Jehová Diospa rimasqanqa junt’akunqapunin

1. Salmos 31:​2-5 textopi nisqan jina, ¿imaraykun Jehová Dios confianapaq jinapuni?

SATANASPA kamachisqan kay pachapiqa runakunaqa paykunapuran llullanakunku engañanakunku ima, chaykunaqa tukuy ladopin rikukun. Chaymi wakin runakunaqa mañana pi runapipas confiankuchu. Wakin empresayoq runakunapas juj empresayoq runakunatan engañanku, televisionpi radiopi willamusqankupas wakinqa manan cheqaqchu. Wakinqa manañan amigonkupipas confiankuñachu. Chhaynaña kay tiempopi kausay kashan chaypas, Jehová Diosqa manan chhaynachu. Payqa cheqaqta rimaq Diosmi, chaymi payqa confianapaq jinapuni (leey Salmos 31:​2-5). Arí, payqa junt’anpunin ima rimasqantapas, manapunin jayk’aqpas llullakunmanchu. ¡May munaymi chhayna kasqanta yachayqa ¿riki?!

2. ¿Imakunamantan kaypi yachasunchis?

² Kaypin yachasunchis imaraykus Jehová Diospa rimasqanpi confiasunman chaymanta, imakunatas kunan ruwashan rimasqan junt’akunanpaq chaytapas. Chaymantapas yachasunmi imakunatas ruwanqa Satanastapas paypa ladonmanta kaqkunatapas chinkachinanpaq chayta. Chaykunata yachaymi yanapawasun ama manchakuspa Jehová Diosmanta runakunaman willamunanchispaq.

¿IMARAYKUN JEHOVÁ DIOSPI CONFIANANCHIS?

3. ¿Imaraykun Jehová Diospi tukuy sonqo confiananchis?

³ Pay kamaqninchis kasqanrayku. Jehová Diosmi janaq pachatapas, kay pachatapas, runakunatapas kamawarqanchis (Gén. 1:1; Sal. 36:9; Apo. 4:11). Payqa runakuna kusisqa tiyakunankupaq jinan kay pachataqa kamarqan. Arí, payqa tukuy imatan allintapuni kamarqan, payqa allintan yachan imayna ruwasqas kashanchis imakunatas necesitanchis chaytapas. Chaymantapas Jehová Diosqa allin yachayniyoq tukuy atiyniyoq iman, chaymi paypiqa tukuy sonqo confiananchis.

4. ¿Imaynapin yachanchis Jehová Dios munakuwasqanchista?

⁴ Pay munakuwasqanchisrayku. Jehová Diosqa munakuspan runakunata kamawarqanchis, payqa munarqanmi noqanchispas kusisqa kausakunanchista. Chaymantapas Jehová Diosqa munakuwasqanchisraykun payman rijch’akuqta kamawarqanchis (Gén. 1:26). Manan chayllapaschu, payqa noqallanchismanta imatapas ajllakunanchispaq jinan kamawarqanchis. Chaymantapas kay jallp’a pachatan qowarqanchis chaypi sumaqta kusisqa kausakunanchispaq (Gén. 1:28; 2:15). Qallariypiqa Jehová Diosqa Adanta Evatawanmi nirqan kay pachata juj sumaq paraisoman tukuchinankupaq, paykunamanqa tukuy imaymanatan qorqan kusisqa kausanankupaq. Chaykunapin sut’ita reparanchis Jehová Dios runakunata mayta munakuwasqanchista (Sal. 103:17).

5. a) Adanwan Evawan juchallikurqankuña chaypas, ¿imatan Jehová Dios ruwarqan munaynin junt’akunanpaq? b) ¿Jehová Diospa ima rimasqankunan junt’akurqan? (Qhaway “Jehová Diosqa junt’anpunin imachus rimasqantaqa” nisqa willakuyta).

⁵ Llapa rimasqanta junt’asqanrayku. Jehová Diosqa manan yanqapaqchu kay pachataqa kamarqan, aswanpas chaypi runakuna tiyananchispaqmi kamarqan (Isa. 45:​18, 19). Ichaqa, ¿iman pasarqan? Yachasqanchis jinapas, Adanwan Evawanmi Jehová Dios contra jatarirqanku, chaymi tiempowanqa wañupurqanku. Ichaqa, ¿chay pasasqanraykuchu nisunman “Jehová Diospa rimasqanqa manañachá junt’akunqachu” nispa? Manapunin. Jehová Diosqa imachus rimasqantaqa junt’anpunin, manan paypa munaynin junt’akunantaqa pipas jark’ayta atinmanchu (Isa. 46:​10, 11). Chaykunaña ñaupaqpi pasarqan chaypas, ¿imatan Jehová Dios ruwanman karqan imachus rimasqan junt’akunanpaq? Nimusqanchis jina, Jehová Diosqa allin sonqoyoq runakuna kay pachapi wiñaypaq tiyanankutan munarqan, chaymi dejallarqan Adanwan Evawan wawakunayoq kanankuta. Chay qhepamanpas wawan Jesustan kachamurqan runakunata juchamanta wañuymantawan librawananchispaq (Juan 3:16).

¿IMATAN JEHOVÁ DIOS RUWASHANMAN MUNAYNIN JUNT’AKUNANPAQ?

6. ¿Imatan Jehová Dios Saqra Satanasmanta Bibliapi willachirqan?

⁶ ¿Pin Adanta Evatawan engañarqan Jehová Dios contra churakunankupaq? “Saqra Satanasmi” (Apo. 12:9; Gén. 3:​4, 5; Juan 8:44).a Chaymi Jehová Diosqa Bibliapi willachirqan imaynas Satanasqa wiñaypaq chinkachisqa kanan karqan chayta (Gén. 3:15). Chaymantapas willachirqanmi imaynas askha runakuna Satanasta qatikunanku karqan chayta. Ichaqa wakin runakunaqa Jehová Diostan tukuy sonqowan servinanku karqan.

7. ¿Pikunan Satanasta qatikushanku, ichaqa iman paykunawan pasanqa?

⁷ ¿Pikunan kanku Satanasta qatikuqkuna? Paykunaqa Jehová Dios contra churakuq angelkuna, Jehová Diosta mana kasukuq runakuna iman kanku. Paykunaqa Satanás jinan manapuni munankuchu Jehová Diospa munaynin junt’akunanta, chaymi imaymanata Dios contra ruwashanku. Ichaqa paykunapas pisi tiempollamantan chinkachisqa kanqaku. Jehová Diosqa ñan churanña juj p’unchayta Satanasta paypa partenmanta kaqkunatawan chinkachinanpaq (Dan. 2:44; Rom. 16:20).

8. ¿Imatan Jesús ruwarqan 1914 watapi? (Qhaway kay parrafopaq fotokunata).

⁸ ¿Imaraykun nisunman “Jehová Diosqa chinkachinqapunin Satanastapas payta qatikuqkunatapas” nispa? Chaypaq yachasun imatas ruwarqan 1914 watapi chayta, chay watapin Jehová Diosqa wawan Jesusta rey kananpaq churarqan. Chay watallapitaqmi Jesusqa janaq pachapi Satanaswan supayninkunapiwan maqanakurqan. Chay maqanakuypiqa Jesusmi atiparqan, jinan Satanasta supayninkunatawan kay pachaman wijch’uykamurqan (Apo. 12:​7-9). Chay watamantapachan Satanasqa imaymanamanta runakunata engañashan, chay watamantapachan mana allin kausaypas astawanraq yapakurqan. Chayraykun Bibliapipas nin: “¡Kusikuychis janaq pachapi kaqkuna! Ichaqa, ¡imaraqchá kanqa jallp’a pachamanta, lamar-qochamantapas! Saqran sinchi phiñasqa qankunaman uraykamushan, yachanmi payqa tiempon pisillaña kasqanta”, nispa (Apo. 12:12). Ichaqa manan chayllapichu imapas tukunqa. Pisi tiempollamantan Jesusqa Satanasta paypa partenmanta kaqkunatawan wiñaypaq chinkachipunqa (Apo. 6:2). Chayta ruwaspan Jehová Diospa sutinta ch’uyanchanqa, chhaynapin llapa runakuna yachanqaku Jehová Dios cheqaq Dios kasqanta, cheqaqllata rimasqantapas (Sal. 45:​4-6; Ezeq. 38:23).

Primera Guerra Mundial: U.S. National Archives photo; bomba: USAF photo; pandemia: blvdone/stock.adobe.com; disturbios: inhauscreative/E+ via Getty Images

JEHOVÁ DIOSQA PAY SONQO RUNAKUNATAN LLAQTANMAN PUSAMUSHAN

9. ¿Imatan Jehová Dios kunan ruwashan?

⁹ ¿Imatan Jehová Dios kunan ruwashanman? Janaq pachapaq kaqkunata kay pachapaq kaqkunata iman juñushan (Efes. 1:10). Ichaqa, ¿pikunataq kanku janaq pachapaq kaqkunari? Paykunaqa janaq pachapi Jesuswan kuska kamachimunankupaq ajllasqa iñiqmasinchiskunan kanku. Kay pachapaq kaqkunataq kanku, juj sumaq paraisopi tiyanankupaq ajllasqa runakuna. Janaq pachapaq ajllasqa kaqkunapas kay pachapaq ajllasqa kaqkunapas, tukuy atisqankutan ruwashanku Jehová Diosmanta llapa runakunaman willamunankupaq. Chayta ruwaspan rikuchishanku Satanás llulla kasqanta.

10. ¿Imaynatan Jehová Dios allin sonqoyoq runakunata llaqtanman pusamushan? (Apocalipsis 14:​6, 7).

¹⁰ Chaymantapas Jehová Diosqa, predicación aparikusqanwanmi pachantinpi sumaq sonqoyoq runakunata llaqtanman pusamushan (leey Apocalipsis 14:​6, 7). Chay llank’aypin yanapakushanku Jehová Diospa testigonkuna, angelkunapas yanapakushankun; chaymi askha runakuna Diospa llaqtanman jaykumushanku. Chay llank’ay aparisqankuwanmi paykunaqa sut’ita rikuchishanku imaynas pantasqa religionkunaqa mana cheqaqtachu Jehová Diosmanta yachachinku chayta (Apo. 18:​2, 4). Ichaqa chay pantasqa religionkunaqa manan wiñaypaqchu runakunataqa engañanqaku, paykunaqa pisi tiempollamantan ch’usaqyachisqa kanqaku. Jehová Diosta adoraqkunan ichaqa wiñaypaq sutinta jatunchanqaku (Apo. 17:16).

11. ¿Imakunata rikuspan runakuna sut’ita reparanku noqanchisqa Diospa llaqtanpuni kasqanchista?

¹¹ Nimusqanchis jina, Jehová Diosqa imaymana clase runakunatan llaqtanman pusamushan (Apo. 7:​9, 10). Paykunamanta wakinqa Diosmanta willasqanchista uyarispan repararqanku noqanchisqa Diospa llaqtanpuni kasqanchista, chaymi kunanqa noqanchiswan kuska Jehová Diosta servishanku (Mar. 13:10). Tiempoq pasasqanman jinan runakunaqa allinta repararqanku, pikunas Jehová Diosta munayninman jina servinku chayta, pikunataqsi mana chaytapas. Chaymanta rimaspan Profeta Malaquías nirqan: “Qankunan wajmanta reparankichis imaynas chanin runa, imaynas millay runa chayta, imaynas Diosta mana serviq runa chaytapas”, nispa (Mal. 3:18). Arí, wakin runakunaqa Diospa munayninman jina kausasqanchista rikuspa, paymanta willasqanchista rikuspa iman sut’ita reparashanku noqanchisqa Jehová Diosta serviqkunapuni kasqanchista.

12. ¿Imata ruwaspan yanapakushanchis Jehová Diospa munaynin junt’akunanpaq?

¹² Diosmanta jamuq “allin willakuykunata” willaspaqa, Jesuspa kamachisqantan kasukushanchis. Chaymantapas chayta ruwaspan yanapakushanchis Bibliapi willasqan profeciakuna junt’akunanpaq (Mat. 24:14; 28:​18-20). Chaymantapas chay llank’ayta aparisqanchisraykun askha runakuna Jesusta qatikushanku, Jehová Diostapas munasqanman jinan servishanku. Chaymantapas chay llank’aypi yanapakuspaqa Jehová Diospa munaynin junt’akunanpaqmi yanapakushallanchistaq. ¡May munaymi chay llank’aypi yanapakuyqa ¿riki?!

JEHOVÁ DIOSPI CONFIASUN

13. ¿Pikunatan Satanás Jehová Diosmanta t’aqayta munashan?

¹³ Satanasqa sinchi phiñasqan kashan. ¿Imarayku? Payqa yachanmi pisi tiempollamanta chinkachisqa kananta (Apo. 12:​12, 13). Chaymi imaymanata ruwashan janaq pachapaq ajllasqa iñiqmasinchiskunata Jehová Diosmanta t’aqananpaq. Chaymantapas Diospa kamachikuyninkunata kasukusqankurayku, Jesuspa kamachisqanman jina allin willakuykunata lliu runakunaman willasqankurayku iman paykunataqa urmachiytapuni munashan (Apo. 12:17; 14:12). Ichaqa manan paykunallatachu Satanasqa urmachiyta munashan, chay iñiqkunata yanapaqkunatapas urmachiytan munashan.

14. ¿Iman pasanqa Satanás Diospa llaqtanman phawaykuqtin? (Qhaway tapanpi kaq dibujota).

¹⁴ Ñaupaqpi rimamusqanchis jina, pisi tiempollamantan llapa pantasqa religionkuna chinkachisqa kanqaku, chay qhepamanmi Satanasqa yanapaqninkunapiwan Diospa llaqtanman phawaykunqaku. Chaywanmi qallarinqa Armagedón guerra (Apo. 16:​13, 14, 16). Chay guerrapin Jesusqa angelninkunawan kuska Diosta serviqkunata salvanqa, Satanaspa mana allin ruwasqankunatataq ch’usaqman tukuchipunqa (Apo. 19:​19-21). Millay runakunatapas llulla runakunatapas wiñaypaqmi chinkachipunqa (Apo. 21:8). Chay qhepamanmi lliu runa yachanqa Jehová Diosqa chanin Dios kasqanta, cheqaqta rimaq kasqanta ima.

15. ¿Imaraykun Jehová Diospi confiananchis? (Isaías 65:​16, 17; qhaway kay parrafopaq dibujota).

¹⁵ Kay pacha runakunaqa t’aqanasqan kashanku, Jehová Diosta serviqkunan ichaqa juj nisqalla kashanchis. Chaymantapas Jehová Diosqa yanapawashanchismi kay jatun llank’ay aparisqanchispiqa, chaymi askha runakuna Diospa llaqtanman jaykumushanku (leey Isaías 65:​16, 17). Rikusqanchis jina Jehová Diosqa confianapaq jinapunin, payqa junt’anpunin imachus rimasqantaqa. Chaymantapas payqa imapiña tarikusun chaypas yanapawasunpunin. Chaymanta rimaspan apóstol Pablo Romanos 8:​38, 39 textopi nirqan: “Noqaqa allintapunin yachani: Manan ni wañuypas, ni kausaypas, ni angelkunapas, ni autoridadkunapas, ni kay tiempopi ima kaqpas, ni jamuq tiempopi ima kaqpas, ni atiykunapas, ni altopi kaqpas, ni ukhupi kaqpas, ni ima kamasqapas Señorninchis Cristo Jesuspi Diospa munakuyninmantaqa t’aqawasunchu” nispa.

16. ¿Imaraykun Jehová Diospi confiananchis?

¹⁶ Kaypi yachamusqanchis jina, ¿imaraykun Jehová Diospi confiananchis? Pay kamaqninchis kasqanrayku, munakuwasqanchisrayku, llapa rimasqanta junt’asqanrayku iman. Chaymantapas Jehová Diosqa allin sonqoyoq runakunatan llaqtanman pusamushan (Isa. 60:22; Zac. 8:23). Arí, Jehová Diosqa imaymanatan ruwashan munaynin junt’akunanpaq. Chaymantapas pisi tiempollamantan Satanasta yanapaqninkunatawan wiñaypaq chinkachipunqa. Chhaynataq chayqa, David jina nisun: “Jatunchasqa kachun Israelpa Diosnin Jehová Diosqa, Jatun sutinpas wiñay-wiñaypaq jatunchasqa kachun, k’anchayninpas jatun kayninpas llapa kay pachata k’anchaykuchun”, nispa (Sal. 72:​18, 19).