Sasachakuykunata allin yuyaywan qhawarisun

1, 2. ¿Iman yanapawasun sasachakuykunata llakikuykunata aguantananchispaq? (Qhaway kay parrafopaq fotota).

KAY pachapiqa llapapas imaymana sasachakuypin tarikushanchis. Wakinninchistaqa yaqapaschá pipas mana chaninta ruwawarqanchis, wakintaqa yaqapaschá mayqen familianchispas Jehová Diosta servinanchista jark’awashanchis. Wakinninchisqa yaqapaschá kuraqña kapusqanchisrayku imaymana nanaywan kashanchis, wakinninchispaqqa yaqapaschá mayqen familianchispas wañukapurqan. Rikusqanchis jina, llapapas imaymana sasachakuypin tarikushanchis (Sal. 90:10).

² Ichaqa, ¿iman yanapawasunman chhayna sasachakuykunata llakikuykunata aguantananchispaq? Chaykunata allin yuyaywan qhawariymi yanapawasun. Chaypaq juj chhikanta kaypi piensarisun: ¿Imatan ruwasunman carrota manejashaspa ñaupanchispi rumita otaq t’oqotapas rikuruspa? Atikuqtinqa yaqapaschá juj ladonta pasarusun, mana atikuqtinqa yaqapaschá juj ratu sayaykunanchis kanqa. Ichaqa ñaupanchispi imachus kashan chayta allinta rikunapaqqa carroq ventananmi limpio kanan, chhaynapin yachasun ima ruwayta. Sasachakuykunapi tarikuspapas chaytan ruwananchis, allin yuyaywanmi chaykunataqa qhawarinanchis. Chayraykun kaypi yachasunchis kay kinsa tapuykunamanta: 1) ¿Imaraykun allin yuyaywan sasachakuykunata qhawarinanchis? 2) ¿Iman pasawasunman sasachakuykunata mana allin yuyaywan qhawariqtinchis? 3) ¿Iman yanapawasunman sasachakuykunata allin yuyaywan qhawarinanchispaq?

ALLIN YUYAYWAN SASACHAKUYKUNATA QHAWARISUN

3. ¿Imaraykun kay pachapi imaymana sasachakuypi tarikusunchis?

³ Satanaspa kamachisqan pachapi kausasqanchisraykun sufrinchis. Arí, kay pachataqa Satanasmi kamachishan, chaymantapas runakunaqa juchayoqmi kanchis, chaymi imaymana sasachakuykunapi tarikunchis. Chaymantapas tukukuy p’unchaykunapiñan kausashanchis, chaymi mana allin kausayqa astawanraq yapakushan. Chhaynataq chayqa mayninqa yaqapaschá millay runakunaq kausanpi sufrisun, maynintaq unu lloqllakuna terremotokuna otaq imapas pasasqanrayku sufrisun (Mat. 24:8; 2 Tim. 3:13). Sichus Jehová Dios kunan chaykunata allichanman chayqa, Satanastapas kay pachata kamachiypi yanapashanman jinan kanman. Chhaynaqa rikusqanchis jina, Satanaspa kamachisqan pachapiqa llapapas imaymana sasachakuypin tarikusunchis (Ecl. 9:​12, willakuyta qhaway).

4. ¿Imaraykun sufrillanchistaq?

⁴ Diosta servisqanchisraykun sufrillanchistaq. Jesusmi discipulonkunata nirqan imaynas paypi iñisqankurayku qatikachasqa kananku karqan chayta (Mat. 24:9; Juan 16:2). Chaymi noqanchisqa mana admirakunanchischu chaykunawanqa, nitaqmi pisipananchispaschu (1 Tes. 3:​3, 4). Sasachakuykunata llakikuykunata aguantaspaqa, wiñay kausayman apaq ñanninta purisqanchistan rikuchishanchis. Chaymantapas chaykunata aguantaspaqa, Jehová Diospa partenmanta churakusqanchistan rikuchishanchis, Satanás llulla kasqantataq sut’iman orqoshanchis. ¿Imaraykun chayta ninchis? Satanasmi runakunamanta nin: “Paykunaqa interesraykullan Diostaqa servinku”, nispa. Chay nisqan cheqaq kasqanta rikuchiyta munaspataq imaymanata ruwashan Jehová Diosmanta t’aqawananchispaq (Job 1:​9-11). Chhaynaqa imapiña tarikuspapas Jehová Diosta tukuy sonqowan servisun chayqa, Satanás llulla kasqantan rikuchisunchis (Prov. 27:11).

5. ¿Imatan yachasunman Eclesiastés 7:​13, 14 textopi nisqanmanta? (Qhaway kay parrafopaq dibujokunata).

⁵ Jehová Diosqa jinallatan qhawashan sasachakuykuna kananta. Bibliapi willasqan jina, Jehová Diosqa “manan pitapas mana allinkunawanqa pruebaman churanmanchu”. Arí, payqa manan runakunataqa castiganchu (Sant. 1:13). Ichaqa yaqapaschá nishanki: “¿Imaraykutaq Salomonri nirqan: Diosmi allin p’unchaytapas mana allin p’unchaytapas paqarichirqan?”, nispa (leey Eclesiastés 7:​13, 14). Chaywanqa Salomonqa manan “Jehová Diosqa runakunatan castigan” nisharqanchu, aswanpas imaynas jinallata qhawan runakunaq sufrinanta chaymantan rimasharqan. Chhaynataq chayqa, ¿imatan Salomonpa nisqanmanta yachasunman? Paypa nisqan jina Satanaspa kamachisqan kay pachapiqa, wakin p’unchaykunaqa allillanpaschá kasunchis, manapaschá imamantapas llakikusunchu. Wakin p’unchaykunaqa manapaschá chhaynachu kanqa, imaymana llakipaschá chayamuwasun. Chhaynaqa, allin p’unchaykunapi tarikuspaqa Jehová Diosta “gracias” nisun; mana allin p’unchaykuna chayamuwaqtinchistaq Salomonpa nisqanta yuyarisun. Paypa nisqan jina, runakunaqa manan yachakunchischu paqarin allinchus manachus kasun chaytaqa, mayninqa qonqaymi ima mana allinpipas tarikusunman.

6. ¿Imakunapin yanapawanchis sasachakuykunapi tarikusqanchis? (Hebreos 12:​7, 11).

⁶ Chhayna sasachakuykunapi tarikuyqa yanapawasunmi Jehová Diospi astawan confiananchispaq. Jehová Diosqa rikumushanmi ima sasachakuykunapis llakikuykunapis tarikushanchis chayta, llakikuntaqmi noqanchismantaqa. Manaña juj milagrotachu ruwanqa sasachakuyninchiskunata allichananpaq chaypas kallpanta, yachayta, allin yuyayta iman qowasun chaykunata aguantananchispaq (Sal. 23:4). Chaymantapas chhayna sasachakuykunapi tarikuymi yanapawallasuntaq imakunapis allinyananchisraq kashan chayta reparakunanchispaq (leey Hebreos 12:​7, 11). Jobtapas chhayna sasachakuykunapi tarikusqanmi yanaparqan imapichus allinyanan karqan chayta reparakunanpaq. Arí paytaqa imaymana sasachakuykunapi tarikusqanmi yanaparqan juch’uyaykukuq humilde sonqo kananpaq (Job 42:​1-6). Noqanchistapas imapiña tarikusun chaypas Jehová Diosqa yanapawasunpunin, payqa manan jinatachu qhawanqa mana atinanchiskama ñak’arinanchistaqa (Rom. 8:​35-39).

7. ¿Imaraykun nisunman “qatikachasqaña kaspapas atisunmanmi kusisqa kaytaqa” nispa?

⁷ Qatikachasqaña kaspapas atisunmanmi kusisqa kaytaqa. Runakunaqa Diosta servisqanchisraykun qatikachawanchis cheqnikuwanchis ima. Chhaynapi tarikuspaqa manan ninanchischu “Jehová Diosqa manañachá munakuwanchu” nispaqa. Aswanpas chhaynapi tarikusqanchismi rikuchishan Jehová Dios noqanchiswan kashasqanta (Mat. 5:​10-12). Apostolkuna jina allin yuyaywan qhawarisun qatikachasqa kayta chayqa kusisqan kasunchis (Hech. 5:​40-42). Manan chayllapaschu, sasachakuykunapiña tarikuspapas Dios sonqollapuni kasun chayqa, yaqapaschá juj runakunapas chayta rikuspa Jehová Diosta reqsiyta munankuman, jatunchankuman imapaschá (1 Ped. 2:12). Chaypaq juj chhikanta piensasun Josepi. Jehová Diosqa José sasachakuykunapi tarikushaqtinpas chay qhepamanpas imaymanapin bendecirqan. Noqanchispas José jina sasachakuykunata aguantasun chayqa, Jehová Diosqa bendeciwasunmi (Gén. 39:​3, 23).

8. ¿Imata yuyariymi yanapawasunman sasachakuyninchiskunata aguantananchispaq?

⁸ Sasachakuyninchiskunapas llakikuyninchiskunapas tukukullanqan. Jobwan imachus pasarqan chaypin chayqa sut’ita rikukun. Chaymanta rimaspan Bibliapi nin: “Chhaynatan Jehová Diosqa Jobta bendecirqan qallariypi bendecisqanmanta mastaraq”, nispa (Job 42:12). Jehová Diosqa chaytan noqanchiswanpas ruwanqa. Payqa mosoq pachapiqa wiñay kausaytan qowasunchis. Chaypiqa manañan imamantapas llakikusunñachu. Chhaynataq chayqa, ima sasachakuypiña tarikuspapas amapuni Jehová Diosmantaqa t’aqakusunchu (Mat. 24:13).

¿IMAN PASANMAN MANA ALLIN YUYAYWAN SASACHAKUYTA QHAWARIQTINCHIS?

9. ¿Imaraykun nisunman “manachus allin yuyaywan sasachakuyninchiskunata qhawarisunman chayqa aswan sasachakuymanmi churakusunman” nispa?

⁹ Sasachakuyninchiskunata mana allin yuyaywan qhawarisunman chayqa, astawanmi imaymana sasachakuyman jaykusunman. Yaqapaschá mayninqa “Jehová Diosmi sasachakuykunaman churawashan” nispa ima piensasunman. Jobpas chhaynapin tarikurqan, payqa Dios pruebaman churananpaqmi piensarqan. Chaymi payqa “Diosta chaninpaq qhawarichinanmantaqa, pay chaninpaq qhawarikurqan” (Job 32:2). Noemipas chhaynapin tarikullarqantaq. Paypas imaymana llakipi tarikuspan Jehová Diosta tumpallarqantaq (Rut 1:​13, 20, 21). Sichus Jobpas Noemipas chhaynallata piensankuman karqan chayqa, Jehová Diosmantan karunchakapunkuman karqan (Prov. 19:3). Ichaqa Jehová Diosmi paykunataqa yanaparqan chay sasachakuyninkuta llakikuyninkuta allin yuyaywan qhawarinankupaq. Chaymantapas Dios sonqollapuni kasqankuraykun paykunaqa imaymana bendicionta chaskirqanku.

10. ¿Imanispan mayninpi piensasunman sinchi llakipi tarikuspanchis?

¹⁰ Mayninqa manapaschá Jehová Diostachu tumpasun ima llakinchismantapas sasachakuyninchismantapas. Ichaqa yaqapaschá nisunman: “Jehová Diosqa qonqapuwanchá”, nispa. Chhaynata piensaspaqa pisikallpayasunmanmi (Prov. 24:10). Rey Davidpas profeta Habacucpas chhayna llakipi tarikuspan Jehová Dios mana uyarimunanpaq piensarqanku (Sal. 10:1; Hab. 1:2). Chaywanpas paykunaqa mañakushallarqankun Diospa yanapayninta. Jehová Diosqa paykunaq ladollanpipunin kasharqan, noqanchistapas yanapawasunpunin payqa (Sal. 10:17).

11. ¿Iman pasawasunman mana allin yuyaywan sasachakuykunata qhawariqtinchis?

¹¹ Sichus mana allin yuyaywan sasachakuyninchiskunata qhawarisun chayqa, qonqaylla imapas pasaruwaqtinchisqa yaqapaschá “¿imaraykutaq noqatari kaykunari pasawashan?” nispa nisunman (1 Ped. 4:12). Juj chhikanta piensasun Jesuspa discipulonkunapi. Paykunaqa manan entiendeyta atisharqankuchu imaraykus Jesús qatikachasqa kanan karqan chayta (Luc. 18:​33, 34). Jesusqa sut’itapunin willarqan imaynas payqa ñak’arinanpuni karqan chayta. Apóstol Pedron ichaqa nirqan: “Manan chayqa pasanmanchu”, nispa. Jesusqa allintan yacharqan imaynas payqa ñak’arispa wañunan karqan chayta, chhaynapaqpunin Jehová Diospas kachamusqa. Pedron ichaqa mana Dios jinachu chay kutipiqa piensarqan, chaymi Jesusqa payta anyarqan (Mar. 8:​31-33). Jesuspa wañupusqan qhepamanpas discipulonkunaqa manan entiendeyta atisharqankuchu imaraykus chhaynata ñak’arispa wañurqan chayta. Chaywanpas Jesusqa confiashallarqanmi paykunapiqa. Chaymi kausarimpusqan qhepamanqa allinta chayta paykunaman entiendechirqan, willarqanmi imatapunis Diospa simin qelqa chaykunamanta willasharqan chayta (Luc. 24:​25-27, 32, 44-48). Paykunaqa allintachá yuyaymanarqanku Jesuspa chaykuna nisqanpiqa, chaychá paykunataqa yanaparqan qatikachayta aguantanankupaqqa. Noqanchispas qatikachaymanta Bibliaq imachus nisqanpi piensasun chayqa, aguantasunmi ima sasachakuytapas ima llakitapas.

12. ¿Iman pasanman mana Jehová Dios jinachu imatapas qhawariqtinchis?

¹² Sichus mana Jehová Dios jinachu sasachakuykunata qhawarisun chayqa, yaqapaschá imapipas tarikuspa nisunman: “Kaytaqa mana allintan ruwawashanku, manan kaytaqa aguantayta atiymanchu” nispa. Yaqapaschá wakin hermanokunaqa Diospa llaqtanpi ima ruwanatapas mana munasqankuman jinachu chaskispanku otaq imachus ruwanankuta saqespanku phiñakunkuman, “injusticiatan ruwawashanku” ninkuman imapaschá. Chaypaq piensasun Jesuspa juj rijch’anachiy willasqanpi. Paymi rimarqan uvas chajrapi llank’aqkunamanta. Chay llank’aqkunamanta wakinqa pagota chaskisqanku ratun phiñakurqanku. Paykunaqa dueño mana allinta ruwananpaqmi piensarqanku, dueñon ichaqa nirqan: “Amigo, noqaqa manan ima mana allintachu ruwashayki”, nispa (Mat. 20:​10-13). Rikusqanchis jinapas, chay llank’aqkunaqa manan ima injusticiapichu tarikusharqanku, paykunaqa imachus chaskinallankutan chaskirqanku. Chaywanpas paykunaqa pagonkuta masta chaskinankupaqmi piensasharqanku. Noqanchisqa manan munasunmanchu paykuna jina kaytaqa ¿riki? Kunanqa yachasunchis imakunatas ruwasunman sasachakuykunapi tarikuspa allin yuyaywan imatapas ruwananchispaq chayta.

¿IMATAN RUWASUNMAN SASACHAKUYKUNAPI TARIKUSPANCHIS?

13. ¿Iman pasawasunman ima llakipipas ima sasachakuypipas tarikuqtinchis?

¹³ Bibliapiqa sut’itan willashan sasachakuykunamanta ñak’ariykunamantapas. Yaqapaschá pipas chhayna sasachakuypi llakikuypi tarikuqtin leepurqanchis Bibliapi wakin textokunata. Kunanqa noqanchistaq chhayna sasachakuypi llakikuypi tarikushanchis chayqa, manapaschá facilchu kashan Dios jina imatapas qhawariy. Yaqapaschá piensasunman: “Dioschá castigawashan, manachá mañakusqaytapas uyariwanchu”, nispa. ¿Imatan ruwasunman chhaynapi tarikuspa allin yuyaywan sasachakuykunata qhawarinanchispaq?

14. ¿Imatan sasachakuypi tarikuspanchis Jehová Diosmanta mañakusunman? (Filipenses 4:13).

¹⁴ Jehová Diospa yanapayninta mañakusun. Arí, Jehová Diosmanmi llapa sasachakuyninchista llakikuyninchista willakunanchis, willakunanchismi imakunapis yanapawananchista munashanchis chaytapas. Chaymantapas yachayta kallpata iman mañakusunman. Ichaqa Jehová Diosqa manapaschá munasqanchisman jinachu imatapas ruwanqa (Efes. 3:20). Mayninqa yaqapaschá angelkunawan yanapachiwasun, maynintaq hermanonchiskunawan yanapachiwasun (Sal. 34:7). Chaymi atento kashananchis imaynatas Jehová Dios yanapawashanchis chayta reparanapaq. Kayta ama qonqaychu: Ima sasachakuypiña tarikunki chaypas, Jehová Diosqa kallpatan qosunki chaykunata aguantanaykipaq (leey Filipenses 4:13).

15. ¿Imakunatan ruwashanallanchis sasachakuykunapiña tarikuspapas? (Qhaway kay parrafopaq fotota).

¹⁵ Aswan allin ruwaykunata ruwasun. Sasachakuykunapi llakikuykunapi tarikuspaqa manapaschá ñaupaqpi jinachu Jehová Diosta serviyta atisun. Chaywanpas kallpachakunanchismi importante ruwaykunata ruwashanallanchispaq. Chay ruwaypi yuyayninchis kanqa chayqa, manan nishutachu llakikuyninchiskunapi piensasun (Sal. 119:143). Ichaqa, ¿ima importante ruwaykunatan ruwananchis? Sapa p’unchaymi Bibliata leenanchis, chaypitaq yuyaymanananchis, tukuy atisqanchistan Diosmanta willaq lloqsinanchis, juñunakuykunamanpas mana faltakuspan rinanchis; chaymantapas manapunin hermanonchiskunamanta t’aqakunanchischu (Prov. 18:1).

16. ¿Imakunamantan sasachakuypi tarikuspa iskayasunman, ichaqa imata ruwaymi yanapawasunman ama iskayananchispaq? (2 Corintios 10:​4, 5).

¹⁶ Imamantapas iskayaspaqa Bibliata estudiasun. Ima sasachakuypipas llakikuypipas tarikuspaqa, yaqapaschá nisunman: “Ima mana allintapaschá ruwashani, chaypaschá khayna sasachakuykunapi tarikushani”, nispa. Chaymantapas “manapaschá Jehová Diosqa munakuwanñachu” nispa iman piensasunman. Chhayna piensaykunataqa usqhayllan umanchismanta wijch’upunanchis (leey 2 Corintios 10:​4, 5). ¿Imatan chaypaq ruwasunman? Imamantapas iskayaspaqa Bibliata qelqanchiskunata iman allinta estudiananchis, chhaynapin yachasun imaynapunis imapas chayta. Sichus “Jehová Diosqa manapaschá munakuwanñachu” nispa nishanki chayqa, apóstol Pablomanta estudiay. Yachasqanchis jina, payqa imaymana sasachakuykunapin tarikurqan. Chhaynakunapiña tarikuspapas payqa allintan yacharqan imaynas Jehová Diospas Jesuspas paytaqa munakurqanku chayta (2 Cor. 11:​23-27). Chaymantapas sichus Jehová Diospa perdonapusqasuykimanta iskayashanki chayqa, Jehová Dios khuyapayakuq perdonaykuq kasqanmanta textokunata anotakuy (Isa. 43:25). Chaymantataq chay anotakusqayki textokunapi yuyaymanay. Chayta ruwanki chayqa, manañan iskayankichu Jehová Dios perdonapusqasuykimantaqa (Sal. 119:97). Chaymantapas sasachakuykunapi tarikuspaqa, yaqapaschá “Jehová Diosqa manapaschá yanapawanñachu” nispa ima piensallasunmantaq. Chaykuna umanchisman jamuqtinqa, imaraykus Jehová Dios jinallata qhawashan ñak’ariykuna kananta chaymanta rimaq qelqakunatan estudiasunman (Sal. 91:​9-12). Chaymantapas imaynatas wakin hermanonchiskuna chhayna sasachakuykunata atiparqanku chaymanta willaq qelqakunatapas leesunmanmi.a

17. ¿Imaynatan qhawarinanchis sasachakuyninchiskunata?

¹⁷ Wakinninchisqa allillanpaschá kashanchis, manapaschá ima jatun sasachakuypipas tarikunchisraqchu. Allillan kashanchis chayqa, Jehová Diosta “gracias” nisun tukuy chaykunamanta (Ecl. 7:14). Ichaqa sichus ima sasachakuypipas llakikuypipas tarikushanchis chayqa, allin yuyaywan chay sasachakuyninchista qhawarisun, tukuy sonqowantaq Jehová Diospa yanapayninpi confiasun. Kaytan mana jayk’aqpas qonqananchischu: Ima sasachakuypiña tarikusun chaypas, Jehová Diosqa yanapawasunpunin chaykunata aguantananchispaq (1 Cor. 10:13). Ichaqa qallariypi nimusqanchis jina, chhayna sasachakuykunapiqa manan noqallanchischu tarikushanchis, wakin hermanonchiskunapas chhaynapin tarikushanku. Chhaynataq chayqa, ¿imaynatan paykunata yanapasunman? Chaymantan qatimuq yachachikuypi yachasunchis.