 23:4). Chaymi Jesusqa yachachispaqa paykunaq allinninpaq imatapas yachachiq. Chaytan sut’ita rikukushan orqo patapi kashaspa yachachisqanpi. Chayraykun runakunaqa Jesustaqa may kusisqa uyarikuqku.

4. ¿Imaynatan rikuchisunman runamasinchiskunamanta llakikusqanchista? (Qhaway kay parrafopaq fotokunata).

⁴ Noqanchispas Jesús jinan kananchis. Ichaqa, ¿imaynatan rikuchisunman runamasinchiskunamanta llakikusqanchista? Chaypaqqa imakunachus paykunata llakichin chaykunapin piensarinanchis. Yachasqanchis jinapas, Satanaspa kamachisqan kay millay pachapiqa imaymana llakin llapanchismanpas chayamuwanchis. Chaypi piensarisun chayqa llakipayasunmi runamasinchiskunata. Paykunata yanapananchispaqqa yaqapaschá piensarisunman kay tapuykunapi: ¿Imamantan kay p’unchaykuna noticiakunapi rimashanku? ¿Tayta-mamakunapas imakunamantan llakisqa kashankuman? ¿Escuelakunapichu mana allin ruwaykuna kapushan? ¿Llank’anapas imaynan kashan, pisiyapushanchu? Chaykunapin allinta piensarinanchis, chayman jina runamasinchista yanapananchispaq. Paykunaqa manataq yachankuchu Bibliapi promesakunamanta chayqa, llakisqapunichá kashanku (2 Tim. 3:1; Isa. 65:​13, 14).

5. ¿Imakunapin Jesús jujniray karqan fariseo runakunamanta? (Mateo 11:​28-30).

⁵ Jesusqa khuyapayaqpunin runakunataqa, runakunapas allintan chaytaqa reparaqku. Fariseo runakunan ichaqa mana chhaynachu karqanku. Paykunaqa imapas kankuman jinaraqmi puriqku, runakunatapas pisichaqkun (Mat. 23:13; Juan 7:49). Jesusmi ichaqa manapuni chhaynachu karqan, aswanmi payqa llapa runakunata munakuq respetaq ima. Arí, payqa “llamp’u sonqon karqan, k’umuykuq sonqon karqan”, chaychá runakunaqa paytaqa sumaqta uyarikuqku (leey Mateo 11:​28-30). Noqanchispas Jesús jinan runakunataqa munakuywan respetowan ima qhawarinanchis.

6. ¿Imaynatan rikuchisunman mana uyarikuy munaq runakunata sumaqta qhawarisqanchista respetasqanchista ima?

⁶ Wakin runamasinchiskunaqa manan uyarikuyta munankuchu Diosmanta willakuy apasqanchista. ¿Imatan ruwananchis chhayna runakunawan tupaspa? Jesusmi nirqan: “Cheqnikuqniykichis runakunapaq allin kaqta ruwapuychis; ñakaqniykichis runakunamanta allinta rimaychis, k’amiqniykichis runakunapaq Diosmanta mañapuychis”, nispa (Luc. 6:​27, 28). Chhaynaqa manan paykunawanqa phiñakunanchischu, nitaqmi paykunamantaqa maltaqa piensananchischu. Wakinqa yaqapaschá cheqaqtapuni noqanchis contra kashanku, wakinmi ichaqa imaymana llakipi tarikuspa mana allinta rimanku. Wakintaq chay ratu imaymana ruwanayoq kasqankurayku mana chaskiyta munawanchischu. Chhaynakunapi tarikuspaqa Bibliaq nisqanman jinapunin rimananchis. Chaypin nin: “Rimayniykichisqa sumaqpuni kachun, kachiwan kachichasqa jina, chhaynapin yachankichis imaynatachus pitapas rimapayayta”, nispa (Col. 4:6). Sichus kallpachakusun runakuna imaynapichus tarikushanku chayta entiendenanchispaq chayqa, manan faciltachu imawanpas ofiendekusun, aswanmi sumaqta paykunata yachachisunchis.

BIBLIAWANPUNIN YACHACHINANCHIS

7. ¿Imaynatan Jesús rikuchirqan Diospa siminman jina yachachisqanta? (Juan 7:​14-16).

⁷ Jesusmanta rimallasuntaq. Payqa manan umallanmantachu imatapas yachachiq, aswanpas Diospa simin qelqapi nisqanman jinapunin yachachiq. Chaymantapas yachachisqanqa fácil entiendeymi karqan, yuyanapaq jinan karqan. Chaymanta rimaspan Bibliapi nin: “Payqa Diospa nisqanman jinapunin yachachiq, manataq kamachikuy simita yachachiqkuna jinachu, chaymi runakunaqa anchata admirakurqanku imayna yachachisqanmanta”, nispa (Mar. 1:22). Chay tiempopi kamachikuy simita yachachiqkunaqa, juj respetasqa runakunaq yachachisqanman jinan yachachiqku, Jesusmi ichaqa Diospa siminman jinapuni yachachiq. Jesusqa taytanwan kuskataq janaq pachapi tiyarqan chayqa, imaymanatan allinta yacharqan. Chaywanpas payqa manan alabakuq jinachu imatapas yachachiq, nitaqmi runakunata pisichaq jinachu imatapas rimaq, aswanmi payqa Diospa siminman jinapuni yachachiq (leey Juan 7:​14-16). ¡May allinpunin chay ruwasqanqa karqan ¿riki?!

8. ¿Imaynatan apóstol Pedro qatikurqan Jesuspa ejemplonta?

⁸ Discipulonkunapas Jesús jinan karqanku, Diospa siminpi nisqanman jinan imatapas yachachiqku. Chaypaq rimasun apóstol Pedromanta. Payqa manaña allin educaciontachu chaskirqan chaypas, 33 watapin Pentecostés fiestapi askha runakunata yanaparqan. Payqa Jesusmanta Diospa siminpi willaq profeciakunatan paykunaman allinta entiendechirqan (Hech. 2:​14-37). Chay rimasqanta tukuy sonqowan uyarikuq runakunaqa bautizasqan karqanku. Chay p’unchayqa 3.000 runakuna jinan bautizakapurqanku (Hech. 2:41).

9. ¿Imaraykun Bibliawanpuni yachachinanchis?

⁹ Diospa simillanwanpunin runakunaq sonqonmanqa chayayta atisunman (Heb. 4:12). Chaymi runakunaman yachachispaqa Bibliawanpuni yachachinanchis. Arí noqanchisqa Diospa simintan jujkunamanqa yachachinanchis, manan piensasqanchistachu (2 Tim. 4:2). Proverbios 2:6 textopin nin: “Jehová Diosmi yachayta qoqqa, siminmantan paqarimun ima yachaypas allin reparaq kaypas”, nispa. Chhaynaqa Bibliamanta yachachisun chayqa, kikin Jehová Diospas rimashanman jinan kanqa (Mal. 2:7). Runakunaqa allintan yachananku imaynas Diospa yachayninqa runakunaq yachayninmanta aswan allin chayta. Bibliaqa Diospa yuyaychasqanpunin, chaypin willawashanchis imatas ruwana Diospa sonqonta kusichinapaq chayta, imatas ruwana kusisqa kausanapaq sumaqta kausanapaq chaytapas (2 Tim. 3:​16, 17).

10. ¿Imatan ruwananchis estudiante Bibliawanpuni yachachisqanchista reparananpaq?

¹⁰ Manaraq pimanpas Bibliamanta yachachishaspaqa allintaraqmi preparakunanchis. Chaypin qhawarinanchis ima textokunatas estudianteman qhawachisun chayta. Estudiantekunaqa allintan yachananku imaynas videokunapas dibujokunapas Bibliata entiendenapaq yanapaqkunalla chayta. Paykunawan estudiashaspaqa, chaypi kaq wakin textokunata leespan allinta reparachinanchis imaynatas payta chay textokuna yanapanman chayta. Videokunata fotokunata qhawachispapas, allinta reparachiy Bibliapi ima textokunawansi tupashan chayta. Chaypaqqa manan nishutachu rimananchis, nitaqmi llapa textokunatachu leenanchis, aswanpas ima textotachus leeshanchis chaytan allinta entiendechinanchis. Atikuqtinqa jujmantan chay textota leepunanchis. Chayta ruwasun chayqa, estudianteqa allintan entiendenqa imaynas Bibliatapuni estudiashanchis chayta, manataq fototachu videotachu ni librotachu chayta (1 Cor. 2:13).

11, 12. a) ¿Imaynatan Bibliamanta yachachishaspa rikuchisunman pacienciakuq kasqanchista? (Hechos 17:​1-4; qhaway kay parrafopaq fotota). b) ¿Imaynan kanku wakin runakuna, imaynatan paykunata yanapasunman?

¹¹ Mayqen estudiantenchispas mana faciltachu imatapas entiendeshan chayqa, apóstol Pabloq nisqantan yuyarinanchis. Paymi nirqan: “Cheqaq kaqmanta willashallay [ . . . ]. Tukuy pacienciawan”, nispa. Yachasqanchis jinapas estudiantekunaqa manan llapankupas igualtachu ñauparinku, chaymi pacienciakunanchis. Bibliapi wakin yachachikuyqa yaqapaschá noqanchispaqqa fácil entiendeylla kanman, jujkunapaqqa manapaschá. Tesalónica llaqtapi wakin runakunapas manan faciltachu entienderqanku wakin yachachikuykunataqa, chaymi apóstol Pabloqa kuti-kutirispa paykunaman explicanan karqan (leey Hechos 17:​1-4).

¹² ¿Imata ruwaspan estudiantekunaman rikuchillasunmantaq pacienciakuq kasqanchista? Suyananchismi tapusqanchisman imaninqachus chayta, manapunin noqanchisqa rimananchispachachu. Tukuy yuyaymi uyarinanchis imatas piensan chayta entiendenapaq, chayman jinataq wakin textokunata leechisun, chhaynapi Dios jina imatapas qhawarinanpaq. Chaymantapas allintan kaypi piensarinanchis: Wakin runakunaqa manan jayk’aqpas Bibliata jap’irqankuchu, manan yachankuchu imaninsi Biblia chayta. Chhaynataq chayqa, atikuqtinqa Mosoq Pacha nisqa Bibliatan paykunaman apasunman, chaypitaq qhawachisunman “¿Imakunamantan Bibliapi yachasunman?” nisqa parteta. Chayqa qallariyllapin kashan, chaypin yachanqaku imakunamantas Bibliapi rimashan chayta. Chaymantapas chay partepi kaq 15 tapuypi wakin textokunatan leepusunman, chaypin rimashan kusisqa kausaymanta. Chaykunata rikuspan payqa reparanqa imaynas Bibliaqa allinpuni chayta. Chhaynaqa, sichus estudiantekunaman allinta reqsichisun Diospa siminta chayqa, astawanmi Bibliamanta yachayta munanqaku, chaypi yachasqankuman jinataqmi kausanqakupas.

JEHOVÁ DIOSTAN ALLINTA REQSICHINANCHIS

13. Bibliamanta yachachishaspanchis, ¿pillapi piensanankupaq jinan runakunata yachachinanchis? Juj ejemplota willay.

¹³ Noqanchisqa Jehová Diostan runakunamanqa reqsichinanchis, payman asuykunankupaqtaqmi yanapananchis (Sant. 4:8). Chaypaq kaypi piensasunchis: Tuta horaspi pimanpas imatapas rikuchiyta munaspaqa, manan noqanchistachu k’anchakunchis ¿riki? Aswanpas imatachus rikuchiyta munashanchis chaytan k’anchanchis ¿riki? Chhaynatan ruwananchis Jehová Diosmanta yachachishaspapas. Pimanpas Diosmanta yachachishanchis chayqa, manan noqanchispi piensanankupaq jinachu yachachinanchis, aswanpas Diospi piensanankupaq jinan yachachinanchis.

14. ¿Imaynatan estudianteta yanapasunman Jehová Diospa sonqonta kusichinanpaq?

¹⁴ Chhaynaqa pimanpas Bibliamanta yachachishaspaqa, Jehová Diospa sonqonta kusichinanpaqmi paytaqa yanapananchis (Prov. 27:11). Arí, pitapas Testigo kananpaq yachachishaspaqa, manan allin kaqta mana allin kaqta reparanallanpaqchu yachachinanchis. Aswanpas Jehová Diospa sonqonta kusichinanpaqmi yanapananchis. Ima costumbretapas manan faciltachu saqeshan chayqa, yaqapaschá tapurisunman: “¿Imanaqtinmi kay ruway Jehová Diosman mana gustanchu? ¿Imanaqtinmi Jehová Dios munashanman qanman gustasqasuyki ruwaykunata saqenaykita? ¿Imaraykun nisunman “chaywanqa Jehová Diosqa munakusqasuykitan rikuchishasunki” nispa?”, nispa. Chhaynatan estudiantetaqa yanaparinanchis Jehová Diospi allinta piensananpaq. Sichus chayta ruwasun chayqa, allintan yachanqa imayna Diospunis Jehová Dios chayta, chaymantapas Diospa sonqontan kusichiyta munanqa.

KALLPACHAKUSHALLASUN ALLIN YACHACHIQ KANANCHISPAQ

15. ¿Imatan ruwashanallanchis allin yachachiq kananchispaq?

¹⁵ Mañakushallasun Jehová Diospa yanapayninta allin yachachiq kananchispaq (1 Juan 5:14). Mañakusqanchis qhepamanqa bendeciwananchispaq jinapuni imatapas ruwasun. Chaypaqqa atenton uyarinanchis juñunakuykunapi capacitación chaskisqanchista, kallpachakunanchistaq chayman jina jujkunata yachachinanchispaq. Chaymantapas Bibliamanta yachachiq rishaspaqa, juj experienciayoq hermanata otaq hermanotan pusarikunanchis. Chaymantataq payta tapurikunanchis imapis allinyasunman chayta niwananchispaq. Chaymantapas manan qonqananchischu kayta: Noqanchis allintaña yachasunman imamantas yachachisun chayta chaypas, estudiantenchisqa manan yachanchu. Chhaynaqa pay entiendenanpaq jina yachachisun. Chaymantapas allintapuni reparachisun imaynapis Bibliamanta yachasqanqa allinninpaq kanman chayta, allinta yachachisun Diospa promesankunamantapas. Chhaynapin payta yanapasunchis Jehová Diospa amigon kananpaq, kusisqa kausananpaqpas (Sal. 1:​1-3).

16. ¿Imaraykun kallpachakushanallanchis allin yachachiq kananchispaq?

¹⁶ ¡May kusikunapaqmi Jehová Diosmanta jujkunaman yachachiyqa ¿riki? Diospa gobiernon chayamuqtinpas paymantaqa yachachishallasunmi. Chhaynaqa kunanmantapacha kallpachakushallasun runakunaman Diosmanta yachachinanchispaq. Ichaqa Diospa siminman jinan chaytaqa ruwananchis, Diospi piensanankupaq jinataqmi yachachinanchispas. Chhaynata yachachisunchis chayqa, allin yachachiqmanmi tukupusunchis.