Amapuni Jehová Diosmantaqa t’aqakunkichu

1, 2. a) ¿Imatan ruwashanallayki colegiota tukuspa astawan estudiaspayki? b) ¿Imaninantan nishan “allinta purisun” nisqa rimay? (Filipenses 3:16).

WAKIN Testigokunaqa colegiota tukuspankun astawanraq estudiashanku. Wakinqa, “chayta estudiaspan llank’anata tarisaq Jehová Diosta astawan servinaypaq” nispan estudiashanku. Qanpas chayta ruwanaykipaq piensaykurqanki chayqa, ¿iman yanapasunkiman Jehová Diosmanta amapuni t’aqakunaykipaq? (Sant. 4:8a). Colegiopi kashaspaqa imaymana sasachakuypichá tarikurqanki, mayninqa yaqapaschá Diospi iñisqaykita ima iskayachiyta munarqasunkiku. Kunan astawan estudianki chayqa chhaynapipaschá tarikunki. Chaywanpas colegiopi jinan kallpachakunayki kanqa iñiyman jina allinta purinaykipaq. Arí, manapunin Jehová Diosmantaqa t’aqakunaykichu (leey Filipenses 3:16).

² Griego rimaypiqa “allinta purisun” nisqa rimaytaqa soldadokunan rimaqku. Paykunaqa marchaspan ñaupaqllaman purinanku karqan qhepata mana qhawarispa, qhepaman mana kutirispa. Chhaynatan qanpas astawan estudiashanki chayqa, Dios serviypi ñaupaqllaman rinayki, qhepata mana qhawarispa, qhepaman mana kutirispan ñaupaqllaman purinayki. Chaypi yanapanasuykipaqmi kaypi yachasunchis Bibliapi tawa yuyaychaykunamanta. Yaqapaschá reqsinkiña chay textokunata. Kaykamaqa chay textokunaqa allintañachá yanaparqasunki, kunanpas estudiasqayki tiempopiqa astawanraqmi yanapasunki. Yanapasunkin estudiayta tukusqayki qhepamanpas.

KALLPACHAKUY DIOSLLAWANPUNI KANAYKIPAQ

3. Estudiaspaqa imaymana cambiotapaschá ruwanki, ichaqa ¿imakunapin allinta piensarinayki?

³ ¿Iman yaqapas pasasunkiman? Astawan estudianki chayqa, chaypipaschá astawan yuyayniyki kanqa, imaymanatapaschá cambianayki kanqa chayta estudianaykipaq, allin notakunata imapaschá orqokuyta munanki. Chayqa manan imananpaschu, ichaqa chayllapiña yuyayniyki kanman chayqa, Jehová Diosmantan pisi-pisimanta t’aqakuwaq. Yaqapaschá pisi-pisimanta manaña juñunakuykunamanpas ni predicaqpas riwaqchu. Manapaschá Bibliatapas estudiawaqchu ni mañakuwaqpasñachu (Apo. 2:4).

4. ¿Iman yanapasunkiman Jehová Dios serviyta ñaupaqman churanaykipaq? (1 Corintios 15:58).

⁴ (Leey 1 Corintios 15:58). Imaynan bicicleta purinanpaqqa manejananchis, chhaynatan Jehová Dioswan allinpi kananchispaqpas munaynin ruwaypi ocupasqa kananchis. Ichaqa, allinña Diospa munaynin ruwayman tiempota qoy chaypas, allintan piensarinayki imaraykus chayta ruwashanki chaypipas. Allintan kayta jap’ikunayki umaykipi sonqoykipipas: Tukuy imamantapas Jehová Diosta serviymi ñaupaqpiqa kanan, manan estudiokunachu (Mat. 22:37). Samantha sutiyoq juj sipas hermanan nin: “Noqaqa manaraq estudiayta qallarishaspan allinta piensarqani. Nirqanin: Chay estudiochus Jehová Dios servinayta jark’awanqa chayqa saqepusaqmi nispay”, nispa.

5. ¿Imakunatan ruwawaq Jehová Diosta servishanallaykipaq?

⁵ ¿Imakunatan ruwawaq manaraq estudiayta qallarishaspa? Allintan yachanayki imakunatas ñaupaqman churanayki chayta. Kaykunapi piensariy: ¿Ñachu piensaykurqankiña imakunatas ruwanki juñunakuykunaman predicacionmanpas ama faltakunaykipaq, Biblia estudiaytapas ama saqenaykipaq chaykunapi? (Jos. 1:8; Mat. 28:​19, 20; Heb. 10:25). Colegiopi kashaspa imakunatas ruwarqanki chaykunapipas piensariwaqmi. Chaypaqqa yaqapaschá kay tapuykunapi piensariwaq: ¿Imatan ruwarqanki juñunakuytapas predicaciontapas ñaupaqman churanaykipaq? Cambianayki kaqtinqa, ¿ima ruwaykunapin cambiawaq chhaynapi Jehová Diosmanta ama t’aqakunaykipaq? ¿Imakunapin astawan allinyariwaq? Estudiankiña chaypas kallpachakullaypuni Jehová Diospa munayninta ruwanaykipaq. Arí, kallpachakuy allin alumno kanaykipaqpas, ichaqa amapunin chayraykuqa Jehová Diostaqa saqenkichu (Mat. 6:24).a

6. ¿Imakunapin allinta piensarinayki? (Qhaway kay parrafopaq fotota).

⁶ Estudiayta qallarishaspaqa mayninpi qhawarikuy imaynas kashanki chayta. Yaqapaschá sapa killan tapukuwaq: “¿Imaynatan qhawarishani Dios serviyta? ¿Ñaupaqmanchu chayta churashani, icha ruwanaykunata jark’aqta jinachu qhawaripushani?”, nispa. Chaypaqqa yaqapaschá kaykunapi piensariwaq: ¿Faltakushankichu wakin juñunakuykunaman? ¿Tardetachu chaykunaman chayashanki? Chaypiña kashanki chaypas, ¿tareaykikunapichu piensashanki? ¿Celularnillantañachu mayninpi juñunakuykunata uyarinki? ¿Imaynan Biblia leeypipas kashanki? ¿Diosmantapas ñaupaqkunapi jinachu mañakushanki icha maynillanñachu mañakushanki? ¿Predicaspapas sonqomantachu predicashanki icha tukurunallantañachu suyakushanki? Chaykunamanta mayqenpipas allinyanayki kashan chayqa, tukuy atisqaykita kallpachakuy allinyanaykipaq. Amapuni estudioraykuqa Jehová Diostaqa qhepamanqa churankichu.

AMAPUNI IMACHUS YACHASQAYKIMANTAQA ISKAYANKICHU

7. ¿Imakunatan mayninpi yachachisunkikuman estudiasqaykipi?

⁷ ¿Iman yaqapas pasasunkiman? Wakin estudio apasqaykipiqa wakin cursokunapin yachachisunkikuman runaq piensayninman jina, yanqa mana valeq yachachikuykunata ima (Col. 2:8). Yaqapaschá yachachisunkikuman Diospi mana creenaykipaq, “runakunaqa k’usillomantan jamunchis” nispa ima. Wakinqa yaqapaschá kallpachasunkikuman qanllapi confiakunaykipaq. Juj wayna hermanon nin: “Estudio apasqaypi imaymanataña yachachiwarqanku chaypas, mayninqa Jehová Diospa yachachisqanmanta jujniray piensaykunatan yachachiwaqku. Sapa kutillanmi niwaqku: Allin kayta munankichis chayqa, qolqeyoq kayta munankichis chayqa, qankunallamantan kanqa, nispa. Chhaynatan noqallaykupi confiakunaykupaq yachachiwaqku, chaymi mayninqa noqapaqqa sasa karqan Jehová Diospi confiay”, nispa.

8. ¿Imaraykun piensayninchista yuyayninchistapas allinta waqaychananchis? (Proverbios 5:​1, 2).

⁸ (Leey Proverbios 5:​1, 2). Bibliapin nishan: “Allin yuyaykuq kayniykita waqaychay”, nispa. Chaypi nisqan jina, allintan yuyayninchista piensayninchistapas waqaychananchis. ¿Imarayku? Satanaswan kamachisqan runakunawan iman jujniray piensaykunata umanchisman churayta munanku (1 Ped. 5:8). Paykuna jina piensananchistan munanku. Chaymantapas warmi-qhari kayta, kay pachapi imaynatachus kausay rijurirqan chaykunata paykuna jina qhawarinanchistan munanku. Paykuna jina piensayta qallarisunman chayqa, yaqapaschá iñiypi chiriyapuyta qallarisunman. Runakunaqa allinpaqpaschá qhawarinkuman imaynachus piensasqankuta. Ichaqa Bibliaq nisqan jina, kay pachaq piensayninqa mana valeqmi Diospaqqa (1 Cor. 3:​18-20).

9. ¿Imatan ruwawaq yuyayniykita piensayniykitapas allinta waqaychanaykipaq?

⁹ ¿Imatan ruwawaq manaraq estudiayta qallarishaspa? Piensayniykita yuyayniykita allinta waqaychanaykipaqqa mana iskayaspan Diospi creenayki. Chaymi manaraq estudiayta qallarishaspa tapukunayki: “¿Imaraykun Diospi creeni? ¿Diospa siminta jinapunichu Bibliata qhawarini? Jujniraytaña runakuna piensanku chaypas, ¿ancha allinchu noqapaq warmi-qhari kaymanta Bibliaq willasqan?”, nispa. Chaymantapas yaqapaschá piensariwaq colegiopi kashaqtiyki imakunachus pasarqan chaypi. Chaypaqqa yaqapaschá kay tapuykunapi piensariwaq: “K’usillomantan jamunchis” nispa nishaqtinku, ¿iskayarqankichu pisillatapas Diosmanta? Compañeroykikuna mana allinkunata ruwashaqtinku, ¿imaynallapipas munarqankichu paykuna qatikuyta? Yaqapaschá imata yuyarispapas nishanki: “Chaytaqa jujniraymantasuná ruwayman karqan”, nispa. Chhayna kaqtinqa, ¿imatan aswan allinta ruwawaq, chhaynapi amapuni Diosmanta t’aqakunaykipaq? Tukuy atisqaykita kallpachakuy estudiashaspa yuyayniykitapas piensayniykitapas allinta waqaychanaykipaq (2 Tim. 2:​16-18).b

10. ¿Imatawanmi ruwawaq piensayniykita yuyayniykitapas allinta waqaychanaykipaq?

¹⁰ Estudiashaspaqa sapa kutilla qhawarikuy imaynas kashanki chayta. Chaypaqqa yaqapaschá kay tapuykunapi piensawaq: ¿Imaynatan qhawarishanki jujkunaq imapas ruwasqanta? Diospa yachachisqan contraña ruwashanku chaypas, ¿normalpaqchu qhawaripushanki? ¿Allintachu reparanki ima yachachisqankupas runaq piensayllanchus kashan icha manachus chayta? ¿Tukuy sonqochu confianki Diospa gobiernollan tukuy ima problematapas allichananpi? Compañeroykikunapas profesorniykikunapas yuyayniykita ama juj ladoman apanankupaqqa, astawanmi Bibliata estudianayki. Tukuy sonqon chay estudiasqaykipipas piensarinayki, chayman jinataqmi kausanaykipas. Biblia estudiayqa allinpunin amapuni Diosmanta iskayanapaq (1 Tim. 4:15).

TIEMPOYKITA ALLINTA AYPACHIKUY

11. ¿Imaraykun allinta tanteanayki tiempoykita?

¹¹ ¿Iman yaqapas pasasunkiman? Estudianapaqqa tiempotan necesitakun, astawanqa examenkuna kaqtin, tareakuna entregana kaqtin ima. Sichus chaykuna ruwanaykipaq mana allintachu tiempota t’aqanki chayqa, yaqapaschá imaymana sasachakuykunapi tarikuwaq; uma nanay juj onqoykuna imapaschá jap’isunkiman. Chay ama pasasunaykipaqqa, allintan tanteakunayki imakunatas ruwanki imaynatas ruwanki chaykunata, chhaynapin allillan kanki, manataqmi ima onqoypas faciltachu jap’isunki.

12. ¿Imakunata ruwanaykipaqmi t’aqanaykipuni tiempota? (Efesios 5:​15, 16).

¹² (Leey Efesios 5:​15, 16). Mayninqa yaqapaschá sasa kanqa imaymana ruwanaykikunapaq tiempota t’aqay. Chaywanpas allin yuyaywanmi imakunatas ruwanayki chayta qhawarinayki. Estudiaspaqa yaqapaschá askha horata clasesman rinayki kanqa. Chhaynaña chaypas, astawanqa tiempotaqa qonayki familiaykiwan hermanokunawan ima kuska pasarinaykipaqmi (Sal. 133:1; Prov. 18:1). Chaykunamantapas astawanqa Dios serviytan ñaupaqmanqa churanayki (Mat. 6:33). Chaymantapas yaqapaschá familiaykita ima ruwaypipas yanapanayki kanqa, llank’anayki imapaschá kanqa. Chaymantapas aman qonqankichu ejercicio ruwayta, horasllanpi puñuytapas. Chaykunan yanapasunki qhalilla kanaykipaq (Ecl. 4:6; 1 Tim. 4:8). Chaykunata ruwanaykipaq tiempota aypachikunaykipaqqa, allin yuyaywanmi imatapas ruwanayki.

13. ¿Imatan ruwawaq tiempota aypachikunaykipaq?

¹³ ¿Imatan ruwawaq manaraq estudiayta qallarishaspa? Bibliaq nisqanman jinaqa, allinta tanteaspa imatapas ruwanki chayqa, allillanmi imapas lloqsisunki (Prov. 21:5). Chayrayku, manaraq estudiayta qallarishaspa imakunatas ruwanayki chayta juj listapi churay. ¿Imaynatan colegiopi kashaspa ruwaq kanki tiempota aypachikunaykipaq? Chaypaqqa yaqapaschá kay tapuykunapi piensawaq: ¿Allintachu escuelapi colegiopi kashaspa tiempota aypachikuq kanki? Yaqapaschá imata yuyarispapas nishanki: “Chaytaqa jujniraymantasuná ruwayman karqan”, nispa. ¿Imatan ruwawaq chaykunata allinta ruwanaykipaq? Allintapuni imapaqpas tiempota t’aqay, chhaynapin allinta tiempota aypachikunki.c

14. ¿Ima tapuykunapin piensarinayki allinta tiempota aypachikunaykipaq?

¹⁴ Estudiashaspaqa sapa kutilla qhawarikuy imaynas kashanki chayta. Chaypaqqa yaqapaschá kay tapuykunapi piensawaq: ¿Allintachu tiempo aypashasunki ejerciciota ruwanaykipaq horallanpi puñunaykipaqpas? ¿Aypashasunkichu tiempo hermanokunawan pasarinaykipaqpas? ¿Tiempollanpichu entreganki tareaykikunatapas juj ima ruwasqaykikunatapas? Manachus chhayna kashan chayqa, allinta qhawarikuy imaraykus chaykuna pasashanman chayta. ¿Nishuchu ruwanayki kashan, icha ultimullapaqñachu imatapas saqeshanki? Imaninkiña chaypas, ¿“chhaynapunin” ninqachu amigoykikunapas familiaykikunapas? Imapipas cambianayki kashan chayqa, kallpachakuy chaypi cambianaykipaq. Reqsisqayki mayqen hermanopas allinta tiempota aypachikun chayqa tapurikuy. Chhaynapin qanpas yachanki imaynatas tiempota allinta aypachikuwaq chayta (Prov. 11:14).

ALLIN YUYAYNIYOQKUNAWAN PURIY

15. ¿Imaraykun allinta qhawarinayki jayk’a tiempos compañeroykikunawan pasashanki chayta?

¹⁵ ¿Iman yaqapas pasasunkiman? Mayninqa yaqapaschá compañeroykikuna invitasunkiku maytapas paykunawan kuska rinaykipaq, mayninqa sasapaschá kanqa “manan” niy. Reqsinkiñataq paykunata chayqa, paykunawantaq masta tiempota pasashankipas chayqa, kuska riytapaschá munanki. Yaqapaschá mayninqa niwaq: “Paykunawanmi masta yachanasqa kani, wakin hermanokunataqa manan allintachu reqsinipas”, nispa. Ichaqa manan qonqanaykichu kayta: Qanqa Jehová Diospa sonqonpaq jinan imatapas ruwayta munanki ¿riki? Compañeroykikunaqa manan chaypiqa piensankuchu. Paykunawan nishuta tiempota pasanki chayqa, yaqapaschá paykuna jina imatapas qhawaripuwaq (1 Cor. 15:33). Chaymi pasasqa hermano Michaeltapas. Payqa tawa watas estudiasqa luzkuna instalayta yachananpaq. Paymi nin: “Noqaqa 40 horasmi semanapi compañeroykunawan tiempota pasaq kani. Chaymi tiempowanqa manaña malpaqchu qhawariq kani warmikunamanta ima rimasqankutapas, ima takikuna uyarisqankutapas, ni millay rimaykuna rimasqankutapas”, nispa.

16. ¿Imatan yachasunman Proverbios 13:20 textopi imachus nisqanmanta?

¹⁶ (Leey Proverbios 13:20). Bibliaq nisqan jina mana allin compañerokunaqa, mana allinmanmi apawasunman. Chaymantapas Bibliapiqa willashanmi yachayniyoq runakunamanta. Chhaynaqa, runakunaqa apawasunmanmi allinmanpas mana allinmanpas. Piwanchus juñukushanchis chaymantan chayqa kanqa. Chayrayku, pikunachá allinniykita munanku paykunawan juñukuy. Arí, qan jina Jehová Diosta munakuq runakunawan juñukuy (Sal. 101:​6, 7; 119:63).

17. ¿Imatan ruwawaq Diosta mana munakuq runakunamanta t’aqakunaykipaq?

¹⁷ ¿Imatan ruwawaq manaraq estudiayta qallarishaspa? Allinta piensariy maykamas mayqen compañeroykiwanpas juñukunki chaypi. Trenton sutiyoq hermanonchismi nin: “Llapa compañeroykunawanmi allinta apanakuni. Ichaqa paykunaqa compañeroykunallan kanku, manan amigoykunachu kanku”, nispa. ¿Qanrí, “imata ruwasaq” nishankin? Yaqapaschá piensariwaq imatas ruwarqanki colegiopi kashaspa chaypi. Chaypaqqa yaqapaschá kay tapuykunapi piensariwaq: ¿Maykaman compañeroykikunawan amigota ruwaq kanki escuelapi colegiopi kashaspa? Yaqapaschá imata yuyarispapas nishanki: “Kaytaqa jujniraymanta ruwayman karqan”, nispa. ¿Imatan ruwawaq chaypi allinyanaykipaq? Tukuy atisqaykita kallpachakuy allin yachayniyoqkunawan purinaykipaq, t’aqakuytaq Diosta mana munakuqkunamantaqa.d

18. ¿Ima tapuykunapin allinta piensarinayki? (Qhaway kay parrafopaq fotota).

¹⁸ Estudiashaspaqa sapa kutilla qhawarikuy imaynas kashanki chayta. Chaypaqqa yaqapaschá kay tapuykunapi piensariwaq: ¿Imaynan compañeroykikunawan kashanki? ¿Astawanchu paykunawan amigota armashanki, paykuna jinañachu rimashanki piensashankipas? ¿Paykuna jinachu imatapas ruwashanki? ¿Imanishanmanmi Jehová Dios chaykunamanta imachus nisqaykimanta? (Sal. 1:1). Paykunamanta ima mana allintapas yacharushanki chayqa cambiay chayta, kallpachakuytaq Jehová Diospa amigonkuna amigoykikuna kananpaq. Kallpachakuy compañeroykikunaman Diosmanta willanaykipaqpas. Unaytaq tiempota paykunawan pasashanki chayqa, allinmi kanman paykunaman Jehová Diosmanta willayqa.

LISTOLLAPUNI KASHAY TUKUY IMAPAQPAS

19. ¿Imatan ruwawaq manaraq imata estudiaytapas qallarishaspayki? Juj ejemplota willay.

¹⁹ Karu ñankunata puriqkunaqa, manaraq puriyta qallarishaspankun allinta preparakunku. Paykunaqa ñaupaqtan ejerciciota ruwanku, p’achatapas purinapaq jinan apakunku, allintataqmi yachanku maymanta maykamas rinqaku chayta. Ichaqa manapaschá ñanpi imakunas pasanman chaypiqa anchatachu piensanqaku. Chaywanpas maymanchus rinankupi allinta piensanqaku chayqa, allillanmi chayman chayanqaku. Chhaynallataqmi colegiota tukuspa astawan estudiaypas. Chayrayku ñaupaqmantapacha kallpachakuy Jehová Dioswan allin amigontin kanaykipaq. Chaymantapas Diospa qosqan llapallan maqanakuna p’achawan churakuy. Allinta piensaykuy imaraykus estudiayta munashanki chaypi. Qanqa manan qhapaq kanaykipaqchu ni allin reqsisqa kanaykipaqchu estudiaytaqa munashanki ¿riki? Aswanpas Jehová Diosta jatunchanapaqmi imatapas ruwanayki (Efes. 6:​11-13; 1 Cor. 9:​26, 27; 10:31).

20. ¿Imatan ruwawaq 2 Cor. 13:5 textopi yuyaychayta kasukunaykipaq?

²⁰ Bibliapin nishan: “Qankuna kikiykichista allinta t’aqwikuychis allinchus iñiypi kashankichis icha manachus chayta yachanaykichispaq, allintataq qhawarikuychis imayna runachus kashankichis chayta”, nispa (2 Cor. 13:5). ¿Imaynatan chay textoq nisqanta kasukuwaq? Sapa kutillanmi qhawarikunayki imaynas kashanki chayta. Kaypi yachasqanchis tawa yuyaychaykunaman jinan chaytaqa ruwawaq. ¿Tukuy atisqaykitachu kallpachakushanki Jehová Dioswan allinpi kanaykipaq? ¿Kallpachakushankichu yuyayniykitapas piensayniykitapas allinta waqaychanaykipaq? ¿Allintachu tiempota aypachikushanki? ¿Kallpachakushankichu hermanokunawan tiempota pasarinaykipaq, mana allin runakunamantapas t’aqakunaykipaq? Chay tapuykunapiqa llapallanchismi piensarinanchis. Escuelapiña, llank’anapiña, maypiña kashanchis chaypas, imaña kanqa chaypas tukuy atisqaykita kallpachakuy iñiypi qaqata sayanaykipaq. Chayta ruwanki chayqa, Jehová Diosqa bendecisunkin (Prov. 3:​5, 6).