“Wawakunaqa Jehová Diospa herencia qosqanmi kanku”

¿IMAN umaykiman jamusunki herenciamanta rimaqta uyariqtiyki? Yaqapaschá nishanki: “Wakinmanqa familiankun juj chajrata, juj wasita, otaq ima valorniyoq cosastapas herenciata jina saqenku”, nispa. Arí chhaynapunin chayqa. Pipas juj herenciata saqewasunman chayqa, allintan chayta cuidasunman ¿riki?

Chhayna munay herenciata jinan Jehová Diospas tayta-mamakunaman wawakunata qon. Chayraykun Bibliapipas nin: “Wawakunaqa Jehová Diospa herencia qosqanmi kanku”, nispa (Sal. 127:3). Diosta serviq tayta-mamakunaqa Diospa qosqan munay herenciata jinan wawankuta qhawarinanku. Tukuy atisqankutan ruwananku wawankuman ama imatapas faltachinankupaq, allinta cuidanankupaq, Diosmantapas yachachinankupaq.

Wakin tayta-mamakunaqa manan wawankutaqa Diospa regalonta jinachu qhawarinku, chayqa llakikunapaqmi (Isa. 49:15; 2 Tim. 3:​1-3). Wakinmi ichaqa anchata wawankuta munakunku. Chhaynaña kaqtinpas manan paykunapaqqa facilchu wawankuta cuidayqa, imaymana sasachakuykuna kasqanrayku. Ichaqa, ¿mayqenkunan chay sasachakuykuna kanman? ¿Wawankuta imaynata uywanankutan Jehová Dios munan? ¿Imatan tayta-mamakuna ruwankuman wawankuta allinta uywanankupaq? Chaykunamantan kunan yachasun.

¿IMA SASACHAKUYKUNAPIN TARIKUNKU?

• Askha wawayoq kanankupaqmi mat’ipayanku. Wakin ladokunapiqa askha wawayoq runakunataqa allinpaqmi qhawarinku. Chaymi wakinqa wawankuta manaña cuidayta atishaspapas familiankuq mat’ipayasqan kaspa otaq vecinonkuq mat’ipayasqan kaspa askha wawakunata yapakunku.

• Machuyapunankumanta payayapunankumantan llakikunku. Wakin ladokunapiqa wajchallan kanku, manan mijuy kanchu, imaymana onqoykunan kan, manan hospitalkunapas kanchu. Chaywanmi askha wawakuna wañunku. Chaymi wakin runakunaqa askha wawayoq kanku, chhaynapi jujllapas iskayllapas kausananpaq. Wakintaq “machuyapuqtiy payayapuqtiy cuidawananpaq” nispa piensaspa askha wawayoq kallankutaq. Chayqa astawanqa pasan kuraq runakunata gobiernoq mana apoyasqan llaqtakunapin.

• Cuidakunankupaq mana ima pastillaspas kanchu. Wakin ladokunapiqa cuidakuytan munanku ama askha wawayoq kanankupaq, ichaqa sasa tariymi cuidakunapaq pastillaskunapas inyeccionkunapas. Wakin ladokunapin ichaqa kan, ichaqa manan allinchu chay vendesqanku pastillaskunapas inyeccionkunapas, chaymi mana chaykunawan cuidakuyta munankuchu. Wakin ladokunapin ichaqa chaykunaqa nishuta valen.a

¿WAWANKUTA IMAYNA UYWANANKUTAN JEHOVÁ DIOS MUNAN?

Tukuy ima necesitasqankutan wawaykichisman qonaykichis. Jehová Diosmi tayta-mamakunata kamachin wawankuman mijunankuta, p’achankuta, wasita ima qonankupaq. Chaymantapas allinta educanankutan munan. Diosta serviq tayta-mamakunaqa wawankuwan kuskan tiyananku yuyayta jap’inankukama, manataqmi estudiana wasikunamanqa otaq internadomanqa churanankuchu chaypi tiyanankupaqqa. Chaymantapas llank’ayta iman yachachinanku, chhaynapi vida pasayta yachanankupaq. Manan chayllachu, tayta-mamakunaqa wawankuwanmi tiempota pasarinanku, chhaynapi wawanku munasqa kusisqa kanankupaq. Chaypaqqa manan qhapaqraqchu kana. Diospa wawanta uywaq runakunapas manan qhapaqchu karqanku, ichaqa allintan Jesustaqa uywarqanku (Mat. 13:​55, 56; Luc. 2:24).

Bibliapin nin: “Pipas cuidanan kaqkunaman mana qonchu imachus necesitasqankuta, astawanqa wasinpi kaqkunaman mana qonchu chayqa, iñiytan negashan, mana iñiyniyoq runamantapas aswan mana allinraqmi kapun”, nispa (1 Tim. 5:8).

Taytakuna mamakuna, kuraq kapuqtiykichisqa yanapanatapaschá necesitankichis. Chaytaqa allintan Jehová Diosqa yachan. Chhayna kaqtinqa wawaykikunan qhawarisunkiku, chaytan Bibliapi nin (Éx. 20:12; 1 Tim. 5:4). Ichaqa manan imaynatas wawaykichis machuyapuqtiykichis cuidasunkichis chayllapiñachu piensanaykichis. Aswanpas imaynatas wawaykichista yanapashallawaqchis chaypin mastaqa piensarinaykichis (2 Cor. 12:14).

Jehová Diosmantan yachachinaykichis. Diosta serviq tayta-mamakunaqa yachachinankun wawankuta Jehová Dios munakuyta payta serviyta ima. Chay ruwaytan Jehová Diosqa ancha allinpaq qhawarin (Deut. 6:​6, 7).

Bibliapin nin: “Sumaqta uywaychis Jehová Diospa nisqanman jina wanachispa yachachispa ima”, nispa (Efes. 6:4).

JEHOVÁ DIOSPA MUNASQANMAN JINA WAWAYKICHISTA UYWAYCHIS

Allinta piensaychis jayk’a wawayoqsi kankichis chaypi. Wawakunayoq kayta munashankichis chayqa ñaupaqta tapukuychis: “¿Aypawasunchu qolqenchis llapankuman mijuchinanchispaq, p’achachinanchispaq, educananchispaqpas?”, nispa. Mana aypasunkichischu chayqa, allinta qhawariychis jayk’a wawayoqsi kankichis chayta. Chaymantapas yuyariychis: Wawaykichistaqa sapankatan Diospa munasqanman jina uywanaykichis kanqa. Ichaqa mayninqa manan imapas munasqanchisman jinapunichu lloqsin, chaytapas Jehová Diosqa allintan yachan, entiendewanchistaqmi (Ecl. 9:11). Chaywanpas sichus tukuy atisqaykichista kallpachakunkichis allin tayta allin mama kanaykichispaq chayqa Jehová Diosqa yanapasunkichispunin.

Bibliapin nin: “Allin llank’aqpa yuyaykusqankunaqa allinpipunin tukunqa, usqhaylla imatapas ruwayta munaqmi ichaqa wajchayapunqa”, nispa (Prov. 21:5).

“Pipas juj torreta sayarichiyta munaqqa, ¿manachu tiyaykuspa ñaupaqtaraq qolqenta tanteakun torreta tukunanpaq aypanqachus manachus chayta?”, nispa (Luc. 14:28).

Jehová Dios serviyta ñaupaqman churaychis. Jehová Diosta tukuy yuyaywan serviychis. Wawakunayoqña kashankichis chayqa, yanapaychis Jehová Diosta munakunankupaq. Chaymantapas yachachiychis juñunakuykunata makilla uyarikunankupaq. Sapa semana familiantin Diosta adoraychis, predicayta ima yachachiychis. Chaytaqa qankuna kikiykichismi ruwanaykichis, manan kuraq wawaykichischu ni familiaykichischu ruwanan. Chaykunata ruwayqa manapaschá facilchu kanqa, ichaqa chayta ruwaspaqa kusisqan kankichis, wawaykichiskunapas kusisqan kanqaku.

Bibliapin nin: “Noqaqa wawaykuna cheqaq kaqpi allinta purishasqankuta yachaspaymi imamantapas astawanqa kusikuni”, nispa (3 Juan 4).b

Jehová Diospi confiaychis. Wakinniykichisqa wawayoq kaytapaschá munashankichis, wakinniykichisqa yaqapaschá wawayoqña kashankichis. Wawayoqña mana wawayoqña kankichis chaypas, Jehová Diospa munasqanman jina imatapas ruwaychis, ama runakunaq piensasqanman jinachu, nitaq costumbrekunaman jinapaschu.

Kayta yuyariy: Wawayoqña mana wawayoqña kanki chaypas, Jehová Diosqa manan jayk’aqpas saqerparisunkichu, machuyapunkiña payayapunkiña chaypas, payqa cuidasunkipunin. Chhaynaqa ama niychu: “Wawayta allinta estudiachisaq, chhaynapi machuyapuqtiy payayapuqtiy cuidawananpaq”, nispaqa. Machuyapunkichisña payayapunkichisña chaypas manan sapaykichischu kankichis, Jehová Dios kikinmi cuidasunkichis (Jos. 23:14).

Bibliapin nin: “Tukuy sonqoykiwan Jehová Diospi confiay, amataq qan kikiykiq yachasqallaykimanchu jap’ipakuy. Tukuy ima ruwasqaykipi payta yuyariy, paymi allin kaq ñanta reqsichisunki”, nispa (Prov. 3:​5, 6).

“Waynan karqani, kunantaq machuña kapuni, ichaqa manan jayk’aqpas rikurqanichu chanin runata qonqasqataqa, manan rikurqanichu wawankuna mijunata mañapakushaqtapas”, nispa (Sal. 37:25).

“Aswanpas Diospa gobiernonta chanin kaynintawan ñaupaqtaqa maskhaychis, jinan payqa tukuy chaykunata qosunkichis”, nispa (Mat. 6:33).

Tayta-mamakuna, wawaykichisqa Diospa qosqan munay regalokunan kanku. Chhayna munay regalota jina munay herenciata jinan paykunataqa qhawarinaykichis. Llapa ima necesitasqankutataqmi qonaykichis, yanapanaykichismi Dioswan allinpi kanankupaqpas. Chaymantapas paypa nisqanman jinan allinta piensarinaykichis jayk’a wawayoqsi kankichis chaypi. Chaytaqa manan costumbreman jinachu, nitaq runakunaq piensasqanman jinachu ruwana. Chayta ruwaspan Diospa qosqan herencia valorasqaykichista rikuchinkichis.