Llakipi kallpachaq Dios jina kasun

1. ¿Imaraykun jujkunata kallpachananchis sonqochananchis ima?

KAY tiempopiqa “imaymana pruebakunaq ñit’isqanmi kashanchis”, chaymi llapanchispas munanchispuni jujkuna kallpachariwananchista (1 Ped. 1:6). Chhayna pruebapi llakipi tarikushaqtinchis pipas kallpachariwanchis chayqa kusikunchismi ¿riki? Chaymi noqanchispas jujkunataqa kallpacharinanchispuni (Mat. 7:12). Ichaqa Jehová Diosmi jatun ejemplo chaypiqa. Payqa “tukuy ima llakipi kallpachaq Diosmi”, chaymi noqanchispas pay jina jujkunata kallpachananchis (2 Cor. 1:​3, 4; 1 Tes. 4:18). Ichaqa jujkunata kallpachaspaqa sonqomantan kallpachananchis, manan jawa sonqollachu. Chaymi kaypi yachasunchis kinsa yanapaykunamanta. 1) ¿Imaninantan Bibliapi nishan kallpachaymanta rimaspa? 2) ¿Imaynatan jujkunata kallpachasunman sonqochasunmanpas? 3) ¿Imatan ruwasunman jujkunaq kallpacharinanta otaq yanaparinanta necesitaspanchis?

¿IMANINANTAN NISHAN?

2. ¿Imaninantan nishan griego rimaypi “kallpachay” nisqa simi?

² Bibliapi kallpachay nisqa simiqa griego rimaymantan jamun, chayqa “sonqochay, anyay, yuyaychay” ninantan nin (Rom. 12:8). Chaymantapas griego rimaypiqa chay kallpachay nisqa simiqa “ladoypi kay” ninantan nin. Chaypaq kaypi piensasun: Juj amigoykis sinchi ñak’ariypi tarikushanman, payta yanapaqqa usqhayllan riwaq ¿riki? Chayta ruwasqaykiwanmi amigoykiqa kallpachasqa sonqochasqa kanqa ¿riki? Chayta ruwanamantan Bibliapiqa rimashan.

3. ¿Imatan yachasunman Bernabemanta? (Qhaway kay parrafopaq dibujota).

³ Bibliapin willashan juj allin sonqo runamanta, paypa sutinmi karqan José. Payqa munaytan jujkunata kallpachaq, paytan apostolkuna suticharqanku Bernabé nispa. Chayqa jujkunata “kallpachaq” ninantan nin (Hech. 4:36). Chaymantapachaqa Bibliapiqa manañan José ninñachu, aswanpas Bernabé nispallañan paymanta rimaspaqa nin. Chay runaqa askha kutipin hermanokunata yanaparqan. Chaypaq piensasun juj kuti imachus pasarqan chaypi. Juj kutinmi Saulo Jerusalenta rirqan iñiqkunawan tupaq, iñiqkunaqa manchakurqankun Saulota ñaupaqpi paykunata qatikachasqanrayku. Ichaqa, ¿imatan Bernabé ruwanman karqan? Payqa confiarqanmi Saulopi, chaymi payta apostolkunaq kasqanman pusarqan (Hech. 9:​26-28).

¿IMAYNATAN JUJKUNATA KALLPACHASUNMAN?

4. ¿Imakunata ruwaspan jujkunata kallpachasunman? (Romanos 1:​11, 12).

⁴ Atikuqtinqa visitarisun. Kay tiempokunapipas ñaupaqpi jinan Jehová Diosqa serviqninkunawan jujkunata kallpachan. Chaypaq yuyarisun profeta Eliaswan imachus pasarqan chayta. Juj kutinmi payqa sinchi llakisqa kasharqan, chaymi Jehová Diosqa juj angelta kacharqan kallpachananpaq (1 Rey. 19:​4-7). Apóstol Pablopas willarqanmi imaynas hermanokunata visitaspa kallpachayqa allinpuni chayta (leey Romanos 1:​11, 12). Chhaynaqa kallpacharinanchispaq pitapas visitanchis chayqa, manan juj ratullachu chaypi karunanchis, aswanpas tiempochatan paywan pasarinanchis (1 Cor. 16:7). Ichaqa mayninqa manapaschá visitayta atisunchu, chhayna kaqtinqa yaqapaschá mensajeta aparichisunman, wajasunman imapaschá. Atikuqtinqa juj tarjetachata otaq cartatan aparichisunman. Jehová Diosqa maytan munashan qanwan jujkunata kallpachayta. ¿Munawaqchu qanpas chaypi yanapakuyta?

5. ¿Imaraykun mayninpi sasa kanman hermanonchiskunata kallpachariy?

⁵ Kay pachapi mana allin kausayqa p’unchaymanta p’unchaymi astawan yapakushan. Chaymi mayninqa sasa kanman hermanonchiskunata kallpachananchispaq visitariy. Apostolkunaq tiemponpipas pasarqanmi chayqa, apóstol Pablo Roma llaqtapi preso kashaqtinmi Éfeso llaqtamanta Onesíforo paywan tupayta munasharqan. Payqa carcelman wisq’asqa kaytapas wañuytapas mana manchakuspan tarinankamapuni Pablota maskharqan (2 Tim. 1:​16-18). Rusia nacionpi hermanokunapas paypa ejemplontan qatikushanku. Mayqen hermanopas juicioman apasqa kaqtinqa, askha iñiqmasikunan juzgado wasita rinku payta apoyanankupaq, carcelman apasqa kayta mana manchakuspan paykunaqa chayta ruwanku. ¿Imatan qan ruwawaq chhaynapi tarikuspayki? ¿Apoyawaqchu chay hermanokunata? Yaqapaschá chaypaq estudiawaq ñaupa tiempopipas kay tiempopipas Diosta serviqkuna imaynatas yanapanakurqanku chayta, paykunaqa kusisqan Diosta servirqanku qatikachasqaña kaspapas.

6. ¿Imaynatan jujkunata Jehová Dios jina sonqochasunman? (Qhaway kay parrafopaq fotota).

⁶ Tukuy yuyaywan uyarisun. Chaypaq yuyarisun profeta Eliaswan imachus pasarqan chayta. Payqa wañuy patapi tarikushaspan Jehová Diosman sonqonta kicharirqan. Jehová Dios yacharqanña imachus pasashasqanta chaypas, tukuy yuyaywan munakuywan iman Eliastaqa uyarirqan. Kuti-kutirispaña imachus pasasqanta willakurqan chaypas, Jehová Diosqa pacienciallawanmi uyarirqan (1 Rey. 19:​9, 10, 14). Kunanqa profeta Habacucpi piensasun, payqa manan respetowanchu Jehová Diosman llakikuyninkunata willakurqan, phiñasqan rimapayarqan. Chaywanpas Jehová Diosqa manan phiñakurqanchu (Hab. 1:​2, 3). Kay tiempopipas Jehová Dios yachanña imapichus tarikusqanchista chaypas, tukuy yuyaymi payqa uyariwanchis. ¿Imaynatan paypa ejemplonta qatikusunman? Noqanchispas tukuy yuyaywan pacienciawan iman hermanonchiskunataqa uyarinanchis, ima sasachakuyninkutapas willawashanchis chayqa allintan uyarinanchis (Sant. 1:19). Kuti-kutirispaña imatapas willawanchis chaypas, mana allintaña rimarunman chaypas, manan tatichinanchischu nitaq phiñakunanchischu (Ecl. 7:9).

7. Pipas llakikuypi sasachakuypi tarikushan chayqa, ¿imatan ruwasunman imatas necesitashan chayta yachanapaq?

⁷ Allinta qhawarisun imatas necesitashan chayta. Jehová Diosqa allintan yachan runakunaq sonqon imaynas kashan chayta, noqanchismi ichaqa mana atisunmanchu chay ruwaytaqa. Chhaynaqa pipas imatas necesitashan chayta yachanapaqqa, tukuy yuyaymi uyarinanchis imachus niwasqanchista. Yaqapaschá nisunman: “Noqaqa khaynapi tarikuspayqa kaywan jaqaywan yanapawanankutan munayman”, nispa. Ichaqa manan qonqananchischu kayta: Sapanka runan jujniray kanchis, chaymi tiempochata qokunanchis payta tukuy yuyay uyarinanchispaq. Chaymantapas munayllatan imatapas tapurinanchis, chhaynapin yachasunchis imaynapunis tarikushan chayta imatas necesitashan chaytapas (Prov. 20:5).

8. ¿Imaynatan Jesús sonqocharqan Martatapas Mariatapas, imatan chaymanta yachasunman? (Qhaway kay parrafopaq fotokunata).

⁸ Kunanqa piensasun imaynatas Jesús Martatapas Mariatapas sonqocharqan turanku Lázaro wañukapuqtin chaypi. Iskayninkuña kaq llakipi tarikusharqanku chaypas, jujniraymantan Jesusqa sapankankuta yanaparqan. Martawan rimaspaqa Jesusqa kausarimpuymantan rimapayarqan, chhaynapin yanaparqan iñiyninpi qaqata sayananpaq. Mariawan rimaspan ichaqa Jesusqa mana imatapas rimarqanchu kausarimpuymantaqa, aswanpas paywan kuskan waqarqan. Chaymantataq tapurqan: “¿Maymanmi churamurqankichis?”, nispa (Juan 11:​20-35). ¿Imatan chaymanta yachasunman? Sapankan jujniray kanchis, chaymi jujkunata sonqochanapaqqa, sapanka imachus necesitasqanman jina sonqochananchis.

9. ¿Imaraykun hermanonchiskunata Bibliawan sonqochananchis? (Romanos 15:​4, 5).

⁹ Bibliawan sonqochasun. Jujkunata Bibliawan sonqochasun chayqa, astawanmi Jehová Diospi confianqaku (leey Romanos 15:​4, 5). Chaymantapas jujkunata Bibliawan sonqochasun chayqa, aswan kallpachasqan kanqaku (Isa. 40:31). Ichaqa, ¿ima textokunatan paykunaman leepusunman? Wakin hermanokunaqa juj listapin jap’inku kallpachanapaq jina textokunata. Chaykunamanta wakin textokunata tarinapaqqa “Allinta kausanapaq Bibliapi yanapaykuna” nisqa folletopin “Llakisqata sonqochaymanta” nisqa parteman jaykusunman. Chaymantapas Jehová Diospa yanapaynintan mañakunanchis kallpachanapaq jina textokunata yuyarichiwananchispaq (Juan 14:26).

10. ¿Imaraykun munayllata hermanonchiskunata kallpacharinanchis?

¹⁰ Munakuywan rimapayasun. Yachamusqanchis jina griego rimaypiqa “kallpachay” simiqa “anyay yuyaychay” nikullantaqmi. Mayninqa yaqapaschá pitapas kallpachaspaqa yuyaychananchis ima kanqa, chhaynapi imachus piensasqanta cambiananpaq. Chayta ruwana kaqtinqa, allinta piensaspan kallpachanapaq jina rimananchis, manan k’irinapaq jinachu (Prov. 12:18). Chaypaq rimallasuntaq profeta Eliasmanta, paywan rimaspan Jehová Diosqa allin ejemplota qowarqanchis. Eliasqa mana allin profeta kananpaqmi piensakurqan, chaymantapas payllaña Israel llaqtapi Diosta servinanpaqmi piensarqan. Jehová Diosqa munayllatan paytaqa yuyaycharqan chhayna piensasqanta cambiananpaq. Diospa rimapayasqanta uyarispaqa manapaschá repararqanchu Jehová Dios payta anyashasqantaqa (1 Rey. 19:​15-18). Noqanchispas Jehová Dios jinan allinta piensaspa munayllata hermanonchiskunataqa yuyaycharinanchis. Juñunakuykunapi participaspapas discursota qospapas kallpachanapaq jinapunin rimananchis, chhaynapin hermanonchiskunaqa kallpachasqa kanqaku.

11. ¿Imakunata ruwaspan hermanonchiskunata yanapallasunmantaq? (1 Juan 3:18).

¹¹ Kallpanchiswan imachus kaqninchiswan ima yanaparisun. Hermanonchiskunataqa manan simillawanchu kallpacharinanchis, aswanpas atisqanchisman jinan imallatapas paykunapaq ruwapunanchis (leey 1 Juan 3:18). Bernabeq ejemplonmi chaypiqa yanapawasunman. Payqa jallp’anta vendespan apostolkunaman chay qolqeta qorqan, chhaynapi chaywan chayllaraq bautizakuq wajcha hermanokunata yanapanankupaq (Hech. 4:​36, 37). Kay tiempopipas hermanonchiskunaqa chaytan ruwashanku. Chaypaq yachasun Polonia nacionpi Gabriela sutiyoq hermanamanta. Paypa wasintas unu lloqlla yaqalla apapusqa, chaywansi sinchi llakisqa tarikusqa. Paymi nin: “Noqaqa tayta-mamaywan kuskan tiyarqani, llapaykun manchasqa llakisqa ima kasharqayku. ¿Imatataq kunanri ruwasunchis? nispan nisharqayku. Chayllamanmi chay ladopi tiyaq askha hermanokuna wasiyta jamusqaku. Paykunaqa juj p’unchayllapin wasiyta allichapuwarqanku. Chayta rikuspan noqaqa repararqani Jehová Dios chay hermanokunawan yanapachiwashasqankuta, chaymi yanapawarqan Jehová Diospa yanapayninpi astawan confianaypaq”, nispa.

12. ¿Imaraykun nisunman “sasachakuykunata aguantaqtinchisqa hermanokunapas kallpachasqan kanqaku” nispa?

¹² Sasachakuykunata aguantasun. Chaymanta rimaspan apóstol Pablo Tesalónica llaqtapi iñiqkunata nirqan: “Junt’aq sonqo kasqaykichisraykun kallpachasqa tarikuyku”, nispa. Chay llaqtapi iñiqkunaqa imaymana sasachakuytan aguantasharqanku, paykunaq ejemplonmi apóstol Pablotaqa yanaparqan (1 Tes. 3:​5-8). Payqa repararqanmi sasachakuykunata qatikachaykunata aguantaqtinqa jujkunapas kallpachasqa kanankuta (Col. 2:​1, 2). Noqanchispas Dios serviyninchispi ima sasachakuytapas ima llakikuytapas aguantasun chayqa, chayta rikuq hermanokunaqa Dios yanapawashasqanchista rikuspan paykunapas kallpachasqa kanqaku.

13. ¿Imaynan kananchis, imarayku?

¹³ Pacienciakuq kasun. Pitaña kallpachasunman chaypas, manapaschá juj ratullapichu payqa allin karunqa, chaywanpas Bibliaq nisqantan kasukunanchis. Chaypin nin: “Imaynan ruwashankichis jinata qankunapura sonqochanakushaychis kallpachanakushaychis”, nispa (1 Tes. 5:11). Chhaynaqa chaypi nisqan jina, mana sayk’uspan kallpachakushanallanchis. Manaña kasqan ratuchu pipas allin karunqa chaypas, pacienciawanmi yanapashanallanchis (1 Tes. 5:14). Ichaqa noqanchis ima sasachakuypipas tarikuspa kallpachanata necesitasunchis ¿chayri? ¿Imatan ruwasunman? Chaymantan qatiqpi yachasunchis.

¿IMATAN RUWANANCHIS SASACHAKUYPI TARIKUSPANCHIS?

14, 15. ¿Imatan ruwananchis sinchi llakisqa kaspa?

¹⁴ Jehová Diospa yanapaynintan mañakunanchis. Sasachakuykunapi tarikuspa llakisqa pisi kallpa ima kashanchis chayqa, Jehová Diospa yanapaynintan mañakunanchis (Sal. 94:19). Dioswan parlaspaqa imachá llakichiwashanchis chaytan llapanta willakunanchis (Sal. 62:8). Pay yachanña imakunapis tarikushanchis chayta chaypas, llakikuyninchista willakuspaqa paypi confiasqanchistan rikuchishanchis. Jehová Diospa yanapayninta mañakusun chayqa, payqa yanapawasunpunin (Mar. 11:24). Filipenses 4:​6,7 textopi nisqan jina, yanapayninta mañakusun chayqa, “Diosqa runaq mana entiendey atisqan thaj kaytan qowasunchis, chhaynapin sonqonchista yuyayninchista ima Cristo Jesuswan waqaychanqa”.

¹⁵ Hermanokunaq yanapaynintan mañakunanchis. Nishu llakisqa kaspaqa, juj allin iñiyniyoq hermanoman umalliqman iman willakusunman. Ichaqa paykuna allinta yanapariwananchispaqqa imakunachus llakichiwashanchis chaytan llapanta willakunanchis (Prov. 14:10). Chaymantapas ima textos payta yanaparqan sasachakuykunapi tarikushaqtin chayta leepuwananchispaqmi nisunman.

16. ¿Imatan mayninpi hermanonchiskuna ruwarunkuman kallpachayta munawaspanchis, ichaqa imatan yuyarinanchis?

¹⁶ Pacienciakuq perdonaykuq iman kananchis. Mayninqa yaqapaschá hermanonchiskuna yanapayta munawaspanchis mana reparakuspa sonqonchista k’iriruwasun, yaqapaschá mana allinta piensaspa imatapas rimarunqaku ruwarunqakupas. Chay pasaqtinqa pacienciakunanchismi paykunawan (1 Cor. 13:​4, 7). Chaymantapas Santiago 3:2 textoq nisqantan yuyarinanchis. Chaypin nin: “Pipas rimasqanpi mana pantaqqa mana ima juchayoqchá chay runaqa”, nispa. Chaypi nisqan jina llapanchismi pantaq runa kanchis, mayninqa yaqapaschá allin kaqta ruwayta munashaspapas imallapipas pantarusun. Chhaynataq chayqa, hermanonchiskunaq allinkuna ruwasqankupin mastaqa piensananchis, manataqmi qonqananchischu paykunapas pantaq runa kasqankuta (Mat. 26:41).

17. Kay sasa tiempokunapitaq kausashanchis chayqa, ¿imata ruwananchispaqmi llapanchispas kallpachakushanallanchis?

¹⁷ Nimusqanchis jina noqanchisqa tukukuy p’unchaykunapiñan kausashanchis, chaymi imaymana sasachakuypi tarikushanchis, gobiernokunapas astawanraqmi Diospa llaqtanta qatikachashanku. Chaymi mayninqa sonqochanata kallpachanata ima necesitanchis. Chhayna sasa tiempokunapitaq kausashanchis chayqa, tukuy atisqanchistan kallpachakunanchis hermanonchiskunata yanapananchispaq kallpachananchispaq ima.